Vakayagataki ni Lako Mai, Mo Muri Au—Me Baleta na Matawilivola ni Siga Tabu

Vakarau mo Veivakavulici ena Matawilivola ni Siga Tabu

Na itikotiko e dodonu me vanua ni kena vulici na kosipeli. Oqo e ka dina vei iko kei ira o vakavulica. Ni ko vakarau mo veivakavulici, tekivuna ena nomu gauna vata kei na ivolanikalou. Na nomu vakavakarau bibi duadua ena yaco ni ko vakasaqara na veivakauqeti ni Yalo Tabu.

Sa tiki bibi talega naLako Mai, Mo Muri Au—Me Baleta na Tamata Yadua kei na Matavuvale mo vakavakarau kina. Ena vukea mo kila vakatitobu kina na ivakavuvuli vakaivunau e kunei ena ivolanikalou. Ena rawa talega mo vakauqeta ka sureti ira na lewe ni kalasi mera vakayagataka na Lako Mai, Mo Muri Au—Me Baleta na Tamata Yadua kei na Matavuvale me laveti cake kina na nodra dui vulica yadua ka vakamatavuvale na ivolanikalou (mo vukei kina, raica na “Vakasama me Baleta na Vakayaloqaqataki ni Vuli ni Tamata Yadua kei na Matavuvale” ena ivurevure oqo). Ni ko cakava, nanuma mo raici ira vakabibi na lewe ni kalasi e dredre vei ira mera tokona ka vulica vakamatavuvale na ivolanikalou.

Ni ko vakavakarau tiko, o na nanuma ka vakauqeti baleti ira o vakavulica tiko, na kena vakalougatataki na nodra bula ena ivakavuvuli ni ivolanikalou, kei na sala mo vakauqeti kina ira mera kunea na ivakavuvuli oqori ena gauna era vulica kina vakai ira na ivolanikalou.

Vakasama ni Veivakavulici

Ni ko tuvanaka tiko na nomu veivakavulici, o na vakauqeti tale tiko ni ko vakadikeva tiko yani na ituvatuva ena ivurevure oqo. Kakua ni nanuma ni vakasama oqo sa ivakasala vakaituvatuva ia era sa vakatutu ga me caudreva nomu vakauqeti. O sa kilai ira tiko na nomu lewe ni kalasi, ka sa kilai ira tale tikoga na Turaga. Ena vakauqeti iko ena sala vinaka duadua mo vukea na kalasi mera yavutaki cake ena vulici ni kosipeli era cakava tiko mai vale.

Sa vuqa tale tiko na ivurevure mo vakavakarau kina, oka kina na vakasama ena Lako Mai, Mo Muri Au—Me Baleta na Tamata Yadua kei na Matavuvale kei na mekasini ni Lotu. Na ikuri ni kena ivakamacala kei na ivurevure tale eso, raica na “iKuri ni iVurevure.”

Eso na Ka me Nanumi Tiko

• Na noda itikotiko sa vanua uasivi duadua me vulici kina na kosipeli. Sa nomu itavi bibi vaka-qasenivuli o ya mo tokona, vakayaloqaqataka, ka laveta cake na vulici ni kosipeli ena itikotiko.

• Na nodra saumaki na lewe ni kalasi ki na kosipeli i Jisu Karisito ena titobu cake ni ra sa kila vinaka ka bulataka na ivunau dina. Vakayaloqaqataki ira mera vola ka cakacakataka na veivakauqeti ni Yalo Tabu vei ira.

• Na veivakavulici e sega walega ni veivakasalataki, ia sa sega talega ni liutaki e dua na veivosaki. Sa tiki ni nomu ilesilesi mo vakayaloqaqataka mera vakaitavi ia me veilaveti ka yavutaki tiko ena ivolanikalou.

• E vinakata na Tamada Vakalomalagi mo qasenivuli gugumatua. Sa vakarautaka o Koya e vuqa na ivurevure mo gugumatua kina, vakakina ena soqoni ni matabose ni qasenivuli. Ena veisoqoni oqo mo veivakasalataki vata kei ira na qasenivuli me baleta na ibolebole o na rawa ni sotava. Sa rawa talega me veivosakitaki ka vakatovotovotaki na veivakavulici Vakarisito.

• Era na vuli vinaka na tamata ni soli na madigi mera veivakavulici. Ena so na gauna, mo vakatara vei ira na lewe ni kalasi kei ira na itabagone, mera vakavulica e dua na tiki ni lesoni. Me yavutaki na lewa oqo ena nodra gagadre kei na gumatua na lewe ni kalasi. Ke o sa sureta e dua na lewe ni kalasi me veivakavulici, taura na gauna mo vukei koya me vakavakarau ena kena vakayagataki na vakasama e tiko ena ivurevure oqo vakakina ena Lako Mai, Mo Muri Au—Me Baleta na Tamata Yadua kei na Matavuvale. Nanuma tiko ni ko sa kacivi mo qasenivuli, sa nomu itavi na veika me vakavulici ena kalasi.

• Na ivurevure oqo e oka kina na ituvatuva ni veimacawa ni dua na yabaki, vakavo ga na rua na Siga Tabu e vakayacori kina na koniferedi raraba. Ena vei-Siga Tabu e sega ni caka kina na Matawilivola ni Siga Tabu ena vuku ni koniferedi ni iteki se dua tale na vuna, mera na wilika tikoga mai vale na vei matavuvale na Veiyalayalati Vou me vaka sa tuvanaki toka ena ituvatuva. Ni gadrevi me donu tiko vakaituvatuva na kalasi ni Matawilivola ni Siga Tabu, sa rawa mo calata e dua na lesoni se semata vata e rua. Me kakua kina na veilecayaki, me veivakasalataki taumada o peresitedi ni Matawilivola ni Siga Tabu vei ira na kena qasenivuli me baleta na veisau vakaoqo.