Vakayagataki ni Lako Mai, Mo Muri Au—Baleta na Vuli ni Sigatabu

Vakarau tiko mo Veivakavulici ena Vuli ni Sigatabu

Na vuli yadudua kei na matavuvale e vale me usutu ni vuli kosipeli. Oqo e ka dina vei iko kei ira o vakavulica. Ni o vakavakarau mo veivakavulici, tekivu ena nomu vakila vakataki iko na veika e sotavi ena ivolanikalou. Na nomu vakavakarau bibi duadua ena yaco ni o vakasaqara na ivolanikalou ka vakasaqara na veivakauqeti ni Yalo Tabu.

NaLako Mai, Mo Muri Au—Baleta na Tamata Yadua kei na Matavuvale sa dua na tiki bibi ni nomu vuli vakai iko kei na nomu vakavakarau mo veivakavulici. Ena vukea na nomu rawata e dua na kilamatata titobu cake ni ivakavuvuli vakaivunau e kunei ena ivolanikalou. Ena rawa talega mo vakauqeti ka sureti ira na lewe ni kalasi mera vakayagataka na Lako Mai, Mo Muri Au—Baleta na Tamata Yadua kei na Matavuvale me laveti cake kina na nodra dui vulica yadua ka vakamatavuvale na ivolanikalou (mo vukei kina, raica na “Vakasama me Baleta na Vakayaloqaqataki ni Vuli ni Tamata Yadua kei na Matavuvale” ena ivurevure oqo). Ni ko cakava, nanuma mo raici ira vakabibi na lewe ni kalasi e dredre vei ira mera tokona ka vuli ivolanikalou vakamatavuvale kei na lotu vakamatavuvale.

Ni ko vakavakarau tiko, o na nanuma ka vakauqeti baleti ira o vakavulica tiko, na kena vakalougatataki na nodra bula ena ivakavuvuli ni ivolanikalou, kei na sala mo vakauqeti kina ira mera kunea na ivakavuvuli oqori ena gauna era vulica kina vakai ira na ivolanikalou.

Vakatutu ni Veivakavulici

Ni o vakavakarau tiko mo veivakavulici, o na rairai rawata na ikuri ni veivakauqeti ena nomu vakadikeva na ituvatuva ena ivurevure ni vuli oqo. Kakua ni raica na veivakasama oqo me idusidusi muri vakamatailalai ia me ra sa vakatutu ga ni kena vakayadrati na nomu veivakauqeti. O kila tiko na lewe ni nomu kalasi, ka na yaco mo kilai ira vinaka cake sara ni dou sa vuli vata ena kalasi. E kilai ira talega na Turaga, ka na vakauqeti iko ena sala vinaka duadua mo vukea na kalasi mera yavutaki cake ena vulici ni kosipeli era cakava tiko mai vale.

E vuqa na ivurevure tale eso sa rawa ni o vakayagataka ena nomu vakavakarau, oka kina na vakasama mai na Lako Mai, Mo Muri Au — Baleta na Tamata Yadua kei na Matavuvale kei na mekasini ni Lotu. Na ikuri ni ivakamacala me baleta oqo kei na ivurevure tale eso, raica na iwase ka kena ulutaga na “iKuri ni iVurevure” ena ivurevure oqo.

Eso na Ka Me Nanumi Tiko

• Ena mana sara na vulici ni kosipeli ni sa yavutaki e loma ni vuvale. Ni o qasenivuli, sa nomu itavi bibi mo tokona, vakayaloqaqataka, ka tara cake na vulici mai vale ni kosipeli vei lewe ni kalasi.

• Na nodra saumaki na lewe ni kalasi ki na kosipeli i Jisu Karisito ena titobu cake ni ra sa kilamatata ka bulataka na ivunau dina. Vakayaloqaqataki ira mera vola ka cakacakataka na veivakauqeti ni Yalo Tabu vei ira.

• Na veivakavulici e levu cake mai na veivunauci, ia e levu cake sara talega mai na kena liutaka walega e dua na veivosaki. Sa tiki ni nomu ilesilesi mo vakayaloqaqataka na vakaitavi e veilaveti ka yavutaki tiko ena ivolanikalou. Sa dodonu talega mo wasea na vakasama veivakauqeti o a ciqoma ni o vulica na ivolanikalou.

• Nanuma tiko ni vuqa na lewe ni kalasi e tu na nodra veikasotavi vakaibalebale ena nodra vuli mai vale ena ivolanikalou vata ga o na veivosaki kina ena kalasi. Sa rawa mo tokona na nodra vulica na ivolanikalou ena nomu solia vei ira na madigi me ra wasea na veika era sa vulica tiko e vale.

• E vinakata na Tamada Vakalomalagi mo qaqa ena nomu itavi vakaqasenivuli. Sa vakarautaka tu o Koya e vuqa na ivurevure me vukei iko mo qaqa, okati kina na soqoni ni matabose ni qasenivuli. Ena vei soqoni oqo ena rawa mo veitalanoataka kina kei ira eso tale na qasenivuli na vei bolebole o sotava tiko. E rawa talega ni o veitalanoataka ka taurivaka na ivakavuvuli eso ni veivakavulici va-Karisito.

• Era na vuli vinaka na tamata ni soli na madigi mera veivakavulici. Ena so na gauna, mo vakatara vei ira na lewe ni kalasi, oka kina o ira na itabagone, mera vakavulica e dua na tiki ni lesoni. Me yavutaki na lewa oqo ena nodra gagadre kei na rawaka na lewe ni kalasi. Ke o sa sureta e dua na lewe ni kalasi me veivakavulici, taura na gauna mo vukei koya me vakavakarau eliu ena kena vakayagataki na vakasama e tiko ena ivurevure oqo vakakina ena Lako Mai, Mo Muri Au—Me Baleta na Tamata Yadua kei na Matavuvale. Nanuma tiko ni ko sa kacivi mo qasenivuli, sa nomu itavi taucoko na veika me vakavulici ena kalasi.

Na ivurevure ni vuli oqo e oka kina na vakavulici ni ituvatuva ni veimacawa ena loma ni yabaki. Ena vei-Sigatabu ni sega ni vakayacori na Vuli ni Sigatabu, na matavuvale ena tomana tiko me wilika na Veiyalayalati Makawa e vale me vaka na ituvatuva e tuvai koto ena Lako Mai, Mo Muri Au—Me Baleta na Tamata Yadua kei na Matavuvale Ni sa vakayacori na Vuli ni Sigatabu, o na digitaka beka mo lade se cokotavata na lesoni.