Sam Moa Risos

Yufala i save faenem ol risos ia long Gospel Library ap mo long ChurchofJesusChrist.org/study?lang=bis.

Kam Folem Mi—Blong Wanwan Man, Woman mo Famli

Yu save jenisim eni aktiviti insaed long risos ia blong yusum long Sandei Skul klas blong yu. Sapos ol memba blong klas oli bin yusum olgeta aktiviti ia long skripja stadi blong olgetawan, leftemap tingting blong olgeta blong serem eksperiens blong olgeta mo ol tingting blong olgeta.

Hymns mo Children’s Songbook mo Singsing Tabu mo Singsing blong Ol Pikinini

Tabu miusik i save invaetem Spirit mo i save tijim doktrin long wan gudfala wei. Angap long buk ia we oli printim, olsem Hymns mo Children’s Songbook, mo Tabu Singsing mo Singsing blong Ol Pikinini, yu save faenem plante hym mo singsing blong ol pikinini we oli rekodem long music.ChurchofJesusChrist.org mo insaed long ol Ap ia, Sacred Music mo Gospel Media.

Ol Lesenbuk blong Seminari mo Institiut

Ol lesenbuk blong seminari mo institiut oli givim wan histri bakgraon mo sam tingting long doktrin long saed blong olgeta prinsipol we oli stap long ol skripja. Oli givim insperesen tu long sam tingting blong tij long ol klas blong Sandei Skul.

Ol Magasin blong Jos

Ol magasin ia, New Era, Ensign mo Liahona, insaed long olgeta i gat ol atikol mo ol nara samting we i save kam sapotem olgeta prinsipol ia we yu stap tijim aot long Doktrin mo Ol Kavenan.

Gospel Topik

Insaed long Gospel Topics (topics.ChurchofJesusChrist.org) yu save faenem sam besik infomesen abaot ol defdefren topik blong gospel, wetem ol link we i go long sam risos we oli save help, olsem ol mesej blong jeneral konfrens, ol atikol, ol skripja, mo ol vidio. Mo tu, yu save faenem Gospel Topics Essays, we oli givim wan dip ansa long saed blong doktrin mo histri kwestin

man we i stap stadi long ol buk blong Jos

Prijim Gospel blong Mi

Gaed ia, blong ol misinari, i givim wan bigfala lukluk long saed blong stamba prinsipol blong gospel.

Blong Ol Yut Oli Kam Strong

Buk ia i givim aotlaen blong ol standet blong Jos blong helpem ol yut mo ol narawan blong kam ol fetful disaepol blong Jisas Kraes. Tingting blong lukluk buklet ia plante taem, speseli sapos yu stap tijim olgeta yut.

Ol Vidio mo Ol Art

Ol artwok, ol vidio, mo ol nara media oli save helpem olgeta we yu stap tijim blong gat wan pikja long doktrin mo ol stori we oli stap go wetem ol skripja. Go luk Gospel Media laebri long ChurchofJesusChrist.org blong luk tru long ol grup blong media risos blong Jos. Ol risos ia oli stap tu long Gospel Media Ap, mo plante pikja oli stap tu insaed long Gospel Art Buk.

Revelations in Context

Revelations in Context: The Stories behind the Sections of the Doctrine and Covenants i wan grup blong samfala tingting we oli raetem abaot histri we i raonem ol revelesen we oli stap insaed long Doktrin mo Ol Kavenan. Wanem oli eksplenem insaed long risos ia, i save helpem yu blong andastanem gud moa wanem we ol toktok blong Lod insaed long Doktrin mo Ol Kavenan oli bin minim long ol fas Lata-dei Sent.

Ol Sent

Ol Sent i grup blong plante buk we oli raetem stori blong histri blong Jos. Buk 1, The Standard of Truth, mo Buk 2, No Unhallowed Hand, i kavremap semfala taem blong histri blong Jos olsem Doktrin mo Ol Kavenan. Ol histri ia, oli save givim yu ol niu tingting o lukluk long wanem i bin stap hapen raon long taem we ol revelesen oli bin kamaot, hemia ol revelesen ia we yu stap stadi long olgeta long Doktrin mo Ol Kavenan.

Jos Histri Topik

I gat plante kaen atikol abaot ol pipol, ol art, ol ples mo ol samting we i bin hapen long histri blong Jos, we oli save faenem long ChurchofJesusChrist.org/study/history/topics.

Tij Folem Wei blong Sevya

Risos ia i save helpem yu blong lan abaot mo stap praktisim ol prinsipol blong stap tij olsem Kraes i bin tij. Olgeta prinsipol ia, oli stap toktok raon long olgeta mo oli stap praktisim olgeta insaed long ol kaonsel miting blong ol tija.