Lēsoni 202: Teuteu ki he Ngāue Fakafaifekaú

Ko e Tohi ʻa Molomoná Ko ha Meʻangāue Fakaului

Ko Hono Fakaʻaongaʻi ʻo e Tohi ʻa Molomoná ke Teuteu ke Vahevahe ʻa e Ongoongoleleí

Ko e Tohi ʻa Molomoná ko ha meʻaʻofa ia kuo foaki mai ʻe he ʻOtuá ke tau tānaki fakataha ʻa ʻIsileli ʻi he ngaahi ʻaho kimui ní kia Sīsū Kalaisi. Ke fakaʻaongaʻi ʻe he kau akó e meʻaʻofa ko ʻení ke tokoni ke tānaki e niʻihi kehé, ʻoku mahuʻinga ke nau maʻu haʻanau fakamoʻoni pē ʻanautolu mei he ʻOtuá ʻoku moʻoni. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e mahuʻinga hono fakamālohia ʻenau fakamoʻoni ki he Tohi ʻa Molomoná ʻi he teuteu ke vahevahe e ongoongolelei ʻa e Fakamoʻuí.

Ngaahi ʻEkitivitī Ako ʻOku Ala Fakahokó

Ko ha meʻangāue ke tānaki fakataha ʻa ʻIsileli

Fakakaukau ke lisi ʻi he palakipoé pe fakaʻaliʻali ha ʻū meʻangāue kehekehe ʻoku maheni mo hoʻo kau akó. Ko e ngaahi sīpinga ʻe niʻihi ko ha hāmala, meʻa fakamaʻu sikalu (screwdriver), polosi fufulunifo, meʻa fana siteipolo (stapler), mo e alā meʻa pehē. Fakaafeʻi e kau akó ke talanoa ki he ngaahi ngāue ʻo e ʻū meʻangāué ʻo fakaʻaongaʻi e ngaahi fehuʻi hangē ko ʻení.

• Ko e fē taimi fakamuimuitaha naʻá ke fakaʻaongaʻi ai ha taha ʻo e ʻū meʻangāue ko ʻení? Naʻá ke fakaʻaongaʻi fēfē ia?

• ʻE ngāue fēfē ha niʻihi ʻo e ngaahi meʻangāue kehé ke fakahoko e ngāue tatau?

  Ke tokoni ke mahino ki he kau akó ʻoku lelei ange ha ʻū meʻangāue pau ki hono fakahoko ha ngaahi ngāue paú, fakakaukau ke kole ki ha tokotaha ako ke fakahoko ha ngāue hangē ko hono siteipoloʻi fakataha ha ʻū laʻipepa ʻe niʻihi ʻo fakaʻaongaʻi ha meʻafana siteipolo pe ko ha polosi fufulunifo.

  Tokoni ke mahino ki he kau akó ʻoku fakahoko ʻe he ongo meʻangāue ko ʻení ha ngaahi fatongia pau. ʻI he founga tatau, kuo ʻomi ʻe he ʻOtuá ha ngaahi meʻangāue ke fakahoko ha ngaahi tafaʻaki pau ʻo ʻEne ngāué, ko e taha ai ko e tānaki e kakaí kia Sīsū Kalaisi.

• Ko e hā ha ngaahi meʻangāue kuo ʻomi ʻe he Tamai Hēvaní mo Sīsū Kalaisi ke tānaki ʻaki e kakaí kiate Kinauá?

ʻE lava e kau akó ʻo lau e fakamatala ko ʻení ke fakapapauʻi ʻenau tali ki he fehuʻi kimuʻá pe vakai ki ha toe ngaahi tali kehe.

Naʻe akonaki ʻa ʻEletā Seni M. Poueni ʻo e Kau Fitungofulú ʻo pehē:

ʻOku tau tānaki fakaʻosi ʻa ʻIsileli ko hono fai fakaʻosi pea ʻoku tau fai ia ʻaki e Tohi ʻa Molomoná—ko ha tohi, ka fakatahaʻi mo e Laumālie ʻo e ʻEikí, ko e taha ʻo e ngaahi meʻangāue lelei taha ʻo e fakauluí. (Shayne M. Bowen, “Ko e Fatongia ʻo e Tohi ʻa Molomoná ʻi he Fakauluí,” Liahona, Nōvema 2018, 83)

• ʻOkú ke pehē ko e hā ʻe lava ke hoko ai e Tohi ʻa Molomoná ko ha meʻangāue mālohi pehē ki hono fakaului mo tānaki e kakaí kia Sīsū Kalaisí?

Fakafanongo fakalelei ki he tali ʻa e kau akó, pea ʻi he taimi ʻe feʻunga aí, fakaafeʻi ke nau vahevahe e ʻuhinga ʻoku nau ongoʻi pehē aí.

Kapau ʻe tokoni ke vakai e kau akó ki ha sīpinga ʻo e founga naʻe hoko ai e Tohi ʻa Molomoná ko ha meʻangāue ʻi hono ʻomi ha tangata ke ofi ange ki he ʻOtuá, fakakaukau ke huluʻi e “A Book of Mormon Story” (5:15), ʻoku maʻu ʻi he ChurchofJesusChrist.org.

Fakaafeʻi e kau akó ke nau lau e Molonai 10:3–5 mo e fakamatala ko ʻení. Kole ange ke nau kumi ha founga mahuʻinga te tau lava ai ʻo teuteu ke vahevahe e Tohi ʻa Molomoná mo e niʻihi kehé.

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Ke tau ʻiloʻi ʻoku moʻoni e Tohi ʻa Molomoná, kuo pau ke tau lau ia pea fai e fili ʻoku hā ʻi he tohi ʻa Molonaí: lotu ke ʻiloʻi pe ʻoku moʻoni. Hili ʻetau fai iá, ʻe lava ke tau fakamoʻoniʻi ki hotau ngaahi kaungāmeʻá mei he meʻa kuo tau aʻusia tonú, ʻe lava ke nau fai e fili ko iá pea ʻiloʻi ʻa e moʻoni tatau. (Henry B. Eyring, “A Voice of Warning,” Ensign, Nov. 1998, 34)

• Ko e hā ha meʻa naʻá ke ako mei he fakamatala ʻa Palesiteni ʻAealingí mo e Molonai 10:3–5?

ʻI he vahevahe ʻe he kau akó e meʻa naʻa nau akó, te nau ala ʻiloʻi ha moʻoni hangē ko ʻení: ʻOku fakaʻatā ʻe hono maʻu ʻetau fakamoʻoni ki he Tohi ʻa Molomoná ke tau tokoni ki he niʻihi kehé ke nau ako hono moʻoní.

Ke tokoni ke fakakaukau e kau akó ki heʻenau ngaahi aʻusia ʻi he moʻoni ko ʻení, te ke lava ʻo fakaafeʻi kinautolu ke nau vakaiʻi fakalongolongo ʻenau tali ki he ngaahi fakamatala ko ʻení.

Fakaʻaongaʻi ha meʻafua ʻo e taha ki he nima, ko e tahá ʻoku “ʻikai moʻoni fekauʻaki mo au” pea nimá ʻoku “moʻoni ʻaupito fekauʻaki mo au,” pea fakafuofua e ngaahi fakamatala ko ʻení:

• Te u lava ʻo fakamatalaʻi ki ha kaungāmeʻa ʻa e Tohi ʻa Molomoná mo e founga ʻokú ne lava ai ʻo ʻomi e kakaí kia Kalaisí.

• ʻOku ou ako e Tohi ʻa Molomoná ʻi ha founga ʻoku fakaloloto ai ʻeku ului fakataautaha kia Sīsū Kalaisí.

• Kuó u maʻu ha ngaahi aʻusia ʻoku fakaʻatā ai au ke u fakamoʻoni ki he niʻihi kehé ʻoku moʻoni e Tohi ʻa Molomoná.

Fakakaukau ke fakaafeʻi e kau akó ke kumi ha tākiekina fakalaumālie ki he founga ke fakaafeʻi mai ai e mālohi ʻo e ʻOtuá ki heʻenau moʻuí mo e moʻui ʻa e niʻihi kehé ʻo fakafou ʻi he Tohi ʻa Molomoná.

Ko hono Fakamahuʻingaʻi e meʻaʻofa ʻa e ʻOtuá ko e Tohi ʻa Molomoná

ʻI ha fakahā ne foaki kia Siosefa Sāmita, naʻe fakamamafaʻi ai ʻe he ʻEikí ʻa hono mahuʻinga ʻo e Tohi ʻa Molomoná ʻaki hono vahevahe e ongo ʻokú ne maʻu ʻi hono toʻo maʻamaʻa ia ʻe he kakaí.

Lau ʻa e Tokāteline mo e Ngaahi Fuakava 84:54–57, pea fakakaukau ki he founga ʻe ala kaunga ai e ngaahi veesi ko ʻení ki he kāingalotu ʻo e Siasi ʻo e ʻEikí ʻa ia ʻoku nau teuteu ke vahevahe ʻEne ongoongoleleí.

• Ko e hā e meʻa naʻá ke maʻu ʻe lava ʻo fakaʻaongaʻi kiate kinautolu ʻoku nau loto-holi ke vahevahe e ongoongolelei ʻo e Fakamoʻuí?

• Ko e hā ha ngaahi founga ʻe niʻihi te tau fakahaaʻi ai e mahuʻinga ʻo e Tohi ʻa Molomoná ʻi heʻetau moʻuí?

ʻIlo fakataautaha mo e fakamoʻoni ki he Tohi ʻa Molomoná

ʻE lava ke tokoni e tūkunga ko ʻení, pe ko ha tūkunga naʻá ke faʻu, ke fakahaaʻi ai ʻe he kau akó e meʻa kuo nau ako mo ongoʻi lolotonga e lēsoní. Fakakaukau ke lau fakataha mo e kalasí ʻa e tūkungá, pea ʻoange ha taimi ki he kau akó ke nau fakakaukau ki he meʻa te nau ala vahevahe mo ʻAní.

Naʻe toki kau pē ʻa ʻAni ki ha kalasi teuteu ngāue fakafaifekau. Naʻá ne kole ki he ongo faiako ne toki ʻosi mai mei he ngāue fakafaifekaú ha ngaahi fokotuʻu ki he teuteu ke vahevahe e ongoongoleleí. Naʻe faleʻi ia ʻe he ongo faiakó fakatouʻosi ke fakamālohia ʻene ʻiló mo e fakamoʻoni ki he Tohi ʻa Molomoná. ʻI he kotoa e ngaahi founga naʻá na mei lava ʻo tali ʻakí, naʻe ʻikai ʻamanaki ʻa ʻAni ko e talí ko hono ako e Tohi ʻa Molomoná.

Fakaafeʻi e kau akó ke nau ʻalu takai ʻi he lokí ʻo talaange ki ha ongo tamaiki ako kehe ʻe toko ua ʻa e meʻa naʻa nau mei vahevahe mo ʻAní.

Fakakaukau ke fokotuʻu ha faingamālie ke fakamoʻoniʻi ai ʻe he Laumālie Māʻoniʻoní ʻa e Tohi ʻa Molomoná ki hoʻo kau akó. Te ke lava ʻo fakaafeʻi ha niʻihi ʻoku fie vahevahe mo e kalasí ʻenau potufolofola manako mei he Tohi ʻa Molomoná pe ko ʻenau aʻusia ʻi hono maʻu ha fakamoʻoni ki he Tohi ʻa Molomoná. Te ke lava ʻo vahevahe ha potufolofola kuó ne tokoniʻi koe ke lelei ange hoʻo ʻilo ki he Fakamoʻuí. ʻOange ha taimi ki he kau akó ke nau teuteu. Kapau ʻoku tokolahi e kau ako ʻoku fie vahevahé, fakaafeʻi ke nau fai ia ʻi ha fanga kiʻi kulupu tokosiʻi koeʻuhí ke nau maʻu kotoa ha faingamālie.

Fakaʻaongaʻí

Fakakaukau ke fakaafeʻi e kau akó ke nau tali fakalongolongo ki he fehuʻi ko ʻení ʻi heʻenau tohinoa akó.

• Ko e hā te ke lava ʻo fai ke fakaloloto ai ho vā fetuʻutaki mo Sīsū Kalaisí ʻo fakafou ʻi he Tohi ʻa Molomoná?

  Te ke lava ʻo fokotuʻu ange ha ngaahi founga ʻe niʻihi hangē ko ʻení: lau ʻa e Tohi ʻa Molomoná kakato ʻi ha vahaʻataimi pau, kumi ha ngaahi veesi ke vahevahe mo e niʻihi kehé, pe kole ki he Tamai Hēvaní ha fakamoʻoni ʻoku moʻoni e tohí ʻo fakafou ʻi he Laumālie Māʻoniʻoní.

  Te ke lava foki ʻo huluʻi e vitiō “The Book of Mormon” (2:10), ʻoku maʻu ʻi he ChurchofJesusChrist.org. ʻI he vitiō ko ʻení, ʻoku vahevahe ai ʻe ʻEletā Sefilī R. Hōlani mo Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga naʻe fakaafeʻi ai kinaua ʻe heʻena palesiteni fakamisioná ke na ako fekauʻaki mo Kalaisi ʻo fakafou ʻi he Tohi ʻa Molomoná. ʻE lava ke fili ʻa e kau akó ke muimui ki he fakaafe tatau ko iá.

• ʻE teuteuʻi fēfē nai koe ʻi hono fai e meʻa naʻá ke tohí ke ke vahevahe e Tohi ʻa Molomoná ʻi he moʻui fakaʻahó pe ʻi hoʻo hoko ko ha faifekau taimi kakató?

ʻE tokoni ke vahevahe hoʻo fakamoʻoni fekauʻaki mo e founga kuo tokoniʻi ai koe ʻe he Tohi ʻa Molomoná ke ke ʻunu ke ofi ange kia Sīsū Kalaisi.

Ngaahi Maʻuʻanga Tokoni Kehé

Ko e hā e founga pea mo e ʻuhinga ʻoku totonu ke u vahevahe ai e Tohi ʻa Molomoná?

Naʻe vahevahe ʻe ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ou fakaafeʻi kimoutolu, ʻi he ʻahó ni, ke foaki ha Tohi ʻa Molomona ki hoʻo ngaahi kaungāmeʻá mo e fāmilí, kaungāngāué, ko hoʻo faiako soká, pe tangata fakatau vesitapolo ʻi hoʻo māketí. ʻOku nau fiemaʻu e ngaahi folofola ʻa e ʻEikí ʻoku maʻu ʻi he tohí ni. ʻOku nau fiemaʻu ha tali ki he ngaahi fehuʻi fakaʻahó mo e moʻui taʻengata ka hoko maí. ʻOku nau fiemaʻu ke ʻilo ki he hala ʻo e fuakavá kuo tuku mai maʻanautolú pea mo e ʻofa tuʻu maʻu ʻa e ʻEikí maʻanautolú. ʻOku maʻu kotoa ia ʻi heni ʻi he Tohi ʻa Molomoná.

ʻI he taimi ʻokú ke foaki ai kiate kinautolu ha Tohi ʻa Molomoná, ʻokú ke ʻoange ai hanau faingamālie ke nau ako mo ongoʻi e folofola ʻa e ʻOtuá. ʻOku ʻikai fiemaʻu ia ke ke toʻo holo ha ngaahi tatau ʻo e tohi kuo pākí. ʻE faingofua pē haʻo vahevahe ia mei hoʻo telefoni toʻotoʻó mei he konga ʻo e ngaahi folofolá ʻi he app ʻa e Gospel Library.

Fakakaukau kiate kinautolu kotoa pē ʻe lava ke tāpuekina ʻenau moʻuí ʻe he ongoongoleleí, pea ʻave leva kiate kinautolu ha tatau ʻo e Tohi ʻa Molomoná mei hoʻo telefoní. Manatuʻi ke fakakau ai hoʻo fakamoʻoní mo e founga kuo tāpuekina ai he tohí ni ʻa hoʻo moʻuí. (Ronald A. Rasband, “ʻI He ʻAho Ní,” Liahona, Nōvema 2022, 27)

ʻOku tataki fēfē kitautolu ʻe he Tohi ʻa Molomoná kia Sīsū Kalaisí?

Naʻe vahevahe ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻá ku ako fakaʻauliliki ai ʻa e Tohi ʻa Molomoná ʻi heʻeku fakakakato ʻa ʻeku ngaahi lēsoni semineli kuo vahe fakauiké. ʻOku ou manatuʻi lelei ne fakafonu māmālie hoku lotó mo hoku laumālié ʻe ha ongo māfana, ʻo fakamaama ʻa ʻeku ʻiló, pea fakaʻau ke fakafiefia ange ʻo hangē ko hono fakamatalaʻi ʻe ʻAlamā ʻi heʻene malangaʻi ʻa e folofola ʻa e ʻOtuá ki hono kakaí. Ne faifai pea hoko ʻa e ongo ko iá ko e ʻilo ne matuʻaki mahuʻinga kiate au pea hoko ko e fakavaʻe ʻo ʻeku fakamoʻoni ki he ngaahi meʻa mahuʻinga ne hokó mo e ngaahi akonaki ʻoku ʻi he tohi toputapú ni.

Naʻe hoko moʻoni ʻa e Tohi ʻa Molomoná ko e maka-tuʻu-loto naʻá ne fokotuʻu maʻu ʻeku tui kia Sīsū Kalaisi mo ʻeku fakamoʻoni ki he tokāteline ʻo ʻEne ongoongoleleí, ʻo fakafou ʻi he ngaahi aʻusia fakataautaha mahuʻinga ko ʻení mo ha ngaahi aʻusia kehe. Naʻe hoko ia ko e taha ʻo e ngaahi meʻa mahuʻinga ʻokú ne fakamoʻoni mai kiate au kau ki he feilaulau fakalelei fakalangi ʻa Kalaisí. Naʻe hoko ia ko ha maluʻi ʻi he kotoa ʻo ʻeku moʻuí mei he ngaahi feinga ʻa e filí ke fakavaivaiʻi ʻeku tuí pea fakaloloto e taʻetuí ʻi hoku ʻatamaí pea ʻomi kiate au ha loto-toʻa ke fakahaaʻi mālohi ki he māmaní ʻa ʻeku fakamoʻoni ki he Fakamoʻuí. (Ulisses Soares, “Ko Hono ʻOmi ʻo e Tohi ʻa Molomoná,” Liahona, Mē 2020, 34)

Ngaahi ʻEkitivitī Fakalahi ki he Akó

Ko hono tokoniʻi e niʻihi kehé ke nau haʻu kia Sīsū Kalaisi ʻo fakafou ʻi he Tohi ʻa Molomoná

Mahalo ʻe faingataʻa ki he kau akó ke vahevahe e ongoongoleleí mo e niʻihi kehé. ʻE ala tokoni ke huluʻi e vitiō ko ʻeni ʻo ha talavou naʻá ne vahevahe e Tohi ʻa Molomoná mo ha kaungāmeʻa. Ko e founga ʻe taha, ʻe lava e kau akó ʻo talanoa ki ha ngaahi taimi kuo nau vahevahe ai e Tohi ʻa Molomoná mo ha taha ʻa ia naʻe tāpuekina ʻi heʻene lau iá.

ʻE lava ke aleaʻi ʻe he kau akó e ʻuhinga ʻe hoko ai hono vahevahe e Tohi ʻa Molomoná ko ha founga lelei ke aleaʻi e ongoongoleleí mo ha taha.

Te ke lava ʻo fakaʻaliʻali ki he kau akó ha ngaahi founga kehekehe ke vahevahe fakaʻilekitulōnika ai e Tohi ʻa Molomoná. Te nau lava ʻo fai ʻeni ʻi he app Gospel Library ʻi he lomiʻi he ngaahi folofolá pea lomiʻi e “Vahevahe” pe “Vahevahe he Taimí ni” ʻi he tafaʻaki ki ʻolungá. Pe te nau lava ʻo vahevahe ʻa e app Book of Mormon. ʻOku maʻu e Tohi ʻa Molomoná ʻi he ongo foungá fakatouʻosi ʻi ha lea fakafonua ʻe 100 tupu pea taʻetotongi. ʻOku maʻu he uepisaiti ko ʻení ha ngaahi fakahinohino ki hono download e polokalamá pea kau ai mo ha vitiō ke tokoni ke ʻiloʻi ʻe he kau akó e founga ke vahevahe ai iá:

Vahevahe ʻa e app ʻo e Tohi ʻa Molomoná

Tulamaʻi hono vahevahe e Tohi ʻa Molomoná

ʻE tokoni ke ʻoange ki he kau akó ha faingamālie ke vahevahe e Tohi ʻa Molomoná ʻi ha tūkunga ʻi he ngāue fakafaifekaú. ʻE lava ke tauhoa e kau akó ʻo tulamaʻi ai. ʻE lava ke fetongitongi e hoa takitaha ʻi hono fakahoko ʻení ʻo hangē ʻoku nau talanoa ki ha kaungāmeʻa mei ha tui fakalotu kehe:

• Fakamatalaʻi pe ko e hā ʻa e Tohi ʻa Molomoná.

• Fakaafeʻi ho kaungāmeʻá ke ne lau ia.

• Talaange ki ho kaungāmeʻá ʻa e ʻuhinga ʻokú ke loto ai ke ne lau iá.

Mahalo ʻe tokoni ki he kau akó ke lau pea muimui ʻi he ngaahi fokotuʻu ko ʻení ki hono vahevahe e Tohi ʻa Molomoná ʻoku maʻu ʻi he “Ngaahi Fakakaukau ki he Akoʻí” ʻi he peesi 49–50 ʻo e Malanga ʻAki ʻEku Ongoongoleleí: Ko ha Fakahinohino ki he Ngāue Fakafaifekaú (2023).

Talateu ki he Tohi ʻa Molomoná. “Tauhi ki hono ngaahi akonakí”

Fakakaukau ke fakaafeʻi e kau akó ke nau lau e palakalafi hono ono ʻo e talateu ki he Tohi ʻa Molomoná. ʻE tokoni ʻeni ke nau vakai ki ha founga mahuʻinga ke fakaafeʻi mai ai e ngaahi tāpuaki ʻo e Tohi ʻa Molomoná ki heʻenau moʻuí. Kole ange ke nau kumi ʻa e talaʻofa kuo ʻomaí. Mahalo ʻe ʻaonga atu e ngaahi fehuʻi ke aleaʻi ko ʻení:

• Makehe mei hono lau e Tohi ʻa Molomoná, ko e hā e meʻa ʻoku fiemaʻu ke tau fakahoko ke ʻunuʻunu ke ofi ange ki he ʻOtuá?

• Ko e fē ha taimi kuó ke ngāueʻi ai ha meʻa naʻá ke ako mei he Tohi ʻa Molomoná?

ʻOku lea ʻa e Tohi ʻa Molomoná ʻo taukaveʻi pē ia

Ke tokoni ke mahino lelei ange ki he kau akó e mālohi ʻo e Tohi ʻa Molomoná ke tataki e kakaí ki he Tamai Hēvaní mo Sīsū Kalaisí, te mou lava ʻo mamata ʻi he vitiō ko ʻení. ʻOku ʻasi ai ha kakai mei he ngaahi tui fakalotu kehekehe he funga ʻo e māmaní ʻoku nau lau ha peesi ʻo e Tohi ʻa Molomoná pea kumi e founga ʻoku fakamoʻoni ai ki he ʻOtuá.