Mga Ideya alang sa Pag-awhag og Personal ug Pamilya nga Pagtuon

Ania ang pipila ka mga ideya nga makatabang nimo sa pag-awhag sa mga sakop sa klase nga magtuon sa pulong sa Dios diha sa panimalay, sa tagsa-tagsa ug isip mga pamilya. Magmahimong sensitibo sa kamatuoran nga dili tanang sakop sa klase ang makatuon sa mga kasulatan kauban sa ilang mga pamilya (pananglitan, ang ubang mga miyembro nagpuyo nga nag-inusara o anaa sa pamilya nga dili tanan miyembro sa simbahan).

• Dapita ang mga sakop sa klase sa pagpakigbahin sa ilang mga kasinatian sa pagtuon sa mga kasulatan diha sa panimalay. Sama pananglit, mahimo nimo silang hangyoon sa pagpaambit og usa ka bersikulo nga nakapalawom sa ilang gugma kang Jesukristo.

• Hangyoa ang mga sakop sa klase sa paghatag og mga ehemplo kon unsay ilang gibuhat sa paghimo sa personal o pamilya nga pagtuon sa kasulatan nga mas makahuluganon. (Ang ubang mga ideya makita ubos sa “Mga Ideya sa Pagpalambo sa Inyong Personal nga Pagtuon sa Kasulatan” ug “Mga Ideya sa Pagpalambo sa Inyong Pamilya nga Pagtuon sa Kasulatan” diha sa Dali, Sunod Kanako—Alang sa mga Indibidwal ug mga Pamilya.)

• Dapita ang mga sakop sa klase sa pagpaambit kon giunsa nila pagsunod ang mga impresyon nga ilang nadawat atol sa ilang personal ug pamilya nga pagtuon sa kasulatan.

• Paggahin og pipila ka minuto nga magpakita sa mga sakop sa klase sa pipila ka mga kapanguhaan nga gihatag sa Simbahan aron makatabang sa mga miyembro sa pagtuon sa ebanghelyo, sama sa mga tabang sa pagtuon sa kasulatan nga makita sa scriptures.ChurchofJesusChrist.org; “Mga Istorya sa Kasulatan” nga makita diha sa children.ChurchofJesusChrist.org; naka-focus sa kabatan-onan nga sulod [content] diha sa youth.ChurchofJesusChrist.org; mga manwal sa seminary ug institute; ug mga video, mga audio recording, ug mga imahe nga makita sa MediaLibrary.ChurchofJesusChrist.org. Daghan niini makita usab sa Gospel Library nga app.

• Paggahin og pipila ka minuto nga magpasabut kon unsaon paggamit sa Gospel Library nga app sa pagtuon sa mga kasulatan, lakip na kon unsaon pagmarka sa mga bersikulo ug pagrekord sa mga impresyon.

• Dapita ang usa o dugang pa nga mga sakop sa klase sa pagpakigbahin kon giunsa nila pagtudlo ang piho nga baruganan sa ebanghelyo diha sa ilang mga pamilya.