“29 ʻEpeleli–5 Mē. Sione 7–10: ‘Ko Au ko e Tauhi Leleí’” Haʻu, ʻo Muimui ʻIate Aú—Maʻá e Lautohi Faka-Sāpaté: Fuakava Foʻoú 2019 (2019)
“20 ʻEpeleli–5 Mē. Sione 7–10,” Haʻu, ʻo Muimui ʻIate Aú—Maʻá e Lautohi Faka-Sāpaté: 2019
Ko Ia Ia ʻOku Taʻeangahalá, tā fakatātaaʻi ʻe Liz Lemon Swindle
29 ʻEpeleli– 5 Mē
Sione 7–10
“Ko Au ko e Tauhi Leleí”
Te ke maʻu mo e kau mēmipa ʻo hoʻo kalasí ha ngaahi fakakaukau ʻi hoʻomou lau e Sione 7–10 ʻi he uiké ni. Manatuʻi ʻoku totonu ke tokoni e ngaahi fakakaukau ʻi he fokotuʻutuʻu ko ʻení ki hono akoʻí kae ʻikai fetongi e ueʻi fakalaumālie ʻokú ke maʻu ʻi hono ako e folofolá.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
Fakamanatu ki he kau mēmipa ʻo e kalasí e mahuʻinga ʻo hono ʻai honau ʻapí ko e uho ʻo hono ako e ongoongoleleí. Ko e veesi fē mei he Sione 7–10 naʻe aleaʻi ʻe he kau mēmipa ʻo e kalasí mo honau ngaahi fāmilí lolotonga ʻo e uiké? Ko e hā e ngaahi pōpoaki naʻe ʻaonga lahi taha kiate kinautolú?
Akoʻi e Tokāteliné
Ko Sīsū Kalaisi ʻa e Fakamoʻui ʻo e māmaní.
-
ʻI he Sione 7–10, naʻe fakahoko ʻe he Fakamoʻuí ha ngaahi fakahā ʻe lava ʻo tokoni ke mahino lelei ange ai ki he kau mēmipa ʻo e kalasí ʻEne ngāue fakafaifekaú mo ʻunu ofi ange kiate Ia. ʻE lava ke lau ʻe he kau mēmipa ʻo e kalasí e ngaahi potufolofola ko ʻení mo vahevahe e meʻa ʻoku nau akoʻi fekauʻaki mo e misiona fakalangi ʻo e Fakamoʻuí. ʻOku fakahoko fēfē nai ʻe Kalaisi e ngaahi fatongia ko ʻení ʻi heʻetau moʻuí?
-
Sione 7:37–39: “Kapau ʻoku fieinu ha tangata, ke haʻu ia kiate au ʻo inu”
-
Sione 8:12; 9:4–5: “Ko e maama ʻo e māmaní”
-
Sione 8:58: “Kimuʻa ʻia ʻĒpalahamé, ʻOku Ou ʻi ai Au” (vakai, ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí, ki ha ngaahi fakakaukau fekauʻaki mo e veesi ko ʻení)
-
Sione 9:8–10, 35–38: “Ko e ʻAlo ʻo e ʻOtuá”
-
Sione 10:7–9: “Ko e matapaá”
-
Sione 10:11–14: “Ko e tauhi leleí”
-
Maama ʻo e Māmaní, tā fakatātaaʻi ʻe Howard Lyon
ʻI heʻetau moʻui ʻaki e ngaahi akonaki ʻa Sīsū Kalaisí, te tau ʻilo ʻene moʻoní.
-
ʻE lava ke mahino ange ki he kau mēmipa ʻo e kalasí e founga ʻoku fakatupulaki ai ha fakamoʻoni ʻi hono moʻui ʻaki ha fekau, kapau te nau fakafehoanaki e sīpinga ko ʻení ki he founga ʻo hono ako ha taukei ʻo fakafou ʻi he aʻusia fakatāutahá. Hangē ko ʻení, te ke lava ʻo fakaafeʻi e kau mēmipa ʻo e kalasí ʻa ia ʻoku nau poto he hikó pe fakaʻaongaʻi ha naunau hiva ke fakamatalaʻi e founga ne nau fakatupulaki ai e ngaahi taukei ko ʻení. Naʻe akoʻi fēfē nai ʻe heʻenau akoako ʻiate kinautolu peé ke nau poto ange ʻi haʻanau sio ki ha taha kehe? Aleaʻi fakakalasi e founga ʻoku fakafehoanaki ai e ivi ʻoku fakaʻaongaʻi ki hono ako ha taukeí, ki he sīpinga fakalaumālie naʻe fakamatalaʻi ʻe he Fakamoʻuí ʻi he Sione 7:14–17. Ko e hā ha ngaahi aʻusia ʻe lava ke vahevahe ʻe he kau mēmipa ʻo e kalasí fekauʻaki mo e muimui ʻi he sīpinga ko ʻení ke nau maʻu ha ʻilo fakalaumālié?
-
Te ke lava fēfē ʻo fakatātaaʻi e ngaahi moʻoni ʻoku akoʻi ʻi he Sione 7:14–17? Ko e fakakaukau ʻe tahá, ko hono kole ange ki he kau mēmipa ʻo hoʻo kalasí ke nau vahevahe e ngaahi aʻusia ne nau maʻu ai ha fakamoʻoni ki ha moʻoni ʻo e ongoongoleleí ʻi heʻenau moʻui ʻaki iá. Ko ha sīpinga lelei foki e talanoa naʻe fai ʻe Sisitā Bonnie L. Oscarson ʻi he “Ngaahi Maʻuʻanga Tokoni Kehé.” Tuku ange ha taimi ki he kau mēmipa ʻo e kalasí ke nau fakakaukau ki ha tefitoʻi moʻoni ʻo e ongoongoleleí ʻoku nau loto ke maʻu ha fakamoʻoni mālohi ange fekauʻaki mo iá, pea poupouʻi kinautolu ke fokotuʻu ha ngaahi taumuʻa pau ke moʻui kakato ʻaki e tefitoʻi moʻoni ko iá.
ʻI heʻetau ʻilo ʻo kau kia Sīsū Kalaisí, te tau ʻilo ai ʻa e Tamaí.
-
Naʻe pehē ʻe ʻEletā Jeffrey R. Holland: “ʻOku fokoutua ha niʻihi ʻi he māmaní he ʻahó ni ʻi ha maʻuhala fakamamahi ki he [ʻOtua ko e Tamaí]. … ʻOku pehē ʻe ha niʻihi tokolahi ʻi he ngaahi ʻahó ni ʻe lava ke nau ongoʻi fiemālie ʻi he toʻukupu ʻo Sīsuú, ka ʻoku nau faingataʻaʻia ʻenau fakakaukau atu ki he ngaahi tuʻutuʻuni pau ʻa e ʻOtuá” (“The Grandeur of God,” Ensign pe Liahona, Nōvema 2003, 71). Ko e hā ʻoku akoʻi mai ʻe he ngaahi lea ʻa e Fakamoʻuí ʻi he Sione 8:18–19, 26–29 fekauʻaki mo Hono vā fetuʻutaki mo e Tamaí? Hili hono lau mo aleaʻi ʻe he kau mēmipa ʻo e kalasí e ngaahi veesi ko ʻení, ʻe lava ke nau lisi ʻi he palakipoé ha ngaahi meʻa naʻe fai, folofola ʻaki, pe akoʻi ʻe Sīsū. Ko e hā ʻoku tau ako fekauʻaki mo e ʻOtua ko e Tamaí mei he ngaahi meʻa ko ʻení?
ʻOku ope atu e ʻaloʻofa ʻa e Fakamoʻuí kiate kinautolu kotoa pē ʻoku fakatomalá.
-
Ko kinautolu ʻoku ongoʻi halaia koeʻuhí ko ʻenau ngaahi angahalá, ʻe lava ke hoko e talanoa ʻo e ʻaloʻofa ʻa e Fakamoʻuí mo e fakatomala ʻa e fefine naʻe moʻua ʻi he tono tangatá ko ha maʻuʻanga tokoni fakalotolahi. Pe, kapau ʻoku ongoʻi ʻe he kau mēmipa ʻo e kalasí ʻoku ʻahiʻahiʻi kinautolu ke nau valokiʻi e niʻihi kehé koeʻuhí ko ʻenau ngaahi angahalá, ʻe lava ke hoko e talanoá ko ha fakatokanga. ʻE lava ke ke fakaafeʻi kinautolu ke nau lau e Sione 8:1–11, ʻo kumi e ngaahi tali ki he ngaahi fehuʻi hangē ko ʻení: Ko e hā ʻoku akoʻi mai ʻe he talanoa ko ʻení fekauʻaki mo e ʻaloʻofa ʻa e Fakamoʻuí? ʻE tokoni fēfē hono maʻu ʻEne ʻaloʻofá ʻi heʻetau faiangahalá, ʻi he taimi ʻoku tau ongoʻi ai ʻoku ʻahiʻahiʻi kitautolu ke tau fakamaauʻi ʻa e niʻihi kehé? (Vakai, ʻAlamā 29:9–10). Te ke lava foki ʻo huluʻi e vitiō “Go and Sin No More” (LDS.org).
-
Ke tokoni ki he kau mēmipa ʻo e kalasí ke nau maʻu ha meʻa mahuʻinga ʻi he Sione 8:1–11, ʻe lava ke ke vahevahe e kalasí ki ha kulupu ʻe tolu—kulupu ʻe taha ke nofo taha ʻenau tokangá ʻi he ngaahi lea mo e ngāue ʻa e kau Fālesí, kulupu ʻe taha ke tuku taha ʻenau tokangá ʻi he ngaahi lea mo e ngāue ʻa e Fakamoʻuí, pea kulupu leva ʻe tahá ke tuku taha ʻenau tokangá ʻi he ngaahi lea mo e ngāue ʻa e fefiné. Fakaafeʻi e kulupu takitaha ke nau lisi e ngaahi moʻoni fakalaumālie ʻoku nau ako mei hono lau e konga takitaha ʻo e fakamatalá.
-
ʻI he taimi ʻe niʻihi, ʻoku ʻikai ke tau fakatokangaʻi e ngaahi founga ʻoku tau fakamaauʻi ai e niʻihi kehé. Ko ha ʻekitivitī ʻeni ke tokoni ki he kau mēmipa ʻo e kalasí ke nau ikunaʻi e fakahehema ko iá: Kole ki he kalasí ke nau tokoni atu ʻi hono lisi e ngaahi founga ʻoku tau fakamaauʻi ai e kakaí (ʻi honau fōtungá, ʻulungāngá, puipuituʻá mo e alā meʻa peheé). Tufa ki he kalasí ha ngaahi laʻi pepa kuo ʻosi kosikosi ki ha fōtunga ʻo ha foʻi maka, pea kole ange ke nau fili ha founga ʻo hono fakamaauʻi e niʻihi kehé ʻoku nau ongoʻi tautea ai pea tohiʻi ia ki he ngaahi laʻi pepa maká. Ko e hā ʻoku tau ako mei he folofola ʻa e Fakamoʻuí ki he kau Fālesí ʻi he Sione 8:1–11? Fakaafeʻi e kalasí ke nau tohi ʻi he tafaʻaki ʻe taha ʻo e laʻi pepa maká ha meʻa te ne fakamanatuʻi ange ke ʻoua te nau fai fakamaau (mahalo ko ha kupuʻi lea mei he Sione 8).
Poupouʻi ʻo e Ako ʻi ʻApí
Kole ki he kau mēmipa ʻo e kalasí ke nau fakakaukau ki ha taimi ne mole ai haʻanau meʻa ne mahuʻinga fau. Te nau ako ʻi he folofolá, ʻi he uike ka hokó, e ongo ʻoku maʻu ʻe he Tamai Hēvaní mo Sīsū Kalaisi fekauʻaki mo e niʻihi ʻoku heé.
Ngaahi Maʻuʻanga Tokoni Kehé
ʻOku tokoni hono moʻui ʻaki ha tefitoʻi moʻoni ke tau maʻu ai ha fakamoʻoni.
Naʻe pehē ʻe Sister Bonnie L. Oscarson:
“Naʻe akoʻi ʻe he Fakamoʻuí, ‘Pea ko ia ia ʻe fai ki hono finangaló, te ne ʻilo ʻa e akonakí, pe ʻoku ʻi he ʻOtuá ia, pe ko ʻeku lea ʻiate au pē’ [Sione 7:17]. ʻOku tau feinga he taimi ʻe niʻihi ke fakahoko fakaholomui ia. Hangē ko ʻení, mahalo te tau fai ʻeni: Te u fiefia ke moʻui ʻaki e fono ʻo e vahehongofulú, ka ʻoku fie maʻu ke u ʻuluaki ʻiloʻi pe ʻoku moʻoni. Mahalo ʻoku tau lotu ke maʻu ha fakamoʻoni ki he fono ʻo e vahehongofulú pea ʻamanaki ʻe hanga ʻe he ʻEikí ʻo tāpuakiʻi kitautolu ʻaki ha fakamoʻoni kimuʻa pea toki fakafonu e laʻi foaki vahehongofulú. ʻOku ʻikai ke ngāue pehē ia. ʻOku ʻamanaki mai e ʻEikí ke tau fakaʻaongaʻi e tuí. Kuo pau ke tau totongi vahehongofulu totonu maʻu pē ke maʻu ha fakamoʻoni ki he vahehongofulú. …
“ʻOku ou fie vahevahe ha sīpinga ʻo e founga ʻoku tokoni ai kiate kitautolu hono moʻui ʻaki ha tefitoʻi moʻoni ke tau ului ki he tefitoʻi moʻoni ko iá. … Ne fakatō kiate au ʻe heʻeku mātuá mo e kau faiako ʻi he lotú ʻa e mahuʻinga ko ia ke fakaʻapaʻapaʻi hoku sinó, tauhi ke maʻa hoku ʻatamaí, pea mahuʻinga tahá, ke ako ke falala ki he ngaahi fekau ʻa e ʻEikí. Ne u fai ha fili ke fakaʻehiʻehi mei he ngaahi tūkunga ne u ʻiloʻi ʻe ʻi ai e ʻolokaholó pea fakamamaʻo mei he tapaká mo e faitoʻo konatapú. Ko e taimi lahi ne ʻikai fakakau atu au ʻi he ngaahi fakafiefiá, pea ʻikai ke u faʻa teiti. Ne fakaʻau ke lahi ange hono fakaʻaongaʻi ʻo e faitoʻo konatapú ʻe he kakai kei talavoú, pea ʻikai ʻilo lahia hono fakatuʻutāmakí ʻo hangē ko e ʻaho ní. Ne lahi ha niʻihi ʻi hoku toʻú ne uesia ʻe he faitoʻo konatapú pe maʻunimā kinautolu. Ne u houngaʻia ne akoʻi ke u moʻui ʻaki e Lea ʻo e Potó ʻi hoku ʻapí, pea ne u maʻu ha fakamoʻoni mālohi ʻo e tefitoʻi moʻoni ko ia ʻo e ongoongoleleí ʻi heʻeku tui pea moʻui ʻaki iá. Ko e ongo fakafiemālie ko ia ne u maʻu ʻi hono moʻui ʻaki ha tefitoʻi moʻoni ʻo e ongoongoleleí ko e Laumālie ia ʻo e Laumālie Māʻoniʻoní ʻokú Ne fakapapauʻi mai ʻoku moʻoni e tefitoʻi moʻoni ko iá” (“Ke Ke Ului,” Ensign pe Liahona, Nōvema 2013, 77).
Fakatupulaki ʻEtau Founga Akoʻí
Moʻui taau mo e fakahinohino ʻa e Laumālié. ʻI he taimi te ke moʻui ʻaki ai e ongoongoleleí, te ke taau mo e takaua ʻa e Laumālié, ʻa ia ko e faiako lelei tahá. ʻI hoʻo fekumi ki Heʻene fakahinohinó, ʻe foaki atu ʻe he Laumālie Māʻoniʻoní ha ngaahi fakakaukau mo ha ngaahi ongo fekauʻaki mo e founga ke ke feau ai e ngaahi fie maʻu ʻa e niʻihi ʻokú ke akoʻí (vakai, Faiako ʻi he Founga ʻa e Fakamoʻuí, 5).