“Lēsoni 90—Tokāteline mo e Ngaahi Fuakava 79–80: Malanga ʻAki ʻa e Ngaahi Ongoongo Fakafiefia ʻo e Fiefia Lahi,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 79–80,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 90: Tokāteline mo e Ngaahi Fuakava 77–80
Tokāteline mo e Ngaahi Fuakava 79–80
Malanga ʻAki ʻa e Ngaahi Ongoongo Fakafiefia ʻo e Fiefia Lahi
ʻI hono tali ʻe he fuofua Kāingalotú ʻa e pōpoaki ʻo hono Fakafoki Mai ʻo e Ongoongoleleí, naʻa nau maʻu ha holi lahi ke vahevahe ʻa e ongoongolelei ʻo Sīsū Kalaisí mo e niʻihi kehé. Naʻe vahevahe ʻe ha niʻihi ʻenau tuí mo e kau mēmipa ʻo e fāmilí mo e ngaahi kaungāmeʻá. Naʻe tali ʻe ha niʻihi ʻa e ui mei he Fakamoʻuí ke ngāue fakafaifekau. ʻE lava ke tokoni ʻa e lēsoni ko ʻení ki he kau akó ke nau vahevahe ʻa e ongoongolelei ʻa e Fakamoʻuí ʻi he kotoa ʻo ʻenau moʻuí.
Ngaahi ʻEkitivitī Ako ʻOku Ala Fakahokó
Ngaahi faingamālie ke vahevahe ʻa e ongoongolelei ʻo Sīsū Kalaisí
Tokoni ki he kau akó ke nau ʻiloʻi ʻa e ngaahi faingamālie ke vahevahe ai ʻa e ongoongolelei ʻo Sīsū Kalaisí. Fakakaukau ke fakaafeʻi ʻa e kau akó ke lau ʻa e fakamatalá ni mo aleaʻi e ngaahi fehuʻi ko ʻení ʻo tautau toko ua pe ʻi ha fanga kiʻi kulupu iiki.
Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:
Tatau ai pē pe ko e fē ha feituʻu ʻokú ke ʻi ai ʻi he māmaní, ʻoku lahi e ngaahi faingamālie ke vahevahe ai e ongoongo fakafiefia ʻo e ongoongolelei ʻo Sīsū Kalaisí ki he kakai te ke fetaulaki, ako, nofo fakataha pe ngāue mo feohi fakataha mo iá. (Dieter F. Uchtdorf, “Ngāue Fakafaifekaú: Ko Hono Vahevahe e Meʻa ʻI ho Lotó,” Liahona, Mē 2019, 15)
-
Ko e hā ha ngaahi aʻusia kuó ke maʻu ʻi hono vahevahe ʻa e ongoongolelei ʻo Sīsū Kalaisí?
-
Ko e hā ha ngaahi faingamālie ke vahevahe ai ʻa e ongoongoleleí ʻokú ke pehē te ke maʻu ʻi he kotoa hoʻo moʻuí?
-
ʻOku fēfē hoʻo tuʻunga loto-falala ki hoʻo malava ke vahevahe ʻa e ongoongolelei ʻo Sīsū Kalaisí? Ko e hā te ne lava ʻo fakafaingataʻaʻiaʻi hono vahevahe ʻo e ongoongoleleí?
Fakaafeʻi ʻa e kau akó ke nau feinga ʻi he faʻa lotu ke ʻiloʻi ha taha te nau lava ʻo vahevahe mo ia ʻa e ongoongolelei ʻo Sīsū Kalaisí. Kapau naʻe fakaafeʻi ʻa e kau akó ke fakakakato ʻa e ʻekitivitī teuteú, mahalo kuo nau ʻosi fakakaukau ki ha taha. Fakaafeʻi ʻa e kau akó ke hiki ʻa e hingoa ʻo e kakaí ni ʻi heʻenau tohinoa akó. Pe, kapau naʻe ʻikai ha taha te nau fakakaukau ki ai, fakaafeʻi kinautolu ke hokohoko atu ʻenau fakalaulauloto ki he ngaahi faingamālie te nau ala maʻu ke vahevahe ai ʻa e ongoongoleleí mo e niʻihi kehé. Poupouʻi ʻa e kau akó ke nau fekumi ki ha ueʻi fakalaumālie mei he Laumālie Māʻoniʻoní lolotonga e aʻusia fakaako ko ʻení.
Ngaahi ongoongo fakafiefia ʻo e fiefia lahi
ʻI he ngaahi fakahā ʻoku lekooti ʻi he Tokāteline mo e Ngaahi Fuakava 79–80, naʻe ui ʻe he Fakamoʻuí ha niʻihi fakafoʻituitui ʻe toko tolu ke nau ngāue fakafaifekau: Ko Sēleti Kaata, Sitīveni Puaneti, mo ʻĪteni Sāmita.
Lau ʻa e Tokāteline mo e Ngaahi Fuakava 79:1. Fekumi ki he founga naʻe fakamatalaʻi ai ʻe he ʻEikí ʻa e pōpoaki naʻá Ne kole kia Sēleti Kaata ke vahevahe mo e niʻihi kehé.
-
Ko e hā ha ngaahi lea naʻe makehe kiate koe mei he veesi ko ʻení? Ko e hā ʻoku fakaafeʻi kitautolu ʻe he Fakamoʻuí ke tau faí?
Tokoni ki he kau akó ke nau ʻiloʻi ʻoku fakaafeʻi kitautolu ʻe Sīsū Kalaisi ke vahevahe ʻa e fiefia ʻo ʻEne ongoongoleleí mo e tokotaha kotoa pē. Fakakaukau ke hiki ʻa e Ngaahi ongoongo fakafiefia ʻo e fiefia lahí ʻi he palakipoé. Fakaafeʻi ʻa e kau akó ke hiki ʻa e meʻa ʻoku nau ʻilo fekauʻaki mo Sīsū Kalaisi mo ʻEne ongoongolelei taʻengatá ʻa ia ʻokú ne ʻomi kiate kinautolu ha fiefia lahi.
Fakakaukau ki he moʻui ʻa e kakai naʻá ke hiki honau hingoá ʻi he kamataʻanga ʻo e lēsoní. Lekooti ʻi he tafaʻaki honau hingoá ʻa e founga ʻokú ke pehē ʻe lava ke ʻomi ai kiate kinautolu ʻa e fiefia ʻi he “ongoongo fakafiefia” ʻo e ongoongoleleí.
ʻOku ʻi he Tokāteline mo e Ngaahi Fuakava 79–80 ha ngaahi akonaki mei he Fakamoʻuí ʻe lava ʻo tokoni ki he kau akó ʻi heʻenau feinga ke vahevahe ʻa e ongoongoleleí. Fakakaukau ki ha ngaahi founga te ke lava ʻo tokoniʻi ai kinautolu ke nau ʻiloʻi ʻa e ngaahi akonaki ko ʻení. Ko e ʻekitivitī ko ʻení ko ha founga ia ʻe taha ke fakahoko ai ʻeni. ʻE lava ke liliu ia ke feau e ngaahi fiemaʻu hoʻo kau akó.
ʻOange ki he tokotaha ako takitaha ʻa e laʻipepa tufa “Malanga ʻaki ʻEku Ongoongoleleí.” Pe fakaafeʻi ʻa e kau akó ke faʻu ha saati tatau ʻi ha laʻipepa ʻoku teʻeki tohi ai ha meʻa pea ʻoange kiate kinautolu ʻa e fakahinohino ki he puha takitaha.
Malanga ʻaki ʻeku ongoongoleleí
Malanga ʻAki ʻEku Ongoongoleleí
ʻI hoʻo fai ʻa e ʻekitivitī ko ʻení, kumi ha ngaahi akonaki meia Sīsū Kalaisi ʻe lava ʻo tokoni atu ʻi hoʻo feinga ke vahevahe ʻa e fiefia ʻo ʻEne ongoongoleleí.
Lau ʻa e potufolofolá pea fakakakato ʻa e ngaahi fakahinohino ʻi he foʻi tapafā takitaha. Kapau ʻokú ke fiemaʻu ha konga ʻatā lahi ange, te ke lava ʻo fakaʻaongaʻi e tafaʻaki ʻe taha ʻo e laʻipepa tufá.
|
Tokāteline mo e Ngaahi Fuakava 79:2 Toe hiki ʻa e veesi ko ʻení ʻi he fakalea pē ʻaʻau. |
Tokāteline mo e Ngaahi Fuakava 79:3 Tā ha fakatātā ʻo e veesi ko ʻení. (Ko e ngaahi haʻinga uité ko ha ngaahi haʻinga kēleni ia pea ko ha fakataipe ia ʻo e kakai ʻoku nau tali ʻa e ongoongoleleí.) |
|
Tokāteline mo e Ngaahi Fuakava 79:4 Hiki ʻa e meʻa ʻokú ke tui ko e foʻi lea pe kupuʻi lea mahuʻinga taha ia ʻi he veesi ko ʻení pea mo ha fakamatala nounou ki he ʻuhinga ʻokú ke ongoʻi ai ʻoku mahuʻinga ke vahevahe ʻa e ongoongoleleí. |
Tokāteline mo e Ngaahi Fuakava 80:1 Kumi ha potufolofola fakataukei fakatokāteline pe ko ha potufolofola kehe ʻoku fekauʻaki mo e veesi ko ʻení. Hiki ʻa e fakamoʻoni fakafolofolá ʻi he tapafā ko ʻení. |
|
Tokāteline mo e Ngaahi Fuakava 80:2 Hiki ha ʻuhinga ʻe taha ʻokú ke pehē ʻoku ʻoange ai ʻe he ʻEikí ki he kau faifekaú ha ngaahi hoa. |
Tokāteline mo e Ngaahi Fuakava 80:3 Hiki ʻa e founga ʻokú ke ongoʻi ʻe lava ke fakafehoanaki ai ʻa e veesi ko ʻení ki heʻetau ngaahi feinga ke vahevahe ʻa e ongoongolelei ʻo Sīsū Kalaisí. |
|
Tokāteline mo e Ngaahi Fuakava 80:4 Hiki ha meʻa kuó ke fanongo, tui, pe ʻiloʻi ʻoku moʻoni fekauʻaki mo Sīsū Kalaisi pe ko ʻEne ongoongoleleí. Fakakau ʻa e ʻuhinga ʻe lava ke mahuʻinga ai ʻa e moʻoni ko iá ke fanongo ki ai ʻa e niʻihi kehé. |
Tokāteline mo e Ngaahi Fuakava 80:5 Lau ʻa e veesi ko ʻení ʻo hangē pē naʻe lea fakahangatonu atu ia kiate koé. Hiki ʻa e founga ʻe lava ai ʻe hono ʻiloʻi kuo ui koe ʻe he Fakamoʻuí ke ke vahevahe ʻa e ongoongoleleí, ʻo ʻoatu ha loto-falala ke ke fai iá. |
Ko ha founga ʻe lava ke fakaʻaongaʻi ai ʻa e laʻipepa tufa ko ʻení ko hono tomuʻa fakapapauʻi ʻa e lahi ʻo e taimi ʻe fiemaʻu ke fakakakato ai ʻe he kau akó ʻa e ʻekitivitī takitaha. ʻAi ke ʻilo ʻe he kau akó ʻa e taimi ʻoku tuku ange ke nau fakakakato ai ʻa e ʻekitivitī ʻi he puha takitaha pea seti ha uasi. Ko e taimi kotoa pē ʻoku tatangi ai ʻa e uasí, fakahinohinoʻi kinautolu ke paasi ʻenau laʻipepá ki ha tokotaha ako ʻe taha, lau ʻa e meʻa kuo tohi ʻe honau kaungāakó, pea fai ʻa e ʻekitivitī ʻi he puha hono hokó.
Hili ʻa e ʻekitivitī ko ʻení, fakahinohinoʻi e kau akó ke fakafoki ʻa e laʻipepá ki he tokotaha ʻoku aʻaná. Fakaafeʻi ʻa e kau akó ke lau ʻiate kinautolu pē ʻa e meʻa kotoa pē kuo hiki ʻi heʻenau laʻipepá. ʻE lava ke vahevahe ʻe he kau akó ha ngaahi fakakaukau mei honau kaungāakó pe ko ʻenau akó ʻoku nau ongoʻi ʻe tokoni ʻi heʻenau feinga ke vahevahe ʻa e fiefia ʻo e ongoongolelei ʻo Sīsū Kalaisí.
Ko hono vahevahe ʻo e meʻa kuo tau fanongo, tui, mo ʻilo ʻoku moʻoní
Fakakaukau ke toe vakaiʻi ʻa e Tokāteline mo e Ngaahi Fuakava 80:4. ʻOku kole mai ʻe he ʻEikí ʻi he veesi ko ʻení, ke tau vahevahe ʻa e meʻa kuo tau fanongo, tui, mo ʻiloʻi ʻoku moʻoní. Fakaafeʻi ha niʻihi ʻo e kau akó ke vahevahe ʻa e meʻa ne nau tohí pe ko ha kaungāako ʻi he foʻi tapafā ko iá.
Ke tokoni ke fakakaukauloto ʻa e kau akó ki he founga te nau lava ai ʻo fakaʻaongaʻi ʻa e meʻa kuo nau akó ke vahevahe ʻa e ongoongoleleí, fakakaukau ke vahevahe ha sīpinga ʻaki ha talanoa pe vitiō. ʻOku kau ai ʻa e foʻi vitiō “Good Things to Share” (2:21), ʻoku maʻu ʻi he ChurchofJesusChrist.org.
Good Things to Share
-
Ko e hā kuó ke ongoʻi ʻi he ʻahó ni kuó ne fakatupulaki hoʻo loto-holi ke vahevahe ʻa e fiefia ʻo e ongoongolelei ʻa e Fakamoʻuí?
-
Ko e hā ha ngaahi founga te ke lava ai ʻo fakaʻaongaʻi ʻa e ngaahi moʻoni kuó ke ako ʻi he ʻaho ní ʻi he kotoa hoʻo moʻuí?
Fakaafeʻi e kau akó ke lekooti ʻa e ngaahi ongo ne nau maʻu ʻe lava ʻo tokoni ke nau vahevahe ʻa e fiefia ʻo e ongoongolelei ʻa e Fakamoʻuí mo e niʻihi fakafoʻituitui ne nau ʻilo ʻi he kamataʻanga ʻo e kalasí. Poupouʻi ʻa e kau akó ke muimui ki heʻenau ngaahi ongó pea vahevahe ʻenau tuí mo e niʻihi kehé ʻi ha ngaahi founga ʻuhingamālie hangē ko e ngaahi fepōtalanoaʻaki fakatāutahá, pōpoaki text, pe ʻi he mītia fakasōsialé.