“Ngaahi Fakakaukau ki ha Founga Kehekehe,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ngaahi Fakakaukau ki ha Founga Kehekehe,” Tokāteline mo e Ngaahi Fuakava – Tohi Lēsoni ʻa e Faiako Seminelí
Fakalahi ki he Tohí
Ngaahi Fakakaukau ki ha Founga Kehekehe
Ngaahi Fakakaukau ki ha Founga Kehekehe
ʻOku kau ʻi he maʻuʻanga tokoni ko ʻení ha ngaahi founga kehekehe ke tokoniʻi ʻa e kau akó ke nau kau moʻoni ki he ngaahi lēsoní. Naʻa mo e ngaahi founga fakafaiako ʻoku fakaʻaiʻaí, kapau ʻe fuʻu tōtuʻa hono fakaʻaongaʻí he ʻikai ola lelei ia pe taʻeoli. Neongo ʻoku ʻikai totonu ke ke fili ʻa e ngaahi foungá koeʻuhí pē ke kehekehe, ka ke fakakaukauʻi ha founga ke kehekehe ai hoʻo faiakó lolotonga ʻa e lēsoni takitaha. ʻE lava ke tokoni hono fakaʻaongaʻi e ngaahi founga fakafaiako kehekehé ke tokoni ki ha kau ako tokolahi ange. Ko ha ngaahi fehuʻi ʻeni ʻe niʻihi ke fakakaukauʻi ʻi he taimi ʻoku fili ai ha ngaahi ʻekitivitī ke fakakau ʻi ha aʻusia fakaako:
-
ʻOku tokoniʻi nai ʻe he ʻekitivitií ha aʻusia ʻoku fakatefito ʻia Kalaisi, fakatefito ʻi he folofolá, pea fakatefito ʻi he tokotaha akó? Vakai ki he Ko Hono Fakaʻaongaʻi mo Fakafenāpasi ʻa e Ako ki he Naunau Fakalēsoni ʻa e Seminelí ki ha meʻa lahi ange.
-
ʻOku fakaafeʻi nai ʻe he ʻekitivitií ʻa e Laumālie Māʻoniʻoní ke faiako mo fakamoʻoni? Fakakaukau ki he founga ʻe ala uesia ai ʻe he ʻekitivitií ʻa e ʻātakai ʻapasia ʻoku fiemaʻu ke fakahoko ai ʻe he Laumālie Māʻoniʻoní Hono fatongiá.
-
ʻOku fakafofongaʻi fēfē ʻe he foungá ʻa e folofola toputapu ʻa e ʻOtuá? ʻOku fiemaʻu ke fakamatalaʻi e folofolá mo e ngaahi lea ʻa e kau palōfitá ʻi ha founga fakaʻeiʻeiki mo māʻoniʻoni.
-
ʻE fakafōtunga anga fakaʻeiʻeiki nai ki he tokotaha ako kotoa pē? Feinga maʻu pē ke tanumaki ʻa e ngaahi ongo ʻo e uouangatahá mo e ʻofá. Fakaʻehiʻehi mei he ngaahi ʻekitivitī ʻe ala ongoʻi ai ha tokotaha ako ʻoku taʻefiemālie, loto-foʻi, pe liʻekina.
-
ʻOku ʻaonga nai ʻa e ʻekitivitií mo e taimi kalasí? Ko ha taimi mahuʻinga ʻa e taimi ʻokú ke fakataha ai mo e kau ako ʻi he seminelí. ʻE lava ke ola lelei ʻa e ngaahi ʻekitivitií taʻe te ne toʻo ha taimi lahi.
-
Ko e hā e lahi ʻo e taimi mo e ngaahi maʻuʻanga tokoni ʻe fiemaʻu ke teuteu ki he ʻekitivitií? ʻOku mahuʻinga ke tokangaʻi lelei ho taimí mo e ngaahi maʻuʻanga tokoni mahuʻingá.
ʻE lava ke faʻa fakaʻaongaʻi e ngaahi fakakaukau ko ʻení ʻi ha ngaahi taimi kehekehe ʻi ha lēsoni. ʻI he ngaahi meʻa lahi, ʻe tokoni hono ʻoange ha sīpinga ki he kau akó ʻo e meʻa ʻoku kole ange ke nau faí, ke nau lavameʻa ange ai. Fakapapauʻi ʻoku mahino lelei kiate koe ʻa e ʻekitivitií pea lava ʻo ʻoange ha ngaahi fakahinohino mahino mo ha sīpinga, kapau ʻe tokoni, kimuʻa pea kamata ʻe he kau akó ʻa e ʻekitivitií. ʻOku fokotuʻutuʻu ʻa e ngaahi ʻekitivitī ko ʻení ʻi he ngaahi konga ko ʻení:
Ke ʻomi ha fakamatala tokoni pe fokotuʻu mai ha toe ngaahi fakakaukau, kātaki ʻo ‘īmeili ki he CES-Manuals@ChurchofJesusChrist.org. Fakakau ʻi he kaveingá ʻa e “Ngaahi Fakakaukau ki ha Founga Kehekehe.”
1. Ako e folofolá ke mahino ʻa e talanoá pea ʻiloʻi ʻa e ngaahi tefitoʻi moʻoni pe tokāteline ʻo e ongoongoleleí
ʻOku faʻa kau ʻi he ngaahi lēsoní ʻa e ngaahi ʻekitivitī ʻa ia ʻoku ako ai ʻe he kau akó ha ngaahi veesi hokohoko ke mahino lelei ʻa e puipuituʻa mahuʻinga mo e talanoa ʻo ha konga folofola ke lava ʻo ʻiloʻi ʻa e ngaahi tefitoʻi moʻoní pe tokāteliné. Ko e ngaahi ʻekitivitī ko ʻení ko ha ngaahi founga ia ʻe niʻihi te ke lava ʻo tokoniʻi e kau akó ke fakahoko ʻeni.
Fakaʻuhingaʻi ʻo e tā valivalí
Fakaʻaongaʻi ʻa e fakatātā ʻo e ongoongoleleí ke aleaʻi ha talanoa. Fakaʻaliʻali ha tā mei he Media Library ʻa e Siasí pea fakaafeʻi e kau akó ke ako e ngaahi veesi ʻoku fakatātaaʻi ʻi he taá. Fehuʻi ki he kau akó:
-
Ko e hā te ke liliú?
-
Ko e hā ʻa e fakaʻuhinga ʻo e tā valivalí (ʻoku ʻikai maʻu ʻi he fakamatalá)?
-
Ko e fē ʻa e ngaahi veesi folofola ʻoku fakafofongaʻí?
Founga kehe: Vahevahe fakakongokonga e fakatātaá kae ʻoua ʻe fakaʻaliʻali kakato ʻi he kamataʻanga e kalasí ke kamataʻi ha fealēleaʻakí. Fakaʻaliʻali taha taha ʻa e ngaahi kongá pea ʻai ke mateʻi ʻe he kau akó ʻa e meʻa ʻoku hoko ʻi he fakatātā kakató. Kole ange ke nau fakamatalaʻi e meʻa ʻoku nau sio ki aí mo fakamahamahalo ki he meʻa ʻoku ʻikai ke nau sio ki aí.
Founga kehe: Fili ha ngaahi ʻīmisi ʻe niʻihi ʻo e Fakamoʻuí pea fakapipiki ʻi he palakipoé. Fakaafeʻi e kau akó ke nau sio māmālie ki he lanú, meʻa ʻoku tokanga taha ki ai e taá, mo e fokotuʻutuʻu ʻo e ngaahi ʻatá pea feinga ke ʻiloʻi e meʻa ʻoku akoʻi ʻe he meʻa takitaha fekauʻaki mo Sīsū Kalaisí. Hili hono ʻiloʻi ha tefitoʻi moʻoni, te ke lava ʻo fai ha ngaahi fehuʻi hangē ko e:
-
Ko e fē ʻa e fakatātā ʻo Kalaisi ʻokú ke ongoʻi ʻokú ne fakafofongaʻi ʻa e tefitoʻi moʻoni naʻá ke maʻú pea ko e hā hono ʻuhingá?
-
Ko e fē ʻi he ngaahi fakatātā ko ʻeni ʻo Sīsuú ʻokú ne tokoniʻi koe ke ke ongoʻi ʻa e mahuʻinga ʻo e foʻi moʻoni ko ʻení?
-
Ko e hā te ke loto ke ʻilo ʻe haʻo kaungāmeʻa fekauʻaki mo Sīsū Kalaisí ʻi he taimi ʻokú ke fakakaukau ai ki he moʻoni ko ʻení?
Tānaki atu ha fetalanoaʻaki ki ha fakatātā
Hiki ha tatau ʻo e ʻū fakatātā mei he Scripture Stories for Children pea fakapipiki ki ha laʻipepa tufa maʻá e kau akó. Tānaki atu ha fanga foʻi fuopotopoto ʻe lava e kau akó ʻo tohi ai e lea pe fakakaukau ʻa e niʻihi ʻi he fakatātaá.
Talanoa he ongoongó pe lipooti ʻo e tohí
ʻOange ki he tokotaha ako takitaha ha konga ʻo e folofola te nau akó. Hili iá pea ʻoange kiate kinautolu ʻa e ngaahi fiemaʻu ʻo e talanoa he ongoongó pe lipooti ʻo e tohí (ʻi ha laʻipepa pe ko e palakipoé). ʻE lava ke kau ai e kakai tefito ʻoku fai ki ai e talanoá, ko e talanoá, lēsoni ʻe taha pe ua ne akó (lau e ngaahi veesi ne maʻu mei aí), pea mo hano fakaʻaongaʻi ki ha taha taʻu hongofulu tupu. ʻOange ha taimi ki he kau akó ke vahevahe mo ha tokotaha ako kehe ʻa e meʻa naʻa nau teuteú.
Founga kehe: ʻI ha kiʻi kulupu tokosiʻi, ʻe lava ke toʻo ʻe he tokotaha ako takitaha ha konga ʻe taha ʻo e talanoá pe lipooti ʻo e tohí: kakai tefito ʻoku fai ki ai e talanoá, ko e talanoá, ngaahi lēsoní, pe ko hono fakaʻaongaʻí.
Ko hono ʻiloʻi e ngaahi fehuʻí
Hili hono lau ʻe he kau akó ha konga folofola, fakaafeʻi kinautolu ke hiki ha ngaahi fehuʻi ʻe ala tokoni ʻa e ngaahi vēsí ke tali. Fakatukupaaʻi e kau akó ke nau hiki ha ngaahi fehuʻi mahuʻinga mo ʻuhingamālie ki ha taha taʻu hongofulu tupu, kae ʻikai ko ha ngaahi fehuʻi faingofua pē ke fekumi ki ai. Hangē ko ʻení, ʻoua ʻe fehuʻi “Ko e hā ʻoku pehē ʻe ʻAlamā ko e tuí iá? Ko e hā ʻokú ne pehē ʻoku ʻikai ko e tuí?” ʻe lava ke fehuʻi ʻe he kau akó “Ko e hā ʻoku fiemaʻu ke u fai ke u ʻiloʻi ʻiate au pē ʻoku moʻoni ha meʻa naʻe akoʻi ʻe he Fakamoʻuí?” Kapau ʻoku laka hake he tahá ʻa e ngaahi konga folofola ke ako ʻe he kau akó, te nau lava ʻo hiki ʻenau ngaahi fehuʻí pea vahevahe ia mo ha tokotaha ako naʻá ne ako ha konga kehe. ʻE lava ke kumi mo fakakaukau ʻa e kau akó ki he ngaahi tali ki he ngaahi fehuʻi honau kaungāakó.
ʻInitaviu ʻa e tokotaha faʻu tohí
Kole ki he kau akó ke nau fakakaukauloto ko kinautolu naʻa nau faʻu ha talanoa mei he folofolá pea ʻoku ʻinitaviu kinautolu ʻe ha taha fekauʻaki mo e meʻa ne nau tohí. ʻE lava ke lau ʻe he kau akó ʻa e talanoa fakafolofolá pea taufetongi ʻi he fatongia ʻo e tokotaha fai ʻinitaviú mo e tokotaha faʻu tohí. Ko e ngaahi fehuʻi ʻeni ʻe lava ke fai ʻe he tokotaha fai ʻinitaviú:
-
Ko e hā ha ngaahi tafaʻaki ʻo e ngaahi veesi ko ʻení he ʻikai te ke loto ke liʻaki ʻe he kau laukongá?
-
Ko e hā te ke pehē ko ho tefitoʻi fakakaukaú, pe ko e taha hoʻo ngaahi tefitoʻi fakakaukaú?
-
ʻOkú ke ʻamanaki fēfē ʻe fakaʻaongaʻi ia ʻe he kau laukongá ʻi heʻenau moʻuí?
Fakaafeʻi e kau akó ke vahevahe e meʻa ne nau ako mei he aʻusiá. Fakaʻaongaʻi ʻenau ngaahi fakamatalá ke fakamatalaʻi ʻaki ʻa e foʻi moʻoni ʻoku tohi mataʻāʻaá.
Fakatauhoa
ʻOange ha ngaahi fakamoʻoni fakafolofola ʻi ha kōlomu ʻe taha mo ha ngaahi moʻoni ʻoku hoa mo ia ʻi ha kōlomu kehe kae fakahokohoko kehekehe. ʻE lava ke ako mo fakatauhoa ʻe he kau akó.
Moʻoni mahuʻinga tahá
ʻI he taimi ʻoku ako ai ʻe he kau akó ha vahe ʻo e folofolá ʻoku kau ai ha ngaahi moʻoni lahi te nau ala ʻiloʻi, te ke lava ʻo ʻai ke nau kamata ʻaki haʻanau ako ʻiate kinautolu pē. ʻE lava ke nau takitaha fakakaukauʻi ʻa e meʻa ʻoku nau tui ko e ngaahi moʻoni pe fakakaukau mahuʻinga taha ʻe tolu pe fā ʻi he konga folofolá pea hiki ia. ʻE lava leva ke vahe ʻa e kau akó ki ha ngaahi kulupu tautau toko ua pea fakafehoanaki ʻa e ngaahi moʻoni naʻa nau ʻiló. ʻOku fakapapauʻi ʻe he hoa takitaha ʻo e kau akó ʻa e meʻa ʻoku nau ongoʻi ko e ongo foʻi moʻoni mahuʻinga tahá pea lekooti ia. Fakatokangaʻi ange: ʻE lava ke kehe ʻa e ngaahi fakakaukaú mei heʻenau ʻuluaki fakakaukau ʻe faá. ʻOku kau fakataha leva ʻa e hoa takitaha mo ha hoa kehe ke faʻu ha kulupu tautau toko fā; ʻoku vahevahe mo fakafehoanaki fakataha ʻe he kau ako ʻe toko faá ʻenau ngaahi fakakaukaú mo ngāue fakataha ke fakapapauʻi ʻa e foʻi moʻoni mahuʻinga taha ʻi he tohí.
Fakatātā fakahokohoko ʻo e ngaahi meʻa ne hokó
Fakaʻaliʻali ha ʻū fakatātā ʻokú ne fakafofongaʻi ha talanoa mei he folofolá ʻe ako ʻe he kau akó. Fakaʻaliʻali e ngaahi veesi ʻe lau ʻe he kau akó. Fakaafeʻi e kau akó ke nau fokotuʻutuʻu ʻa e fakatātaá ʻi he hokohoko totonú.
Fakātātā ʻo e meʻa ʻi he talanoá
Tokoni ke ʻiloʻi ʻe he kau akó ʻa e tokāteline pe ngaahi tefitoʻi moʻoni naʻe akoʻi ʻi he ngaahi fakamatala fakafolofolá ʻaki ha fakatātā ʻo e meʻa ʻi he talanoá. Fakapapauʻi ʻa e ngaahi ʻelemēniti kehekehe ʻo e meʻa ʻi he talanoá kau ai ʻa e ngaahi meʻá ni:
-
Ko e tūkunga ʻi he kamataʻangá (kau ai ʻa e ko hai, ko e hā, feituʻu, ʻane fē).
-
Fakalalahi e fekeʻikeʻí pe ngāué. Feinga ke ʻiloʻi ʻa e ngaahi liliu ʻokú ne uesia e moʻui ʻa e kakai ʻi he talanoá.
-
Tumutumu ʻo e talanoá. Ko e tefitoʻi taumu‘a ʻeni ‘o e talanoá. ʻOku faʻa ʻi ai maʻu pē ha liliu lahi, hangē ko hano ikunaʻi ʻe ha taha ha faingataʻa pe aʻusia ha mōmeniti ʻo ʻene ʻilo ha meʻa.
-
Hifongá. Ko e ngaahi nunuʻa ʻo e tumutumu ʻo e talanoá ʻi he hōloa ʻa e ngāué.
-
Ikuʻangá. ʻOku fakamatalaʻi heni ʻa e mahino foʻou ʻoku maʻu ʻe he kakaí koeʻuhí ko e meʻa ne nau aʻusiá.
Hiki ʻa e ngaahi fakamoʻoni fakafolofola ki he konga takitaha ʻo e meʻa he talanoá ʻi he palakipoé. Fakaafeʻi e kau akó ke lau ʻa e ngaahi veesi ki he konga takitaha pea tā ha fakatātā ʻo e meʻa ʻoku nau laú pe hiki ha lisi ʻo e ngaahi meʻa mahuʻinga ne hokó. ʻI he fakakakato ʻe he kau akó e sitepu fakaʻosí, fakaafeʻi ke nau vakai ki he fakamatala kakató pea hiki ha fakamatala ʻo e moʻoni kuo nau akó.
Pāsoló
Faʻu ha kiʻi pāsolo faingofua mei ha fakatātā ʻokú ne fakafofongaʻi ʻa e konga folofolá. Hiki ʻa e ngaahi fakamoʻoni fakafolofolá ʻi he tuʻa ʻo e konga takitaha. ʻE lava ke vahe fakakulupu ʻa e kau akó pea ʻoange kiate kinautolu takitaha ha konga ʻo e pāsoló. ʻOku ako ʻe he kau akó ʻa e ngaahi fakamoʻoni fakafolofolá pea teuteu ke fakamatalaʻi fakanounou ʻenau ngaahi vēsí. ʻI hono vahevahe ʻe he ngaahi kulupú ʻenau fakamatala fakanounoú ki he kalasí, te nau lava ʻo fakapipiki ʻa e ngaahi kongá ki he palakipoé ke faʻu ʻa e fakatātā kakató.
Laukonga fakafaivaʻí
Ki ha talanoa ʻoku lahi ai ʻa e fepōtalanoaʻakí, fokotuʻutuʻu e ngaahi veesi folofolá ki ha lea ʻe lava e tokotaha takitaha ʻo maʻu vave ʻenau kongá. Fakaʻaongaʻi ha tokotaha fakamatala ke lau ʻa e ngaahi veesi ʻoku ʻikai fepōtalanoaʻakí. Te ke lava ʻo hiki ʻa e ngaahi veesi folofolá pea fakaʻilongaʻi ʻa e konga takitaha ʻo fakaʻaongaʻi ha peni fakaʻilonga lanu kehekehe. Fakatokangaʻi ange: Manatuʻi ʻoku totonu ke fakafofongaʻi maʻu pē ʻa e kau mēmipa ʻo e Toluʻi ʻOtuá ʻaki ʻa e tuʻunga māʻolunga taha ʻo e ʻapasiá. Kapau ʻoku fakafofongaʻi ha mēmipa ʻo e Toluʻi ʻOtuá, kau ai ʻa Sīsū Kalaisi, ʻi ha fakamatala fakafolofola te ke fie fakahoko ai ʻa e ʻekitivitī ko ʻení, tuku ke lau ʻe he tokotaha fakamatalá ʻa ʻEne ngaahi leá.
Ko hono lau ʻo e folofolá
‘Oku lahi ha ngaahi founga ke lau ai ‘a e folofolá ‘i he kalasí. ʻE lava ʻi he founga takitaha ʻo fakahoko ha ngaahi taumuʻa kehekehe. Fakakaukau ki he ngaahi fiemaʻu hoʻo kalasí ʻi hono fili e ngaahi founga laukongá.
-
Lau fakalongolongó: ʻE lava ke laukonga fakalongolongo pē ʻa e kau akó kiate kinautolu. ʻOku maʻu heni ha taimi ke fakakaukau ai ki he folofolá mo lau ʻi heʻenau taimi pē ʻanautolú.
-
Laukonga fakahoa pe fakakulupu: ʻOku lava heni ke tokolahi ange e kau ako ʻoku kau maí mo siʻisiʻi ange ʻenau ongoʻi manavasiʻi ke laukonga leʻolahí.
-
Faiako pe ongo kuo ʻosi lekooti: ʻE lava ke lau ʻe he faiakó ʻa e fakamatalá pe tā e leʻo kuo ʻosi hikí pea fakaafeʻi ʻa e kau akó ke nau muimui ki ai.
-
Laukonga leʻolahi: ʻE lava ke fakaafeʻi e kalasí kotoa ke nau lau fakataha e ngaahi vēsí. ʻE lava ke lau leʻolahi ʻe ha kau ako tokolahi ki he kalasí pe ʻe lava ke fakaafeʻi kimuʻa pea ʻoange ha taimi ke nau teuteu ai ke lau. Fakapapauʻi ki he kau akó te nau lava ʻo “paasi” kapau ʻoku ʻikai ke nau ongoʻi fiemālie ke laukonga.
Fekumi he folofolá
Teuteuʻi ha ngaahi fehuʻi fekauʻaki mo ha ngaahi veesi ʻi he folofolá ʻi ha ʻū laʻipepa kehekehe. Ui ʻa e kau akó ki muʻa ʻi he kalasí pea ʻoange kiate kinautolu ha fehuʻi ʻe taha. Fakaafeʻi ke nau foki ki honau tesí ke kumi ʻa e talí. ʻI heʻenau maʻu pē ʻa e talí, te nau toe haʻu ki muʻa ʻi he lokí pea maʻu ʻa e fehuʻi hoko ke talí. ʻE lava foki ke fakahoko ʻeni ʻi ha ngaahi kulupu iiki.
Sīpinga
Fokotuʻutuʻu ʻa e loki akó ʻi ha founga te ne fakafofongaʻi ha sīpinga ʻo e talanoa ke lau ʻi he folofolá ʻi he ʻaho ko iá. Hangē ko ʻení, kapau ʻe lau ʻa e Tokāteline mo e Ngaahi Fuakava 121, ʻe lava ke fokotuʻutuʻu ʻa e ʻū seá ke faʻu ha feituʻu lahi tatau mo ha loki ʻi he fale fakapōpula Lipetií. ʻOku tokoni ʻa e founga ko ʻení ke maʻu ʻe he kau akó ha fakakaukau ki he meʻa te nau akó. Ki he Tokāteline mo e Ngaahi Fuakava 136, ʻe lava ke fokotuʻutuʻu ʻa e kau akó ki ha ngaahi kulupu paionia pea fili ha kapiteni ko ha tokotaha lea.
Fakaʻilonga taʻofi
ʻOange ki he kau akó ʻa e moʻoni ʻoku tohi mataʻāʻaá. Lau māmālie ha ngaahi veesi kiate kinautolu, pea kole ange ke hiki honau nimá pe lea “Taʻofi” ʻi heʻenau fakatokangaʻi ha meʻa ʻi ha veesi ʻoku tokoni ke akoʻi ʻa e moʻoni ko iá. Hili iá pea fakaafeʻi ʻa e kau akó ke vahevahe ʻa e meʻa naʻa nau fakatokangaʻí.
Fakamatala fakanounou ʻa e tokotaha akó
Kimuʻa ʻi he kalasí, ʻoange ki ha tokotaha ako ʻe taha pe lahi ange ʻa e puipuituʻa pe kaveinga ʻo e ngaahi potufolofola te ke loto ke nau fakamatalaʻi fakanounou ki he kalasí. ʻE lava ke paaki pea tufaki ʻeni ʻi he ʻaho kimuʻá, pe tufa ki he kau akó ʻi heʻenau hū mai ki he kalasí. Fakaafeʻi kinautolu ke nau teuteu ke vahevahe ʻa e fakamatala fakanounoú ʻi hono ui kinautolu ʻi he taimi totonu ʻi he kalasí.
Liliu ha veesi
Hili hono lau ʻe he kau akó ha konga folofola, te ke lava ʻo ʻai ke nau fili ha veesi ke liliu pe hiki e laine takitaha ʻi he lea pē ʻanautolu. Tokoniʻi kinautolu ke nau akoako hono kumi ha ngaahi fakaʻuhinga pe fakaʻaongaʻi ha ngaahi potufolofola kehe mo e ngaahi meʻangāue ako folofolá ke mahino ʻa e ngaahi foʻi lea mo e kupuʻi lea faingataʻá.
Moʻoni pe hala
Hiki ha ngaahi fakamatala kehekehe ʻoku moʻoni pe hala fekauʻaki mo e ngaahi fakaikiiki mahuʻinga ʻi ha konga folofola. Fakaafeʻi ʻa e kau akó ke fakahaaʻi pe ʻoku nau ʻuluaki tui pe ʻikai tui tatau mo e ngaahi fakamatalá. Fakaafeʻi kinautolu ke kumi ha meʻa ke fakamoʻoniʻi pe fakafepakiʻi ʻa e ngaahi fakamatalá ʻi heʻenau ako ʻa e konga folofolá. Hili iá ʻe toe tohi ʻe he kau akó ʻa e ngaahi fakamatala halá ke tonu ʻi heʻenau lau ʻa e potufolofolá.
Fakaʻaongaʻi ha laʻitā
Fakaafeʻi e kau akó ke fili ha laʻitā ʻoku mahuʻinga kiate kinautolu. ʻE lava pē ke fai ʻeni ʻi heʻenau telefoní, pe te nau haʻu mo ha tā mei ʻapi. Fakaafeʻi kinautolu ke teuteu ke vahevahe e ngaahi meʻá ni:
-
Ko e puipuituʻá, ʻo fakamatalaʻi ʻa e meʻa naʻe hoko kimuʻa pea ʻai ʻa e laʻitaá.
-
Ko e tefitoʻi meʻa mahuʻinga pe taumuʻa ʻo e laʻitaá.
-
Ko ha ngaahi fakaikiiki ʻoku mahuʻinga kiate kinautolu.
Hili e vahevahe ʻa e kau akó, te nau lava leva ʻo lau ʻa e konga folofola ki he lēsoní pea teuteuʻi ʻa e ngaahi meʻa tatau ʻe tolu ʻoku fekauʻaki mo e konga folofolá.
Fakakaukauloto
Fakaafeʻi e kau akó ke nau fakakaukauloto ki ha talanoa pe konga ʻo e fakamatala ne akó. ʻE lava ke kuikui ʻa e kau akó pea tokanga taha ke sioloto ki he ngaahi ʻīmisi naʻe fakamatalaʻi ʻe he faiakó. Hangē ko ʻení, te ke lava ʻo fakaafeʻi e kau akó ke fakakaukauloto ko e kau tauhisipi kinautolu naʻa nau muimui ʻi he fakaafe ʻa e ʻāngeló ke kumi ʻa e tamasiʻi ko Kalaisí ʻoku toka ʻi ha ʻaiʻangakai ʻo e manú. Te ke lava leva ʻo lea ʻaki ha meʻa hangē ko e “ʻOkú ke hū atu ki he fale tauhiʻanga ʻo e fanga monumanú ʻa ia ʻoku fuofua ai ʻe Mele ʻa e tamasiʻi ko Kalaisí. Ko hai ʻokú ke sio ki aí? Ko e fē fanga monumanu ʻokú ke fakakaukau ki aí? ʻI hoʻo fakakaukau ki aí, ko e hā e tali ʻa Mele ki hoʻo tūʻuta atú?” Hokohoko atu hono fai ha ngaahi fehuʻi ʻe tokoni ki he kau akó ke nau fakakaukauloto ki he tūkungá.
Pupunga Lea
Fakaafeʻi e kau akó ke nau feinga ke ʻiloʻi e ngaahi foʻi lea mo e kupuʻi lea ʻoku nau ongoʻi ʻoku mahuʻinga ʻi ha potufolofola. Faʻu ha pupunga lea ʻaki ʻa e ngaahi foʻi lea mo e kupuʻi lea angamaheni pe mahuʻinga taha ʻoku nau ʻiloʻí. ʻE lava ke fakahaaʻi ʻe he lalahi ʻo e ngaahi foʻi leá ʻa e tuʻunga ʻo honau mahuʻingá.
2. Fakaloloto e mahinó ʻaki e ngaahi konga leá mo e folofolá
ʻE faʻa kau ʻi he ngaahi lēsoní ha ngaahi potufolofola mei he ngaahi tohi folofolá ke tokoni ke fakaloloto e mahino ʻa e kau akó ki he tefitoʻi moʻoni pe tokāteline ʻoku nau akó. ʻE ʻi ai foki mo ha ngaahi lēsoni ʻe kau ai ha ngaahi konga lea mei he kau taki ʻo e Siasí. Ko e ngaahi ʻekitivitī ko ʻení ko ha ngaahi founga ia ʻe niʻihi te ke lava ai ʻo tokoniʻi ʻa e kau akó ke nau ako ha ngaahi potufolofola pe konga lea kehekehe pea ʻoange ha faingamālie ke nau ʻiloʻi ai ʻa e moʻoní ʻiate kinautolu pē.
Fokotuʻu ha ngaahi feituʻu ako
Fokotuʻu ha ngaahi feituʻu ako ʻi he loki akó. ʻE lava ke kau ʻi he feituʻu takitaha ha ngaahi fakahinohino ʻoku fakapipiki ʻi he holisí pe ʻi he funga tesí. ʻE lava ke kau ʻi he ngaahi fakahinohino ko ʻení ha ngaahi potufolofola pe ngaahi konga lea ke lau, mo ha ngaahi fehuʻi pe ngaahi ʻekitivitī kehe ke fakakakato. ʻE lava ke vilo ʻa e kau akó ʻi ha fanga kiʻi kulupu iiki, ʻo aleaʻi ʻa e meʻa kuo nau ako ʻi he feituʻu takitaha. Te nau lava foki ʻo fakahoko fakafoʻituitui ia pea ngaʻunu ʻi heʻenau taimi pē ʻanautolu. Te ke lava ʻo tuku ha laʻipepa lahi ʻi he feituʻu takitaha ke hiki ai ʻe he kulupu pe tokotaha ako takitaha ʻenau ngaahi talí. Te nau lava ʻo lau mo fakakaukau ki he meʻa kuo tohi ʻe he niʻihi kehé.
Faʻu haʻo futinouti pē ʻaʻau.
Fakaafeʻi e kau akó ke tānaki atu ha ngaahi futinouti ki he ngaahi potufolofola ʻoku nau akó. ʻE lava ke tānaki atu ʻeni ʻaki hano fokotuʻu ha ngaahi fehokotakiʻanga ʻi he vahaʻa ʻo e ngaahi potufolofola ʻoku akó mo e ngaahi folofola kehé pea mo e ngaahi lea ʻa e kau taki ʻo e Siasí. ʻE lava ke hiki ʻe he kau akó ʻa e ngaahi potufolofola fakafekauʻakí ʻi he tafaʻakí pe fakaʻaongaʻi ʻa e polokalama fakafehokotaki ʻi he Gospel Library. Te nau lava ʻo vahevahe ki he lahi taha te nau lavá ha ngaahi fakamoʻoni fakafolofola kehe te nau ʻomi ha ngaahi fakakaukau lahi ange fekauʻaki mo e tefitó. Founga kehe: ʻE lava ke fakaʻaongaʻi ʻe he kau akó ʻa e Tags ʻi heʻenau Gospel Library ke fakafehokotaki ʻa e ngaahi potufolofola mo e ngaahi konga lea kehekehe mei ha lēsoni.
Fakaʻuhingaʻí
ʻOku ʻiloʻi ʻe he kau akó ha foʻi lea pe fakakaukau ʻa ia ʻoku faingataʻa ke mahino. ʻAi ke nau kumi ha ngaahi maʻuʻanga tokoni kau ai ʻa e ngaahi folofolá mo e meʻangāue ako folofolá (Fakahinohino ki he Ngaahi Folofolá, Ngaahi Tefitó mo e Ngaahi Fehuʻí) ke tokoni ke nau ʻilo lahi ange ki he foʻi lea ko iá. ʻAi ke nau fakaʻuhingaʻi ʻa e foʻi leá pe kupuʻi leá ʻi heʻenau lea pē ʻanautolu.
Ngaahi fakamatala tā fakatātā
ʻI he ako ʻa e kau akó, ʻoange ha laʻipepa ʻoku ʻi ai ha ngaahi foʻi fuopotopoto pe ngaahi konga te nau lava ʻo hiki ai ʻa e meʻa ʻoku nau ʻiló.
Kau mataotao
Vahevahe ʻa e kau akó ki ha fanga kiʻi kulupu pea vahe ki he kulupu takitaha ha tefito ke nau ako. ʻOange ha taimi mo ha ngaahi maʻuʻanga tokoni ki he ngaahi kulupú ke nau ako ʻa e ngaahi tefitó koeʻuhí ke lava e mēmipa takitaha ʻo e kulupú ʻo hoko ko ha mataotao ʻi he tefito ne ʻoange ki heʻenau kulupú. Hili ha taimi feʻunga, fokotuʻutuʻu ʻa e kau akó ki ha ngaahi kulupu foʻou koeʻuhí ke ʻi ai ha “mataotao” ʻo ha tefito kehe ʻi he kulupu takitaha. Hili iá, ʻe lava ke vahevahe ʻe he kau akó e meʻa ne nau ako fekauʻaki mo ʻenau ngaahi tefitó.
Fakafehokotaki mo e Ki Hono Fakamālohia ʻo e Toʻu Tupú
Fili ha konga ʻi he kiʻi tohi Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí pea fakaafeʻi e kau akó ke kumi ha ngaahi fakamatala ʻokú ne fakamamafaʻi ʻa e moʻoni kuo nau ʻilo mei ha konga folofola.
ʻOtu lea ki he ʻotu lea
Tuku ke toe hiki ʻe he kau akó ha potufolofola ʻi heʻenau tohinoa akó ʻi ha laine pe sētesi ʻe taha he taimi. ʻOku totonu ke nau tuku ha konga ʻatā he vahaʻa ʻo e laine pe sētesi takitaha. ʻE lava ke ako fakalelei ʻa e kau akó mo fakakaukau ki he foʻi lea takitaha ʻi he laine pe sētesi ko iá. Te nau lava foki ʻo maʻu ha ngaahi potufolofola fakafekauʻaki pe fakamatala kehe ʻi he Gospel Library fekauʻaki mo e laine ko iá. Fai leva ʻa e meʻa tatau ki he laine hoko ʻo e potufolofolá. ʻE lava ke maʻu ha sīpinga ʻo e meʻá ni ʻi he [makasini] “ʻOua ʻe Manavahē,” Ki Hono Fakamālohia ʻo e Toʻu Tupú, Fēpueli 2021, 32.
Mape ʻo e fakakaukaú
Fakaafeʻi e kau akó ke faʻu ha mape ʻo e fakakaukaú ʻi heʻenau tohinoa akó ʻo hangē ko ia ʻi ʻolungá. Te nau lava ʻo hiki ʻa e tefitoʻi moʻoni pe tokāteline naʻa nau ʻiló ʻi he puha ʻi loto mālié. Hili iá pea ʻai ke nau kumi ha toe ngaahi potufolofola pe konga lea ʻokú ne fakalahi e mahino ʻoku nau maʻú. Te nau lava ʻo tānaki atu ʻenau ngaahi fakakaukau fekauʻaki mo e tefito ko iá ʻi he ngaahi puha takatakai ʻi tuʻá. Fakaafeʻi ʻa e kau akó ke fakalahi ʻenau mape ʻo e fakakaukaú ʻaki e hokohoko atu hono tānaki e ngaahi puhá pea fakafehokotaki kinautolu ki he ngaahi meʻa ʻoku nau akó.
Ngaahi fakakaukau ʻoku fekauʻakí
Fakaafeʻi e kau akó ke fili ha tefito ʻe ua pe lahi ange mei he lēsoní ʻoku faitatau ʻi ha ngaahi founga ʻe niʻihi pea kehekehe ʻi ha ngaahi founga kehe. Faʻu ha fakatātā ʻoku tatau mo e fakatātā ʻi ʻolungá ʻa ia ʻe lava ke fokotuʻutuʻu ai ʻe he kau akó ʻa e meʻa ʻoku faitatau ai ʻa e ngaahi meʻa ko ʻení pea mo e meʻa ʻoku kehekehe fekauʻaki mo e ongo tefitó. ʻE lava ke fakahoko ʻeni mo ha toko ua ʻi ha talanoa (hangē ko ʻení, Leimana mo Nīfai) pe tefito ʻe ua (hangē ko ʻení, laka atú mo e sākalamēnití).
Vahevahe ʻa e ngaahi fakakaukaú
ʻOange ki he kau akó ha peesi kuo hiki tatau ai ha konga folofola pea tuku ke nau tohi honau hingoá ʻi ʻolunga. ʻOange ha miniti ʻe taha ki he ua ke nau lau ai ʻa e konga folofolá pea hiki ha fakakaukau ne nau ako mei heʻenau akó.
ʻE lava ke kau ʻi he ngaahi sīpingá ʻa e: ʻE lava ke fakaʻilongaʻi ʻe he kau akó ʻa e futinoutí, vahevahe ʻa e ngaahi lea fakaepalōfita, laineʻi ʻa e ngaahi kupuʻi lea mahuʻingá, siakaleʻi ʻa e ngaahi foʻi lea makehé, hiki ʻa e ngaahi tefitoʻi moʻoní pea vahevahe ʻenau fakamoʻoní mo e ngaahi fakakaukau kehé ʻi he tafaʻakí.
Hili e ʻosi ʻa e taimí, tuku ke nau ʻoange ʻenau laʻipepá ki ha tokotaha ako foʻou ke ne hiki ai ha ngaahi fakakaukau kehe. Hili hano feʻaveʻaki taimi siʻi, tuku ke nau fakafoki ʻenau laʻipepá ki he tokotaha ako ʻuluakí. Founga kehe: ʻOku ʻi he laʻipepa takitaha ha fehuʻi ke fakaʻaongaʻi ʻoku fekauʻaki mo e konga folofolá, kae ʻikai ko ha konga folofola. ʻE lava ke tali ʻe ha kau ako tokolahi ʻa e ngaahi fehuʻí ʻo fakaʻaongaʻi ʻa e folofolá pea vahevahe ʻenau fakamoʻoni ki he tefitó.
Fili tavale pē ha konga lea
Faʻo ha ngaahi konga lea ʻokú ne akoʻi ha foʻi moʻoni mei he lēsoní ʻi ha tatā pe kato. Fakaafeʻi ha niʻihi te nau loto-fiemālie ke toʻo ha konga lea mei ha tataá pea vahevahe ʻa e founga ʻoku fekauʻaki ai ia mo e moʻoni ʻoku nau akó pea mo ʻene ʻuhinga kiate kinautolú. Fakapapauʻi ʻoku ʻoange ha taimi ke nau lau mo teuteu ai ke vahevahe. Founga kehe: Ko ʻene vahevahe pē ʻa e kau akó, ʻoku nau fetongi leva ʻa e ngaahi konga leá mo kumi ha ngaahi hoa foʻou ke vahevahe mo kinautolu ʻenau konga lea foʻoú.
Haʻi fakafolofola
Fili ha fakamoʻoni folofola ʻe 16 pea hiki ʻa e fakamoʻoni folofola takitaha ʻi he laine ʻe 16 ʻi tuʻa he kōlomu ʻo e haʻí. Fakaafeʻi e kau akó ke nau tauhoa pe fakakulupu iiki ʻo lau ʻa e ngaahi potufolofola ʻoku hoa ʻi he foʻi haʻi takitaha pea fakapapauʻi pe ko e fē ʻa e fakamoʻoni folofola ʻe mahuʻingamālie taha ki ha toʻu tupu he ʻahó ni. ʻOku ʻalu ʻa e potufolofola ʻoku nau filí ki he haʻi hono hokó. ʻE hokohoko atu hono aleaʻi ʻe he kau akó ʻa e ngaahi folofola takitaha kuo fakahoá kae ʻoua kuo nau ʻiloʻi ʻa e potufolofola ʻe taha ʻoku nau ongoʻi ʻoku mahuʻingamālie tahá pea aleaʻi hono ʻuhingá. ʻE lava leva ke vahevahe ʻe he kau akó ʻa e ngaahi potufolofolá mo e kalasí.
Ngaahi ʻekitivitī ako ke fili ʻe he tokotaha akó
Hiki ha lisi ʻo ha ngaahi ʻekitivitī ako ʻe ono. Hili hono ʻiloʻi ʻe he kau akó ha foʻi moʻoni mei ha konga folofola, fakaʻaongaʻi ha founga kehekehe ke fili ai ʻe he kau akó pe ko e fē ʻa e ʻekitivitī ke fakakakató (foʻi lulu, toho ha laʻipele, fili ha laʻipepa, meʻa ʻokú ne ʻomi ha mataʻifika kehekehe).
ʻE lava ke kau ʻi he ngaahi sīpingá ʻa e:
-
Vahevahe ha talanoa mei he moʻui ʻa Sīsuú ʻa ia naʻá Ne akoʻi pe fakahaaʻi ai ʻa e moʻoní.
-
Kumi ha potufolofola fakataukei fakatokāteline pe potufolofola kehe fekauʻaki mo e moʻoní.
-
Kumi ha sīpinga ʻo ha talanoa mei he folofolá ʻo ha taha naʻá ne moʻui ʻaki ʻa e moʻoní.
-
Kumi ha lea mei ha taki ʻo e Siasí ʻokú ne akoʻi ʻa e moʻoní.
-
Vahevahe ha aʻusia fakataautaha ʻo ha taha kuo tāpuekina ʻe he moʻoní.
-
Fili haʻo sīpinga pē ʻaʻau ʻo ha meʻa te tau lava ʻo fai ke moʻui ʻaki ʻa e moʻoní. Kumi ha potufolofola ʻokú ne akoʻi e sīpinga ʻokú ke vahevahé.
Vilo hokohoko ʻo ako
Tuku ʻi he tesi pe sea takitaha ha kaati ʻoku ʻi ai ha fakahinohino hangē ko e “lau ha potufolofola pe ha konga lea,” pe “tali ha fehuʻi mei he lēsoní.” ʻE lava ke vilo ʻa e kau akó ʻi he nofoʻangá pea muimui ki he ngaahi fakahinohino ʻi he kaati ko iá.
Ngaahi fakakaukau ki he tefitó
Fakaafeʻi e kau akó ke nau faʻu ha fakatātā hangē ko ʻení ʻoku kamata ʻaki e foʻi moʻoni pe tefito ʻoku fakaʻilongaʻi mataʻāʻā ʻi lotomālie. Hili iá pea tā leva ʻe he kau akó ha ngaahi laine ki he ngaahi siakale ʻi tuʻá pea fakahingoa ʻaki ha ngaahi potufolofola, ngaahi moʻoni, pe ʻelemēniti fekauʻaki mo e tefitó. Hangē ko ʻení, ʻe lava ke lekooti ʻe he kau akó ʻa e fakaafe ʻa e Tuʻi ko Penisimaní ke “Tui pe ki he ʻOtuá” ʻi he siakale ʻi lotó fakataha mo e fakamoʻoni fakafolofola “Mōsaia 4:9–10.” Hili iá te nau lava ʻo lisi ʻi he ngaahi siakale ʻi tuʻá ʻa e ngaahi meʻa ʻoku fakaafeʻi kitautolu ʻe he Tuʻi ko Penisimaní ke tau tui ki ai fekauʻaki mo e ʻOtuá.
Kiʻi taʻofi fakataimi e vitioó
Fakaʻaongaʻi ha foʻi vitiō ʻokú ne fakatātaaʻi pe akoʻi ha tefitoʻi moʻoni ʻo e ongoongoleleí. Kiʻi taʻofi ʻi ha ngaahi momeniti kehekehe ke fakatupu ha fieʻilo pe tokoni ke ʻanalaiso ʻe he kau akó ʻa e meʻa ʻoku nau sio ki aí. Te ke lava ʻo ʻeke ki he kau akó ha ngaahi fehuʻi hangē ko e:
-
“Ko e hā nai haʻo fakakaukau pe ongoʻi pe ko ha ngaahi fehuʻi te ke ala maʻu kapau naʻá ke ʻi he tūkunga ko ʻení?”
-
“Ko e hā ha ngaahi potufolofola kuó ke ako he ʻahó ni ʻe lava ʻo tokoni?”
-
“Ko e hā ʻokú ke ʻamanaki ʻe mahino ki he tokotahá ni fekauʻaki mo e moʻoni kuo tau ako he ʻaho ní?”
-
“Te ke fakafekauʻaki fēfē ki he talanoá ni he ʻaho ní?”
3. Vahevahe ʻa e meʻa ʻoku nau akó.
ʻOku fakaafeʻi ʻa e kau akó ʻi he kotoa ʻo e ngaahi lēsoní ke vahevahe ʻenau ngaahi fakakaukaú mo e ʻiló. ʻI he fakamatala, vahevahe, mo fakamoʻoni ʻa e kau akó ki ha hoa, kiʻi kulupu, pe ki he kalasí, ʻoku faʻa tataki kinautolu ʻe he Laumālie Māʻoniʻoní ki ha fakamoʻoni mālohi ange ʻo e ngaahi meʻa tonu ʻoku nau fakamatalaʻí. ʻE lava foki ke tākiekina mālohi ʻe heʻenau ngaahi leá mo e aʻusiá ʻa e loto mo e fakakaukau ʻa kinautolu ʻoku fanongó ʻo fakafou ʻi he mālohi ʻo e Laumālie Māʻoniʻoní. Neongo ʻoku mahuʻinga ʻení, ka ʻe lava ke faingataʻa ki he kau akó ke nau vahevahe koeʻuhí ko ha ngaahi ʻuhinga kehekehe. Manatuʻi ke ʻai ke malu ki he kau akó ke nau “paasi” kapau ʻoku ʻikai ke nau ongoʻi fiemālie ke vahevahe. ʻE lava ke tokoni ʻa e ngaahi fakakaukau ko ʻení ke vahevahe ʻe he kau akó ʻa e meʻa ʻoku nau akó.
ʻAnalaiso ha potufolofola
Hiki ha veesi folofola ʻi lotomālie ʻi ha laʻipepa lahi (pe, te ke lava ʻo fakaʻaliʻali ia ʻi he palakipoé). Fakapapauʻi ʻoku lahi feʻunga ke sio ki ai ʻa e tokotaha ako kotoa pē. ʻE lava ke fakaʻaongaʻi ʻe he kau akó ha ngaahi miniti siʻi ke ʻeke ʻa e ngaahi fehuʻi lahi taha te nau lavá fekauʻaki mo e veesi folofolá. Hili iá pea ʻoange ha ngaahi miniti siʻi ke nau fekumi ai ʻi he Gospel Library ke tali ʻa e ngaahi fehuʻí. Ko e founga ʻe tahá, ʻe lava ke paaki ʻa e folofolá ʻi ha laʻipepa pea ʻe lava ke fakahoko fakafoʻituitui ʻe he kau akó ʻa e ʻekitivitī tatau.
Palakipoe fakakaukau
ʻE lava ke fakaʻaongaʻi ʻe he kau akó ha fanga kiʻi sticky notes pe laʻipepa iiki ke hiki ʻenau ngaahi fakakaukau fekauʻaki mo e ngaahi founga ke fakaʻaongaʻi ai ha moʻoni ʻo e ongoongoleleí pea fakapipiki ʻi he palakipoé. Hangē ko ʻení, ʻe lava ke kole ki he kau akó ke hiki ʻenau ngaahi fakakaukau fekauʻaki mo e ngaahi founga ke fakaʻaongaʻi ai ha tefitoʻi moʻoni ʻo e ongoongoleleí. ʻE lava ke ʻi he palakipoe fakakaukaú ha fakatātā lahi ʻo ha meʻa ʻoku fekauʻaki mo e tefitó. Hangē ko ʻení, kapau ʻe ako ʻe he kau akó ʻa e fuʻu ʻakau ʻo e moʻuí, te nau lava ʻo lisi ha ngaahi founga ke kai ai ʻa e fuá pea fakaʻaliʻali ia ʻi he ngaahi vaʻa ʻo ha fuʻu ʻakau ʻi he palakipoé. ʻOange ha taimi ki he kau akó ke toe vakaiʻi e meʻa naʻe tohi ʻe he niʻihi kehé.
ʻIloʻi ho haʻofangá
Tuku ke fili ʻe he kau akó ha haʻofanga kakai ke fakataumuʻa ki ai ʻenau leá pea vahevahe ʻa e meʻa ʻoku nau akó ʻi ha founga ʻoku mahino ki he haʻofangá. ʻE lava ke fakahoko ʻe he kau akó ʻa e ʻekitivitī ko ʻení mo ha hoa pe kulupu. ʻE lava ke ʻaonga ke ʻoange ki he kau akó ha ngaahi fili kehekehe pea tuku ke nau fili ʻa e haʻofanga ʻoku nau fie akoʻí. Ko ha ngaahi meʻa siʻi ʻeni te nau lava ʻo fili mei ai:
-
Ko ha kaungāmeʻa ʻi ha tui fakalotu kehe ʻi hoʻo ngāue fakafaifekaú.
-
Fānau ʻi ha kalasi palaimeli.
-
Ko ha kaungāmeʻa mei he akó.
-
Ko ha mēmipa ʻo ho fāmilí.
Hokohoko atu ʻa e fepōtalanoaʻakí
Kimuʻa pea fai ha fealēleaʻaki fakakalasí, ʻe ala tokoni ke poupouʻi e kau akó ke nau fakafanongo lelei ki he niʻihi kehé. ʻE lava ke ʻoange ʻa e ngaahi fakakaukau ko ʻení ki he kau akó kimuʻa pea fai e fealēleaʻakí. ʻE lava ke tokoni ʻeni ke nau fefanongoʻaki lelei pea kamata ha fealēleaʻaki fakamaama ʻoku fakakau ai ha kau ako tokolahi ʻi he fealēleaʻakí. Te ke lava ʻo fakaʻaliʻali kinautolu pe ʻoange ki he kau akó ha laʻipepa tufa ʻo e ngaahi fakakaukau ko ʻení.
Tānaki ki ai—Vahevahe ʻa e meʻa naʻá ke saiʻia ai ʻi he fakamatala ʻa ha kaungā ako, hili iá pea tānaki atu leva hoʻo ngaahi fakakaukaú.
-
“ʻOku fakamanatu mai kiate au ʻa e …”
-
“ʻOku ou tui ki ai, koeʻuhí …”
-
“Moʻoni ia. Ko e sīpinga ʻe taha ko e taimi …”
-
“Ko ha fakakaukau lelei ia …”
Fakamāʻopoʻopo—Toe fakalea ʻa e meʻa naʻe lea ʻaki ʻe hoʻo kaungā akó pea toki tānaki atu ki ai.
-
“ʻOku ou fanongo ki hoʻo pehē …”
-
“Ko ia, kapau ʻoku tonu ʻeku mahino ki hoʻo pehē …”
-
“ʻOku ou saiʻia hoʻo pehē …”
Fehuʻi—ʻEke ki ha tokotaha ako ʻe taha ha ngaahi fehuʻi fekauʻaki mo e meʻa naʻa nau lea ʻakí.
-
“ʻE lava ke ke toe fakamatala lahi ange ki ai?”
-
“ʻOku ʻikai keu fakapapauʻi ʻoku fuʻu mahino kiate au … ?”
-
“ʻOku mahino kiate au ho ʻuhingá, kae fēfē … ?”
-
“Kuó ke fakakaukau nai ki he … ?”
Paasi ʻa e laʻipepá
ʻAi ha laʻipepa ʻoku ʻi ai ha ngaahi fakahinohino hokohoko ʻe lava ke kau ai ha ngaahi potufolofola pe konga lea ke lau mo ha ngaahi fehuʻi ke tali. Fakapapauʻi ʻoku ʻi ai ha feituʻu feʻunga ke hiki ai ʻe he kau akó ʻenau ngaahi talí. ʻOange ki he tokotaha ako takitaha ha tatau pea fakaafeʻi ke nau tohi honau hingoá ʻi ʻolunga. ʻOku tali ʻe he kau akó ʻa e fehuʻi ʻuluakí. Hili iá te nau pelupelu leva ʻa e laʻipepá ke fakapuliki ʻaki ʻenau talí. Te nau paasi ʻa e laʻipepá ki ha tokotaha ako ʻe taha ke ne tali ʻa e fehuʻi hokó pe fai e fekau hokó. ʻE pelupelu ʻe he tokotaha ako takitaha ʻa e laʻipepá ke fakapuliki ʻenau talí pea ʻave ia ki ha tokotaha ako kehe. ʻI he fakaʻosinga ʻo e viló, ʻoku fakafoki ʻa e ʻū laʻipepá ki he tokotaha ako ʻuluakí ʻa ia te ne lau ʻa e meʻa naʻe tohi ʻe honau kaungāakó.
Teuteu ke vahevahe
Vahevahe ha fehuʻi mahuʻinga te ke loto ke tali ʻe he kau akó. Fakapapauʻi ke ke vahevahe ia ʻi ha ngaahi miniti kimuʻa pea toki fakaafeʻi kinautolu ke tali ʻa e fehuʻí. Hangē ko ʻení, te ke lava ʻo pehē, “ʻI ha ngaahi miniti siʻi mei heni, ʻoku ou loto ke vahevahe mai ʻe hamou niʻihi hoʻomou ngaahi fakakaukau fekauʻaki mo e ______________. Kātaki ʻo fakakaukau ki he meʻa te ke fie vahevahe ʻi heʻetau ako ʻa e potufolofola ko ʻení.” ʻE lava ke fakaafeʻi ʻa e kau akó ke nau ʻuluaki vahevahe mo ha hoa pe kulupu.
Saveaʻi e kalasí
Fakahoko ha savea ʻi hoʻo kau akó ʻaki hano ʻoange ha kiʻi laʻipepa siʻisiʻi. ʻE lava ke tali ʻe he kau akó ʻo ʻikai tohi ai honau hingoá pea faʻo ʻenau laʻipepá ʻi ha puha pe tatā. Te ke lava ʻo tānaki ʻenau ngaahi fakakaukau fekauʻaki mo ha tefitoʻi moʻoni, fehuʻi, pe ko ha fili ʻe lava ke fai ʻe ha taha ʻi ha tūkunga. Pe, kapau ʻoku maʻu ʻe he kau akó ha telefoni toʻotoʻo, te ke lava ʻo fakaʻaongaʻi ha polling app ʻoku taʻetotongi mo faingofua hono fakaʻaongaʻí. ʻOange ki he kau akó ha ngāue fakaako mo ha fehokotakiʻanga ki ha fehuʻi pea tuku ke nau tali ʻaki ʻenau telefoní. Te ke lava ʻo sio ki he ngaahi talí pea te ke lava ʻo fakaʻaliʻali ia ʻi he kalasí. ʻOku lahi ha ngaahi app savea taʻetotongi ʻe lava ʻo tokoni heni.
Ngaahi kupuʻi lea mālohi
Fakaʻaongaʻi ha ngaahi kupuʻi lea mālohi ke akoʻi hoʻo kau akó ke vahevahe mo fakaʻaiʻai ha fealēleaʻaki ʻi he kalasí.
Ko ha meʻangāue ʻaonga ʻeni ki he ngaahi kalasi ʻoku fakalongolongo pe taʻepau e founga pe ko e meʻa ke vahevahé. Fakaʻaliʻali e lisi ʻo e ngaahi kupuʻi lea ʻi laló ke tokoni ki he kau akó ke nau maʻu ha fakakaukau ki he meʻa te nau ala vahevahé. Tuku ke nau ako ha konga folofola pea teuteu ke vahevahe ʻo fakaʻaongaʻi ha kupuʻi lea mālohi ʻe taha pe lahi ange. Tokoniʻi ʻa e fealēleaʻakí pe ʻai ha tokotaha ako ke ne tokoniʻi ia.
-
Ko ha veesi ʻoku ou saiʻia ʻaupito ai ko e…
-
Ko ha kupuʻi lea ne mahino lelei ko e…
-
Ko ha lēsoni ke ako mei heni ko e…
-
Naʻá ku ʻilo ha tefitoʻi moʻoni…
-
Ko ha foʻi lea ne u mālieʻia/puputuʻu ai ko e…
-
Ko e meʻa ʻoku fiemaʻu ke ako ʻe ha toʻu tupu mei hení…
-
Ko e meʻa ʻoku ou ʻilo ʻoku moʻoni hení ko e…
-
Ko e meʻa ʻoku ou veiveiua ai ko e…
-
Ko e meʻa ʻe taha ʻoku ou ongoʻi ʻoku totonu ke u fai ʻaki ʻeni he ʻaho ní ko e…
-
Ko e meʻa ʻe taha ʻoku ou ako fekauʻaki mo e Fakamoʻuí ʻi he meʻá ni ko e…
ʻŪ kaati ke kaú
Tufa ha ʻū kaati ʻe lava ke puke hake ʻe he kau akó ko ha tali ki he ngaahi fehuʻi ʻokú ke ʻeké. ʻE lava ke fakaʻaongaʻi ʻe he kau akó ʻa e ʻū kātí ke fakahaaʻi ʻenau talí pe ko e taimi ʻoku nau mateuteu ai ke vahevahe pe aleaʻi ʻenau ngaahi fakakaukaú. Hangē ko ʻení:
-
Lanu mata ki he moʻoni, kulokula ki he hala
-
“Kei Fakakaukau Pē” ʻi he tafaʻaki ʻe taha mo e “Mateuteu ke Vahevahe” ʻi he tafaʻaki ʻe tahá
-
Ko ha kaati ʻoku ʻi ai ha ʻū mataʻifika pe mataʻitohi ʻokú ne fakafofongaʻi e ngaahi fili kehekehe ʻoku lisi ʻi he palakipoé. ʻOku tuhu kotoa ʻa e kau akó ki ha mataʻifika pe mataʻitohi ki heʻenau ngaahi talí koeʻuhí ke ke lava ʻo sio ki heʻenau talí pea fili ʻa e kau ako ke talí.
-
Ko ha kaati ʻoku lahi e ngaahi tali ʻi he tafaʻaki kehekehe (vakai ki he sīpinga ʻi laló). ʻI he taimi ʻoku fakaafeʻi ai ʻa e kau akó ke talí, ko ʻenau talí ʻoku ʻi loto-mālie taupotu ki ʻolungá. Te ke lava leva pe ko ha tokotaha ako ʻo ui e kau akó ʻo makatuʻunga ʻi he tali ʻoku nau fakaʻaliʻalí.
Kamataʻi e tūkungá
ʻOange ki he kau akó ha tūkunga taʻekakato pea fakaafeʻi ke nau tānaki ki he ngaahi fakaikiikí ke ʻai ke mahuʻingamālie mo mahino ange. Hangē ko ʻení, te ke lava ʻo lea ʻaki ha meʻa hangē ko e “Tau faʻu ha tūkunga fekauʻaki mo ha taha ofi ki ho toʻú, ko Sūlia, ʻa ia ʻoku fehangahangai mo ha ngaahi faingataʻa ʻo e moʻuí. Ko e hā nai ha niʻihi ʻo e ngaahi faingataʻa ko ʻení? ʻI he vahevahe ʻa e kau akó, tokoni ke nau fokotuʻu mai ha ngaahi fakaikiiki ke ʻai ʻa Sūlia, pe ko ha hingoa kehe naʻá ke fili, ke hangē ha tokotaha moʻoní. Te ke lava foki ʻo tānaki atu ha ngaahi fakaikiiki mahuʻinga ʻokú ne tākiekina e fealēleaʻakí, hangē ko e fehuʻi tefito ʻa Sūliá.
Pe, te ke lava ʻo ʻai ke faʻu ʻe he kau akó haʻanau ngaahi tūkunga pē ʻanautolu pea hiki ia ʻi ha laʻipepa. Te ke lava ʻo fakafetongi ʻa e ngaahi tūkunga ko ʻení pea tuku ki he kau akó ke nau tali ʻaki hono fakaʻaongaʻi e meʻa naʻa nau akó.
Pōpoaki text ki he tūkungá
Faʻu ha tūkunga ʻoku kamata ʻaki ha pōpoaki text ʻe taha, kae ʻoua naʻa fakahā ki he kau akó ʻa e ngaahi tūkunga naʻe iku ki he text ko iá. Te ke lava ʻo ʻoange ki he tokotaha ako takitaha ha faʻunga text hangē ko ʻení pea fakaafeʻi ke nau faʻu ha fetalanoaʻaki ʻi he text.
Fakakaungāmeʻa vavé
ʻOku kamata hono tokoniʻi e kau akó ke nau ongoʻi fiemālie ʻi he fevahevaheʻakí ʻaki hono tokoniʻi kinautolu ke nau ʻilo honau kaungāakó. ʻE lava ke tokoni ʻa e ʻekitivitī ko ʻení ki he kau akó ke nau feʻilongaki pea vahevahe ha meʻa fekauʻaki mo e folofolá. Fokotuʻutuʻu ʻa e kau akó ki ha ngaahi hoa ʻaki hano fokotuʻutuʻu ha ʻotu sea ʻe ua ʻoku fehangaaki. Fakaafeʻi leva e kau akó ke nau fakaʻilongaʻi ha potufolofola ne ʻoange pea tali ha fehuʻi naʻá ke teuteu fekauʻaki mo e potufolofola ko iá. Fakaafeʻi e hoa takitaha ke na tali ha fehuʻi fakakaungāmeʻa naʻá ke teuteuʻi ʻe lava ʻo tokoni ke na feʻilongaki lelei ange ai. Fakaafeʻi e kau akó ke nau fetongi hoa pea toutou fai ʻa e founga ko iá ʻo fakaʻaongaʻi ha ngaahi fehuʻi mo ha ngaahi potufolofola kehekehe. Ke ʻai ʻa e kau akó ke nau ngāue mo e hoa kotoa pē, ʻoku ʻikai vilo ʻa e tokotaha ako ʻoku tangutu ʻi he taha ʻo e ngaahi sea he tulikí.
Palakipoe fakapipiki
Fokotuʻu ʻi he palakipoé ha ngaahi fehuʻi ʻe niʻihi ke tali ʻe he kau akó pe ngaahi veesi te nau lava ʻo vahevahe ha ngaahi fakakaukau fekauʻaki mo ia. ʻE hiki ʻe he tokotaha ako takitaha honau hingoá ʻi ha (ʻū) laʻipepa pipiki pea fakapipiki ia ʻi he tafaʻaki ʻo e (ngaahi) fehuʻi pe (ngaahi) veesi ʻoku nau loto-fiemālie ke tali pe fakamatala ki aí.
Founga kehe: ʻe lava ke fakahaaʻi ʻe he ngaahi lanú ʻa e meʻa ʻoku fie vahevahe ʻe he kau akó, ʻa ia, ko ha fakakaukau, fehuʻi, potufolofola fakafekauʻaki, mo e alā meʻa pehē.
Kamosi ha tā
Fakaafeʻi e kau akó ke fili ha meʻa ʻi he loki akó pe ko ha fakatātā ʻi heʻenau telefoní ʻe lava ke fakaʻaongaʻi ke tokoni ke akoʻi ha tefitoʻi moʻoni pe tokāteline. Fakaafeʻi ke nau vahevahe ʻa e founga te nau akoʻi ai ki ha taha ʻa e meʻa ne nau akó ʻo fakaʻaongaʻi ʻa e meʻa pe fakatātā ko iá.
Tohi kimuʻa pea vahevahé
ʻOange ha taimi ki he kau akó ke lekooti e ngaahi tali ki he ngaahi fehuʻi mahuʻingá ʻi heʻenau tohinoa akó kimuʻa pea toki fakaafeʻi ke nau tali leʻolahi.
4. Faʻu ha fakatātā ʻo e meʻa ne nau akó
ʻOku faʻa fakaafeʻi ʻe he ngaahi lēsoní ʻa e kau akó ke nau fai ha meʻa ke fakatātaaʻi ʻaki ʻa e meʻa kuo nau akó. ʻE lava ke kau heni hono fakaʻaongaʻi ha ngaahi taukei mohu founga. Ko e ngaahi ʻekitivitī ko ʻení ko ha ngaahi founga siʻi ia ke tokoni ki he kau akó ke nau fakahoko ʻeni.
Maau fakaʻuhinga (acrostic)
Fakaʻaongaʻi e ngaahi mataʻitohi ʻo ha hingoa, feituʻu, pe tokāteline ke faʻu ʻaki ha foʻi maau fakaʻuhinga ʻo fakaʻaongaʻi e meʻa ne nau ako ʻi he kalasí. Hangē ko ʻení, ʻe lava ke tohi ʻe ha tokotaha ako ha foʻi maau fakaʻuhinga ʻo fakaʻaongaʻi ai ʻa e foʻi lea ko e tuí ʻo hangē ko ʻení:
T – Tuitala ki he sīpinga ʻa Sīsū Kalaisí.
U – Ului moʻoni ki he ongoongoleleí.
I – Ikunaʻi e ngaahi faingataʻá ʻi he faʻa kātaki.
Faʻu e polokalama
Faʻu ʻe he kau akó ʻenau app pē ʻanautolu ʻi ha laʻipepa. ʻE lava ke fakaʻaongaʻi ʻe he polokalamá ha foʻi moʻoni ʻoku akoʻi ʻi he ngaahi folofola naʻe akó pea fakakau ai ʻa e ngaahi ʻekitivitī, fakatātā, potufolofola, pe kupuʻi lea ʻe lava ʻo tokoni ki ha taha ke ne fakaʻaongaʻi ia ʻi heʻene moʻuí.
Kiasimasi (Chiasmus)
Ko e kiasimasí ko ha konga ia ʻo e leá ʻa ia ʻoku liliu ai ʻa e konga hono ua ʻo e sētesí, palakalafí, pe faʻu ha sioʻata tohi, ʻoku tohi fakaholomui ʻa e konga ʻuluakí. ʻOku maʻu ʻa e tefitoʻi pōpoakí ʻi lotomālie (vakai, ʻAlamā 36 ko ha sīpinga). Fakaafeʻi e kau akó ke nau faʻu ha kiasimasi mei he meʻa ʻoku nau akó. ʻE fokotuʻu ʻe he kau akó ʻa e foʻi moʻoni ʻoku fakaʻilongaʻi mataʻāʻaá ʻi lotomālie pea tānaki atu ha ngaahi laine ʻi ʻolunga mo lalo mo ha ngaahi potufolofola poupou pe fakamatala fakaepalōfita. ʻE lava ke hangē ko ʻení:
A – ko e meʻa ʻoku ongoʻi ʻe he kau akó fekauʻaki mo e moʻoní pe ngaahi aʻusia kuo nau maʻu ʻi aí
E – ko e meʻa ʻoku mahino ki he kau akó fekauʻaki mo e moʻoní
F – moʻoni pe tefitoʻi moʻoni ʻo e ongoongoleleí
F – moʻoni pe tefitoʻi moʻoni ʻo e ongoongoleleí
E – ko ha mahino lahi ange fekauʻaki mo e moʻoní
A – ko ha toe ngaahi aʻusia kehe kuo maʻu ʻe he kau akó ʻi he moʻoní mo e ongo ʻoku nau maʻu ki aí
Ako fanga kiʻi laʻipepa fakaolí
ʻOange ki he kau akó ha faʻunga tohi fakaoli ʻoku teʻeki tohi ha meʻa ai pe tuku ke nau faʻu ha sīpinga ʻi ha laʻipepa. ʻOku lau ʻe he kau akó ʻa e konga folofolá pea faʻu ha kiʻi talanoa fakaoli ʻokú ne fakatātaaʻi e talanoa ʻi he konga folofolá. ʻAi ke nau fakaʻaongaʻi ʻa e puha fakaʻosí ke vahevahe ʻa e meʻa ʻoku nau ongoʻi ko e foʻi moʻoni mahuʻinga taha ia ke ako mei he talanoá. ʻE lava leva ke nau vahevahe ʻenau ngaahi talanoá mo e kalasí. Pe, te nau lava ʻo fakaʻaongaʻi ʻa e ʻekitivitī ko ʻení ke fakatātaaʻi ʻaki hano fakaʻaongaʻi he ʻahó ni ʻa e moʻoní pe tefitoʻi moʻoní.
Faʻu ha fokotuʻutuʻu lēsoni
Faʻu ha fokotuʻutuʻu ʻe lava ke fakaʻaongaʻi ʻe he kau akó ke teuteuʻi ha lēsoni nounou, lea, pōpoaki, pe founga ke vahevahe ai ha potufolofola. Te ke lava ʻo ʻoange ha sīpinga fokotuʻutuʻu ʻoku teʻeki fakafonu ʻa ia ʻe lekooti ai ʻe he kau akó e ngaahi meʻa ʻoku nau ʻiló. Te ke lava ʻo fakahinohinoʻi e kau akó ke fakakau ha fakamatala kehekehe ʻi he puha takitaha. Hangē ko ʻení, ʻe lava ke hiki ʻe he kau akó ha kaveinga ʻi he puha ʻuluakí, fakamatalaʻi fakanounou ʻa e ngaahi veesi mahuʻingá ʻi he puha hokó, sīpinga pe ngaahi talanoa fakataautaha ʻi he puha lōloa ʻe tolú, mo ha fakamoʻoni ʻi he puha fakaʻosí.
Faʻu ha kiʻi tohi tufa
ʻOange ki he tokotaha ako takitaha ha laʻipepa pea fakaafeʻi ke nau pelu tolu ia. ʻE lava ke faʻu ʻe he kau akó ha peesi talamuʻaki ʻoku ʻi ai ʻa e tefitoʻi moʻoni pe tokāteline kuo nau ʻiló. ʻE lava ke faʻu ʻe he kau akó ha ngaahi peesi hokohoko mo e subtitles mo e fakaikiiki mei he meʻa ʻoku nau akó. Te ke lava ʻo fakaafeʻi kinautolu ke nau tuku ha feituʻu ʻatā ʻi he tafaʻaki ki mui ʻo e kiʻi tohi tufá ke hiki ha faʻahinga taumuʻa pe palani ʻoku nau fokotuʻu lolotonga e lēsoní.
Fakafaʻahinga fakalanulanu
Paaki ha peesi ʻo e konga folofolá kuo hiki tatau pea ʻoange ha peni kala ke fakaʻilongaʻi ʻaki ʻa e folofolá. Feinga ke ʻiloʻi ʻa e ngaahi kulupu hangē ko e “Ngaahi tāpuaki kuo Talaʻofa Maí,” “Ngaahi Ngāue ʻo e Tuí,” pe “Ngaahi Fekaú.” ʻE lava ke vahe ki he kulupu takitaha ha lanu. Fakaafeʻi e kau akó ke nau ako ʻa e ngaahi vēsí pea fakaʻilongaʻi ʻa e ngaahi kulupu fakalanulanú ʻi heʻenau maʻu iá. Fakaafeʻi e kau akó ke vahevahe ʻa e meʻa naʻa nau fakaʻilongaʻi mo ako mei he ʻekitivitií.
Sivisiviʻi ha palani
Te ke lava ʻo fakaʻaongaʻi ha meʻa fokotuʻutuʻu fakatātā ke tokoni ki he kau akó ke siviʻi ʻenau ngaahi palaní. ʻOku tali ʻe he kau akó ʻa e ngaahi fehuʻi ʻi he konga takitaha ʻo e fakatātaá.
Saati
ʻE lava ke faʻu ʻe he kau akó ha fakatātā ʻoku fakatātaaʻi ai e fekauʻaki ʻa e ngaahi fili pe fakakaukau kehekehe ʻi he lēsoní. Hangē ko ʻení, ʻe lava ke fakaʻaongaʻi ha saati hangē ko ʻení ke fakahaaʻi ʻa e feituʻu ʻe lava ke iku ki ai e tui pe ʻamanaki lelei kia Sīsū Kalaisí.
Faʻu ha meʻa ʻaki ho nimá
ʻOange ki he kau akó ha naunau te nau lava ʻo fakaʻaongaʻi hangē ko ha fanga foʻi poloka pe ʻumea ke faʻu ʻaki ha meʻa ʻokú ne fakafofongaʻi ʻa e meʻa kuo nau akó. Hangē ko ʻení, ʻe lava ke fakaʻaongaʻi ʻe he kau akó ha ngaahi poloka ke fakafofongaʻi ʻa e ngaahi kolotau naʻe fekau ʻe he ʻEikitau ko Molonaí ke langa ʻe hono kakaí (vakai, ʻAlamā 48:7–9). ʻE lava ke fakahingoa ʻe he kau akó ʻa e konga takitaha ʻaki ha founga te tau lava ai ʻo teuteu fakalaumālie ke matuʻuaki ʻa e ngaahi ʻohofi ʻa Sētané.
ʻĪmisi fakatahatahaʻi
ʻE lava ke kumi ʻe he kau akó ha ʻū fakatātā ʻi heʻenau telefoní pe ʻi he Gospel Library ʻoku fekauʻaki mo e moʻoní. Te nau lava ʻo faʻu ha ʻīmisi fakaʻilekitulōnika ʻo fakatahatahaʻi pea vahevahe ia ʻi he kalasí.
ʻIloʻi – fifili – ako
Vahevahe ʻe he kau akó ha laʻipepa ki ha kōlomu ʻe tolu. ʻI he kōlomu ʻuluakí, te nau hiki ai ʻa e meʻa kuo nau ʻosi ʻilo fekauʻaki mo ha tefito. ʻI he kōlomu hokó, te nau hiki ai ʻa e meʻa ʻoku nau fie ʻiló. ʻE fakafonu ʻa e kōlomu hono tolú ʻi he lolotonga mo e hili ʻa e lēsoní ʻaki e ngaahi meʻa naʻe ako ʻe he kau akó. ʻE lava ke fakaafeʻi ke nau feinga ke ʻiloʻi ʻa e meʻa naʻá ne tokoniʻi kinautolu ke nau ako pe liliu ai ʻenau ngaahi ongó lolotonga e lēsoní, kapau ʻoku ʻi ai.
ʻŪ tohi ki he kahaʻú
ʻE lava ke fai ʻe he kau akó ha tohi kiate kinautolu pē ke fakaava mo lau ʻi ha taimi pau (ʻi he ngāue fakafaifekaú, mali, maʻu ʻena ʻuluaki pēpeé). Ko ha founga ʻe taha ko hano ʻai ke faitohi ʻa e kau akó ki he kau mēmipa honau fāmilí ʻi he kahaʻú. Pe te nau lava ʻo faitohi ki he kau ako ʻi he kahaʻú te nau haʻu ki he seminelí pea fakamatalaʻi e meʻa ne nau akó mo e ongo ne nau maʻú.
Faʻu ha meʻa fakakata (meme)
ʻOku ʻiloʻi ʻe he tokotaha ako takitaha ha tefitoʻi moʻoni mei heʻenau akó pea faʻu ha kupuʻi lea ongo mālie ʻokú ne fakatātaaʻi ʻa e tefitoʻi moʻoní. Kole ange foki ke nau tā ha fakatātā ʻokú ne fakatātaaʻi ʻa e tefitoʻi moʻoní. Fakapapauʻi ʻoku fakakau ai ʻa e fakamoʻoni fakafolofolá. Tuku ke nau vahevahe mo fakamatalaʻi ʻenau faʻu ha meʻa fakakata (meme). Mahalo te ke fie fakaʻaliʻali ha ngaahi sīpinga mei ha makasini kimuí ni ʻo e Ki Hono Fakamālohia ʻo e Toʻu Tupú .
Faʻu ha palani ke “ʻalu ʻo fakahoko”
ʻE lava ke faʻu ʻe he kau akó ha palani ke fakahoko ha ngāue lelei mo māʻoniʻoni mei he ngaahi meʻa ʻoku nau ako mo ongoʻi lolotonga e lēsoní. Ke fai ʻení, te ke lava ʻo ʻai ke nau ʻiloʻi ʻa e meʻa te nau fie fakahokó pea faʻu ha ngaahi sitepu pau ki he founga te nau fakahoko ʻaki ʻenau ngaahi palaní. ʻE lava ke kau heni hono ʻiloʻi e ngaahi faingataʻa te nau ala fehangahangai mo iá mo ha ngaahi sitepu pau ke fakaleleiʻi ʻaki e ngaahi fakafeʻātungia ko ʻení. ʻI hono faʻu ʻe he kau akó ʻenau ngaahi palaní, poupouʻi kinautolu ke vahevahe ia ki ha fanga kiʻi sitepu iiki ange. ʻE lava ke tokoni hono fai ha fanga kiʻi liliu iiki ki he ngaahi meʻa ʻoku nau fakahoko he ʻaho kotoa peé ke nau ongoʻi lavameʻa lahi ange ai.
Faʻu ha palani “fuʻu ʻakau filí”
ʻE lava ke fakaʻaongaʻi ʻe he kau akó ha fuʻu ʻakau fili ke tokoni ʻi hono fakaʻaongaʻi ha tefitoʻi moʻoni ʻo e ongoongoleleí ʻaki hono lisi e ngaahi lelei mo e kovi ʻo e ngaahi fili kehekehé. Te nau lava ʻo kamata ʻaki ha fehuʻi ʻe taha fekauʻaki mo ha tefitoʻi moʻoni ʻo e ongoongoleleí pea hili hono lisi e ngaahi leleí mo e koví, sivisiviʻi ʻenau ngaahi fili ke fai e fakakaukau ko iá. Faʻu ha fuʻu ʻakau kehekehe ki he fehuʻi mo e fili takitaha ʻi he palaní.
Hangē ko ʻení: Faʻu ha palani ke ako ʻa e folofolá.
Ngaahi Fehuʻí:
-
Ko e fē taimi te u ako ai ʻeku folofolá? (Faʻu ha fuʻu ʻakau fili ʻe taha.)
-
Te u ako ʻeku folofolá ʻi fē? (Faʻu ha fuʻu ʻakau fili ʻe taha.)
-
Ko e hā e fuoloa ʻeku ako ʻeku folofolá? (Faʻu ha fuʻu ʻakau fili hono tolu.)
ʻI he fakaʻosinga ʻo e ngāué, ʻoku faʻu fakataha ʻe he fili ʻe tolú ha palani, pe taumuʻa, mo ha ngaahi sitepu pau ke fakahoko ai ia.
Veesi ʻo e himi foʻou
ʻE lava ke fili ʻe he kau akó ha himi fekauʻaki mo ha foʻi moʻoni naʻe ako ʻi he lēsoní. Fakaafeʻi ke nau faʻu ha veesi foʻou ʻo e himí mei he meʻa ne nau akó. ʻE lava ke fili ʻe he kalasí ha ngaahi veesi foʻou ʻe niʻihi ke fakaʻaliʻali mo hivaʻi.
Ngāue–makatuʻunga ʻi he akó
ʻE lava ke faʻu ʻe he kau akó ha ngāue fakavahaʻa lēsoni ʻa ia te nau tānaki ki ai ha fakamatala ʻi he ngaahi lēsoni/uike hoko maí. ʻE lava pē ko ha foʻi maau, himi, vitiō, ngāue fakaʻaati, pe ngaahi faʻu mohu founga kehe ʻoku nau faʻu ʻi he ngaahi lēsoni hoko maí.
Toe tohi e ikuʻangá
Fakaafeʻi e kau akó ke toe hiki e fakaʻosinga ʻo ha talanoa mei he folofolá pe ko ha talanoa ʻokú ke vahevahe ʻo hangē naʻe fai ʻe he tokotahá ha ngaahi fili lelei ange/kehe.
Ngaahi founga feimeʻatokoní
ʻOku faʻu ʻe he kau akó ha ngaahi founga feimeʻatokoni ʻo fakaʻaongaʻi e meʻa ʻoku nau akó. Te ke lava ʻo kamata ʻaki hano fakaʻaliʻali ange ha sīpinga ʻo ha founga feimeʻatokoni ʻoku kau ai ʻa e ngaahi meʻa ke faí, ngaahi fuá, mo e ngaahi fakahinohinó. Hili iá pea tokoniʻi e kau akó ke muimui ʻi he sīpinga ko iá ke fokotuʻutuʻu ʻa e meʻa ʻoku nau akó. Te nau lava ʻo fakahingoa ʻenau founga feimeʻatokoní ko e “Founga ke hoko ai ko ha faifekau maʻongoʻonga” pe “Ngaahi founga ke ako lelei ange ai e folofolá” pea fakakau leva e meʻa ʻoku nau ongoʻi ko e ngaahi ʻelemēniti mahuʻingá ʻo fakaʻaongaʻi e folofolá mo e ngaahi leá. Hangē ko ʻení, ʻi he Tokāteline mo e Ngaahi Fuakava 76, ʻe lava ke hiki ʻe he kau akó e ngaahi meʻa ʻoku fiemaʻú, fuá, mo e fakahinohino ke hoko ai ko ha tokotaha fakasilesitialé. Poupouʻi kinautolu ke nau mohu founga ʻi heʻenau founga feimeʻatokoní. Te nau lava ʻo tā ha fakatātā ʻokú ne fakafofongaʻi ʻa e ola fakaʻosi ʻo e founga feimeʻatokoní.
Fakafaivaʻí
ʻOku fakatātaaʻi ʻe he kau akó ha tūkunga. ʻOku lahi ha ngaahi founga kehekehe ki hono fakahoko ʻení. Te ke lava ʻo kole ha niʻihi ʻoku fie omi ki muʻa ʻi he lokí ke fakafaivaʻi ʻa e tūkungá. ʻE lava foki ke fakafaivaʻi ʻe he kau akó ʻo tauhoa pe ʻi ha fanga kiʻi kulupu iiki. Pe te ke lava ʻo fakatātaaʻi ha konga ʻo ha taha ʻoku ʻi ai haʻane ngaahi fehuʻi pea tuku ke tali ʻe he kalasí kotoa hoʻo ngaahi fehuʻí pe meʻa ʻokú ke hohaʻa ki aí.
Vitiō nounou
Fakaafeʻi e kau akó ke palani ha foʻi vitiō nounou. Te nau lava ʻo faʻu ha fakamatala pea fakakaukauʻi e founga ke fakatātaaʻi ai ha meʻa ne nau ako mei he lēsoní. Kapau ʻe lava, ʻe lava ke faʻu ʻe he kau akó ʻa e vitioó pea vahevahe ia ʻi he kalasí.
Tohi ʻi he mītia fakasōsialé
Fakaafeʻi e kau akó ke nau faʻu ha tohi he mītia fakasōsialé ke vahevahe ʻenau tui pe aʻusia fakataautaha fekauʻaki mo e ngaahi tefitoʻi moʻoni naʻe aleaʻi ʻi he kalasí. ʻE lava pē ko ha meʻa ʻeni ʻoku nau tohi ʻi he ʻinitanetí, pe ko ha meʻa ʻoku nau faʻu ʻi heʻenau tohinoa akó. Pe te nau fakakaukauloto ki hano tuku hake ʻe ha taha ha fehuʻi fekauʻaki mo e meʻa naʻe ako ʻi he kalasí pea faʻu ha tali ʻo fakaʻaongaʻi ʻa e ʻilo kuo nau akó. Pe ʻe lava ke ako ʻe he kau akó ha tohi kimuí ni mai he mītia fakasōsialé ʻa ha taki ʻo e Siasí pea fai ha tali pe fakalotolahi ʻi he tohí. Ki ha fakamatala ʻoku tokoni ke fakahoko ʻe he kau akó ha ngaahi tohi ʻuhingamālie ʻi he mītia fakasōsialé, vakai ki he “Mītia Fakasōsialé: Mālohi ke Liliu e Moʻuí,” Ki Hono Fakamālohia ʻa e Toʻu Tupú, ʻEpeleli 2022.
Fakaʻaliʻali ʻatá
Fakakulupu ʻa e kau akó ke nau fakaʻaongaʻi ʻa e folofolá, ngaahi konga leá, mo e ngaahi maʻuʻanga tokoni fakaako kehé ke faʻu ha ngaahi pousitā pe meʻa ke fakaʻaliʻali he holisi ʻo e loki akó. ʻE lava ke kau ʻi heʻenau ngaahi pousitaá pe meʻa ke fakaʻaliʻalí ha ngaahi veesi mahuʻinga, ngaahi fehuʻi ʻe lava ke tali ʻe he folofolá, ngaahi moʻoni taʻengata, ʻū tā, mo e alā meʻa pehē. ʻE lava ke vilo takai ʻa e kau akó ʻo sio ki he ngaahi ngāue ʻa e ngaahi kulupu kehé.
Hiki ha fakamatala ki ha makasini ʻa e Siasí
ʻE lava ke fakakaukau ʻa e kau akó ʻoku nau tohi ha fakamatala ʻi he ngaahi makasini Ki Hono Fakamālohia ʻo e Toʻu Tupú, Ko e Kaumeʻá, pe Liahona ʻo vahevahe e meʻa naʻa nau akó mo e founga te ne lava ʻo tokoniʻi e toʻu tupú he funga ʻo e māmaní. Te ke lava ʻo fakaʻaliʻali ha fakamatala ko ha sīpinga. Poupouʻi e kau akó ke tānaki atu ha ʻū tā fakatātā, saati, mo ha ʻū kalafi fakamatala.