Fakalahi ki he Tohí

Siviʻi Hoʻo Akó, Konga 1

Siosefa Sāmita—Hisitōlia 1; Tokāteline mo e Ngaahi Fuakava 1–4, 8–10

ʻE lava ke tokoni ʻetau fakakaukau mo e siviʻi ʻetau ako fakalaumālié ke tau ʻunu ʻo ofi ange ai ki he Fakamoʻuí. ʻE lava ke tokoni ʻa e lēsoni ko ʻení ke ke manatuʻi mo vakaiʻi ʻa e founga kuo tokoniʻi ai koe ʻe heʻenau ngaahi aʻusia ʻi hono ako ʻo e Tokāteline mo e Ngaahi Fuakava 1–4, 8–10 mo e Siosefa Sāmita—Hisitōlia ke ke tupulaki fakalaumālie mo ofi ange ai kia Sīsū Kalaisí. Kumi ha ngaahi faingamālie ke vahevahe ai ha niʻihi ʻo hoʻo ngaahi talí mo e kau ako kehé pe ko e kau mēmipa ʻo e fāmilí.

Fakatokangaʻi ange: Kimuʻa pea fakakakato e sivi ko ʻení, fakapapauʻi ke fakakakato e laukonga ʻoku fiemaʻú kapau kuo teʻeki ai ke ke fakahoko ia: Siosefa Sāmita—Hisitōlia 1; Tokāteline mo e Ngaahi Fuakava 1–4, 8–10.

Ko e hā e meʻa ʻokú ke akó? ʻOku fēfē nai hoʻo fakalakalaká?

Fakaʻaongaʻi ha ngaahi miniti siʻi ke hiki ʻi hoʻo tohinoa akó fekauʻaki mo e fakalakalaka ʻokú ke fakahoko ke ofi ange ai ki he Fakamoʻuí ʻi hoʻo ako ʻa e Siosefa Sāmita—Hisitōlia 1 mo e Tokāteline mo e Ngaahi Fuakava 1–4, 8–10. ʻE lava ke kau heni ʻa e tokāteline mo e ngaahi moʻoni ʻokú ke akó, ngaahi founga ʻoku tupulaki ai hoʻo fakamoʻoni kia Sīsū Kalaisí, ngaahi tōʻonga moʻui foʻou ʻokú ke fakahokó, mo e ngaahi founga ʻokú ke fāifeinga ai ke liliú.

Siviʻi ʻa e ako folofolá

• Naʻe tokoni fēfē nai ʻa e ako folofolá ki he Palōfita ko Siosefa Sāmitá?

Fakakaukau ki hoʻo taumuʻa ki he ako folofolá.

• ʻOku liliu fēfē nai koe ʻe hoʻo feingá?

• Ko e hā ha founga ʻe taha ʻokú ke ongoʻi kuó ke lavameʻa ai ʻi hoʻo ako folofolá?

• Ko e hā ha faingataʻa ʻokú ke fekuki mo ia ʻi hoʻo ako folofolá?

Vakaiʻi e ongo ʻokú ke maʻu fekauʻaki mo e Palōfita ko Siosefa Sāmitá (vakai, Siosefa Sāmita—Hisitōlia 1)

Hiki ki he lahi tahá ʻa e ngaahi meʻa ʻokú ke lava ʻo fakakaukau ki ai kuó ke ako fekauʻaki mo e Palōfita ko Siosefa Sāmitá ʻi he ngaahi uike siʻi kuohilí ʻi he seminelí.

Laineʻi pe siakaleʻi ha faʻahinga meʻa ʻi hoʻo lisí ʻoku toe ʻuhinga foki ki ha founga kuó ne tokoniʻi ai koe ke ke ʻunu ʻo ofi ange kia Sīsū Kalaisi.

Vakaiʻi ʻa e tuʻunga mālohi hoʻo tui ki he ngaahi meʻa naʻá ke hikí ʻi ha meʻafua mei he 1 ki he 5 (1=ʻikai ke tui mo e 5=tui ʻi he loto-falala). Mahalo te ke fie lekooti ha ngaahi aʻusia kuo tokoni ke fakatupulaki hoʻo tui naʻe ui ʻe he ʻOtuá ʻa Siosefa Sāmita ke hoko ko ha palōfita ke tokoniʻi kitautolu ke tau toe ofi ange kia Sīsū Kalaisi.

• Kapau ʻoku faingataʻa ki ha taha ke tui naʻe ui ʻe he ʻOtuá ʻa Siosefa Sāmita ke hoko ko ha palōfita, ko e hā te ke lava ʻo fokotuʻu ange ke ne fai ke maʻu pe fakamālohia ai e tui ko ʻení?

Ko hono maʻu e fakahā fakatāutahá (Tokāteline mo e Ngaahi Fuakava 8)

Fili ha niʻihi ʻo e ngaahi fakamatala ko ʻení pea fakakakato ia ʻi hoʻo tohinoá. Fakakau ha toe ngaahi fakakaukau mo e ongo kehe ʻokú ke ongoʻi ke lekooti.

• Ko e meʻa mahuʻinga taha kuó u ako fekauʻaki mo e fakahā mei he Tamai Hēvaní kimui ní ko e …

• ʻOku kau ʻi he ngaahi meʻa siʻi kuó u toki feinga ke maʻu ha fakahā ki aí ʻa e …

• Ko e meʻa ko ia ne hangē kuó ne tokoniʻi ʻeku malava ke maʻu ha fakahaá ko e …

• Ko ha aʻusia ne u toki maʻu kimuí ni mai ʻoku ʻikai ke u loto ke ngaló ko e …

• ʻOku ou loto ke hokohoko atu hono fakatupulaki ʻeku malava ke maʻu ha fakahā mei he ʻOtuá koeʻuhí …

• Ke fakalahi ʻeku malava ke maʻu ha fakahā mei he ʻOtuá, ʻoku ou tukupā ke …

Vahevahe ha meʻa naʻá ke lekooti mo ha mēmipa ʻo e fāmilí, kaungāmeʻa, pe ko ha taha ʻi hoʻo kalasí.