Boni Ngkoe te Tia Reirei n Ana Ekaretia Iesu Kristo

Ko a tia ni weteaki iroun te Atua bwa ko na reireiniia Natina n ana kawai te Tia Kamaiu. Ko kamatoaaki ibukin te wewete aei man te kariaia are irouia Ana nakoanibonga aika tabu. E ngae ngke bon tiaki ngkoe te tia reirei ae mwaatai, ngkana ko maiuna te itiaki, tataro ni katoa bong, ao ni kamatebwaia koroboki aika tabu, Tamara are i Karawa e na anganiko ana kairi ao mwaakan te Tamnei ae Raoiroi ni buokiko n tokanikai (taraa 2Nibwaai 33:1).

Naake ko onimakinaki bwa ko na tararuaia bon natin Tamara are i karawa, ao E ata te bwai ae a kainnanoia ao te kawai ae tamaroa are a na buokaki iai. Rinanon te Tamnei ae Raoiroi, te Atua e na kairiko ngkai ko katauraoi ao ngkai ko anga reirei. E na kaoti nakoim bwaai ake ko na riai n taekin ao bwaai ake ko riai ni karaoi (taraa 2Nibwaai 32:5).

Te oi n iango ae kakaawaki ibukin te anga reirei ao reiakinan te euangkerio bon kamatoan rairakira nakon Tamara are i Karawa ao Iesu Kristo. Am kouru ngkoe te tia reirei bon te buokiia naake ko reireiniia bwa a karaoa aia kabanea ni konaa ni kamatoa rairakiia nakon ana euangkerio Iesu Kristo–te waaki are e aki toki i nanon te kiraati. Kaoiia naake ko reireiniia bwa a na ira buakon reiakinan taekan Iesu Kristo ao Ana Euangkerio ao ni mwakurii baike a reiakinna. Kaungaia bwa a na karaoa aia kamatebwai ibon irouia ke aia utu itinanikun te kiraati are bon ngaia oin aia kamatebwai n te euangkerio. N aia tai ni karaoa te mwakuri n kamatebwai ibon irouiia ao aia utu, a na bon kaoa te Tamnei inanon maiuia, ao bon te Tamnei are e karika te rairaki ni koaua. Bwaai ni kabane ake ko karaoi ngkai tabem bwa te tia reirei ngkoe e na riai ni kairiia nakon te kaantaninga ae tabu aei.

Anga reirei iaon reirein Ana euangkerio Iesu Kristo ae kaokaki n aron are a kuneaki ni koroboki aika tabu ao n aia taeka burabeti ni bong aikai. Reirei aika itiaki—akea tokiia, koaua aika aki bibitaki ake a reiakinaki iroun te Atua ao Ana toro—a kaoa te Tamnei ao iai mwakana ni bita te maiu.

Te wewete n anga reirei bon te onimakinaki ae kakannato, ao e na bon rereke n tabetai te nano ae ko a aki konaa ni karaoia. Ma uringa bwa Tamam are i Karawa ngaia ae e weteiko ao E na bon aki kitaniko. Aio bon ana mwakuri te Uea, ao ngkai kam beku “ma nanomi, marurungimi, ami iango ao korakorami ni kabane” (Reirei Ao Berita Aika Tabu 4:2.), E na karababa ami konabwai, bwaai ake iroumi, ao tarena, ao ami mwakuri a na kakabwaiai mauia te koraki ake kam reireiniia.