“20–26 Mē. Mātiu 21–23; Maʻake 11; Luke 19–20; Sione 12: ‘Vakai, ʻOku Haʻu Ho Tuʻí’” Haʻu, ʻo Muimui ʻIate Au—Maʻá e Lautohi Faka-Sāpaté: Fuakava Foʻou 2019 (2019)
“20–26 Mē. Mātiu 21–23; Maʻake 11; Luke 19–20; Sione 12,” Haʻu, ʻo Muimui ʻIate Au—Maʻá e Lautohi Faka-Sāpaté: 2019
Ko Sākeasi ʻi he Funga ʻAkau Sukaminó, tā fakatātaaʻi ʻe James Tissot
20–26 Mē
Mātiu 21–23; Maʻake 11; Luke 19–20; Sione 12
“Vakai, ʻOku Haʻu Ho Tuʻí”
ʻI hoʻo lau ʻa e Mātiu 21–23; Maʻake 11; Luke 19–20; mo e Sione 12, fakakaukau ki ha ngaahi fehuʻi te ke lava ʻo ʻeke, ʻa ia ʻe lava ʻo tokoni ke feau e ngaahi fie maʻu ʻa e kau mēmipa ʻo hoʻo kalasí. ʻE ueʻi koe ʻe he Laumālie Māʻoniʻoní ke ke ʻilo pe ko e ngaahi fehuʻi mo e ngaahi tefitoʻi moʻoni fē, kau ai mo e ngaahi meʻa ʻi he fokotuʻutuʻu ko ʻení, te ne feau lelei taha e ngaahi fie maʻu ko iá.
Lekooti e Ngaahi Ongo ʻOkú ke Maʻú
Fakaafeʻi e Feʻinasiʻakí
ʻI he lolotonga ʻo e uiké, kimuʻa pea fai e kalasí, fakaafeʻi ha kau mēmipa ʻe niʻihi ʻo e kalasí ke nau teuteu ke vahevahe ha aʻusia ne nau maʻu ʻi heʻenau ako e ngaahi vahe ʻo e uike ní. Ko e hā ha ngaahi tāpuaki ʻoku nau maʻu ʻi heʻenau ako e folofolá lolotonga e uiké?
Akoʻi e Tokāteliné
ʻOku ʻafioʻi fakataautaha kitautolu ʻe he Fakamoʻuí.
-
Mahalo kuo ʻosi ongoʻi ʻe he kau mēmipa ʻo hoʻo kalasí ʻoku nau liʻekina pe ngalo ʻi ha ngaahi taimi ʻi heʻenau moʻuí. ʻE lava ke tokoni e talanoa ʻo Sākeasí ke mahino ʻoku ʻafioʻi mo tokanga mai ʻa e Tamai Hēvaní mo Sīsū Kalaisi kiate kinautolu. Ke tokoni ke fakatatau ʻe he kau mēmipa ʻo e kalasí e talanoa ko ʻení ki heʻenau moʻuí, fakaafeʻi ke nau fakakaukauloto ko Sākeasi kinautolu. ʻOku mou pehē ko e hā naʻá ne ako fekauʻaki mo e Fakamoʻuí mei he aʻusia ko ʻení? Ko e hā te tau lava ʻo ako mei he feinga ʻa Sākeasi ke kumi e Fakamoʻuí?
-
ʻE ala tokoni foki ke kole ki he kau mēmipa ʻo e kalasí ke nau fakakaukau ki ha ngaahi tūkunga kehe ʻi he folofolá naʻe ui ai ʻe he ʻEikí hono kakaí ʻaki honau hingoá. (ʻOku ʻoatu ha ngaahi sīpinga ʻe niʻihi ʻi he “Ngaahi Maʻuʻanga Tokoni Kehé.”) Te ke lava foki ʻo fakaafeʻi e kau mēmipa ʻo e kalasí ke nau vahevahe e ngaahi aʻusia kuo nau maʻu ai ha fakapapau ʻoku ʻafioʻi fakataautaha kinautolu ʻe he ʻEikí.
Mātiu 21:1–11; Maʻake 11:1–11; Luke 19:29–44; Sione 12:12–16
Ko Sīsū Kalaisi hotau Tuʻí.
-
ʻE lava ke kamataʻi ʻe ha kiʻi ʻekitivitī nounou ha fealēleaʻaki fekauʻaki mo e hū langilangiʻia ʻa e Fakamoʻuí ki Selusalemá: ʻE lava ke tā ʻe ha niʻihi ʻo e kau mēmipa ʻo e kalasí ʻi he palakipoé ha ngaahi meʻa ʻoku felāveʻi mo ha tuʻi, hangē ko ha kalauni pe ko ha taloni, kae mateʻi ʻe he toengá e meʻa ʻoku nau taá. ʻE lava leva ke tā ʻe he kau mēmipa kehe ʻo e kalasí ha ʻuhikiʻi ʻasi mo ha ngaahi vaʻa ʻo ha fuʻu ʻakau. Ko e hā e felāveʻi ʻa e ngaahi meʻá ni mo ha tuʻí? Te ke lava leva ʻo fakaʻaliʻali e fakatātā ʻo e hū langilangiʻia ʻa e Fakamoʻuí ki Selusalemá mei he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pea fakaafeʻi e kau mēmipa ʻo e kalasí ke nau lau e Maʻake 11:1–11. Naʻe ʻiloʻi fēfē ʻe he kakaí ʻa Sīsū ko honau Tuʻí? ʻOku tau moihū fēfē nai kia Sīsū Kalaisi ko hotau Tuʻi ʻi heʻetau ngaahi leá mo e ngaahi ngāué?
-
Ke tokoni ke mahino ki he kau mēmipa ʻo e kalasí ko Sīsū Kalaisi hotau Tuʻí, te ke lava ʻo kole ange ke nau toe vakaiʻi e himi “Haʻu ʻa e Tuʻi ʻo e Ngaahi Tuʻi,” Ngaahi Himí, fika 23, pe ko ha himi kehe fekauʻaki mo Sīsū ko hotau Tuʻí. Ko e hā e ngaahi lea mei he himí ʻokú ne fakamanatu mai e ngaahi moʻoni ʻi he Mātiu 21:1–11; Maʻake 11:1–11; Luke 19:29–44; mo e Sione 12:12–16?
Ko e ongo fekau lalahí ke ʻofa ki he ʻOtuá mo ʻofa ki he niʻihi kehé ʻo hangē pē ko kitautolú.
-
Naʻe akoʻi ʻe Palesiteni Dieter F. Uchtdorf ko e taimi ʻoku fakamuʻomuʻa ai ha toe meʻa kehe ʻi heʻetau moʻuí mei he ongo fekau lalahi ʻe uá, ʻoku hangē ia hano fana ha ngahau ki ha holisi maʻa pea tā takatakai e ngaahi tāketí ʻi he foʻi ngahaú (vakai, “Fakataumuʻa ki Loto Mālie,” Ensign pe Liahona, Sānuali 2017, 4–5). ʻE tokoni nai hono fai e talanoa fakatātā ko ʻení ke mahino ki he kau mēmipa ʻo e kalasí e Mātiu 22:34–40? Ko e founga ʻe taha ke fai ai ʻení ko hono folahi ha lauʻi pepa fālahi ʻi he falikí pea tuku ke taufetongi e kau mēmipa ʻo e kalasí ʻi hono lī hifo ha peni pe ko ha peni vahevahe ai. Te nau lava leva ʻo fakaʻilongaʻi e meʻa naʻe tō ai ʻenau pení ʻi he laʻi pepá pea fakahingoa ʻaki ia ha fekau. Hili hono lau fakataha e Mātiu 22:34–40, te ke lava ʻo tā ha foʻi tāketi foʻou ʻokú ne takatakaiʻi e ngaahi tāketi kehé pea fakahingoa ia ko e “ʻOfa ki he ʻOtuá pea ʻOfa ki Ho Kaungāʻapí.” ʻOku tokoni fēfē ʻetau tokanga taha ki he ongo fekau lalahí ke tau talangofua ai ki he ngaahi fekau kehe ʻa e ʻOtuá? Te tau fakapapauʻi fēfē nai ʻoku nofo taha ʻetau talangofuá ʻi he ongo fekau ko ʻení?
ʻE maluʻi kitautolu ʻi heʻetau fakaʻehiʻehi mei he kau takimuʻa kuí.
-
ʻE ʻaonga nai ki he kau mēmipa ʻo hoʻo kalasí hano aleaʻi e foʻi lea “takimuʻa kui,” naʻe fakaʻaongaʻi ʻe he Fakamoʻuí ke fakamatalaʻi ʻaki e kui fakalaumālie ʻa e Kau Fālesí mo e kau tangata tohí? (Mātiu 23:16). ʻE lava ke ke fakakaukauʻi ha founga ke fakatātaaʻi ai pe ʻe fēfē ha muimui ʻa ha taha ʻi ha taha ʻoku ʻikai ke lava ʻo sio. Pe ko hono lisi ʻe he kalasí ʻi he palakipoé e ngaahi ʻulungaanga ʻo ha takimuʻa kuí, ʻo hangē ko hono fakamatalaʻi ʻi he Mātiu 23:13–33. Ke tānaki ki he lisí, ʻe lava ke ke tānaki atu mo ha ngaahi potufolofola kehe ʻokú ne akoʻi e kui fakalaumālié, hangē ko e 2 Kolinitō 4:3–4; 2 Nīfai 9:28–32; mo e Sēkope 4:14. Te tau lava fēfē ʻo ʻiloʻi mo fakaʻehiʻehi mei he kau takimuʻa kuí?
-
ʻE lava ke ke tokoni ke mahino ki he kau mēmipa ʻo e kalasí naʻe tokanga ange e kau tangata tohí mo e kau Fālesí ki he koulá mo e ngaahi meʻaʻofa ʻi he temipalé ʻo laka ange ʻi he ʻuhinga totonu ʻo e temipalé (vakai, Mātiu 23:16–22). Ke fai ʻení, ʻe lava ke ke vahevahe e talanoa fakatātā ʻo e mataʻi tofé mo e puhá naʻe fai ʻe Palesiteni Poiti K. Peeka ʻi he “Ngaahi Maʻuʻanga Tokoni Kehé.” Ko e hā te ne lava ʻo tohoakiʻi ʻetau tokangá mei he fiefia ʻi he ngaahi tāpuaki totonu ʻo e temipalé? ʻo e houalotu sākalamēnití?
Ko e Tangata Tānaki Tukuhau Kuo Fakatomalá mo e Tangata Fālesi Angatonú ʻi he Temipalé, tā fakatātāʻi ʻe Frank Adams
ʻE lava ke taʻofi kitautolu ʻe he ngaahi fakahīkihiki ʻa e tangatá mei heʻetau hoko ko e kau ākonga lototoʻa ʻa Sīsū Kalaisí.
-
ʻE lava ke taʻefiemālie ha kakai ʻe niʻihi ʻoku tui kia Sīsū Kalaisi ke nau taukapoʻi ʻEne ongoongoleleí, tautautefito ki he ngaahi sosaieti ʻoku nau fakataʻeʻaongaʻi pe manukiʻi e tui fakalotú. Ko e hā e lēsoni ʻoku ʻomi ʻe he Sione 12:42–43 maʻatautolu he ʻahó ni? Te ke lava ʻo fakaafeʻi e kalasí ke nau fekumi ʻi he ngaahi veesi folofola ko ʻení mo kumi e kakai ne nau loto ke fakafiemālieʻi e tangatá mo e kakai ne nau loto ke fakafiemālieʻi e ʻOtuá: ʻEkesōtosi 32:1–8; 1 Samuela 15:18–25; Mātiu 14:1–10; 1 Nīfai 6:1–6; Mōsaia 17:1–12; mo e Molonai 8:16. Ko e hā ʻoku tau ako mei he ngaahi sīpinga ko ʻení? Ki ha ngaahi fakamatala lahi ange fekauʻaki mo hotau fatongia ke fakahaaʻi ʻetau tuí ʻi he ngaahi feituʻu tokolahí, vakai ki he lea ʻa ʻEletā Robert D. Hales, “Tauhi ʻo e Tauʻatāina ke Filí, Maluʻi ʻo e Tauʻatāina Fakalotú,” Ensign pe Liahona, Mē 2015, 111–13.
Poupouʻi ʻo e Ako ʻi ʻApí
Naʻe kikiteʻi ʻe he Fakamoʻuí ʻe malava pē ke kākaaʻi e “kakai filí” ʻi he ngaahi ʻaho fakaʻosí (Siosefa Sāmita—Mātiu 1:22). Ke poupouʻi e kau mēmipa ʻo e kalasí ke nau lau e Siosefa Sāmita—Mātiu 1; Mātiu 25; Maʻake 12–13; mo e Luke 21 ʻi he uike kahaʻú, ʻe lava ke ke talaange te nau maʻu ʻi he ngaahi vahe ko ʻení e kī ke fakaʻehiʻehi mei he kākā ʻi he ngaahi ʻaho kimui ní.
Ngaahi Maʻuʻanga Tokoni Kehé
ʻOku ʻafioʻi fakafoʻituitui kitautolu ʻe he Tamai Hēvaní.
Naʻe fakahā ʻe ʻEletā Neal A. Maxwell: “Oku ou fakamoʻoni atu kuo fuoloa fau hono ʻafioʻi fakatāutaha koe ʻe he ʻOtuá (vakai, TF 93:23). Kuo fuoloa fau ʻEne ʻofeina koé. ʻOku ʻikai ngata pē ʻi heʻene ʻafioʻi e hingoa ʻo e foʻi fetuʻu kotoa pē (vakai, Saame 147:4; ʻĪsaia 40:26); ʻokú Ne ʻafioʻi homou ngaahi hingoá mo homou ngaahi loto mafasiá mo e fiefiá!” (“Remember How Merciful the Lord Hath Been,” Ensign pe Liahona, May 2004, 46).
Ngaahi taimi ʻoku ui ai ʻe he ʻEiki e kakaí ʻaki honau hingoá.
Ko e talanoa fakatātā ʻo e mataʻi tofé mo e puhá
Naʻe vahevahe ʻe Palesiteni Boyd K. Packer e talanoa fakatātā ko ʻení: "Naʻe fekumi ha tangata fakatau ki ha ngaahi siueli mahuʻinga pea faifai peá ne maʻu ha foʻi mataʻi tofe haohaoa. Naʻá ne totongi e tangata tā tongitongi lelei tahá ke ne faʻu ha kiʻi puha siueli pea teuteu ʻaki ia ha tupenu oloveti lanu pulū. Naʻá ne tuku ki ai ʻene foʻi mataʻi tofe mahuʻingá ʻo fakaʻaliʻali koeʻuhí ke mamata mo e niʻihi kehé ki heʻene koloá. Naʻá ne mamata ki he holo mai ʻa e kakaí ke vakai ki aí. Naʻe ʻikai fuoloa mei ai kuó ne tafoki atu ʻi he mamahi. Ko e puhá ne nau matamataleleiʻia aí, kae ʻikai ko e mataʻi tofé” (“The Cloven Tongues of Fire,” Ensign, May 2000, 7).
Fakatupulaki ʻEtau Founga Akoʻí
ʻOku ʻikai fie maʻu ke ke akoʻi e meʻa kotoa pē. “ʻOku lahi fau e meʻa ke aleaʻi ʻi he lēsoni takitaha, ka ʻoku ʻikai fie maʻu ia ke ke akoʻi e meʻa kotoa pē ʻi he foʻi kalasi ʻe taha kae toki ongo e lēsoní ki ha loto ʻo ha taha—ʻi he taimi ʻe niʻihi, ʻoku feʻunga pē ha meʻa mahuʻinga ʻe taha pe ua. ʻI hoʻo fakalaulauloto ki he ngaahi fie maʻu ʻa e kau akó, ʻe tokoni atu e Laumālié ke ke ʻiloʻi pe ko e feʻia e ngaahi tefitoʻi moʻoni, talanoa pe potufolofola ʻe mahuʻingamālie taha kiate kinautolú” (Faiako ʻi he Founga ‘a e Fakamoʻuí, 7).