Oi Kemuni E Dua na Qasenivuli ena Lotu i Jisu Karisito.

O sa kacivi mai vua na Kalou mo vakavulici ira na Luvena ena ivakarau ni iVakabula. O sa mai tabaki ki na veikacivi oqo ena kaukauwa kei na lewa ni Nona matabete tabu. Kevaka mada ga o sega ni kenadau ena veivakavulici, ni ko bula kilikili, masu e veisiga, ka vulica na ivolanikalou, ena solia vei iko na Tamada Vakalomalagi na veivakauqeti kei na kaukauwa ni Yalo Tabu (raica na 2 Nifai 33:1).

Era sa luvena na Kalou o ira sa nuitaki mo karona, ka kila o Koya na ka era gadreva kei na sala vinaka duadua mera vukei kina. Ko na dusimaki tiko mai vua na Yalo Tabu, ni ko vakavakarau tiko kei na gauna o veivakavulici tiko kina. Ena vakatakila vei iko o Koya na ka mo cavuta kei na ka mo cakava.

Na inaki bibi ni kena vulici na kosipeli o ya me veisautaka na bula. Na nomu inaki vaka qasenivuli o ya mo vukei ira o vakavulica mera cakava nodra igu taucoko mera saumaki mai ki na kosipeli i Jisu Karisito—na lalawa e lako sivita yani na gauna ni kalasi. Sureti ira o vakavulica mera cuqena na vakaitavi ka gumatua ena nodra vulica na ivakavuvuli ni vunau i Jisu Karisito ka cakava na ka era sa vulica. Vakayaloqaqataki ira mera vuli vaka tamata yadua ka vakamatavuvale ena taudaku ni kalasi me sa usutu ni nodra vuli ena kosipeli. Ni ra sa vakabauta nodra vuli yadua ka vakamatavuvale, era na sureta kina na Yalotabu ki na nodra bula ka vakalougatataki vakatitobu ni vakatauvatani mai na ka e cakava o qasenivuli.

Mo vakavulica duadua ga na vunau ni kosipeli vakalesuimai i Jisu Karisito sa tiko ena ivolanikalou kei na nodra vosa na parofita edaidai. Na vunau savasava—tawamudu, me baleta na dina ka sega ni veisau me vaka e vakavulica na Kalou vei ira na Nona italai—ena sureta na Yalotabu ni sa tu vua na kaukauwa me veisautaka na bula.

Na veikacivi ni veivakavulici sa dua na veidinadinati tabu, ka sa ivakarau ni bula me tuburi keda na yalomarau ena veigauna eso. Ia mo nanuma tiko ni sa kacivi iko na Kalou, ka na sega vakadua ni biuti iko. Oqo na cakacaka ni Turaga, ni ko na qarava “ena yalomudou taucoko, igu, vakasama kei na kaukauwa” (V&V 4:2), ena vakalevutaka o Koya na nomu gugumatua, isolisoli, kei na taledi, ka veivakalougatataki na nomu veiqaravi ki na nodra bula o vakavulica tiko.