Lēsoni 199: Teuteu ki he Ngāue Fakafaifekaú

Ko Hono Vahevahe ʻo e Ongoongoleleí ʻi he ʻOfa Faka-Kalaisí

ʻOfa ki he ʻOtuá mo e Niʻihi Kehé

ʻOku lahi ha ngaahi ʻuhinga te tau lava ai ʻo fili ke vahevahe ʻa e ongoongolelei ʻo Sīsū Kalaisí mo e niʻihi kehé. ʻOku tupulaki ʻetau holi ke vahevahe ʻa e ongoongoleleí ʻi heʻetau ako ke ʻofa ki he ʻOtuá mo kinautolu ʻoku tau feohí. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe lava ke fakaʻaiʻai ai kinautolu ʻe heʻenau ʻofa ki he Tamai Hēvaní, Sīsū Kalaisi, mo e kakai kehé ke vahevahe ʻa e ongoongoleleí.

Ngaahi ʻEkitivitī Ako ʻOku Ala Fakahokó

Loto ke tokoní

Fakakaukau ke fakaʻaliʻali ha ngaahi fakatātā ʻo ha toʻu tupu ʻoku nau tokoni ʻi ha ngaahi tūkunga kehekehe. Fakaafeʻi e kau akó ke vahevahe ha ngaahi ʻuhinga lahi ʻe ala fili ai ʻa e toʻu tupu ʻi he fakatātā takitaha ke tokoní. (ʻE ala kau ʻi he ngaahi ʻuhingá ʻa e fatongiá, ʻofá, ngaahi fiemaʻu ʻa e mātuʻá, ongoʻi halaiá, pe feohi fakasōsialé.)

• Neongo ʻoku lahi ha ngaahi ʻuhinga ke tokoni ai ki he niʻihi kehé, ka ko e ngaahi ʻuhinga fē ʻoku ngalingali te ne tokoniʻi kitautolu ke tau hoko ʻo hangē ko e Fakamoʻuí? Ko e hā hono ʻuhingá?

Hili iá te ke lava ʻo fakaʻaliʻali ha fakatātā ʻo ha taha ʻokú ne vahevahe ʻa e ongoongoleleí ʻi hoʻo fakaafeʻi ʻa e kau akó ke aleaʻi ʻa e ngaahi fehuʻi ko ʻení:

• Ko e hā ha ngaahi ʻuhinga ʻe ala fili ai ha taha ke vahevahe ʻa e ongoongoleleí mo hano kaungāmeʻa pe fili ke ngāue fakafaifekau taimi kakato?

• Ko e hā ha ngaahi ʻuhinga ʻoku ngalingali te ne tokoniʻi kinautolu ke mohu founga ʻi hono ʻomi ʻo e niʻihi kehé ki he ʻOtuá?

Fakakaukau ke ʻoange ha taimi ki he kau akó ke nau fakalaulauloto mo lekooti ai ʻenau ngaahi ongó ʻi heʻenau tohinoa akó fekauʻaki mo e ngaahi meʻá ni:

• Ko e hā hoʻo ongo fekauʻaki mo hono vahevahe ʻo e ongoongolelei ʻo Sīsū Kalaisí mo e niʻihi kehé? Ko e hā e ʻuhinga ʻokú ke ongoʻi pehē aí?

• ʻOkú ke palani nai ke ngāue fakafaifekau taimi kakato? Kapau ko ia, ko e hā e meʻa ʻokú ne fakaʻaiʻai koé?

Fakaafeʻi e kau akó ke fekumi ki he fakahinohino ʻa e Laumālie Māʻoniʻoní lolotonga e lēsoní ʻi heʻenau fakakaukau ki heʻenau ngaahi holi ke vahevahe e ongoongolelei ʻo Sīsū Kalaisí.

ngaahi meʻa ʻoku fakaʻaiʻai ki he ʻOtuá

Fakakaukau ke fakamatalaʻi ange ki he kau akó ko e taimi ʻoku tau ʻilo ai ʻa e meʻa ʻokú ne fakaʻaiʻai e Tamai Hēvaní mo Sīsū Kalaisi ke tokoniʻi kitautolú, te tau lava ʻo faʻifaʻitaki lelei ange ki Heʻena ngaahi sīpingá.

Ke tokoni ke mahino ʻeni ki he kau akó, te ke lava ʻo fakaʻaliʻali ʻa e ngaahi fakamoʻoni folofola ko ʻení. Fakaafeʻi e tokotaha ako takitaha ke ne fili ha potufolofola ʻe taha pe ua ke lau mo fakalaulauloto ki ai.

Lau ha potufolofola ʻe taha pe ua mei he ngaahi potufolofola ko ʻení, ʻo kumi e meʻa ʻoku nau akoʻi fekauʻaki mo e Tamai Hēvaní mo Sīsū Kalaisí:

• Sione 3:16–17

• Sione 15:12–13

• 2 Nīfai 26:24

• Tokāteline mo e Ngaahi Fuakava 18:10–13

• Tokāteline mo e Ngaahi Fuakava 34:1–3

• Tokāteline mo e Ngaahi Fuakava 95:1

• Tokāteline mo e Ngaahi Fuakava 138:1–4

Fakaafeʻi e kau akó ke nau ʻunu takai ʻi he loki akó pea vahevahe mo e kaungāako naʻa nau fili ha ngaahi potufolofola kehé ʻa e meʻa ne nau ako fekauʻaki mo e Tamai Hēvaní mo Sīsū Kalaisí.

ʻI he ʻosi e vahevahe ʻa e kau akó, kole ha niʻihi ʻe loto-fiemālie ke fakamatalaʻi fakanounou ʻa e meʻa ne nau ako fekauʻaki mo e Tamai Hēvaní mo Sīsū Kalaisí.

Tokoni ke fakatokangaʻi ʻe he kau akó ʻoku hoifua ʻa e Tamai Hēvaní mo Sīsū Kalaisi ke Na tokoni ʻi he ʻofa.

Mahalo ʻe fiemaʻu ʻe he kau akó ha taimi ke fakalaulauloto ai ki he ngaahi fehuʻi ko ʻení kimuʻa pea nau ongoʻi mateuteu ke tali leʻolahí. Mahalo te ke fie ʻoange ha taimi ke nau hiki ai ʻenau ngaahi talí ʻi heʻenau tohinoa akó kimuʻa pea kole ki ha niʻihi ʻoku loto ke vahevahé.

• Ko e hā ha ngaahi aʻusia kuo tokoni ke ke ongoʻi e ʻofa ʻa e Tamai Hēvaní mo Sīsū Kalaisi kiate koé?

• ʻE tākiekina fēfē hoʻo holi ke vahevahe ʻa e ongoongoleleí mo e niʻihi kehé ʻe he mahino e ʻuhinga ʻoku tokoniʻi ai kitautolu ʻe he Tamai Hēvaní mo Sīsū Kalaisí?

ʻE lava ke fakaʻaiʻai kitautolu ʻe he ʻofá ke tau vahevahe ʻa e ongoongoleleí

ʻOku fakaʻaongaʻi ʻe he konga ko ʻeni ʻo e lēsoní ʻa e ngaahi akonaki ʻa e Fakamoʻuí ʻi he Sione 21 ke tokoni ke ʻilo ʻe he kau akó ʻe lava ʻe he ʻofá ʻo fakaʻaiʻai kitautolu ke vahevahe ʻa e ongoongoleleí.

Ko ha founga ʻe taha ke fakahoko ai ʻení ko hono fakaafeʻi e ngaahi hoá ke nau ako ʻa e konga “Ko e ʻOfa Faka-Kalaisí pea mo e ʻOfá” kau ai ʻa e ngaahi fakakaukau “Ako Folofola” ʻi he peesi 144 ʻo e Malanga ʻAki ʻEku Ongoongoleleí: Ko ha Fakahinohino ki Hono Vahevahe ʻo e Ongoongolelei ʻo Sīsū Kalaisí (2023), ʻo kumi e founga ʻe lava ke fakaʻaiʻai ai kitautolu ʻe he ʻofá ke vahevahe ʻa e ongoongoleleí.

Hili pē ha taimi nounou mei hono Tutuki ʻo Sīsū Kalaisí, naʻe ō ha niʻihi ʻo ʻEne kau ākongá ʻo toutai. Lolotonga ʻenau toutaí, naʻe fakaafeʻi kinautolu ʻe ha tangata ʻi he matātahí ke lī ʻenau kupengá ʻi he tafaʻaki toʻomataʻu ʻo honau vaká. Hili ʻenau fai iá pea maʻu ha ika lahí, naʻe fakatokangaʻi ʻe he kau ākongá ko e tangatá ko e Fakamoʻui ia kuo toetuʻú. ʻI heʻenau omi ki he mataʻutoʻutá, naʻe tokoniʻi kinautolu ʻe Sīsū ʻaki hono fafanga mo akoʻi kinautolú.

Fakakaukau ke fakaafeʻi e kau akó ke kumi e toutou fakaafe ʻa e Fakamoʻuí kia Pitá ʻaki hono lau fakataha e Sione 21:15–17 pe mamata ʻi he foʻi vitiō “Fafanga ʻEku Fanga Sipí” (5:47), ʻoku maʻu ʻi he ChurchofJesusChrist.org, mei he taimi 2:46 ki he 4:29. (Mahalo ʻe tokoni ke ʻilo ʻe he kau akó ʻe lava ke ʻuhinga e ngaahi lea ko ʻeni ʻi he veesi 15 ki he ika kotoa naʻe maʻu ʻe he kau ākongá.)

• Ko e hā e meʻa ʻokú ke ako mei he founga naʻe finangalo ai ʻa Sīsū ke fakahaaʻi ʻe Pita ʻene ʻofá?

Lau ʻa e fakamatala ko ʻeni mei he Palōfita ko Siosefa Sāmitá (1805–44), ʻo kumi e meʻa ʻokú ne tānaki mai ki hoʻo mahino ki he ngaahi fakaafe ʻa Sīsū ʻi he Sione 21.

Ko e ʻofá ko e taha ia ʻo e ngaahi ʻulungaanga fakaʻeiʻeiki taha ʻo e ʻOtuá, pea ʻoku totonu ke fakafōtunga atu ia ʻe kinautolu ʻoku holi ke hoko ko e ngaahi foha ʻo e ʻOtuá. Ko e tangata kuo fakafonu ʻaki e ʻofa ʻa e ʻOtuá, ʻoku ʻikai fiemālie ia ʻi hono tāpuakiʻi pē hono fāmilí, ka ʻoku ʻalu feʻaluʻaki he funga ʻo e māmaní, ke tāpuakiʻi ʻa e faʻahinga ʻo e tangatá. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 493)

• Ko e hā e meʻa ʻoku mahuʻinga kiate koe mei he fakamatala ʻa Siosefa Sāmitá?

• Ko e hā e meʻa naʻá ke ako mei he Sione 21 mo e fakamatala ʻa Siosefa Sāmita ʻe lava ke ne fakaʻaiʻai koe ke ke vahevahe ʻa e ongoongoleleí pe ʻalu ʻo ngāue fakafaifekaú?

• ʻOkú ke pehē ko e hā ha ngaahi founga lelei ke fakaloloto ai ʻetau ʻofa ki he ʻOtuá? Ke fakaloloto ʻetau ʻofa ki he kakai kehé?

Ko hono ikunaʻi ʻo e loto-momou ke vahevahe ʻa e ongoongoleleí

ʻE lava ke faʻu ʻe he kau akó ha ngaahi kulupu ke fakakakato ʻa e ʻekitivitī ko ʻení. ʻE ala tokoni ke ʻoange ki he kulupu takitaha ha laʻipepa.

1. Faʻu fakakulupu ha tūkunga ʻoku momou ai ha talavou ke ngāue fakafaifekau taimi kakato pe momou ha taha taʻu hongofulu tupu ke vahevahe ʻa e ongoongoleleí mo hano kaungāmeʻa. Fili ha tokotaha tohi ke ne hiki ʻa e tūkungá ʻi ha laʻipepa. Fakapapauʻi ke fakakau ha ngaahi ʻuhinga ʻoku momou ai ʻa e tokotaha ʻi he tūkungá.

   Ko ha sīpinga ʻeni ʻo ha tūkunga ʻe ala faʻu ʻe he ngaahi kulupú: “Naʻe toki fanongo ʻa ʻAnitoniō ki ha lea konifelenisi naʻá ne poupouʻi ha toʻu tupu tokolahi ange ke teuteu ke hoko ko ha kau faifekau maʻá e ʻEikí. ʻOkú ne ʻiloʻi ko e meʻa totonu ia ke ne faí. Ka neongo ia, ʻokú ne fāinga ke lea ki he kakai ʻoku ʻikai ke ne ʻiloʻí, pea ʻokú ne ongoʻi hangē ʻoku ʻikai ke ne ʻiloʻi lelei e folofolá ke akoʻi e kakai kehé. ʻOkú ne hohaʻa naʻa ʻikai ke ne hoko ko ha faifekau lelei.”

   Hili hono hiki ʻe he ngaahi kulupú ʻa e ngaahi tūkunga naʻa nau faʻú, fakakaukau ke kole ange ke nau fakafetongi tūkunga mo e ngaahi kulupu kehé kimuʻa pea fakakakato ʻa e sitepu ko ʻení.

2. Fakaʻaongaʻi ʻa e meʻa naʻá ke ako mo ongoʻi he ʻaho ní, kole ki ha tokotaha tohi ke ne hiki ʻa e meʻa ʻe vahevahe ʻe hoʻo kulupú ke tokoni ki he tokotaha ʻi he tūkungá. Fakakau ai ha ngaahi fokotuʻu ʻo e meʻa ʻe lava ke fai ʻe he tokotahá ke fakatupulaki ai ʻene ʻofa ki he Fakamoʻuí mo e niʻihi kehé. Mahalo te ke fie fakakau ai ha meʻa fekauʻaki mo e founga ʻe lava ke tokoni ai hono ongoʻi e ʻofa ʻa e Fakamoʻuí ke fakatupulaki e holi ʻa e tokotahá ni ke ngāué.

Fakakaukau ke fakaafeʻi ha ngaahi kulupu ke vahevahe mo e kalasí ʻa e founga naʻa nau tali ʻaki ki he tūkunga ʻa e kulupu kehé.

Ke fakaʻosi e lēsoní, fakakaukau ke ʻoange ha taimi ki he kau akó ke lekooti ʻi heʻenau tohinoa akó ʻa e founga ʻe lava ke tokoniʻi ai kinautolu ʻe he ʻofa ki he ʻOtuá mo e niʻihi kehé ke nau ikunaʻi ha faʻahinga momou pē te nau ongoʻi fekauʻaki mo hono vahevahe ʻo e ongoongolelei ʻo Sīsū Kalaisí.

Ngaahi Maʻuʻanga Tokoni Kehé

Ko e hā ha meʻa te ne lava ʻo tokoniʻi au ke u ikunaʻi ʻa e manavasiʻi ke vahevahe ʻa e ongoongoleleí?

Naʻe fakamatala ʻe ʻEletā L. Tomu Peuli (1922–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻi ai ha kāingalotu ʻoku hangē ʻoku nau loto kinautolu ke fufuuʻi ʻenau kau ki he Siasí. ʻOku ʻi ai pē ʻenau ngaahi ʻuhinga ki ai. Hangē ko ʻení, mahalo ʻoku ʻikai ke nau tui ko ha meʻa ia ʻanautolu ke vahevahe ʻenau tuí. Mahalo ʻoku nau manavasiʻi naʻa ʻi ai haʻanau fehālaaki pe fai ange ha fehuʻi he ʻikai ke nau lava ʻo tali. Kapau ʻe ʻi ai ha taimi ʻe haʻu ai ha ngaahi fakakaukau pehē ki ho ʻatamaí, ʻoku ʻi ai ʻeku faleʻi maʻamoutolu. Mou manatuʻi pē e ngaahi lea ʻa Sioné: “ʻOku ʻikai ha manavahē he ʻofá; ka ʻoku tekeʻi atu ʻa e manavaheé ʻe he ʻofa mamahí” (1 Sione 4:18). Kapau pē te tau ʻofa ki he ʻOtuá pea ʻofa ki hotau kaungāʻapí, ʻoku talaʻofa mai te tau ikunaʻi ʻetau manavaheé. …

ʻOku ou palōmesi atu kapau te mou tali ʻa e fakaafe ke vahevahe e ngaahi meʻa ʻoku mou tui ki aí mo hoʻomou ngaahi ongo kau ki he ongoongolelei ʻo Sīsū Kalaisi kuo fakafoki maí, ʻe hoko ha laumālie ʻo e ʻofá mo ha laumālie ʻo e loto toʻá ko homou takaua maʻu ai pē, he ʻoku “tekeʻi atu ʻa e manavaheé ʻe he ʻofa haohaoá” (1 Sione 4:18). (L. Tom Perry, “ʻOku Tekeʻi Atu ʻa e Manavaheé ʻe he ʻOfa Haohaoá,” Liahona, Nōvema 2011, 43, 44)

Ko e hā ʻa e fehokotaki ʻi he ʻofá mo hono vahevahe ʻo e ongoongolelei ʻo Sīsū Kalaisí?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku mahino kiate kitautolu mei heʻetau fakamoʻoni ki he moʻoni mo e mahuʻinga ʻo e ongoongolelei kuo fakafoki maí, ʻa hono mahuʻinga ʻo e meʻa kuo foaki maí. Mei heʻetau ʻofa ki he ʻOtuá mo hotau kāingá, ʻoku tau maʻu ai ʻetau holi ke vahevahe ʻa e meʻaʻofa maʻongoʻonga ko iá mo e tokotaha kotoa pē. …

Ko e kau faifekau lelei tahá, ʻa e mēmipá mo e taimi kakató, ʻoku nau ngāue maʻu pē ʻi he ʻofa. (Dallin H. Oaks, “Sharing the Gospel,” Ensign, Nov. 2001, 7, 8)

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Fekauʻaki mo hono tānaki ʻo ʻIsilelí, ʻoku fiemaʻu ke tau … mavahe mei he ongoʻi ko ha fatongia pe ongoʻi halaia ʻo maʻu e ongoʻi ʻofa mo kau ʻi he fetākinima fakalangi ʻi hono vahevahe ʻo e pōpoaki, ngāue, pea mo e misiona ʻo e Mīsaiá mo e māmaní.

Te tau lava ʻi heʻetau hoko ko e mēmipá, ʻo fakahaaʻi ʻetau ʻofa ki he Fakamoʻuí pea mo hotau ngaahi tokoua mo e tuofāfine he funga māmaní ʻi hano fai ha fanga kiʻi fakaafe faingofua. (Quentin L. Cook, “ʻOfa Lahi ki he Fānau ʻa ʻEtau Tamaí,” Liahona, Mē 2019, 78)

Ke tokoni ke ongoʻi ʻe he kau akó ʻa e mahuʻinga ʻo hono fakaʻaiʻai kinautolu ʻe he ʻofá ke ngāue fakafaifekaú, fakakaukau ke huluʻi ʻa e “Face to Face with Elder Rasband, Sister Oscarson, and Brother Owen” (1:20:41) mei he taimi 33:58 ki he 35:43.

Ngaahi ʻEkitivitī Fakalahi ki he Akó

Fetongitongi e founga kamatá: Ko e Samēlia leleí

Te ke lava ʻo kamata e kalasí ʻaki hano ʻai ke lau pe fakatātaaʻi ʻe he kau akó ʻa e talanoa ʻo e Samēlia leleí, ʻoku maʻu ʻi he Luke 10:30–37. Te mou lava ʻo aleaʻi ʻa e meʻa naʻá ne fakaʻaiʻai ʻa e taulaʻeikí, Līvaí, mo e Samēliá ke nau fakahoko ai ʻa e meʻa ne nau faí. Te mou lava ʻo aleaʻi ʻa e founga naʻe mei lava ai ʻe he ʻofa ʻa e ʻOtuá mo e ʻofa ʻa e niʻihi kehé ʻo fakaʻaiʻai e ngaahi ngāue ʻa e tangata Samēliá. Hili iá, ʻe lava ke fakalaulauloto ʻa e kau akó ki heʻenau ngaahi taumuʻa pē ʻanautolu ki hono tokoniʻi ʻo e niʻihi kehé.

Ala atu ʻi he ʻofa

Fakakaukau ke fakaʻaliʻali ʻa e “Reach Out with Love” (8:31) pea fakaafeʻi e kau akó ke nau feinga ke ʻiloʻi ʻa e ngaahi ʻuhinga ʻa Kuilamoa ki heʻene tokoni kia Sitivi hili hono kole ange ʻe heʻene pīsopé ke ʻaʻahi kia Sitiví. Poupouʻi e kau akó ke nau fakafehokotaki e aʻusia ʻa Kuilamoá mo ʻenau holi ke vahevahe ʻa e ongoongoleleí mo e niʻihi kehé.

Ko hono ikunaʻi ʻo e ngaahi meʻa ʻokú ne tohoakiʻi e tokangá kae lava ke ngāue fakafaifekaú

Ke tokoni ke ʻiloʻi ʻe he kau akó ʻa e ngaahi meʻa te ne lava ʻo taʻofi ha taha mei haʻane ngāue fakafaifekau, fakakaukau ke vahevahe ʻa e lea ko ʻeni meia ʻEletā Mākou A. ʻAitukaitisi ʻo e Kau Fitungofulú:

Neongo ʻoku lahi e ngaahi founga ke tokoni ai ki he tānakí, ka ʻoku ou fie lea ki ha meʻa tefito ʻe taha: ko e ngāue fakafaifekau taimi kakató. Ko ha tokolahi ʻiate kimoutolu, ʻe ʻuhinga ʻeni ki he hoko ko ha faifekau malangá. Ko ha niʻihi kehe, ʻe ʻuhinga ʻeni ki he hoko ko ha faifekau ngāue tokoní. Ka ʻoku feinga ʻa e māmaní ke takihalaʻi ʻa e toʻu tupú mei he fatongia toputapu taha ko ʻení ʻo ngāue ʻaki ʻa e manavaheé mo e loto-veiveiuá.

Ko ha ngaahi takihala ʻe niʻihi ʻe lava ke kau ai ʻa hono foua ha mahaki fakaʻauha, ko e mavahe mei ha ngāue paʻanga lelei, toloi e akó, pe ko e tokanga ki ha taha ʻokú mo feʻofaʻaki. ʻE kehekehe pē ʻa e ngaahi pole ʻo e tokotaha kotoa. ʻE lava ke hoko e faʻahinga takihalaʻi peheé ʻi he taimi pē ke kamata ai e ngāue ʻa e ʻEikí, pea ko e ngaahi fili ko ē ne ngali mahino kimui angé ʻoku ʻikai ke faʻa faingofua ia ʻi he taimi ko iá. (Marcos A. Aidukaitis, “Hiki Hake Ho Lotó pea Fiefia,” Liahona, Mē 2022, 41)

Fakaafeʻi e kau akó ke hiki ha ngaahi meʻa angamaheni ʻokú ne tohoakiʻi e tokangá mei he ngāue fakafaifekaú. Hili iá, ʻe lava ke vahevahe ʻe he kau akó ha ngaahi fakakaukau ki he founga ke ikunaʻi ai ʻa e ngaahi fakahohaʻa ko ʻení.

Founga ʻe taha ki hono fakafeʻiloaki ʻo e fakamatala ʻi he Sione 21

Te ke lava ʻo huluʻi ʻa e foʻi vitiō “Ko e Fekau Lahi ʻUluakí” (19:48) mei he taimi 06:52 ki he 11:26. ʻI he vitioó, ʻoku fakamatala ai ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he lea pē ʻaʻana ki he fakaafe ʻa Sīsū kia Pita ke fafanga ʻEne fanga sipí.