mtu alizungumza katika darasa la kanisa

Kutumia Njoo, Unifuate—Kwa Ajili ya Shule ya Jumapili

Kujiandaa Kufundisha katika Shule ya Jumapili

Kujifunza binafsi na kama familia nyumbani kunapaswa kuwa kitovu cha kujifunza injili. Hii ni kweli kwako na kwa wale unaowafundisha. Unapojiandaa kufundisha, anza kwa kuwa na uzoefu wako mwenyewe katika maandiko. Maandalizi yako muhimu zaidi yatatokea wakati unapopekua maandiko na kutafuta mwongozo wa Roho Mtakatifu.

Njoo, Unifuate—Kwa Ajili ya Watu Binafsi na Familia ni sehemu muhimu kwa vyote kujifunza kwako binafsi na maandalizi yako ya kufundisha. Itakusaidia kupata uelewa wa kina wa kanuni za mafundisho zinazopatikana katika maandiko. Itakuwezesha pia kuwatia moyo na kuwaalika washiriki wa darasa kutumia Njoo, Unifuate—Kwa Ajili ya Watu Binafsi na Familia ili kuboresha kujifunza maandiko kwao binafsi na kama familia (kwa msaada katika hili, ona “Mawazo ya Kuhimiza Kujifunza Binafsi na Kifamilia” katika nyenzo hii). Unapofanya hivi, kumbuka kuwa makini kwa washiriki wa darasa ambao mazingira ya familia zao yanaweza yasiruhusu kujifunza maandiko kama familia na jioni ya familia nyumbani kila mara.

Wakati wa maandalizi yako, mawazo na fikra vitakujia kuhusu watu unaowafundisha, jinsi kanuni katika maandiko zitakavyobariki maisha yao, na jinsi unavyoweza kuwatia moyo kuzigundua kanuni hizo wanapojifunza maandiko kwa ajili yao wenyewe.

Mawazo ya Kufundisha

Unapojiandaa kufundisha, ungeweza kupata mwongozo wa ziada kwa kuchunguza mihutasari katika nyenzo hii. Fikiria mawazo haya kama sio maelekezo ya hatua kwa hatua lakini badala yake ni kama mapendekezo ya kuchochea kupata mwongozo wako mwenyewe. Unawajua washiriki wa darasa lako, na utapata kuwajua hata vizuri zaidi pale mnapojifunza pamoja darasani. Bwana anawajua pia, na atakupa mwongozo wa njia nzuri zaidi za kuwasaidia washiriki wa darasa kujenga juu ya kujifunza injili wanakofanya majumbani mwao.

Nyenzo nyingine nyingi zinapatikana kwa ajili yako ili kuweza kutumia wakati unapojiandaa, ikiwa ni pamoja na mawazo katika Njoo, Unifuate—Kwa Ajili ya Watu Binafsi na Familia na magazeti ya Kanisa. Kwa maelezo zaidi kuhusu nyenzo hizi na zingine, ona sehemu yenye kichwa cha habari “Nyenzo za Ziada” ndani ya nyenzo hii.

Baadhi ya vitu vya Kukumbuka

• Kujifunza Injili kunafanikiwa zaidi wakati kitovu chake kinapokuwa nyumbani. Kama mwalimu, una wajibu muhimu wa kuunga mkono, kutia moyo, na kujenga juu ya washiriki wa darasa kujifunza injili nyumbani.

• Uongofu wa washiriki wa darasa katika Yesu Kristo na injili Yake utaongezeka wanapoelewa na kutumia mafundisho ya kweli. Wahimize kuandika na kutendea kazi misukumo wanayopokea kutoka kwa Roho Mtakatifu.

• Kufundisha ni zaidi ya kutoa mhadhara, lakini pia ni zaidi ya kuongoza tu majadiliano. Sehemu ya wajibu wako ni kutia moyo ushiriki ambao unaadilisha na msingi wake ukiwa katika maandiko. Unapaswa pia kushiriki umaizi wenye kushawishi ambao ulipokea pale ulipojifunza maandiko.

• Kumbuka kwamba washiriki wengi wa darasa wanapata uzoefu wa maana wanapojifunza maandiko yale yale nyumbani ambayo mtajadili darasani. Unaweza kuunga mkono kujifunza maandiko kwa kuwapa nafasi za kila mara za kuelezea wanachojifunza nyumbani.

• Baba wa Mbinguni anataka wewe ufanikiwe kama mwalimu. Ametoa nyenzo nyingi ili kukusaidia, ikiwa ni pamoja na mikutano ya baraza la walimu. Katika mikutano hii unaweza kushauriana na walimu wengine kuhusu changamoto zinazokukabili. Unaweza pia kujadili na kufanyia mazoezi kanuni za kufundisha kama Kristo.

• Watu hujifunza vizuri zaidi wanapokuwa na nafasi ya kufundisha. Mara kwa mara, fikiria kuwaruhusu washiriki wa darasa, ikijumuisha vijana, kufundisha sehemu ya somo. Fanya uamuzi huu kulingana na mahitaji na uwezo wa washiriki wa darasa. Kama unamualika mshiriki wa darasa kufundisha, chukua muda kumsaidia kujiandaa mapema kwa kutumia mawazo yanayopatikana katika nyenzo hii na katika Njoo, Unifuate—Kwa Ajili ya Watu Binafsi na Familia. Kumbuka kwamba kama mwalimu aliyeitwa, unawajibika ipasavyo kwa kile kinachofundishwa katika darasa.

Nyenzo hii inajumuisha muhtasari wa kufundisha kwa kila wiki ya mwaka. Wakati wa Jumapili ambayo Shule ya Jumapili haifanyiki, washiriki wa darasa wanaweza kuendelea kusoma Agano la Kale nyumbani kufuatana na ratiba ya muhtasari katika Njoo, Unifuate—Kwa Ajili ya Watu Binafsi na Familia. Wakati Shule ya Jumapili inafanyika, unaweza kuchagua kuruka somo au kuunganisha masomo mawili.