babbai ken lallaki iti klase

Panangusar iti Umaykayo, Sumurot Kaniak—Para iti Sunday School

Panagsagana a Mangisuro iti Sunday School

Nasken a maisentro iti panagsursuro iti ebanghelio ti bukod ken sangapamiliaan a panagadal iti pagtaengan. Pudno daytoy kenka ken kadagiti sursuruam. Bayat ti panagsaganam a mangisuro, rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti yaasidegmo ken ni Cristo, panagsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo.

Umaykayo, Sumurot Kaniak—Para kadagiti Indibidual ken Pamilia ket napateg a paset ti agpada a bukod a panagadalmo ken panagsaganam a mangisuro. Makatulongto kenka daytoy a manggun-od iti naun-uneg a pannakaawat kadagiti pagbatayan iti doktrina a masarakan kadagiti nasantuan a kasuratan. Daytoy pay ti mangted kabaelan kenka a mangparegta ken mangawis kadagiti miembro ti klase a mangusar iti Umaykayo, Sumurot Kaniak—Para kadagiti Indibidual ken Pamilia tapno mapasayaat ti bukod ken sangapamiliaan a panagadalda iti nasantuan a kasuratan (para iti tulong iti panangaramid iti daytoy, kitaen iti “Dagiti Kapanunotan para iti Panangyallukoy iti Bukod ken Sangapamiliaan a Panagadal” iti daytoy a resource). Bayat ti panangaramidmo, laglagipem nga agbalinka a managrikna kadagiti miembro ti klase a dagiti kasasaadda iti pamilia ket mabalin a saan a makasuporta iti masansan a sangapamiliaan a panagadal iti nasantuan a kasuratan ken family home evening.

Kabayatan ti panagsaganam, umayto dagiti kapanunotan ken impresion kenka maipapan kadagiti tao a sursuruam, no kasano a papigsaento dagiti pagbatayan iti nasantuan a kasuratan ti pammatida iti Nailangitan nga Ama ken ni Jesucristo, ken no kasano a maparegtam ida a mangtakuat kadagita a pagbatayan bayat ti panagadalda kadagiti nasantuan a kasuratan para iti bagbagida.

Dagiti Kapanunotan iti Panangisuro

Bayat ti panagsaganam a mangisuro, mabalin a magun-odmo ti mainayon a pammaregta babaen ti panagsukisok kadagiti balabala iti panangisuro iti daytoy a resource. Saanmo a panunoten a dagitoy a kapanunotan a kas agsasaruno nga addang iti panangiturong no di ketdi kas singsingasing tapno maaddaanka iti bukodmo nga inspirasion. Am-ammom dagiti miembro ti klasem, ket maam-ammomto ida a nasaysayaat kabayatan ti aggigiddan a panagsursuroyo iti klase. Am-ammo met ida ti Apo, ket Isunto ti mangparegta kenka kadagiti kasayaatan a wagas a pakatulongan a dumur-as dagiti miembro ti klase iti panagsursuro iti ebanghelio nga ar-aramidenda iti pagtaengan.

Adu ti dadduma pay a resources ti adda a magun-od nga usarem bayat ti panagsaganam, agraman kadagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin ti Simbaan. Para iti ad-adu pay nga impormasion maipapan kadagitoy ken dadduma pay a resources, kitaen iti benneg a napauluan iti “Dagiti Nainayon a Resources” iti daytoy a resource.

Dagiti Sumagmamano a Banag a Laglagipen

• Kas maysa a mannursuro, addaanka iti napateg a responsibilidad a mangsuporta, mangparegta, ken mangpadur-as iti bukod ken sangapamiliaan a panagsursuro dagiti miembro ti klase iti ebanghelio iti pagtaengan. Idinto a mabalin a saan nga agtultuloy ti sumagmamano a miembro ti klase iti panagadal iti ebanghelio iti pagtaengan, makaaramidka iti dakkel a pagdumaan iti panangallukoy ken panangtulong kadakuada a mangaramid iti pagtaenganda a sentro a pagsursuruan iti ebanghelio.

• Umun-unegto ti kumbersion dagiti miembro ti klase iti ebanghelio ni Jesucristo bayat ti panangawat ken panangyaplikarda iti pudno a doktrina. Allukoyem ida nga agsurat ken agtignay a mayannurot kadagiti impresion a naawatda manipud iti Espiritu Santo.

• Ti panangisuro ket ad-adda pay ngem iti panag-lecture, ngem ad-adda pay ngem iti panangiturong laeng iti panaglilinnawag. Paset ti akemmo ti mangyallukoy iti pannakiraman a mangitandudo ken maibatay kadagiti nasantuan a kasuratan. Nasken pay nga ibinglaymo dagiti naparegta a nalawag a pannakaammo ken pannakaawat [insights] a naawatmo bayat ti panagadalmo kadagiti nasantuan a kasuratan.

• Laglagipem nga addaan dagiti miembro ti klase kadagiti napapateg a padas iti panagadalda kadagiti nasantuan a kasuratan iti pagtaengan. Makasuportaka iti panagsursuroda iti ebanghelio babaen ti panangipaay kadakuada kadagiti masansan a gundaway a mangibinglay no ania ti masursuroda iti pagtaengan ken no kasano a mangimpluensia daytoy iti biagda.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka, a pakairamanan dagiti teacher council meeting. Kadagitoy a miting mabalinmo ti makiinnuman kadagiti dadduma pay a mannursuro maipapan kadagiti karit a pakaipasanguam. Mabalinmo pay nga ilawlawag ken yaplikar dagiti pagbatayan iti panangisuro a kas ken ni Cristo.

• Makasursuro a nasaysayaat dagiti sumagmamano a tao no addaanda kadagiti gundaway a mangisuro. No dadduma, ibilangmo ti panangpalugod kadagiti miembro ti klase, agraman dagiti agtutubo, tapno mangisuro iti maysa a paset ti adalen. Ibataymo daytoy a pangngeddeng kadagiti kasapulan ken kabaelan dagiti miembro ti klase. No awisem ti maysa a miembro ti klase a mangisuro, maaddaanka iti oras a mangtulong kenkuana nga agsagana a nasapsapa babaen ti panangusar kadagiti kapanunotan a masarakan iti daytoy a resource ken iti Umaykayo, Sumurot Kaniak—Para kadagiti Indibidual ken Pamilia. Laglagipem a kas naawagan a mannursuro, sika ti kangrunaan nga akinrebbeng no ania ti maisuro iti klase.

• Iraman daytoy a resource dagiti balabala [outline] iti panangisuro para iti tunggal lawas ti tawen. Kadagiti Domingo no saan a maangay ti Sunday School, ituloyto dagiti pamilia ti panagbasa iti Doktrina ken Katulagan iti pagtaengan a mayannurot iti iskediul a nabalabala iti Umaykayo, Sumurot Kaniak—Para kadagiti Indibidual ken Pamilia.. Mabalinmo a pilien a laktawan dagiti adalen a nailatang iti maysa a lawas no saan a maangay ti Sunday School, wenno mabalinmo ti mangisuro iti adu nga adalen kabayatan ti maysa a klase.