“Lēsoni 203—Faivelenga ʻi he Ngāue Fakafaifekaú: Ko e Teuteu ke Hoko ko ha Faifekau Faivelengá,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Faivelenga ʻi he Ngāue Fakafaifekaú,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 203: Teuteu ki he Ngāue Fakafaifekaú
Faivelenga ʻi he Ngāue Fakafaifekaú
Ko e Teuteu ke Hoko ko ha Faifekau Faivelengá
Naʻe ʻomi ʻe Sīsū Kalaisi ʻa e sīpinga haohaoa ʻo e faivelengá ʻa ia ʻoku totonu ke tau feinga ke faʻifaʻitaki ki ai ʻi heʻetau tokoniʻi e niʻihi kehé. ʻE lava e lēsoni ko ʻení ʻo tokoni ki he kau akó ke fekumi ki he tokoni ʻa e ʻEikí ke nau faivelenga ange ʻi heʻenau moʻuí mo ʻenau teuteu ke hoko ko ʻEne kau faifekaú.
Ngaahi ʻEkitivitī Ako ʻOku Ala Fakahokó
Fungavaka faá, matapā fakaʻosí
Fakakaukau ke kamata e lēsoní ʻaki hono tokoniʻi e kau akó ke nau fakalaulauloto ki he mahuʻinga ʻo e faivelenga ʻi he ngāue fakafaifekaú. Te ke lava ʻo fakaʻaliʻali ʻa e fakatātā ko ʻení pea vahevahe e fakamatala ʻi laló. Pe te ke lava ʻo huluʻi e vitiō “Fungavaka Faá, Matapā Fakaʻosí,” ʻoku maʻu ʻi he ChurchofJesusChrist.org, mei he taimi 14:17 ki he 17:27. Te ke lava ʻo taʻofi e vitioó ʻi he taimi 16:03 ke fakakaukauʻi ʻe he kau akó e founga te nau lava ai ʻo tali ʻi he taimi ko ʻení. Huluʻi leva e toenga ʻo e vitioó.
Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e aʻusia ko ʻeni ʻo ha ongo faifekau ʻi ʻIulope naʻá na ongoʻi ne ueʻi kinaua ke vahevahe e ongoongoleleí mo e kakai ʻi ha fale nofo totongi fungavaka fā.
Naʻá na kamata ʻi he fungavaka ki laló ʻo tukituki he matapā kotoa pē, mo fakahoko ʻena pōpoaki ʻo Sīsū Kalaisí mo e Fakafoki mai ʻo Hono Siasí.
Naʻe ʻikai fie fanongo ha taha kiate kinaua ʻi he fungavaka ki laló. …
… Ne na tukituki he matapā kotoa pē ʻi he fungavaka uá.
Ka ne ʻikai pē ha taha ʻe fie fanongo.
Naʻe tatau pē mo e fungavaka tolú. (Dieter F. Uchtdorf, “Fungavaka Faá, Matapā Fakaʻosí,” Liahona, Nōvema 2016, 17)
-
Ko e hā ha ngaahi fakakaukau naʻe mei maʻu ʻe he kau faifekau ko ʻení ʻi he taimi ko ʻení?
Naʻe hoko atu ʻa ʻEletā ʻUkitofa ʻo pehē:
[Naʻe tatau pē] mo e fungavaka faá—kae ʻoua kuó na tukituki he matapā fakaʻosi he fungavaka faá.
Naʻe malimali mai ha kiʻi taʻahine ʻi he ava ʻa e matapaá, pea fakaafeʻi atu kinaua ki loto ke na talitali ai kae talanoa mo ʻene faʻeé. …
… Ne fakahoko ʻe he ongo faifekaú ʻena pōpoakí pea foaki ange ha tohi ke lau ʻe he faʻeé—ko e Tohi ʻa Molomoná.
Hili ʻena oó, ne fakakaukau e fineʻeikí ke ne lau pē ha ngaahi peesi siʻi.
Naʻe lau ʻaho pē kuo ʻosi e tohí heʻene lau.
ʻIkai fuoloa mei ai, ne hū e fāmili uitou ko ʻení ʻi he vai ʻo e papitaisó. (Dieter F. Uchtdorf, “Fungavaka Faá, Matapā Fakaʻosí,” Liahona, Nōvema 2016, 17–18)
-
Ko e hā ha ngaahi ʻulungaanga faka-Kalaisi ʻokú ke fakatokangaʻi ʻi he ongo faifekau ko ʻení?
Ngaahi ʻulungaanga faka-Kalaisi ʻi he ongo faifekaú
Fakakaukau ke vahe ki he vaheua ʻo e kalasí ke nau lau e ngaahi veesi ʻi laló ʻi he Tokāteline mo e Ngaahi Fuakava vahe 4 pea vaheua ʻe taha ʻo e kalasí ke nau lau e ngaahi veesi ʻi he vahe 75. Hili e laukongá, ʻe lava ke vahevahe ʻe he kau akó ʻenau tali ki he ngaahi fehuʻi ʻi laló mo ha taha ʻokú ne lau e fakamoʻoni folofola ʻe tahá.
Pe te ke lava ʻo fakaafeʻi ha ngaahi hoa ke nau ako e konga “Faivelengá,” kau ai e ngaahi fakakaukau ki he “Ako Folofolá”, ʻi he peesi 149 ʻo e Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí (2023).
Lau e Tokāteline mo e Ngaahi Fuakava 4:2–6; 75:2–5, 29, ʻo kumi e ngaahi lea mo e kupuʻi lea naʻe fakaʻaongaʻi ʻe he ʻEikí ke fakamatalaʻi ʻaki ʻa kinautolu ʻoku loto ke tauhi kiate Iá, kau ai ʻEne kau faifekaú.
-
Ko e hā ʻoku fiemaʻu ʻe he Fakamoʻuí meiate kinautolu ʻoku holi ke ngāue Maʻana ko ha kau faifekau taimi kakató. Ko e hā hono ʻuhingá?
-
ʻE tokoniʻi fēfē kitautolu ʻe he ngaahi ʻulungaanga mo e ngāue ko ʻení ʻi he ngaahi tūkunga faingataʻa te tau ala fehangahangai mo iá?
Makehe mei he ngaahi moʻoni ʻoku vahevahe ʻe he kau akó, te nau ala ʻiloʻi ʻoku finangalo ʻa e ʻEikí ke ngāue faivelenga ʻEne kau faifekaú ʻi hono vahevahe ʻEne ongoongoleleí.
Ko e hā ʻa e faivelenga?
Hiki ʻa e fakamatala ko ʻení ʻi he palakipoé, pea fakaafeʻi e kau akó ke nau tohi e founga te nau ala fakaʻosi ʻakí.
Ko e faivelengá ko e …
Kapau ʻoku fiemaʻu tokoni e kau akó ʻi hono fakamatalaʻi e faivelengá, te ke lava ʻo vahevahe ko e taha ʻo e fakaʻuhinga ʻe malava fakaʻaongaʻí ko e “ngāue hokohoko mo ʻosikiavelenga” (Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí, [2023], 149).
-
Ko e hā ha ngaahi tūkunga ʻe niʻihi te ke ala fepaki mo ia pe ko e niʻihi ho toʻú ʻe fiemaʻu ki ai ʻa e faivelengá?
Mahalo te ke fie lisi e ngaahi tali ʻa e kau akó ʻi he palakipoé. Hili hono fakatahatahaʻi ha ngaahi fakakaukau ʻe niʻihi mei he kau akó, ʻoange kiate kinautolu ha faingamālie ke fakakaukau fakalelei ai ki he founga ʻoku nau fakahaaʻi ai ʻa e faivelengá ʻi heʻenau moʻuí.
Ko e founga ʻe taha ke fakahoko ai ʻení ke fakaʻaliʻali e siviʻi pē kita ko ʻení pea ʻoange ki he kau akó ha taimi ke nau fakakaukauloto fakalongolongo ai ki he founga te nau tali ʻakí. Fakakaukau ke fakamatalaʻi ki he kau akó ʻi heʻenau fakakakato e siviʻi pē kita ko ʻení, ʻe lava ke tokoniʻi kinautolu ʻe he Laumālie Māʻoniʻoní ke nau fakatokangaʻi ʻa e meʻa ʻoku nau fakahoko leleí mo e founga te nau lava ʻo tupulaki aí. ʻE ala ʻaonga ki he kau akó hono lekooti ʻenau ngaahi fakakaukaú ʻi heʻenau tohinoa akó. (Fakatokangaʻi ange: Te ke lava ʻo fili ke toe fakaʻaliʻali e ngaahi fakamatala ko ʻení ʻi he fakaʻosinga ʻo e lēsoní.)
Fakakaukauloto fakalongolongo ki he tuʻunga hono fakamatalaʻi lelei koe ʻe he ngaahi fakamatala takitaha ko ʻení:
-
ʻOku ou ngāue mālohi kae ʻoua kuo fakakakato lelei ha fatongia, neongo kapau ʻoku faingataʻa ia.
-
ʻOku ou ngāue mālohi, ʻo aʻu ki he taimi ʻoku ʻikai siofi ai au ʻe ha tahá.
-
ʻE lava ʻa e kakaí ʻo fakafalala mai kiate au mo ʻeku feinga ke fakahoko ha ngāué.
-
ʻOku ou fiefia ʻi hono fai hoku lelei tahá.
Fakakaukau ke fakaʻaliʻali e ngaahi fakahinohino ko ʻení pea fakaafeʻi e kau akó ke nau ngāue ʻi ha fanga kiʻi kulupu iiki ke fakakakato e ʻekitivitií. Hili hono fakakakato ʻe he ngaahi kulupú e ʻekitivitií, fakaafeʻi kinautolu ke vahevahe mo e ngaahi kulupu kehé ʻa e meʻa naʻa nau akó.
-
Kumi ha fakamoʻoni folofola pe fakamatala fakaepalōfita ʻokú ne fakahaaʻi e mahuʻinga ʻo e faivelengá.
-
Aleaʻi e founga ʻoku hoko ai ʻa Sīsū Kalaisi ko ha sīpinga ʻo e faivelengá.
-
Vahevahe ha aʻusia naʻe tāpuekina ai koe pe ko ha taha ʻokú ke ʻilo ʻo fakafou ʻi he faivelengá.
-
Aleaʻi e ʻuhinga ʻokú ke pehē ʻoku mahuʻinga ai ke faivelenga e kau faifekaú.
-
Aleaʻi ha ngaahi tafaʻaki kehe ʻi hoʻo moʻuí ʻe mahuʻinga ai e faivelengá.
ʻE lava ke tokoni e Laumālie Māʻoniʻoní ke tō loloto e ngaahi moʻoní ki he loto ʻo e kau akó pea teuteuʻi kinautolu ke fakaʻaongaʻi e ngaahi moʻoni ko iá. Ko e founga ʻe taha te ke lava ʻo tokoniʻi ai e kau akó ke nau fakaafeʻi e Laumālie Māʻoniʻoní ko e ʻoange ha ngaahi faingamālie ke nau vakai ai ki he founga kuo fakahaaʻi ai ʻe he Fakamoʻuí mo ha niʻihi kehe ʻa e faivelengá. Ki ha ngaahi sīpinga ʻo e founga ne fakahaaʻi ai ʻe he Fakamoʻuí ʻa e faivelengá, ʻe lava e kau akó ʻo lau ʻa e Tokāteline mo e Ngaahi Fuakava 19:16–19 pe Luke 22:39–44. Ki ha sīpinga ʻo hono fakahaaʻi ʻe ha taha kehe ʻa e faivelengá, fakakaukau ke huluʻi e “Preparation of Gordon B. Hinckley: Forget Yourself and Go to Work” (2:03), ʻoku maʻu ʻi he ChurchofJesusChrist.org.
Ngaahi tāpuaki ʻo e faivelengá
Fakamanatu ange ki he kau akó ʻa e talanoa ʻa ʻEletā Tieta F. ʻUkitofa ki he ongo faifekau ʻi ʻIulope naʻá na tukituki ʻi he matapā fakaʻosi ʻo e fungavaka faá. Fakamatalaʻi ange naʻe iku ʻena ngaahi ngāue faivelengá ke tāpuekina ai ʻa ʻEletā ʻUkitofa. Fakakaukau ke fakaʻaliʻali e tā ko ʻeni ʻo e ongo faifekaú pea mo e fāmili naʻe nofo ʻi he fale nofo totongi ʻo e matapā fakaʻosi ʻi he fungavaka faá. Fakamahinoʻi ange ko e taha ʻo e ongo tamaiki fefine kei īkí ko Halieta, ʻa e uaifi ʻo ʻEletā ʻUkitofá.
Naʻe vahevahe ʻe ʻEletā Tieta F. ʻUkitofa ʻa ʻene ngaahi ongo fekauʻaki mo e ongo faifekau ko ʻení:
Kuo tā-tuʻo-lahi ʻeku fakafetaʻi ʻi he ongo faifekau naʻe ʻikai ke na ngata pē ʻi he fungavaka ki laló. Kuo tuʻo lahi ʻeku houngaʻia koeʻuhí ko ʻena tuí mo e ngāué. Kuo tā tuʻo lahi ʻeku fakafetaʻi naʻe ʻikai ke na foʻi—ka na aʻu ange ki he fungavaka faá, ki he matapā fakaʻosí. (Dieter F. Uchtdorf, “Fungavaka Faá, Matapā Fakaʻosí,” Liahona, Nōvema 2016, 18)
-
Kapau ʻe lava e ongo faifekau ko iá ʻo vahevahe mo ʻetau kalasí ha meʻa fekauʻaki mo e faivelengá, ʻoku mou pehē ko e hā e meʻa te na lea ʻakí?
Faivelenga ʻi heʻeku moʻuí
Fakakaukau ke fakaʻaliʻali e ngaahi fakamatala fekauʻaki mo e faivelenga fakatāutahá ne fakakaukauloto ki ai e kau akó ʻi he konga kimuʻa ange ʻo e lēsoní. Mahalo ʻe ongoʻi ʻe he kau akó ne ueʻi kinautolu ʻe he Laumālié ke nofotaha ʻi ha fakamatala ʻe taha ʻo lahi ange ʻi he toengá. Fakaafeʻi e kau akó ke fakakaukau ki he fakamatala ko iá ʻi heʻenau tohi ʻenau tali ki he ngaahi fehuʻi ko ʻení ʻi heʻenau tohinoa akó.
-
Ko e hā ha ngaahi liliu te u lava ʻo fakahoko ke u faivelenga ange aí?
-
ʻE founga fēfē hono teuteuʻi lelei ange au ʻe he faivelengá ke u vahevahe e ongoongolelei ʻo Sīsū Kalaisí ko ha faifekau taimi kakato pea ʻi heʻeku moʻui fakaʻahó?
-
ʻE tokoniʻi fēfē au ʻe he faivelengá ke u hoko ange ʻo hangē ko e Fakamoʻuí?
ʻI he lekooti ʻe he kau akó ʻenau talí, poupouʻi ke ʻoua te nau momou ke faʻu ha palani ke fai ha meʻa te ne fakatupulaki ai kinautolu mo fiemaʻu ki ai ʻa e ngāue mālohí mo e faivelenga maʻu peé.