Talateu ki he Tokāteline mo e Ngaahi Fuakavá – Tohi Lēsoni ʻa e Faiako Seminelí

Ko e taumuʻa ʻa e Seminelí mo e ʻInisititiuti Fakalotú “ke tokoni ki he toʻu tupú mo e kakai lalahi kei talavoú ke fakaloloto ʻenau ului kia Sīsū Kalaisi mo ʻEne ongoongolelei kuo fakafoki maí, taau ke maʻu ʻa e ngaahi tāpuaki ʻo e temipalé, pea teuteuʻi kinautolu, honau ngaahi fāmilí, mo e niʻihi kehé ki he moʻui taʻengata mo ʻenau Tamai ʻi Hēvaní” (“Ko e Taumuʻa ʻa e Seminelí mo e ʻInisititiutí” [2022], ChurchofJesusChrist.org).

Ke tokoni ke aʻusia e taumuʻa ko ʻení, ʻoku ʻoange ʻe he tohi lēsoni ko ʻení ki he kau akó ha ngaahi aʻusia kehekehe ʻo e akó ʻo fakafou ʻi ha faʻahinga lēsoni kehekehe ʻe ua: Ngaahi lēsoni ʻo e Tokāteline mo e Ngaahi Fuakavá mo e ngaahi lēsoni Teuteu ki he Moʻuí. ʻOku fekauʻaki ʻa e ngaahi lēsoni ʻo e Tokāteline mo e Ngaahi Fuakavá mo e ngaahi konga folofola ʻoku fakamamafaʻi ʻi he uike takitaha ʻi he Haʻu, ʻo Muimui ʻIate Au—Maʻá e ʻApí mo e Lotú: Tokāteline mo e Ngaahi Fuakava 2025. ʻOku tokoni ʻa e ngaahi lēsoni Teuteu ki he Moʻuí ki he kau akó ke nau ako ke maʻu ha mālohi meia Sīsū Kalaisi pea fakaʻaongaʻi ʻEne ngaahi akonakí ke teuteu ki he ngaahi pole ʻo e moʻuí.

ʻI hono fakaʻaongaʻi e ngaahi fokotuʻu ki hono akoʻí ʻoku maʻu ʻi he ongo lēsoni ko ʻení pea muimui ki he fakahinohino ʻa e Laumālié, te ke lava ʻo tokoniʻi e kau akó ke nau fakaʻaongaʻi e mālohi ʻo Sīsū Kalaisí ʻi ha ngaahi tafaʻaki kehekehe ʻo ʻenau moʻuí—kau ai e fakalaumālié, fakasōsialé, fakaʻatamaí, mo e fakatuʻasinó. Te ke tokoni foki ke nau teuteu ki honau kahaʻú ʻi he tui ki he Tamai Hēvaní mo Sīsū Kalaisi.

ʻOku maʻu ʻa e tohi lēsoni ko ʻeni ʻa e faiakó ʻi he ʻinitanetí ʻi he Gospel Library ʻi he ChurchofJesusChrist.org, ʻa ia te ke lava foki ai ʻo maʻu ha PDF ʻo e tohi lēsoní ʻoku lava ke download. ʻOku maʻu foki ia ʻi he polokalama Gospel Library. Kapau ʻokú ke fie fakaʻaongaʻi ha tohi lēsoni kuo paaki, kātaki ʻo kole ia mei hoʻo kouʻotineita fakalotofonuá pe pule ki he polokalamá.

Ngaahi Meʻangāue ke Tokoni ki Hoʻo Teuteu ke Faiakó

Tatau ai pē pe ko e fē ʻa e faʻahinga lēsoni ʻokú ke akoʻí, ʻe tokoni atu ha ngaahi meʻangāue ʻe niʻihi ke ke teuteu ai.

Ko e Folofolá

Ko e ako fakataha mo e folofola ʻi he Haʻu, ʻo Muimui ʻIate Aú ko ha founga mahuʻinga ia ke teuteu ai ke akoʻi e kau akó. ʻOku fiemaʻu ʻe he ngaahi lēsoni ʻi he tohi lēsoni ko ʻení ha faiako ʻoku ueʻi fakalaumālie ke ne ako maʻu pē e folofolá mo fekumi ki he takaua ʻo e Laumālie Māʻoniʻoní. ʻI hoʻo ako maʻu pē ʻa e folofolá, te ke lava ʻo fakaapapauʻi moʻoni ʻe ueʻi koe ʻe he Tamai Hēvaní ʻo fakafou ʻi Hono Laumālié ki he founga ke fulifulihi ai e naunau ko ʻení ke feau ʻa e ngaahi fiemaʻu hoʻo kau akó.

Vakai Fakalūkufuá

ʻOku ʻoatu ha vakai fakalūkufua ʻi he kamataʻanga ʻo e uike takitaha ʻo e ngaahi lēsoni ʻo e Tokāteline mo e Ngaahi Fuakavá pea ʻi he kamataʻanga ʻo e kalasi takitaha ʻo e ngaahi lēsoni Teuteu ki he Moʻuí. ʻOku ʻomi ʻe he vakai fakalūkufua ko ʻení ha fakamatala pau ki he lēsoní ke tokoni ʻi hoʻo teuteu ke faiakó ʻo kau ai ʻa e:

• Ngaahi taumuʻa ʻo e lēsoní

• Ngaahi fakakaukau ki he teuteu ʻa e tokotaha akó

• Ko ha lisi ʻo ha ngaahi lēsoni fakataumuʻa, ʻū laʻipepa tufa, ngaahi ʻata, ngaahi vitiō, pe ʻū naunau kehe ʻe ala fiemaʻu ke tomuʻa teuteuʻi kimuʻa

ʻE lava ke tokoni hono toe vakaiʻi ʻo e vakai fakalūkufuá kimuʻa peá ke akoʻi ʻa e ngaahi lēsoni ʻoku fekauʻaki mo iá ke ke fakakaukauʻi pe ko e fē ʻa e naunau ke teuteu kimuʻá.

Kumi ʻa e vakai fakalūkufua fakauike ki he uike hoko mai ʻo e ngaahi lēsoni te ke akoʻí.

• Ko e hā ha fakamatala ʻokú ke maʻu heni ʻoku ʻaonga ke ke ʻilo kimuʻa?

• Te ke fakaʻaongaʻi fēfē ʻa e fakamatala ko ʻení ʻi hoʻo teuteu ke faiakó?

Ngaahi Tokoni Fakafaiakó

ʻOku ʻi he vakai fakalūkufua takitaha ʻoku ʻi muʻa ʻi he ngaahi lēsoni ʻo e Tokāteline mo e Ngaahi Fuakavá ha tokoni fakafaiako ʻokú ne fakamatalaʻi ha ngaahi founga pe tefitoʻi moʻoni mei he Ko e Faiako ʻi he Founga ʻa e Fakamoʻuí: Maʻa Kinautolu Kotoa ʻOku Faiako ʻi ʻApi pea ʻi he Lotú. ʻOku fakaʻilongaʻi ʻa e ngaahi tokoni ko ʻení ʻaki ʻa e fakaʻilongá ni: . ʻI hoʻo ongoʻi mateuteú, feinga ke fakahoko e ngaahi founga mo e ngaahi tefitoʻi moʻoni ko ʻení lolotonga hoʻo faiakó. Te ke fakatokangaʻi ʻe lava ke tokoni hono fakaʻaongaʻi ʻo e ngaahi fokotuʻu ko ʻení ke fakatupulaki hoʻo ngaahi taukei fakafaiakó.

ʻOku fakahinohinoʻi koe ʻe he tokoni fakafaiako ʻi he vakai fakalūkufua takitaha ki ha lēsoni ʻa ia ʻoku fakatātaaʻi ai ʻa e founga ngāue pe tefitoʻi moʻoni ʻoku fokotuʻu atú. Vakai ki he lēsoni ko iá ki he fakaʻilonga akó ke maʻu ha sīpinga ʻo e tokoni ʻoku fakatātāʻí. ʻOku tokoni foki ʻeni ke fakahinohinoʻi koe ki he Fakatupulaki Ngaahi Taukei ʻa e Faiakó ʻa ia ʻe lava ʻo tokoni atu ke ke ako lahi ange fekauʻaki mo e ngaahi founga fakafaiako pe ngaahi tefitoʻi moʻoni ʻoku fakamamafaʻí. Ka faingamālie ʻa e taimí mo e meʻa te ke malavá, fakakaukau ke fakaʻaongaʻi ʻa e ngaahi ako ko ʻení ko ha konga ʻo hoʻo teuteu lēsoní.

Toe vakaiʻi e tokoni fakafaiako ʻi he vakai fakalūkufuá ki ha fakamatala te ke akoʻi he uike hoko maí. Te ke feinga fēfē ke akoako fakaʻaongaʻi ʻa e fokotuʻu ko ʻení ʻi ha lēsoni hoko?

Ngaahi Fokotuʻu ki he Vave Hono Akoʻí

ʻOku kau ʻi he vakai fakalūkufua ki he seti takitaha ʻo e ngaahi lēsoni Teuteu ki he Moʻuí ha ngaahi fokotuʻu ki he vave hono akoʻí. ʻOku ʻomi ʻe he ngaahi fokotuʻu ko ʻení ha ngaahi fakakaukau ki he tuʻunga ʻe lava ke fakakau ai ʻa e ngaahi lēsoni ko ʻení ki ha fakahinohino ki he vave hono akoʻí. ʻE lava ke fakaʻaongaʻi ʻe he kau kouʻotineitá mo e kau pule ʻo e polokalamá ʻa e ngaahi fokotuʻu ko ʻení ʻi heʻenau faʻu ha fakahinohino ki he vave hono akoʻí.

Teuteu ‘a e Tokotaha Akó

ʻOku kau foki ʻi he vakai fakalūkufua takitaha ha ngaahi fokotuʻu ki hono tokoniʻi ʻo e kau akó ke teuteuʻi honau ʻatamaí mo e lotó ki he lēsoni takitaha. Te ke lava ʻo vakai ki he ngaahi fakakaukau ko ʻení ʻi he kamataʻanga ʻo e uiké pea fili ʻi he faʻa lotu ʻa e ngaahi fakakaukau ʻokú ke ongoʻi ʻe tokoni lelei taha ki hoʻo kau akó. ʻOku ʻikai fiemaʻu ke ke fakaʻaongaʻi ʻa e fokotuʻu kotoa pē ki he teuteu ʻa e tokotaha akó. Te ke lava ʻo fakafenāpasi kinautolu pe faʻu haʻo ngaahi fakakaukau pē ʻaʻau. ʻOku fakataumuʻa ha konga lahi ʻo e ngaahi fokotuʻu ko ʻení ke ʻoange ki he kau akó ʻi ha ʻaho ʻe taha pe lahi ange kimuʻa ‘i heʻenau aʻusia fakaakó.

Toe vakaiʻi e ngaahi fakakaukau ki he teuteu ʻa e tokotaha akó ʻi he vakai fakalūkufuá ki ha uike ʻo e ngaahi lēsoni te ke akoʻí. Fakakaukau pe ko e fē ngaahi fakakaukau te ke fakaʻaongaʻí, fulifulihí, pe ʻikai fakaʻaongaʻí. Kapau te ke loto ke fakaafeʻi hoʻo kau akó ke nau teuteu, te ke vahevahe fēfē ʻa e fakakaukau ko ʻení mo kinautolu? Te ke lava ʻo vahevahe ia ʻaki haʻo lea pe fakaʻaliʻali ia ʻi he fakaʻosinga ʻo e kalasi kimuʻá. Pe, kapau ʻe feʻunga, ʻave ia ʻi he ʻīmeilí pe ko ha polokalama feʻaveʻaki pōpoaki.

Ngaahi Fakahinohino ki hono Akoʻí

Te ke fakatokangaʻi ʻi he lēsoni takitaha ha fanga kiʻi puha ʻoku ʻi ai ha ngaahi fakahinohino maʻá e kau faiakó. ʻOku fakataumuʻa ʻa e ngaahi fakahinohino ki hono akoʻí ke tokoniʻi koe ʻi hoʻo teuteu ke faiakó. Te nau toe lava foki ʻo tokoni ke ke ʻiloʻi ʻa e founga ki hono fakaʻaongaʻi ʻo e ngaahi ʻekitivitī ako ʻoku fokotuʻu atu ʻi he lēsoní. ʻE lava ke nau fakamatalaʻi ʻa e taumuʻa ʻo e ngaahi ʻekitivitī ʻo e lēsoní pe ʻomi ha ngaahi fokotuʻu ki he founga hono liliu ʻa e kakano ʻo e lēsoní ke feau lelei ange ai ʻa e ngaahi fiemaʻu ʻa e kau akó. ʻE lava ke kau ʻi he ngaahi fokotuʻu ko ʻení ha ngaahi founga, fehuʻi, pe ʻekitivitī ʻe tokoni atu ke ke liliu ʻa e kanotohí mo e ngaahi ʻekitivitií ʻo ka fiemaʻu.

Toe vakaiʻi ha niʻihi ʻo e ngaahi fakahinohino ki hono akoʻí ʻi ha lēsoni ʻe vavé ni pē haʻo akoʻi. Ko e hā ha ngaahi liliu te ke ala fai ʻo makatuʻunga ʻi he ngaahi fakahinohino fakafaiako ʻokú ke maʻú?

Ngaahi ʻEkitivitī Ako ʻOku Ala Fakahokó

ʻOku ʻi he lēsoni takitaha ha ngaahi fakakaukau ki ha ngaahi founga te ke lava ai ʻo fakahoko ʻa e aʻusia fakaakó. ʻOku ʻikai fiemaʻu ia ke ke fakaʻaongaʻi kotoa ʻa e ngaahi ʻekitivitiī ʻoku fokotuʻu atú ʻi he ngaahi lēsoni ʻokú ke akoʻí.

Ke maʻu ʻe hoʻo kau akó ʻa e aʻusia lelei taha ʻe ala lavá, ʻoku totonu ke ke fakaʻaongaʻi ʻa e fakamatala ʻi he konga ko ʻení ko ha tataki kae ʻikai ko ha fakahinohino ke muimui pau ki ai. Kapau ko hoʻo toki kamata ʻeni ke hoko ko ha faiako seminelí, ʻe lelei taha ke kamata ʻaki haʻo muimui ofi ki he ngaahi ʻekitivitī ako kuo fokotuʻu atú. ʻI he lahi ange hoʻo aʻusiá, ʻe lava ke fakaleleiʻi hoʻo malava ko ia ke fulifulihi ʻa e kakano ʻo e tohi lēsoni ko ʻení ke feau lelei taha ʻa e ngaahi fiemaʻu hoʻo kau akó.

ʻE fakaafeʻi ʻa e kau akó ʻe he ngaahi ʻekitivitī lahi ʻoku fokotuʻu atu ki he akó ke nau fakakakato ia ʻi ha tohinoa ako. ʻOku ʻi ai ha PDF ʻo ha tohinoa ako ʻe lava ke fakaʻaongaʻi ʻe he kau akó ʻi he ChurchofJesusChrist.org/si/seminary/manuals Kātaki ʻo fetuʻutaki ki hoʻo kouʻotineitá pe pule polokalamá ke maʻu ha ngaahi tatau ʻo e tohinoa ko ʻení kuo paaki ki hoʻo kalasí, kapau ʻe fiemaʻu.

Ke maʻu ha tokoni ke ʻiloʻi e founga ke potupotutatau ai hono fakaʻaongaʻi e ngaahi ʻekitivitī ako ʻoku fokotuʻu atú mo hono fulihi ʻo e naunau fakalēsoní ke feau lelei ange e ngaahi fiemaʻu ʻa e kau akó, vakai, “Ako ki he Ohi pea Toki Fakafenāpasi e Naunau Fakalēsoni ʻa e Seminelí” ʻi he Ako ki he Naunau Fakalēsoni ʻa e Seminelí (2025). Mahalo ʻe ʻaonga taha ke fakakakato ʻa e ako ko ʻení ʻi loto ʻi he ngaahi ʻuluaki uike pē ʻo e taʻú.

Ngaahi Maʻuʻanga Tokoni Kehé

Ko e lahi taha ʻo e ngaahi lēsoní ʻoku ʻi ai ha konga “Ngaahi Maʻuʻanga Tokoni Kehe” ʻi he fakaʻosinga ʻo e lēsoní. ʻOku kau ʻi he konga ko ʻení ha fakamatala ʻe lava ʻo tokoni ke fakaloloto ʻa e akó. Te ke lava ʻo maʻu ha ngaahi tali ki ha ngaahi fehuʻi ʻe ala maʻu ʻe he kau akó pe kumi ha ngaahi fakamatala mei he kau taki ʻo e Siasí te ke ala fiemaʻu ke fakakau ʻi he lēsoní. ʻOku toki maʻu pē ʻa e konga ko ʻení kapau ʻokú ke lava ʻo maʻu ʻa e tohi lēsoni ʻa e faiakó ʻi he polokalama Gospel Library pe ko e Gospel Library ʻi he ʻinitanetí ʻi he ChurchofJesusChrist.org. ʻOku ʻikai fakakau ʻa e konga “Ngaahi Maʻuʻanga Tokoni Kehé” ʻi he tatau PDF ʻo e tohi lēsoni ʻa e faiakó.

Vakai pe ʻoku kau ʻi he lēsoni hoko ʻokú ke akoʻí ʻa e “Ngaahi Maʻuʻanga Tokoni Kehe.” ʻOku ʻi ai nai ha ngaahi fehuʻi, tali pe fakamatala ʻa e kau taki ʻo e Siasí ʻe ʻaonga ke vahevahe mo hoʻo kau akó?

Ngaahi ʻEkitivitī Fakalahi ki he Akó

ʻOku ʻi he konga ko ʻení, ʻa ia ʻoku fakakau foki ʻi he fakaʻosinga ʻo e lēsoní, ha ngaahi fakakaukau lahi ange ki hono fakahoko ‘a e aʻusia fakaakó. ʻOku kau ʻi he ngaahi ʻekitivitī ako ko ʻení ha ngaahi founga ke fulifulihi ai ʻa e ngaahi ʻekitivitī lolotonga ʻi he lēsoní, pe ngaahi founga ke akoʻi ʻaki ʻa e naunau ʻoku ʻikai fakakau ʻi he lēsoní. ʻOku toki fakakau pē ʻa e ngaahi ʻekitivitī ako ʻoku tānaki atú ʻi he tohi lēsoni ʻa e faiakó kapau ʻokú ke maʻu ia ʻi he polokalama Gospel Library pe ko e Gospel Library ʻi he ʻinitanetí ʻi he ChurchofJesusChrist.org. ʻOku ʻikai fakakau ʻa e konga ko ʻení ʻi he tatau PDF ʻo e tohi lēsoni ʻa e faiakó.

Kapau ʻoku kau ʻi hoʻo lēsoni hokó ha konga ki he “Ngaahi ʻEkitivitī Fakalahi ki he Akó”, toe vakaiʻi ʻa e ngaahi ʻekitivitī ko ʻení. ʻOku ʻi ai nai ha faʻahinga ʻekitivitī ʻokú ke pehē ʻe ʻaonga ke fakaʻaongaʻi fakataha mo hoʻo kau akó ko ha tānaki atu pe ko ha fetongi ʻo e ngaahi ʻekitivitī ako ʻoku fakakau ʻi he konga tefito ʻo e naunau fakalēsoní?

Ngaahi Lēsoni ʻo e Tokāteline mo e Ngaahi Fuakavá mo e Ngaahi Lēsoni Teuteu ki he Moʻuí

ʻOku totonu ke fakatou akoʻi ki he kau akó ʻa e ngaahi lēsoni ʻo e Tokāteline mo e Ngaahi Fuakavá mo e ngaahi lēsoni Teuteu ki he Moʻuí ʻi he taʻú kakato. Ko hono fakalūkufuá, ko e lēsoni ʻe tolu he uike takitaha ʻe meimei ko e ngaahi lēsoni ʻo e Tokāteline mo e Ngaahi Fuakavá, ka ko e ongo lēsoni kehe ʻe ua he uike takitaha ko e ngaahi lēsoni teuteu ki he Moʻuí. Mahalo ʻe ʻi ai ha ngaahi uike ʻe fiemaʻu ai ke ke liliu e ngaahi fiemaʻu fakalūkufua ko ʻení.

ʻE lava ke tokoni atu ʻa e fakamatala ko ʻení ke mahino kiate koe ʻa e taumuʻa mo e ngaahi founga ke fakatou fakahoko ai ʻa e ongo lēsoní.

Ngaahi Lēsoni ʻo e Tokāteline mo e Ngaahi Fuakavá

ʻOku fekauʻaki ʻa e ngaahi lēsoni ʻo e Tokāteline mo e Ngaahi Fuakavá mo e ngaahi konga folofola ʻoku fakamamafaʻi ʻi he uike takitaha ʻi he Haʻu, ʻo Muimui ʻIate Aú. ʻOku ʻoange ʻe he ngaahi lēsoni ko ʻení ha ngaahi faingamālie ki he kau akó ke nau maʻu ha ngaahi aʻusia loloto ange ʻi hono ako e ngaahi akonaki ʻa e Fakamoʻuí ʻi he Tokāteline mo e Ngaahi Fuakavá. ʻOku kau foki ʻi he ngaahi lēsoni ʻo e Tokāteline mo e Ngaahi Fuakavá ʻa e ngaahi lēsoni Akoako Fakataukei Fakatokāteliné mo e ngaahi lēsoni Siviʻi Hoʻo Akó.

Fakataukei Fakatokāteliné

Ko ha meʻa mahuʻinga ʻe taha kiate koe ko e faiakó ke tokoniʻi ʻa e kau akó ke nau lavaʻi ʻa e ngaahi ola ʻo e fakataukei fakatokāteliné. ʻOku kau ʻi he ngaahi ola ko ʻení ʻa hono tokoniʻi ʻo e kau akó ke:

• Ako mo fakaʻaongaʻi ʻa e ngaahi tefitoʻi moʻoni fakalangí ki hono maʻu ʻo e ʻilo fakalaumālié.

• Taukei ʻi he ngaahi potufolofola fakataukei fakatokāteliné mo e tokāteline ʻo e ongoongolelei ʻo Sīsū Kalaisi ʻoku nau akoʻí.

Ko hono ako maʻuloto ʻo e ngaahi potufolofola kuo filí pea mo e tokāteline ʻo e ongoongolelei ʻo Sīsū Kalaisí ʻoku akoʻi ʻe he ngaahi potufolofola ko ʻení, ʻoku ʻuhinga ia ʻe hanga ʻe he kau akó ʻo:

• ʻIloʻi mo maʻu ha mahino ki he tokāteline naʻe akoʻi ʻi he ngaahi potufolofola fakataukei fakatokāteliné.

• Fakamatalaʻi mahino ʻa e tokāteliné ʻo fakaʻaongaʻi e ngaahi potufolofola fakataukei fakatokāteline ʻoku fekauʻaki mo iá.

• Fakaʻaongaʻi ʻa e tokāteline ʻo e ongoongolelei ʻo Sīsū Kalaisí pea mo e ngaahi tefitoʻi moʻoni ki hono maʻu ʻo e ʻilo fakalaumālié ʻi heʻenau ngaahi fili fakaʻahó pea ʻi heʻenau ngaahi tali ki he ngaahi palopalema mo e ngaahi fehuʻi fakatokāteline, fakataautaha, fakasōsiale, mo fakahisitōliá.

• Manatuʻi mo ʻiloʻi ʻa e ngaahi potufolofola fakataukei fakatokāteliné pea ako maʻuloto ʻa e ngaahi kupuʻi lea folofola mahuʻingá.

ʻE lava ke tokoni ʻa e Polokalama Fakataukei Fakatokāteliné ke aʻusia ʻe he kau akó ha niʻihi ʻo e ngaahi ola ʻo e fakataukei fakatokāteliné. ʻOku fakataumuʻa ia ke tokoni ki he kau akó ke nau ako maʻuloto e fakamoʻoni fakafolofolá mo e kupuʻi lea mahuʻinga ʻo e folofolá ki he ngaahi potufolofola fakataukei fakatokāteline takitaha. Mahalo te ke fie fakaʻaongaʻi ʻa e polokalamá ʻi he kalasí pea poupouʻi e kau akó ke nau download ia ʻi heʻenau meʻangāue fakaʻilekitulōniká, kapau ʻe lava. ʻOku lava ke maʻu atu ia ʻi he ngaahi meʻangāue iOS mo e Android.

Ke maʻu ha fakamatala lahi ange fekauʻaki mo e ngaahi taumuʻa ʻo e fakataukei fakatokāteliné, mamataʻi e “What Is Doctrinal Mastery?” (3:56), ʻoku maʻu ʻi he ChurchofJesusChrist.org.

Ngaahi Lēsoni Akoako Fakataukei Fakatokāteliné

ʻOku fakataumuʻa ʻa e ngaahi lēsoni Akoako Fakataukei Fakatokāteliné ke tokoniʻi ʻa e kau akó ke nau ngāue ke maʻu ʻa e ngaahi ola ʻo e fakataukei fakatokāteliné.

Ki ha fakamatala lahi ange fekauʻaki mo e founga ke tokoniʻi ai ʻa e kau akó ke aʻusia ʻa e ngaahi taumuʻa ʻo e fakataukei fakatokāteliné, vakai, “Ako ki he Fakataukei Fakatokāteliné” ʻi he Ako ki he Naunau Fakalēsoni ʻa e Seminelí. Mahalo ʻe ʻaonga taha ke fakakakato ʻa e ako ko ʻení ʻi loto ʻi ha ngaahi uike siʻi hili hoʻo fakakakato ʻa e ako ako “Ohi pea Toki Fakafenāpasi e Naunau Fakalēsoni ʻa e Seminelí).”

Ngaahi Lēsoni ki he Siviʻi Hoʻo Akó

Ko e siví ko ha konga mahuʻinga ia ʻo e akó. ʻE lava ke hoko ʻa e ngaahi faingamālie ke kiʻi mālōlō mo fakakaukauloto ki he akó ko ha aʻusia lelei ki he kau akó pea fakaʻaiʻai kinautolu ʻi heʻenau hokohoko atu ke tupulaki mo fakalakalaka ke hoko ʻo hangē ko e Tamai Hēvaní mo Sīsū Kalaisí. ʻI hono siviʻi e ako ʻa e kau akó, ʻoku nau kau longomoʻui mai leva ʻi he akó pea nau haʻisia lahi ange ai ki heʻenau akó.

ʻOku ʻoange ʻe he ngaahi lēsoni ki hono Siviʻi Hoʻo Akó ha ngaahi faingamālie ki he kau akó ke fakamatalaʻi e tefitoʻi tokāteline mei he Tokāteline mo e Ngaahi Fuakavá, fakahaaʻi mai honau ngaahi ʻulungāngá mo e ngaahi fakaʻamú, mo vahevahe ʻenau tupulaki ʻi hono fakatupulaki e ngaahi ʻulungaanga ʻoku tokoni ke nau hoko ko ha kau ākonga mateaki ange ʻo Sīsū Kalaisí. ʻE lava ke tokoni ʻa e ngaahi lēsoni ko ʻení ke ongoʻi fiefia ʻa e kau akó ʻi heʻenau ʻiloʻi ʻenau tupulakí mo ʻiloʻi ʻa e ngaahi tafaʻaki ke fakalakalaka lahi ange ai ʻi he kahaʻú. Ke maʻu ha maaka ʻo e kalasí, ʻe fiemaʻu ke kau ʻa e kau akó ʻi ha Siviʻi Hoʻo Akó ʻe taha pe lahi ange ʻi he vaeua ʻo e konga takitaha ʻo e kalasí.

Ko e kau ako ko ia naʻe ʻikai ke nau kau ʻi ha taha ʻo e ngaahi lēsoni ko ʻení lolotonga ha konga ʻe taha ʻo e kalasí, ʻe fiemaʻu ke nau fakakakato ha lēsoni Siviʻi Hoʻo Akó ki he konga takitaha ʻoku fiemaʻu ke maʻu ai ha maaka ki he kalasí. ʻOku kau ʻi he fakamatala fakalahi ʻo e tohi lēsoni ko ʻení ha ongo lēsoni Siviʻi Hoʻo Akó. ʻE lava ke fakaʻaongaʻi ʻa e “Siviʻi Hoʻo Akó Konga 1” ke fakakakato ʻaki e sivi naʻe ʻikai fakahoko ʻi he konga ʻuluaki ʻo e kalasí. ʻE lava ke fakaʻaongaʻi ʻa e “Siviʻi Hoʻo Akó, Konga 2” ke fakakakato ʻaki ʻa e siví ʻi he konga hono ua ʻo e kalasí. Te ke lava ʻo ʻoange ki he kau akó ʻa e sivi ko ʻení pea ʻai ke nau fakakakato ia mo e toenga ʻo e kalasí pe kau mēmipa ʻo e fāmilí. ʻI heʻenau ʻosí, poupouʻi ke nau vahevahe mo koe ʻa e meʻa naʻa nau ako mei he aʻusiá. ʻE lava ke ʻoatu heni ha ngaahi faingamālie ke ke ngāue fakaetauhi ai ki he kau ako ko ʻení pea fakafiefiaʻi mo kinautolu ʻenau tupulaki fakalaumālié. ʻOange kiate kinautolu ha maaka ki he siví ʻi he konga ʻo e kalasí naʻa nau fakakakato ai ʻa e lēsoni ko ʻeni ki he Siviʻi Hoʻo Akó.

Ke maʻu ha fakamatala lahi ange fekauʻaki mo e founga ke fakahoko ai ʻa e ngaahi lēsoni Siviʻi Hoʻo Akó, vakai, “Ako ki he Ngaahi Siví” ʻi he Ako ki he Naunau Fakalēsoni ʻa e Seminelí. Mahalo ʻe ʻaonga taha ke fakahoko ʻa e ako ko ʻení ʻi loto ʻi ha ngaahi uike siʻi pē hili hoʻo fakakakato ʻa e “Ako ki he Fakataukei Fakatokāteliné.”

Ngaahi Lēsoni Teuteu ki he Moʻuí

ʻOku ʻoange ʻe he ngaahi lēsoni Teuteu ki he Moʻuí ha ngaahi faingamālie ki he kau akó ke nau fakaʻaongaʻi e ngaahi akonaki ʻa e Fakamoʻuí ke:

• Matuʻuaki e ngaahi fehuʻi faingataʻá mo e ngaahi tūkunga faingataʻa ʻo e moʻuí

• Fai ha ngaahi fili ʻoku tataki fakalangi ʻo fakaʻaongaʻi ʻa e ngaahi akonaki ʻa Sīsū Kalaisí mo ʻEne kau palōfitá

• Fakatupulaki ʻa e moʻui fakafalala pē kiate kitá ke tokonaki maʻata mo e fāmilí

• Hoko ʻo moʻui lelei fakaesino mo fakaeloto ange

• Fakatupulaki ha ngaahi taukei ke lavameʻa ai ʻi he akó

• Faʻu ha ngaahi palani ke teuteu ki he ako mo e ngāue maʻuʻanga moʻui ʻi he kahaʻú

• Teuteu ki he ngāue fakafaifekaú mo e ngāue ʻi he siasí

• Teuteu ke fakahoko mo tauhi e ngaahi fuakava ʻi he temipalé

Feinga ke akoʻi ha lēsoni ʻe ua ʻo e Teuteu ki he Moʻuí ʻi he uike takitaha. ʻE ʻi ai ha ngaahi uike te ke akoʻi lahi ange ai ʻi he meʻá ni pea ʻe ʻi ai ha ngaahi uike te ke akoʻi ʻo siʻisiʻi ange, ka ʻi he fakaʻavalisí ʻoku totonu ke ke feinga ke akoʻi ha lēsoni ʻe ua ʻi he uike ʻi he lahi taha ʻe lavá. ʻE ʻoange heni ha faingamālie ki he kau akó ke akoʻi kiate kinautolu e ngaahi lēsoni takitaha ko ʻení lolotonga e taʻu fakaakó. ʻOku ʻikai faʻa fiemaʻu ia ke ke akoʻi e ngaahi lēsoni ko ʻení ʻi ha fakahokohoko pau, neongo ʻoku ʻi ai ha ngaahi lēsoni ʻe niʻihi ʻoku nau fakaʻaongaʻi ha ngaahi fakakaukau ʻoku akoʻi ʻi he ngaahi lēsoni kimuʻá.

ʻE lava ke hoko ʻa e vakai fakalūkufua ki he ngaahi tuʻunga takitaha ʻo e ngaahi lēsoni Teuteu ki he Moʻuí ko ha maʻuʻanga tokoni mahuʻinga ʻi hono tokoniʻi koe ke ke fai ha ngaahi fili fekauʻaki mo e taimi ke akoʻi ai ha ngaahi lēsoni pau ʻi he Teuteu ki he Moʻuí. ʻE tokoniʻi koe ʻe he ngaahi vakai fakalūkufua ko ʻení ke ke vakai vave ki he ngaahi taumuʻa ʻo e lēsoní ki he ngaahi lēsoni kehekehe ʻo e Teuteu ki he Moʻuí, kae pehē ki he ngaahi fokotuʻu ki he vave hono akoʻí fekauʻaki mo e ngaahi taimi ʻe lava ke ke fakakaukauʻi ke akoʻi ai kinautolu ʻi he taʻu.

Fakapapauʻi ke ke maʻu ha tatau ʻo ha fakahinohino ki he vave hono akoʻí mei hoʻo kouʻotineitá pe pule ʻo e polokalamá.

Mahalo te ke loto foki ke sio ki hano “Ako ki he Faʻu ha Taimi-tēpile ʻo e Ngaahi Lēsoní” ʻi he Ako ki he Naunau Fakalēsoni ʻa e Seminelí ke tokoni atu ke ke fulifulihi e fakahinohino ki he vave hoʻo akoʻí ki he ngaahi fiemaʻu hoʻo kau akó.