“Lēsoni 200—ʻOfá, Vahevahé, mo e Fakaafé: Ko Hono Tānaki Fakataha ʻo e Niʻihi Kehé kia Sīsū Kalaisí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“ʻOfá, Vahevahé, mo e Fakaafé,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 200: Teuteu ki he Ngāue Fakafaifekaú
‘Ofá, Vahevahé mo e Fakaafé
Ko Hono Tānaki Fakataha ʻo e Niʻihi Kehé kia Sīsū Kalaisí
ʻI heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko hotau fatongia fakafuakava ia ke vahevahe ʻa e ongoongolelei ʻa e Fakamoʻuí “ki he ngaahi ngataʻanga ʻo e māmaní” (Tokāteline mo e Ngaahi Fuakava 1:23). Te tau lava ʻo kau ʻi he ngāue fakaʻofoʻofá ni ʻaki ʻetau ʻofa ki he niʻihi kehé, vahevahe ʻa e pōpoaki ʻo Sīsū Kalaisí, pea fakaafeʻi kinautolu ke tau kau fakataha ʻi he haʻu ki he Fakamoʻuí. ʻE lava ke tokoni e lēsoni ko ʻení ke faʻu ʻe he kau akó ha palani ke fakamafola e ongoongolelei ʻo Sīsū Kalaisí ʻaki hono fakaʻaongaʻi e ngaahi tefitoʻi moʻoni ʻo e ʻofá, vahevahé, mo e fakaafé.
Ngaahi ʻEkitivitī Ako ʻOku Ala Fakahokó
ʻOua ʻe fakapuliki hoʻo maama ʻi he ongoongoleleí
Ke kamata e kalasí, fakaʻaliʻali ki he kau akó ha fakatātā ʻo ha monumanu ʻoku fakapuli lelei. Fakaafeʻi e kau akó ke vahevahe ʻa e ʻuhinga ʻoku ʻaonga ai ʻa e toitoi pehení ki he monumanú.
-
Ko e hā ha ngaahi tūkunga ʻe ala fiemaʻu ai ʻe ha taha ke fakapuli?
Naʻe vahevahe ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ha meʻa ʻoku ʻikai ke tau loto ke fakapuliki fekauʻaki mo kitautolu:
Ko ha konga mahuʻinga ʻo e ngāue fakafaifekau ko ʻení ko e hoko ʻa e kāingalotu fakafoʻituituí ko ha sīpinga moʻoni ʻo hono moʻui ʻaki ʻa e ongoongoleleí ʻi ha faʻahinga feituʻu pē ʻoku tau nofo ai. He ʻikai ke tau kei toitoi pē. …
… ʻOku ʻamanaki mai ʻa e ʻEikí kiate kinautolu kuo nau tali ʻEne ongoongoleleí ke feinga fakavavevave ke hoko ko ha sīpinga ʻo ha maama kamo ʻe tokoni ki he niʻihi kehé ke nau haʻu ki he ʻOtuá. ʻOkú ne fakaʻatā heni hotau kāinga ʻi he māmaní ke fiefia ʻi he ngaahi tāpuaki fakalangi mo e ngaahi ouau ʻo e ongoongolelei ʻo Sīsū Kalaisí kuo fakafoki maí pea tānaki ke malu ki ʻapi. (Quentin L. Cook, “Tānaki ke Malu ki ʻApi,” Liahona, Mē 2023, 23)
-
Ko e hā naʻe mahuʻinga kiate koe mei he pōpoaki ʻa ʻEletā Kukí?
Ke tokoni ke teuteuʻi e loto mo e ʻatamai ʻo e kau akó ki he lēsoni ko ʻení, te ke lava ʻo fakaafeʻi kinautolu ke vahevahe ʻa e talanoa ʻo ha mēmipa ʻo e fāmilí pe kaungāmeʻa naʻe kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻE lava foki ke nau vahevahe ʻa e talanoa ki honau fakauluí. Kapau ʻoku ʻi ai ha kau ako ʻe niʻihi ʻoku ʻi ai haʻanau ngaahi talanoa ke vahevahe, te ke lava ʻo fakaafeʻi kinautolu ke vahevahe mo honau hoá pe ʻi ha fanga kiʻi kulupu iiki.
Fakaafeʻi e kau akó ke lekooti ʻi heʻenau tohinoa akó ha ngaahi founga te nau lava ai ʻo “fakapuli” mo e ngaahi founga ʻe lava ke hoko ai ʻenau ngāue fakafaifekau fakatāutahá ko ha “sīpinga ʻo ha maama kamo.”
Poupouʻi e kau akó ke nau fakaafeʻi ʻi he faʻa lotu ʻa e Laumālié ke tokoniʻi kinautolu ke nau ʻiloʻi ʻa e founga te nau lava ai ʻo vahevahe tauʻatāina ʻa e maama ʻo e ongoongolelei ʻa e Fakamoʻuí.
Ko e fekau ʻa e Fakamoʻuí ki he ngāue fakafaifekaú
Fakakaukau ke fakaʻaliʻali ʻa e lea ko ʻeni ʻa ʻEletā Kuenitini L. Kukí. Fakaafeʻi e kau akó ke kumi ha faleʻi ki he founga ke vahevahe lelei ai e ongoongolelei ʻo Sīsū Kalaisí.
Naʻe akoʻi foki ʻe ʻEletā Kuki:
ʻOku fakaafeʻi kitautolu ʻe he Fakamoʻuí ʻi he manavaʻofa ke tau hoko ko Hono leʻó mo Hono toʻukupú. ʻE hoko ʻa e ʻofa ʻa e Fakamoʻuí ko hotau maama fakahinohino. Naʻe akonaki ʻa e Fakamoʻuí ki Heʻene kau ākongá ʻo pehē, “Ko ia ke ʻalu ʻa kimoutolu, ʻo fakalotuʻi ʻa e ngaahi puleʻanga kotoa pē.” [Mātiu 28:19]. …
Koeʻuhí ke hoko e fekau ʻa e Fakamoʻuí ke vahevahe e ongoongoleleí ko ha konga ia ʻo kitautolú, … ʻoku fiemaʻu ke tau ʻofa ki hotau kaungāʻapí, vahevahe e ongoongolelei ʻo Sīsū Kalaisi kuo fakafoki maí, pea fakaafeʻi ʻa e tokotaha kotoa pē ke haʻu ʻo mamata. (Quentin L. Cook, “Tali e Finangalo ʻo e ʻOtuá,” Liahona, Mē 2022, 56)
-
Te ke fakamatalaʻi fēfē nai ʻa e pōpoaki ʻa ʻEletā Kukí ʻi he lea pē ʻaʻau?
Tokoni ke ʻiloʻi ʻe he kau akó ha foʻi moʻoni hangē ko ʻení: ʻOku tau tokoni ki he ngāue fakafaifekau ʻa e Fakamoʻuí ʻaki ʻetau ʻofa ki hotau kaungāʻapí, vahevahe ʻEne ongoongoleleí, pea mo hono fakaafeʻi e niʻihi kehé ke haʻu kiate Iá.
Mahalo te ke fie hiki ʻa e ngaahi foʻi lea ʻofá, vahevahé, pea mo e fakaafé ʻi ʻolunga ʻi ha kōlomu ʻe tolu ʻi he palakipoé. ʻI hono vahevahe ʻe he kau akó ʻenau tali ki he ngaahi fehuʻi ko ʻení, fakaafeʻi kinautolu ke nau kamata ha lisi ʻi he kōlomu takitaha ʻo e ngaahi fakakaukau ki he founga ke ʻomi ai e niʻihi kehé ki he Fakamoʻuí ʻi he ʻofá, vahevahé, mo e fakaafé.
-
Ko e hā ha ngaahi founga lelei kuó ke mamata ai ki hono vahevahe ʻe ha niʻihi kehe ʻa e ongoongolelei ʻo Sīsū Kalaisí?
-
Ko e hā ha ngaahi meʻa kuó ke aʻusia ʻi hono vahevahe e ongoongolelei ʻo e Fakamoʻuí mo e niʻihi kehé?
‘Ofa, vahevahe mo e fakaafe
Ko e founga ʻe taha ke tokoni ke mahino lelei ange ai ki he kau akó ʻa e ngaahi tefitoʻi moʻoni ʻo e ʻofá, vahevahé, mo e fakaafé ko hono ʻoange kiate kinautolu ha tatau ʻo e laʻipepa tufa ʻoku ui ko e “ʻOfa, Vahevahe, Fakaafe.” ʻAi ke faʻu ʻe he kau akó ha fanga kiʻi kulupu ako iiki ke nau ako ʻa e fakamatala ʻi he “ʻOfá.” Te nau lava ʻo faʻu ha ngaahi kulupu foʻou ke nau ako ʻa e “Vahevahé” pea ako leva ʻe ha ngaahi kulupu foʻou ʻa e “Fakaafé.”
Pe ko hono ako ʻe he kau akó ʻa e ngaahi potufolofola ʻi he fakakaukau “Ako Folofolá” ʻi he peesi 256 ʻo e Malanga ʻAki ʻEku Ongoongoleleí (2023).
Fakakaukau ke fakaʻaliʻali e ngaahi fehuʻi ko ʻení ʻi he palakipoé ke aleaʻi ʻe he kau akó mo ʻenau kulupú ʻi heʻenau akó.
-
Ko e hā ha ngaahi fakakaukau naʻá ke maʻu fekauʻaki mo hono vahevahe ʻo e ongoongoleleí?
-
Naʻe fakahaaʻi fēfē ʻe he Fakamoʻuí ʻa e tefitoʻi moʻoní ʻi Heʻene fengāueʻaki mo e niʻihi kehé?
-
Ko e hā ha ngaahi founga ʻe lava ke ngāueʻi ai ʻe he toʻu tupú ʻa e tefitoʻi moʻoní ʻi heʻenau feinga ke vahevahe e ongoongolelei ʻa e Fakamoʻuí?
‘Ofa, Vahevahe, Fakaafe
ʻOfá
Sione 13:34–35; Mōsaia 18:20–22; Tokāteline mo e Ngaahi Fuakava 12:7–9; 121:41–42
Naʻe akoʻi ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻOku tau malangaʻi atu ʻa e ongoongoleleí ʻi he taimi kotoa pē ʻoku tau fakahaaʻi ai ʻa e ʻofa faka-Kalaisí ki hotau kaungāʻapí—neongo kapau ʻoku ʻikai ke tau puʻaki ha foʻi lea ʻe taha.
ʻOku fakahaaʻi mahino lelei ʻi he ʻofa ki he niʻihi kehé ʻa e fekau lahi hono ua ke ʻofa ki hotau kaungāʻapí; ʻoku hā ai ʻa e founga fakamaʻa ʻoku fai ʻe he Laumālie Māʻoniʻoní ki hotau ngaahi lotó. ʻI hono fakahaaʻi ʻo e ʻofa ʻa Kalaisí ki he niʻihi kehé, te tau lava ke ueʻi kinautolu ʻoku mamata ki heʻetau ngāue leleí ke “fakamālōʻia ʻa [ʻetau] Tamai ʻa ia ʻoku ʻi he langí” [Mātiu 5:16]. (Gary E. Stevenson, “ʻOfa, Vahevahe, Fakaafe,” Liahona, Mē 2022, 85–86)
Vahevahe
2 Nīfai 2:6–8; Mōsaia 28:1–3; ʻAlamā 31:5; Tokāteline mo e Ngaahi Fuakava 60:2
Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
Ka ʻeke atu ʻe ha taha fekauʻaki mo e fakaʻosinga ʻo hoʻo uiké, ʻoua naʻá ke toe taimi ʻi hono vahevahe atu e meʻa naʻá ke aʻusia he lotú. Fakamatalaʻi ange e fānau ne nau tuʻu he lotú ʻo hivaʻi fiefia e founga ʻo e feinga ke hangē ko Sīsuú. Fakamatala ki he kulupu toʻutupu ne fakaʻaongaʻi honau taimí ke tokoni ki he kau vaivai he ngaahi nofoʻanga maʻá e kau toulekeleká ke fakatahaʻi ʻenau hisitōlia fakatāutahá. …
Ko e hā pē ha founga ʻe ngali fakanatula mo angamaheni kiate koé, vahevahe ki he kakaí e ʻuhinga ʻoku mahuʻinga ai kiate koe ʻa Sīsū Kalaisi mo Hono Siasí. (Dieter F. Uchtdorf, “Ngāue Fakafaifekaú: Ko Hono Vahevahe e Meʻa ʻI ho Lotó,” Liahona, Mē 2019, 17)
Fakaafe
Sione 1:35–46; 4:28–30, 39–41; ʻAlamā 5:62; Molonai 10:3–5
Naʻe akoʻi ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻOku laungeau ʻa e ngaahi fakaafe te tau lava ke fakaaʻu atu ki he niʻihi kehé. Te tau lava ʻo fakaafeʻi ʻa e niʻihi kehé ke nau “omi ʻo mamata” ʻi ha houalotu sākalamēniti, pe ko ha ʻekitivitī fakauooti, pe ko ha vitiō ʻi he ʻinitanetí ʻokú ne fakamatalaʻi ʻa e ongoongolelei ʻo Sīsū Kalaisí. ʻE lava ke hoko ʻa e “omi ʻo mamatá” ko ha fakaafe ke lau ʻa e Tohi ʻa Molomoná pe ʻaʻahi ki ha temipale foʻou lolotonga ʻa e open house kimuʻa pea fakatapuí. ʻI he taimi ʻe niʻihi, ko e fakaafé ʻoku fai pē kiate kitautolu—ko hano fakaafeʻi kitautolu, ke tau ʻiloʻi mo maʻu ha vīsone ki he ngaahi faingamālie ʻoku tau maʻu ke fai ha ngāue ki aí. (Gary E. Stevenson, “ʻOfa, Vahevahe, Fakaafe,” Liahona, Mē 2022, 86)
Ngaahi founga lelei ke ʻofa, vahevahe mo fakaafé
Tokoniʻi e kau akó ke nau ʻomi ha ngaahi fakakaukau lahi ange ki he founga hono vahevahe ʻo e ongoongoleleí ʻo fakaʻaongaʻi e ngaahi tefitoʻi moʻoni ʻo e ʻofá, vahevahé, mo e fakaafé. Fakakau ʻenau ngaahi fakakaukaú ʻi he palakipoé ʻi lalo he kōlomu ʻoku fekauʻaki mo iá. ʻE ala tokoni ha niʻihi ʻo e ngaahi maʻuʻanga tokoni ko ʻení ke fakatupu ha ngaahi fakakaukau:
-
Fakamatala—“20 Easy Ways to ‘Love, Share, Invite’ Your Neighbors,” newsroom.ChurchofJesusChrist.org
-
Vitiō—“Ngaahi Founga Faingofua ke ʻOfa, Vahevahe, mo Fakaafeʻí” (2:45), maʻu ʻi he ChurchofJesusChrist.org
Ngaahi Founga Faingofua Ke ʻOfa, Vahehave, Mo Fakaafeʻí
Naʻe tā ʻe he Fakamoʻuí ʻa e sīpinga ʻo e ʻofá, vahevahé, mo e fakaafé. Kumi ha ngaahi fakakaukau mo ha ueʻi fakalaumālie ki he founga te ke lava ʻo muimui ʻi he sīpinga ko share.churchofjesuschrist.org.
-
Vitiō—“2021 Broadcast: Principles of Love, Share, and Invite” mei he taimi 0:00 ki he 1:35, maʻu ʻi he ChurchofJesusChrist.org
‘Ofa, Vahevahe, Fakaafe
ʻOku fakaafeʻi ʻa e kau takimuʻa ʻi he uōtí mo e siteikí ki ha fakamafola fakaemāmani lahi makehe ʻoku fakatefito ʻi hono vahevahe ʻo e ongoongoleleí ʻo fakafou ʻi he ngaahi tefitoʻi moʻoni ʻo e ʻofá, vahevahé, mo e fakaafé.
Fakaʻaongaʻi ʻa e meʻa kuó ke akó
Fakakaukau ke vahevahe ha taimi naʻá ke tokoniʻi ai ha taha ʻaki hono fakaʻaongaʻi e ngaahi tefitoʻi moʻoni ʻo e ʻofá, vahevahé, mo e fakaafé. Pe ko haʻo vahevahe ha taimi naʻe tāpuekina ai hoʻo moʻuí ʻe ha taha ʻo fakaʻaongaʻi e ngaahi tefitoʻi moʻoni ko ʻení.
Fakaafeʻi e kau akó ke nau muimui ki ha faʻahinga ueʻi pē ne nau ongoʻi he ʻahó ni ke faʻu ha palani ke vahevahe ʻa e ongoongoleleí. ʻE lava ke kau ʻi heʻenau palaní hono fakahoko ha fakakaukau ʻe taha pe lahi ange ʻoku hiki ʻi he palakipoé. Ke tokoni ʻi he fakaikiiki ʻo ʻenau palaní, te ke lava ʻo fakaʻaliʻali e ngaahi fakahinohino mo e fakakaukau ko ʻení ke fakakakato ʻe he kau akó ʻi heʻenau tohinoa akó.
Fili ha fakakaukau ʻe taha pe lahi ange heni ke fakakakato ʻi hoʻo tohinoa akó:
-
Te u fakahaaʻi ʻeku ʻofá ki ha taha ʻaki ʻeku .
-
Te u vahevahe ʻa e meʻa ʻoku ou ʻilo pe ongoʻi fekauʻaki mo e ongoongolelei ʻa e Fakamoʻuí ʻaki .
-
Te u fakaafeʻi ʻa (hingoa ʻo ha taha) ke .
Ki he (ngaahi) fakakaukau naʻá ke fili ke talí, fakakakato ʻa e ngaahi meʻa ko ʻení ʻi hoʻo tohinoa akó:
-
Ko e sitepu hono hoku te u fakahoko ʻi hono fakakakato ʻeku palaní ko e .
-
Te u feinga ke fakahoko ʻeni ʻi he (ʻaho).
Mahalo ʻe ongoʻi loto-foʻi ha kau ako ʻe niʻihi kapau ʻoku ʻikai tali lelei ʻenau feinga fakamātoato ke vahevahe ʻa e ongoongoleleí. Tokoni ke mahino ki he kau akó ʻoku ʻofa ʻa e ʻEikí ʻi he ngaahi feinga ʻoku nau faí, neongo kapau ʻoku ʻikai ngali ola lelei he taimí ni. Fakaafeʻi kinautolu ke hokohoko atu ʻenau feinga ʻi he tuí neongo pe ko e hā e ngaahi ola ʻoku nau maʻú.