ʻOfa Haohaoá, tā fakatātaaʻi ʻe Del Parson

2–8 Tīsemá

1–3 Sione; Sute

“Ko e ʻOtuá ko e ʻOfa”

Ko e hā ha ngaahi kaveinga mo ha ngaahi sīpinga ʻoku makehe kiate koe ʻi hoʻo lau ʻa e Sione 1–3 mo e tohi ʻa Suté? Te ke fakaʻaongaʻi fēfē kinautolu ke tokoni ki he kau mēmipa hoʻo kalasí?

Lekooti e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi ha kau mēmipa ʻe niʻihi ʻo e kalasí ke nau vahevahe ʻa e ngaahi kaveinga pe moʻoni naʻe makehe kiate kinautolu ʻi heʻenau ako ʻa e Tohi ʻa Sioné mo Suté. Ko e hā ʻa e ngaahi pōpoaki mei he ongo tohi ko ʻení naʻe mahuʻinga taha kiate kinautolu mo honau ngaahi fāmilí?

Akoʻi e Tokāteliné

1 Sione 1:5–10; 2:3–11; 3:1–3; 4:7–21; 5:1–3

Ko e Tamai Hēvaní mo Sīsū Kalaisi ʻa e ongo sīpinga haohaoa ʻo e māmá mo e ʻofá.

• Te ke tokoni fēfē nai kiate kinautolu ʻokú ke akoʻí ke nau ʻiloʻi ʻa e maama mo e ʻofa ʻa e Tamai Hēvaní ʻi heʻenau moʻuí? ʻE lava ke ke kamata ʻaki hano tohi e ongo foʻi lea maama mo e ʻofa ʻi he palakipoé. Kole ki he kau mēmipa ʻo e kalasí ke nau vahevahe ʻa e ngaahi foʻi lea ʻoku ʻuluaki haʻu ki honau ʻatamaí ʻi heʻenau fakakaukau ki he ongo foʻi lea ko ʻení. ʻE lava ke ke vahevahe ʻa e kalasí ki ha ngaahi kulupu pea ʻoange ki he kulupu takitaha ha taha ʻo e ngaahi potufolofola ko ʻení: 1 Sione 1:5–10; 2:3–11; 3:1–3; 4:7–12; 4:16–21; 5:1–3. ʻE lava ke fekumi ʻa e ngaahi kulupú ʻi he ngaahi veesi ko ʻení ke maʻu ha fakamoʻoni ki he maama mo e ʻofa ʻa e ʻOtuá pea mo e ngaahi meʻa te tau lava ʻo fai ke fakahaaʻi ʻetau ʻofa ki he ʻOtuá mo ʻEne fānaú. ʻE lava leva ke vahevahe ʻe he kau mēmipa ʻo e kulupu takitaha ki he kalasí ʻa e meʻa ne nau maʻú. Te ke lava foki ʻo fakaafeʻi ʻa e kau mēmipa ʻo e kalasí ke vahevahe ha taimi ne nau ongoʻi ai ʻa e maama mo e ʻofa ʻa e Tamai Hēvaní.

• Te ke tokoni fēfē ki he kau mēmipa ʻo e kalasí ke nau fakalaulauloto ki he maama fakalaumālie ʻi heʻenau moʻuí? ʻE lava ke ke fakaafeʻi ʻa e kau mēmipa ʻo e kalasí ke nau sio ki ha maama ʻi he ʻaofí pe ko ha maama mei ha matapā sioʻatá pea vahevahe ʻa e meʻa ʻoku nau ʻilo fekauʻaki mo e maama fakatuʻasinó. ʻOku tatau fēfē ʻa e maama fakatuʻasinó mo e maama fakalaumālié? ʻE lava ke ke fekumi ʻi he Saame 27:1; Sione 1:4–5; 1 Sione 1:5–7; 3 Nīfai 11:11; Tokāteline mo e Ngaahi Fuakava 88:6–13 mo kumi ha ngaahi fakakaukau kehe fekauʻaki mo e founga ʻoku ʻomi ai ʻe he ʻOtuá mo Hono ʻAló ʻa e māmá ki heʻetau moʻuí. ʻE lava foki ke vahevahe ʻe he kau mēmipa ʻo e kalasí ha ngaahi aʻusia ʻi haʻanau fekumi ke maʻu ʻa e maama fakalaumālié ʻi heʻenau moʻuí.

• Mahalo ʻe fiefia ʻa e kalasí ʻi haʻanau hiva fakataha pe fanongo ki ha foʻi hiva fekauʻaki mo e māmá, hangē ko e “Ko e ʻEikí ko ʻEku Maama” (Ngaahi Himi, fika 45). Ko e hā ʻoku akoʻi mai ʻe he foʻi hivá fekauʻaki mo e founga ʻoku hangē ai ʻa e ʻEikí ko ha maama? ʻE lava ke ʻomi ʻe he pōpoaki ʻa ʻEletā Robert  D. Hales ʻi he “Ngaahi Maʻuʻanga Tokoni Kehé” ha ngaahi fakakaukau loloto ange fekauʻaki mo e founga ke maʻu ai ha maama ʻoku lahi ange ʻi heʻetau moʻuí.

1 Sione 2:18–23, 26–28; 4:3; 2 Sione 1:7–11; 3 Sione 1:9–11; Sute

Kuo pau ke tau fakamālohia kitautolu ke fehangahangai mo e ngaahi akonaki halá.

• Mahalo ʻoku ʻi ai ha niʻihi ʻi he kau mēmipa hoʻo kalasí pe ko honau ngaahi ʻofaʻangá ʻoku nau faingataʻaʻia ke fakafepaki ki he ngaahi akonaki hala ʻoku tuʻu fakatuʻutāmaki ʻenau tuí. ʻE ala ʻaonga kiate kinautolu haʻanau ako ki he meʻa naʻe akoʻi ʻe Sione mo Sute fekauʻaki mo e hē mei he moʻoní. ʻE lava ke ke fakaafeʻi ha vaeua ʻe taha ʻo e kalasí ke nau kumi ha ngaahi fakamatala ʻo e ngaahi akonaki halá pe hē mei he moʻoní ʻi he 1 Sione 2:18–23, 26–28; 4:3; 2 Sione 1:7–11; 3 Sione 1:9–11 pea fekumi ʻa e vaeua ʻe tahá ki ha ngaahi fakamatala tatau ʻi he tohi ʻa Suté. Pe te nau kumi ʻa e tali ki he ngaahi fehuʻi hangē ko ʻení: ʻOku fakaʻuhingaʻi fēfē ʻe Sione mo Sute ʻa e fili ʻo Kalaisí? (vakai foki ki he Fakahinohino ki he Ngaahi Folofolá, “Fili ʻo Kalaisí,” scriptures.lds.org). ʻOku ʻi ai nai ha meʻa ʻi he ngaahi veesi ko ʻení ʻoku ngali felāveʻi mo e ngaahi faingataʻa ʻoku tau fehangahangai mo ia ʻi he ʻaho ní? Te tau fakamālohia fēfē kitautolu ke fehangahangai mo e ngaahi akonaki halá?

• ʻOku fakaʻaongaʻi ʻe Sute ha ngaahi fakataipe mālie ke fakamatalaʻi ʻaki ʻa e kau akonaki loí, pe ko kinautolu ʻoku “lea kovi … ki he ngaahi meʻa ʻoku ʻikai te nau ʻiloʻi” (Jude 1:10). ʻE lava ke ke fakaafeʻi ha kau mēmipa ʻe niʻihi ʻo e kalasí ke nau tā ʻi he palakipoé ha niʻihi ʻo e ngaahi fakataipe naʻe fakamatalaʻi ʻi he Sute 1:12–13 kae mateʻi ʻe he kau mēmipa kehe ʻo e kalasí pe ko e kupuʻi lea fē ʻoku tā ʻe he tokotaha ko iá. ʻOku fakamatalaʻi fēfē ʻe he ngaahi fakataipe ko ʻení ʻa e kau akonaki loí mo e fili ʻo Kalaisí? Hangē ko ʻení, ʻoku fakatupu fēfē ʻe he ngaahi ngāue koví ha “ngaahi ʻila … ʻi homou ngaahi kātoanga ʻofá”? Ko e hā te tau lava ʻo fai ke fakamālohia kitautolu ke fehangahangai mo e “kau manukí”? (vakai, Sute 1:18–21). Ko e hā ka fokotuʻu mai ai ʻe Sute ke tau “manavaʻofa” (Sute 1:22) ki he niʻihi ʻoku nau manuki ki he ongoongoleleí.

1 Sione 5

ʻI he ngāueʻi ʻetau tuí kia Kalaisi mo fanauʻi ʻi he ʻOtuá, te tau lava ʻo ikunaʻi ʻa e māmaní.

• ʻOku fokotuʻu mai ʻe ha taha ʻo e ngaahi ʻekitivitī ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ke fekumi ʻi he 1 Sione 5 ke ʻilo ʻa e founga ʻe lava ke tau ikunaʻi ai ʻa e māmaní. ʻE lava ke ke fakaafeʻi ha kau mēmipa ʻo e kalasí ke nau vahevahe ʻa e meʻa ne nau maʻú pea hiki ia ʻi he palakipoé. (Mahalo te ke fie tuku ange ha taimi ʻi he kalasí ke nau vakai taimi siʻi ai ki he vahé.) Pe te ke fakaafeʻi ʻa e kalasí ke nau lau ha ngaahi konga ʻo e pōpoaki ʻa ʻEletā Neil  L. Andersen “Ko Hono Ikunaʻi ʻo e Māmaní” (Ensign pe Liahona, Mē 2017, 58–62) pea vahevahe ʻa e meʻa ʻoku nau akó. Hangē ko ʻení, ko e hā ha ngaahi fakakaukau ʻoku nau maʻu mei he ngaahi talanoa naʻe vahevahe ʻe ʻEletā ʻEnitaseni fekauʻaki mo Palesiteni Tēvita O. Makei mo ʻEletā Bruce  D. Porter? Mahalo ʻe lava ke vahevahe ʻe he kau mēmipa ʻo e kalasí ha ngaahi sīpinga pē ʻanautolu ʻo ha kakai ʻoku nau ongoʻi ne nau feinga ke ikunaʻi ʻa e māmaní.

  

  ʻE lava ke tokoniʻi kitautolu ʻe he ongoongolelei ʻo Sīsū Kalaisí ke tau maʻu ʻa e melinó ʻi ha māmani faingataʻa.

3 Sione 1:1–4

ʻOku tau maʻu ʻa e fiefiá ʻi heʻetau tokoni ki he niʻihi kehé ke nau “ʻaʻeva ʻi he moʻoní.”

• Mahalo ʻoku ʻi ai ha kakai ʻi hoʻo kalasí ʻe lava ʻo mahino ki ai e meʻa naʻe ongoʻi ʻe Sione ʻi he taimi naʻá ne pehē ai “ʻikai ha fiefia lahi ange” ka ko ʻene fanongo ʻoku ʻaʻeva ʻa Keio (taha ʻo ʻene fānaú) ʻi he moʻoní. ʻE ala ʻaonga ki he kau mēmipa ʻo e kalasí haʻanau fevahevaheʻaki ʻenau ngaahi aʻusiá. ʻE lava ke mou kamata ʻaki hano lau fakataha ʻa e 3 Sione 1:1–4 pea mo e ngaahi veesi folofola ʻi he “Ngaahi Maʻuʻanga Tokoni Kehé.” Ko e hā ʻoku akoʻi mai ʻe he ngaahi veesi folofola ko ʻení fekauʻaki mo e tupuʻanga ʻo e fiefia moʻoní? ʻE lava ke talanoa ʻa e kau mēmipa ʻo e kalasí fekauʻaki mo ʻenau ongo ko e ngaahi mātuʻa, kau faifekau, kau taki ʻo e Siasí, pe kau faiakó, ʻi heʻenau ʻilo ʻoku ʻaʻeva ʻa e kakai ne nau akoʻí ʻi he moʻoní. ʻE lava ke ke fetuʻutaki ki ha kau mēmipa ʻe niʻihi ʻo e kalasí kimuʻa pea kamatá ke nau omi mo ha ngaahi laʻitā ʻo e kakai ne nau tokoniʻi ke nau haʻu kia Kalaisi pea fakamatala fekauʻaki mo ʻenau ngaahi aʻusiá.

Poupouʻi e Ako ʻi ʻApí

ʻE akoʻi fēfē nai kitautolu ʻe he ngaahi fakataipe hangē ko e ngatá, fanga manu kapakaú, mo e fanga lami naʻe tāmateʻí, fekauʻaki mo e palani ʻa e ʻOtuá ki Heʻene fānaú? Fakaafeʻi ʻa e kau mēmipa ʻo e kalasí ke nau fakakaukau ki he fehuʻi ko ʻení ʻi heʻenau ako ʻa e tohi ʻa Fakahaá ʻi he ngaahi uike ka hoko maí.

Ngaahi Maʻuʻanga Tokoni Kehé

1–3 Sione; Sute

ʻOku kapusi ʻe he māmá ʻa e fakapoʻulí.

Naʻe akoʻi ʻe ʻEletā Robert  D. Hales ʻa e founga te tau lava ai ʻo kapusi ʻa e fakapoʻulí mei heʻetau moʻuí kae ʻaʻeva ʻi he māmá:

“ʻI heʻeku kei siʻí, naʻá ku faʻa heka ʻi heʻeku pasikalá ki ʻapi mei he ako pasiketipoló ʻi he poʻulí. Naʻá ku fakapipiki ha kiʻi fakafonu hangē ha foʻi peá ki he vaʻe ʻo ʻeku pasikalá. Pea ʻi heʻeku ʻaká, ʻe hanga ʻe he vilo ʻa e foʻi vaʻé ʻo faʻu ha ʻuhila ʻa ia naʻá ne ʻomi ha kiʻi ulo. Ko ha foʻi ʻenisinia siʻisiʻi ka naʻe ola lelei. Ka naʻe fie maʻu ia ke u ʻaka kae toki moʻui! Naʻá ku ʻilo ai kapau ʻe tuku ʻeku ʻaká, ʻe mate ʻa e kiʻi māmá. Naʻá ku ʻilo foki ko e taimi ʻoku ou ‘femoʻuekina’ ai [TF 58:27] ʻi he ʻaká, ʻe toe ulo lahi ange ʻa e kiʻi māmá pea ʻe mole ai ʻa e fakapoʻuli ʻi muʻa ʻiate aú.

“ʻOku maʻu ʻa e maama fakalaumālié mei he ʻaka fakalaumālie ʻi he ʻaho kotoa peé. ʻOku maʻu ia mei he lotú, ako ʻo e folofolá, ʻaukaí, mo e ngāue tokoní—mei hono moʻui ʻaki ʻo e ongoongoleleí mo e talangofua ki he ngaahi fekaú” (“Out of Darkness into His Marvelous Light,” Ensign, May 2002, 71).

Ngaahi veesi folofola fekauʻaki mo e tokoni ki he niʻihi kehé ke nau ʻaʻeva ʻi he moʻoní.

• Teutalōnome 6:6–7

• Lea Fakatātā 22:6

• Sione 4:36

• 1 Tesalonika 3:9

• Mōsaia 4:14–15

• ʻAlamā 17:1–2; 26:11–37

• Tokāteline mo e Ngaahi Fuakava 18:10–16; 50:22

Fakatupulaki ʻo ʻEtau Founga Akoʻí

Lotua ʻa e kau mēmipa hoʻo kalasí. Hangē ko e lotu ʻa e Fakamoʻuí maʻa Pitá (vakai, Luke 22:32), ʻoku totonu ke ke lotua ʻa e ngaahi hingoa ʻo kinautolu ʻokú ke akoʻí, ʻo feinga ke ʻiloʻi ʻenau ngaahi fiemaʻu tukupaú. ʻI hoʻo fai iá, ʻe hanga ʻe he Tamai Hēvaní ʻo “teuteuʻi honau lotó” ( ʻAlamā 16:16) mo tokoni atu ke ke ʻilo ʻa e meʻa ke akoʻí kae lava ke ke feau ʻenau ngaahi fie maʻú (vakai, Ko e Faiako ʻi he Founga ʻa e Fakamoʻuí, 6).