“Ngaahi ʻEkitivitī Siviʻi Hoʻo Akó ki he Ngaahi Lēsoni Teuteu ki he Moʻuí,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ngaahi ʻEkitivitī Siviʻi Hoʻo Akó,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Fakalahi ki he Tohí
Ngaahi ʻEkitivitī Siviʻi Hoʻo Akó ki he Ngaahi Lēsoni Teuteu ki he Moʻuí
Hili hoʻo akoʻi ha taha ʻo e ngaahi tafaʻaki ʻo e ngaahi lēsoni Teuteu ki he Moʻuí, fakakaukau ke tokoniʻi e kau akó ke nau fakakaukau ki heʻenau akó mo e tupulakí ʻaki hano fakakau ha ʻekitivitī sivi mei he tafaʻaki ko iá ʻi ha lēsoni hoko mai ki he Siviʻi Hoʻo Akó. ʻE lava ke liliu e ngaahi ʻekitivitī ko ʻení ke feau lelei ange e ngaahi fiemaʻu hoʻo kau akó.
Ngaahi Akonaki ʻa e Kau Taki ʻo e Siasí
Fakaʻaongaʻi e ngaahi akonaki ʻa e kau taki ʻo e Siasí ʻi hoʻo moʻuí
Lolotonga e kalasí, naʻe maʻu ʻe he kau akó ha ngaahi faingamālie lahi ke ako mo fakaʻaongaʻi ai e ngaahi akonaki mei he kau taki ʻo e Siasí. ʻI he ʻekitivitī ko ʻení, mahalo te ke fie fakamanatu ki he kau akó ha ngaahi lea pau naʻe ako ʻi he kalasí. Kapau ʻe lava, fakaafeʻi kinautolu ke fili ha taha ʻo e ngaahi lea ne nau akó pea toe fakamanatu ia pea mo ha faʻahinga fakamatala pē ne nau hiki. Poupouʻi e kau akó ke nau fakakaukau ki he founga kuo tokoniʻi ai kinautolu ʻe he ngaahi akonaki mei he leá ke nau feinga ke hoko ko e kau ākonga ʻa Sīsū Kalaisí.
Fakakaukau ke vahevahe ʻa e kau akó ke nau tauhoa ki he ngāue ko ʻení. Te nau lava ʻo taufetongi ʻi he ʻinitaviú. Hili iá, te ke lava ʻo fakaafeʻi ha foʻi hoa ʻe taha pe lahi ange ke fakahoko ʻenau ʻinitaviú ʻi muʻa ʻi he kalasí.
Fakakaukauloto ʻoku ʻinitaviu koe ke pulusi ha fakamatala ʻi he makasini Ki Hono Fakamālohia ʻo e Toʻu Tupú fekauʻaki mo hono ako ʻo e ngaahi akonaki mei he kau taki ʻo e Siasí. ʻE ʻeke atu ʻe he tokotaha faiʻinitaviú ʻa e ngaahi fehuʻi ko ʻení:
-
Ko e hā kuó ke ako fekauʻaki mo hono ako e ngaahi akonaki mei he kau taki ʻo e Siasí?
-
ʻI he ngaahi lea mo e ngaahi fakamatala naʻá ke ako ʻi he seminelí, ko e fē naʻe mahuʻinga taha kiate koé pea ko e hā hono ʻuhingá?
-
Ko e hā ha ngaahi akonaki pau ʻa e kau taki ʻo e Siasí kuó ke fakaʻaongaʻi kimuí ni ʻi hoʻo moʻuí?
Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí
Maʻu ha mālohi mei he ʻEikí ke fai ʻaki e ngaahi fili ʻoku tākiekina fakalaumālié
ʻE tokoni ʻa e ʻekitivitī ko ʻení ki he kau akó ke vakaiʻi ʻa e meʻa ne nau ako ʻi he ngaahi lēsoni ʻoku fekauʻaki mo e kulupu “Ki Hono Fakamālohia ʻo e Toʻu Tupú: Ko Hono Fakahoko ha Ngaahi Filí.” Mahalo ʻe tokoni ke toe vakaiʻi mo e kau akó ha niʻihi ʻo e ngaahi meʻa mei he ngaahi lēsoni ko ʻení.
Ko e founga ʻe taha ke tokoniʻi ai e kau akó ke siviʻi e meʻa kuo nau ako mo ongoʻi ʻi he ngaahi lēsoni ko ʻení ko hono fakaafeʻi kinautolu ke nau faitohi kiate kinautolu pē. ʻE lava ke fakaʻaongaʻi pe fakafenāpasi ʻa e fakakaukau ko ʻení.
Fakakaukauloto pe ʻe fēfē nai hoʻo moʻuí ʻi ha taʻu ʻe taha mei heni. Fakakaukau ki he meʻa te ke fakaʻamu ke aʻusia ʻi he taimi ko iá mo ha faʻahinga faingataʻa pē ʻokú ke ʻamanaki ʻe hoko. Fai ha tohi fakalotolahi kiate koe ʻi he kahaʻú. ʻE lava ke tokoni atu ha niʻihi ʻo e ngaahi fehuʻi ko ʻení.
-
Ko e hā kuó ke ako mo ongoʻi fekauʻaki mo hono maʻu ha mālohi mei he ʻEikí ke fai ha ngaahi fili ʻoku tākiekina fakalaumālié?
-
ʻOku ʻi ai nai ha ngaahi taumuʻa kuó ke fokotuʻu ʻokú ke loto ke hokohoko atu hono ngāueʻí?
-
Ko e hā kuó ke ako fekauʻaki mo e founga ʻe lava ke tokoniʻi ai koe ʻe he ʻEikí ke ke fakahoko lelei e ngaahi fili ʻoku tākiekina fakalaumālié?
Ko Hono Tanumaki ʻo e Moʻui Fakafalala Pē Kiate Kitá
Ko hono tanumaki e moʻui fakafalala pē kiate kitá ʻi he founga ʻa e ʻEikí
Fakakaukau ke kole ki ha tokotaha ako ke ne tā ha fakatātā ʻo ha toʻu tupu ʻi he palakipoé. Fakaafeʻi e kalasí ke ʻoange ki he toʻu tupu ko ʻení ha hingoa pea faʻu ha ngaahi fakaikiiki fekauʻaki mo hono ʻulungāngá mo e tūkunga fakafāmilí.
Kole leva ki he kau akó ke nau fakakaukau ki ha tūkunga moʻoni ʻoku fehangahangai ai e toʻu tupu ko iá mo ha ngaahi faingataʻa ʻi he moʻuí.
Fakaafeʻi e kau akó ke faʻu ha fanga kiʻi kulupu iiki, pea aleaʻi ʻenau tali ki he ngaahi fehuʻi ko ʻení:
-
ʻE tokoni fēfē ʻa e falala ki he Fakamoʻuí mo ʻEne ngaahi akonakí ke fehangahangai ʻa e toʻu tupu ko ʻení mo e ngaahi faingataʻá?
-
Ko e hā ʻe lava ke fai ʻe he toʻu tupu ko ʻení ke tanumaki ai e moʻui fakafalala pē kiate kitá ʻi hono tūkungá?
Te ke lava foki ʻo fakaafeʻi e kau akó ke vahevahe e ngaahi moʻoni fekauʻaki mo e moʻui fakafalala pē kiate kitá kuo nau ako mei he folofolá.
ʻOku kau ʻi he ngaahi potufolofola ʻe niʻihi kuo ako ʻe he kau akó ʻi he lēsoni “Ko Hono Tanumaki e Moʻui Fakafalala Pē Kiate Kitá ʻi he Founga ʻa e ʻEikí” ʻa e:
Fakaʻaliʻali e ngaahi fehuʻi ko ʻení. Fakaafeʻi e kau akó ke nau fakalaulauloto ki ai pea lekooti ʻenau ngaahi fakakaukaú ʻi heʻenau tohinoa akó.
-
Ko e hā ha ngaahi pōtoʻi ngāue mo e tōʻonga fakakaukau kuó ke ako ʻe lava ʻo tokoni atu ke ke moʻui fakafalala lahi ange ai kiate koe ʻi he ngaahi tafaʻaki kehekehe ʻi hoʻo moʻuí (hangē ko e akó, moʻui leleí, ngāue maʻuʻanga moʻuí, pe mālohi fakalaumālié)?
-
Ko e hā ha ngaahi founga ʻokú ke hoko ai ʻo moʻui fakafalala lahi ange pē kiate koe?
-
Te ke fakaafeʻi fēfē ʻa e ʻOtuá ke tokoni atu ke hokohoko atu hoʻo fakatupulaki ʻa e moʻui fakafalala pē kiate kitá?
Moʻui Lelei Fakatuʻasinó mo Fakaelotó
Fakaʻaongaʻi ʻa e ngaahi tefitoʻi moʻoní mo e ngaahi taukeí ke moʻui lelei fakatuʻasino mo fakaeloto ange
Fakakaukau ke tā ha roller coaster faingofua pe ko ha hala ʻoku ʻi ai ha ngaahi tafungofunga mo e teleʻa.
-
Ko e hā ʻe ala fakafehoanaki ai ʻe he kakai ʻe niʻihi ʻenau moʻuí ki ha roller coaster pe ko ha hala ʻoku ʻi ai a ngaahi tafungofunga mo e teleʻá?
-
Ko e hā ha niʻihi ʻo e ngaahi “lelei” mo e “ngaahi faingataʻa” te tau ala ongoʻi ʻi heʻetau moʻuí?
Fakamanatu ki he kau akó naʻa nau ako ʻi he lolotonga e kalasi ko ʻení ha ngaahi lēsoni kehekehe ʻe lava ʻo tokoni ke nau tafoki ki he ʻEikí ke nau matuʻuaki fakaeloto ange ʻi he taimi kotoa pē ʻo e moʻuí.
Fakakaukau ke fakaafeʻi e kau akó ke lisi ha niʻihi ʻo e ngaahi tefitoʻi moʻoni pe taukei ne nau ako ke hoko ʻo matuʻuaki fakaeloto angé. Kapau ʻe lava, te nau lava ʻo tala atu ʻa e ngaahi potufolofola pe lea mei he kau taki ʻo e Siasí ʻoku nau akoʻi ʻa e ngaahi tefitoʻi moʻoni mo e ngaahi taukei ko ʻení. ʻE lava ke kau ʻi he ngaahi tali ʻa e kau akó ha ngaahi founga ke fakaleleiʻi ai ʻa e ngaahi sīpinga ʻo e fakakaukaú mo fehangahangai mo e loto-mafasiá, loto-hohaʻá, loto-mamahí, loto-taʻotaʻomiá, mo e vilitaki ke haohaoá. Te nau lava foki ʻo talanoa fekauʻaki mo hono fakatupulaki ʻenau moʻui lelei fakatuʻasinó.
Fakaafeʻi ʻa e kau akó ke hiki e tali ki he ngaahi fehuʻi ko ʻení ʻi heʻenau tohinoa akó:
-
Ko e hā ʻa e meʻa naʻá ke ako naʻe ʻuhingamālie pe tokoni kiate koé?
-
Ko e hā ha ngaahi taukei kuó ke fakaʻaongaʻi ke tafoki ai ki he ʻEikí ke ke hoko ʻo matuʻuaki fakaeloto angé?
-
Ko e hā ha ngaahi lavameʻa mo e ngaahi tāpuaki mei he ʻEikí naʻá ke aʻusia? Ko e hā ha ngaahi pole ʻokú ke kei fehangahangai mo ia?
-
ʻOkú ke pehē ko e hā nai ʻe finangalo e ʻEikí ke ke fai ke hokohoko atu hoʻo “sio pē kiate [Ia] ʻi he fakakaukau kotoa pē” (Tokāteline mo e Ngaahi Fuakava 6:36) ke ke hoko ʻo matuʻuaki fakaeloto angé?
Fakaafeʻi e kau akó ke vahevahe ʻenau ngaahi talí mo e aʻusiá kapau ʻoku ʻikai ke fuʻu fakataautaha. Kumi ha ngaahi founga ke fakahīkihikiʻi ai e kau akó ʻi heʻenau ngaahi ngāué pea fakamoʻoni ʻe tokoniʻi mo faitāpuekina kinautolu ʻe he ʻEikí ʻi Heʻene taimi mo e founga pē ʻAʻana. Fakamanatu ki he kau akó kapau ʻoku nau aʻusia ha ngaahi faingataʻa mamafa ʻi he loto-mafasiá, loto-hohaʻá, loto-taʻotaʻomiá, pe ngaahi palopalema fakaeʻatamai pe fakaeloto kehé, ʻoku totonu ke nau talanoa mo ha tokotaha lahi falalaʻanga pe mataotao ki he moʻui lelei fakaeʻatamaí. Ko e tafoki ki he niʻihi kehé ke maʻu ha tokoni ʻi heʻetau faingataʻaʻiá, ʻoku ʻikai ko ha fakaʻilonga ia ʻo e vaivai pe siʻi ʻa e tuí.
Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
Maʻu ha mahino ki he mahuʻinga ʻo e ako fakatuʻasino mo fakalaumālie tuʻuloá
Vahevahe ʻa e tūkunga ko ʻení pe ko ha tūkunga hangē ko iá ke ʻoange ki he kau akó ha faingamālie ke fakamatalaʻi ʻa e meʻa kuo nau ako fekauʻaki mo e mahuʻinga ʻo e akó.
Lolotonga hoʻo lue ki ʻapi mei he akó, naʻe tala atu ʻe hoʻo kaungāmeʻa ko Nāomí ʻoku ʻikai ke ne saiʻia ʻi he akó. ʻOkú ne ongoʻi hangē ʻoku fuʻu faingataʻá pea faʻa taʻeʻuhingá. ʻOku ʻikai ke ne fie feinga mālohi ʻi he akó pe hoko atu ʻene akó ʻi heʻene ʻosi mei he ako māʻolungá.
ʻOange ha faingamālie ki he kau akó ke nau tali ki he hohaʻa ko ʻení. Ko e founga ʻe taha te ke lava ʻo fai ai ʻení ko hono vahevahe ʻa e ngaahi fakahinohino ko ʻení. ʻE lava ke fakakakato fakafoʻituitui ʻe he kau akó ʻa e ngaahi fakahinohinó pe mo ha kiʻi kulupu tokosiʻi.
Faʻu ha tali kia Nāomi ʻe lava ʻo tokoni ke mahino kiate ia ʻa e mahuʻinga ʻo e akó. Fakakaukau ke fakakau ha niʻihi pe kotoa ʻo e ngaahi meʻá ni ʻi hoʻo talí:
-
Ko ha potufolofola pe lea mei ha taki ʻo e Siasí
-
Ko ha fakamatala fekauʻaki mo e ʻuhinga ʻoku finangalo ai ʻa e Tamai Hēvaní ke fekumi maʻu pē ʻEne fānaú ki he ako fakatuʻasinó mo fakalaumālié fakatouʻosi
-
Ngaahi aʻusia pe fakamoʻoni fakataautaha
Hili hono faʻu ʻe he kau akó ʻenau ngaahi talí, ʻoange ha faingamālie ke nau vahevahe ia mo e niʻihi kehé.
Faʻu ha palani ki he akó mo e ngāue maʻuʻanga moʻui ʻi he kahaʻú
Kuo maʻu ʻe he kau akó ha ngaahi faingamālie ke faʻu ha ngaahi palani fekauʻaki mo ʻenau ako ʻi he kahaʻú pea pehē ki ha ngaahi faingamālie fakangāue pea mo ha ngaahi fatongia kehe te nau maʻu ʻi heʻenau matuʻotuʻa angé. Fakaafeʻi kinautolu ke toe vakaiʻi e ngaahi palani kuo nau fakahokó.
Fakakaukau ke ʻoange ha faingamālie ke nau fai ai ha faʻahinga liliu pē ʻoku nau ongoʻi ʻoku fiemaʻu. Te nau lava foki ʻo fakakaukau ki he founga ʻoku tākiekina ai ʻe he ngaahi palani ko ʻení ʻenau ngaahi fili lolotongá. Fakaafeʻi leva ke nau aleaʻi e ngaahi fehuʻi ko ʻení mo hanau hoa.
-
Ko e hā hoʻo ngaahi palani ki hoʻo ako ʻi he kahaʻú?
-
Ko e hā hoʻo ngaahi palani ke teuteu ai ki ha ngaahi faingamālie ngāue maʻuʻanga moʻui ʻi he kahaʻú pe ko ha ngaahi fatongia kehe te ke maʻu ʻi hoʻo hoko ko ha tokotaha lahí?
-
Te ke fakakau fēfē ʻa e ʻEikí ʻi hoʻo ngaahi palaní?
Ko e Lavameʻa ʻi he Akó
Fakaʻaongaʻi e ngaahi taukeí ke lavameʻa ʻi he akó
Ke tokoni ke manatuʻi ʻe he kau akó ha niʻihi ʻo e ngaahi moʻoni mo e ngaahi taukei kuo nau akó ʻa ia ʻe lava ʻo tokoni ke nau lavameʻa ange ai ʻi he akó, fakakaukau ke tā ha fakatātā faingofua ʻokú ne fakafofongaʻi ha tokotaha ako. Fakamatalaʻi ange ʻoku fāifeinga ʻa e tokotaha ako ko ʻení ke fai lelei ʻi he akó.
-
Ko e hā ha niʻihi ʻo e ngaahi moʻoni mo e ngaahi taukei kuó ke ako ʻe lava ʻo tokoni ki ha taha ʻoku faingataʻaʻia ʻi he akó?
Kapau ʻe fiemaʻu, te ke lava ʻo fakaafeʻi ʻa e kau akó ke vahevahe ʻa e meʻa ʻoku nau manatuʻi ne nau ako fekauʻaki mo hono fakakau ʻa e ʻEikí ʻi heʻenau akó, faitotonu mo angatonu ʻi heʻenau akó, teuteu ki he ngaahi siví mo e ngaahi ngāue faingataʻá, pea vakai ki he ngaahi faingataʻá ʻaki ha fakakaukau tupulakí. Toe vakaiʻi e ngaahi fakakaukau mo e ngaahi potufolofola mei he ngaahi lēsoni ko iá ʻo ka fiemaʻu. Hangē kko ʻení, te ke lava ʻo fakaafeʻi e kau akó ke vahevahe e meʻa ʻoku nau manatuʻi fekauʻaki mo e founga naʻe fakakau ai ʻe he Palōfita ko Siosefa Sāmitá ʻa e ʻEikí ʻi heʻene akó (vakai, Siosefa Sāmita—Hisitōlia 1:10–18) pe ko e founga ʻo e vakai ʻa Nīfai ki heʻene ngaahi faingataʻá ʻaki ha fakakaukau tupulakí (vakai, 1 Nīfai 16:18–23, 30–32).
Fakaafeʻi leva e kau akó ke nau fakakaukau ki he founga kuo nau fakaʻaongaʻi ai e ngaahi fakakaukau ko ʻení ki heʻenau moʻuí. Mahalo te ke fie fakaʻaliʻali ha ngaahi fehuʻi hangē ko ʻení pea fakaafeʻi e kau akó ke lekooti ʻenau ngaahi talí ʻi heʻenau tohinoa akó.
-
Ko e hā ha niʻihi ʻo e ngaahi moʻoni pe pōtoʻi ngāue kuó ke fakaʻaongaʻi ʻi hoʻo moʻuí ke tokoni ke ke lavameʻa ange ai ʻi he akó?
-
Ko e hā ha faikehekehe kuo fakahoko ʻe he ngaahi meʻá ni?
-
Kuó ke fakatokangaʻi fēfē ho vā fetuʻutaki mo e ʻEikí pe ko hoʻo malava ke maʻu ʻEne tokoní ʻi hoʻo fai e ngaahi meʻa ko ʻení?
Hili hono maʻu ʻe he kau akó ha taimi feʻunga ke tohi ai ʻenau ngaahi talí, fakaafeʻi ha niʻihi ʻoku loto ke vahevahe ʻenau ngaahi fakakaukaú mo e aʻusiá pea mo e kalasí. Poupouʻi kinautolu ke nau fakafanongo fakalelei ki honau kaungāakó pea fakakaukau ke ʻahiʻahiʻi ha niʻihi ʻo e ngaahi taukei kuo lavameʻa ai ʻa e kaungāako ko iá.
Teuteu ki he Ngāue Fakafaifekaú
Ongoʻi ha holi lahi ange ke vahevahe ʻa e ongoongolelei ʻo Sīsū Kalaisí mo e niʻihi kehé
ʻI he lēsoni “ʻOfá, Vahevahé mo e Fakaafé,” mahalo te ke fakaʻaliʻali ha fakatātā ʻo ha monumanu ʻoku fakapuli lelei. Fakakaukau ke toe fakaʻaliʻali ʻa e fakatātaá pea fakamanatu ki he kau akó ʻa e fakamatala ko ʻeni naʻe fakaʻaongaʻi ʻi he lēsoni ko iá.
Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ko ha konga mahuʻinga ʻo e ngāue fakafaifekau ko ʻení ko e hoko ʻa e kāingalotu fakafoʻituituí ko ha sīpinga moʻoni ʻo hono moʻui ʻaki ʻa e ongoongoleleí ʻi ha faʻahinga feituʻu pē ʻoku tau nofo ai. He ʻikai ke tau kei toitoi pē. (Quentin L. Cook, “Tānaki ke Malu ki ʻApi,” Liahona, Mē 2023, 23)
-
ʻE sīpinga fēfē nai ʻa e hoko ha taha ko ha sīpinga ʻo e maama kamó ʻi heʻene hoko ko ha faifekau maʻa Sīsū Kalaisí? ʻE sīpinga fēfē nai ʻa e fakapuli ʻi he hoko ko ʻEne faifekaú?
Mahalo kuo lekooti ʻe he kau akó ʻa e ongo naʻa nau maʻu fekauʻaki mo hono vahevahe ʻo e ongoongoleleí ʻi he lēsoni 199, “Ko Hono Vahevahe ʻo e Ongoongoleleí ʻi he ʻOfa Faka-Kalaisí.” Te ke lava ʻo fakaafeʻi kinautolu ke nau toe vakai ki he meʻa ne nau tohí. Pe te ke fakaafeʻi kinautolu ke lekooti ʻenau ngaahi fakakaukau mo e ongo lolotonga fekauʻaki mo hono vahevahe ʻo e ongoongoleleí. ʻI heʻenau fakalaulauloto mo tohí, mahalo te ke fokotuʻu ange ke nau toe ako ha taha pe lahi ange ʻo e ngaahi potufolofola ko ʻeni mei he lēsoni 201, “Ko e Fili ke Ngāue Fakafaifekaú,” ke manatuʻi ha niʻihi ʻo e ngaahi talaʻofa ʻa e ʻEikí kiate kinautolu ʻoku nau vahevahe ʻa e ongoongoleleí.
Hili ha taimi feʻunga, fakaafeʻi ha niʻihi te nau fie vahevahe ʻa e meʻa ne nau hikí mo e meʻa kuó ne tākiekina ʻenau holi ke hoko ko ha faifekau maʻá e ʻEikí.
Teuteu ki he Temipalé
Ongoʻi ha holi lahi ange ke fakahoko ha ngaahi fuakava mo e ʻOtuá ʻi he temipalé
Fakakaukau ke fakaʻaongaʻi ha ʻekitivitī ʻe taha pe lahi ange mei he ngaahi ʻekitivitī ko ʻení ke tokoni ki he kau akó ke vakaiʻi ʻenau holi ke fai ha ngaahi fuakava mo e ʻOtuá ʻi he temipalé. ʻE lava ke hiki ʻe he kau akó ʻi heʻenau tohinoá pe aleaʻi ʻi ha fanga kiʻi kulupu iiki.
-
Fakaʻaliʻali ha fakatātā ʻo ha temipale pea vahevahe e founga ʻoku fakamanatu atu ai ʻe he temipalé kiate koe ʻa Sīsū Kalaisí. Kapau ʻe fiemaʻu, te ke lava ʻo kumi ha fakatātā ʻi he media gallery ʻi he temples.ChurchofJesusChrist.org. Vahevahe hoʻo ngaahi fakakaukau mo e ongo fekauʻaki mo hono fakahoko mo tauhi e ngaahi fuakava mo e Tamai Hēvaní ʻi Hono temipalé.
-
ʻI he taha ʻo e ngaahi lēsoni teuteu ki he temipalé, naʻá ke ako ai fekauʻaki mo e mahuʻinga ʻo e moihū ʻi he temipalé ʻi he kotoa hoʻo moʻuí. Mahalo naʻá ke faitohi kiate koe he kahaʻú ʻo fekauʻaki mo e mahuʻinga ʻo e moihū ki he ʻEikí ʻi Hono temipalé. ʻOku ʻi ai nai ha faʻahinga meʻa kuó ke ako pe ongoʻi kimuí ni mai kuó ne tākiekina hoʻo holi ke fakahoko mo tauhi e ngaahi fuakava mo e Tamai Hēvaní ʻi he temipalé? Kapau ko ia, tānaki ia ki he tohí pe hiki ha kiʻi fakamatala foʻou kiate koe pē.
-
Fakakaukau ki he meʻa naʻá ke ako fekauʻaki mo hono fakahoko e ngaahi fuakava mo e ʻEikí ʻi he temipalé, kau ai ʻa e fono ʻo e fakatapuí. Tali ʻa e ngaahi fehuʻi ko ʻení.
-
Ko e hā kuó ke fai ke moʻui lelei ange ʻaki e ngaahi tefitoʻi moʻoni ʻo e fono ʻa e ʻEikí ki he fakatapuí?
-
Kuo tokoniʻi fēfē koe ʻe he meʻá ni ke ke teuteu ke fai ha fuakava mo e ʻEikí ʻi he temipalé ke moʻui ʻaki ʻa e fono ko ʻení?