Stap Yusum Kam Folem Mi—Blong Sandei Skul

Stap Rere blong Tij long Sandei Skul

Stadi blong wanwan man, woman, mo famli long hom i mas stap olsem senta blong stap lanem gospel. Hemia i tru blong yu, mo blong olgeta we yu stap tijim olgeta. Taem yu stap rere blong tij, stat wetem eksperiens blong yuwan wetem ol skripja. Fasin blong yu blong rere we i impoten moa, bae i hapen taem yu kam long Kraes, yu luklukgud insaed long ol skripja mo taem yu stap lukaotem insperesen we i kam long Tabu Spirit.

Kam Folem Mi—Blong Wanwan Man, Woman mo Famli i wan impoten pat blong stadi blong yuwan, mo wok blong rere blong tij. Bae i helpem yu kasem wan moa dip andastaning abaot ol doktrin prinsipol we oli stap long ol skripja. Bae i mekem tu se yu save kasem insperesen mo invaetem ol memba blong klas blong yusum Kam Folem Mi—Blong Wanwan Man, Woman mo Famli blong sapotem moa skripja stadi blong olgetawan mo wetem famli (blong kasem help blong mekem hemia, luk long “Sam Aedia blong Leftemap Tingting blong Gat Stadi blong Yuwan mo Famli Stadi” we i stap insaed long buk ia). Taem yu stap mekem olsem, gat tingting long olgeta memba blong klas we situesen blong famli i no save sapotem wan famli skripja stadi taem we i tekem ples evri dei, mo tu, oli no save gat famli haos naet oltaem

Long taem we yu stap rere, bae yu kasem ol tingting mo ol filing abaot ol pipol we yu stap tij, olsem wanem ol prinsipol insaed long ol skripja bae i bildimap fet blong olgeta long Papa long Heven mo Jisas Kraes, mo olsem wanem yu save givim insperesen long olgeta blong oli faenemaot ol prinsipol ia taem oli stap stadi long ol skripja olgetawan.

Sam Aedia blong Tij

Taem yu stap rere blong tij, yu save kasem moa insperesen taem yu lukluk tru long ol tijing aotlaen insaed long buk ia. Yu no tekem se ol aedia ia oli wan instraksen we yu mas folem wanwan step blong hem, be oli sam tingting nomo blong mekem yu gat insperesen. Yu save ol memba blong klas blong yu, mo bae yu kam blong save olgeta gud moa taem yufala i stap lanem samting tugeta insaed long klas. Lod i save olgeta tu, mo bambae Hem i givim insperesen long yufala wetem ol bes wei blong helpem ol memba blong klas blong kam antap long fasin blong lanem gospel we oli stap mekem long hom blong olgeta.

Plante nara risos oli stap blong yu yusum taem yu stap rere, mo ol aedia ia oli stap long Kam Folem Mi—Blong Wanwan Man, Woman mo Famli mo ol magasin blong Jos. Blong gat moa infomesen abaot risos ia mo ol nara risos, luk long seksen we oli singaotem “Sam Moa Risos” insaed long lesenbuk ia.

Sam Samting blong Kipim long Maen

• Olsem wan tija, yu gat wan impoten responsabiliti blong sapotem, leftemap tingting mo bildimap ol memba antap long wok blong olgeta blong stap lanem gospel olgetawan mo wetem famli. Nomata se sam long ol memba blong klas oli no stap stadi long gospel long hom evri taem, yu save mekem samting i defren taem yu stap leftemap tingting mo stap helpem olgeta blong mekem hom blong olgeta i kam senta blong lanem gospel.

• Jenis insaed long laef blong ol memba blong klas, i go long gospel blong Jisas Kraes bae i kam dip moa taem oli kam blong andastanem mo praktisim tru doktrin. Leftemap tingting blong olgeta blong raetemdaon mo tekem aksen folem ol filing we oli bin kasem long Tabu Spirit.

• Tijing i moa bitim blong stap givim wan toktok mo talem wanem blong mekem, be i moa bitim blong jes stap lidim wan toktok insaed long klas. Pat blong rol blong yu i blong leftemap tingting blong tekpat long wan wei we i leftemap man mo toktok i stanap long ol skripja. Yu save serem ol tingting we oli kam long insperesen olsem we yu bin kasem taem yu stap stadi long olgeta skripja.

• Tingbaot se plante long ol memba blong klas oli gat ol eksperiens we i gat mining taem oli stap stadi long ol skripja long hom. Yu save sapotem wok blong olgeta blong stap lanem gospel taem yu givim olgeta plante janis blong serem wanem we oli stap lanem long hom, mo olsem wanem i stap jenisim mo lidim laef blong olgeta.

• Papa long Heven i wantem yu blong gat sakses olsem wan tija. Hem i givim yu plante risos blong helpem yu, mo wan hem i tija kaonsel miting. Long ol miting ia, yu save toktok wetem ol nara tija abaot ol jalenj we yu stap fesem. Mo tu, yu save toktok raon mo praktisim ol prinsipol blong stap tij olsem Kraes i bin tij.

• Sam pipol oli lan moa gud taem oli gat ol janis blong tij. Wanwan taem, tingting blong givim taem long ol memba blong klas, mo ol yut tu, blong oli tijim wan pat blong lesen. Yu mekem desisen ia folem ol nid blong ol memba blong klas mo sapos oli naf blong save tij. Sapos yu invaetem wan memba blong klas blong tij, tekem taem blong helpem hem blong hem i rere fastaem, mo yusum ol aedia we oli stap long buk ia mo insaed long Kam Folem Mi—Blong Wanwan Man, Woman mo Famli. Tingbaot se, olsem tija we oli givim koling ia long yu, yu nao yu responsibol long wanem oli tijim insaed long klas.

• Buk ia, insaed long hem i gat ol tijing aotlaen blong evri wik blong yia. Long ol Sandei ia we i no gat Sandei Skul, ol famli oli gohed blong ridim Doktrin mo Ol Kavenan long hom folem taemtebol we i stap long aotlaen insaed long Kam Folem Mi—Blong Wanwan Man, Woman, mo Famli. Yu save jusum blong skipim ol lesen we oli foldaon long wan wik we oli no holem Sandei Skul, o yu save tijim fulap lesen long wan klas ia nomo.