Lēsoni 201: Teuteu ki he Ngāue Fakafaifekaú

Fili ke Ngāue Fakafaifekaú

Ngaahi Tāpuaki ʻo e Ngāue Fakafaifekaú

Ko e founga ʻe taha ʻoku tāpuekina ai ʻe he Tamai Hēvaní ʻEne fānaú ʻoku fakafou ia ʻi he ngāue fakafaifekaú. ʻOkú Ne tāpuakiʻi ʻa e kau faifekaú ʻi heʻenau tokoni mo akoʻi ʻa e kakai ʻi honau tūkui koló pea mo e funga ʻo e māmaní. ʻOkú ne tāpuakiʻi foki ʻa kinautolu ʻoku nau tali e pōpoaki ʻo e ongoongoleleí mo tali ʻa e tokoni ʻoku fai ʻe he kau faifekaú. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke ngāue maʻá e ʻEikí ko ʻEne kau faifekau.

Ngaahi ʻEkitivitī Ako ʻOku Ala Fakahokó

Ko hotau fatongia ke ngāue ko ha kau faifekaú

Fakakaukau ke fakamatalaʻi ange lolotonga e lēsoni ko ʻeni fekauʻaki mo e ngāue fakafaifekaú, ʻe ngāue fakataha ʻa e kau akó mo ha hoa. Ko e founga ʻe taha ke faʻu ai ha ngaahi hoá ko hono teuteuʻi ha kato ʻoku ʻi ai ha sīpinga ʻo e ngaahi ngāue ʻi he ngāue fakafaifekaú ʻoku hiki ʻi ha fanga kiʻi laʻipepa. ʻE lava ke kau heni e ngaahi feituʻu ʻe lava ke vahe ki ai ʻa e kau faifekaú ke akoʻí, hangē ko Kuatemala pe Hungalí. Te nau lava foki ʻo fakakau ai ha ngaahi ngāue tokoni fakafaifekau ʻe lava ke fakahoko, hangē ko e kau ngāue ouau fakatemipalé pe ʻi ha pangikē meʻakai fakalotofonua. Fakapapauʻi ʻoku ʻi ai ha tatau ʻe ua ʻo e ngāue takitaha ʻi he kató. Fakaafeʻi ʻa e tokotaha ako takitaha ke toʻo ha laʻipepa mei he kató pea tangutu fakataha mo e kaungāako naʻá ne toho ʻa e ngāue tatau.

ʻOange ki he hoa takitaha ha tatau ʻo e fakamatala ko ʻení pea fakaʻaliʻali ʻa e fakahinohino ʻe tolu ʻoku hoko maí.

Naʻe toe fakapapauʻi mai ʻe Palesiteni Lāsolo M. Nalesoni e uiuiʻi ʻa e ʻEikí ke hoko ko ha kau faifekaú:

ʻOku ou toe fakapapauʻi mālohi atu he ʻahó ni e meʻa ne kole mai ʻe he ʻEikí ki he talavou moʻui taau kotoa pē ʻe malavá, ke teuteu ke ʻalu ʻo ngāue fakafaifekau. Ki he kau talavou ʻo e Siasí, ko e ngāue fakafaifekaú ko ha fatongia ʻo e lakanga fakataulaʻeikí. Kuo fakatatali mai kimoutolu kau talavou ki he kuonga ko ʻeni ne talaʻofa mai ʻe fakahoko ai hono tānaki ʻo ʻIsilelí. ʻI hoʻo ngāue fakafaifekaú, ʻokú ke kau ai ʻi he fatongia matuʻaki mahuʻinga ko ʻení!

Kiate kimoutolu kau finemui ʻoku malavá, ko ha faingamālie mālohi lahi foki e ngāue fakafaifekaú, ʻo ka ke ka loto ki ai. ʻOku mau ʻofeina ʻa e kau faifekau fefiné mo talitali lelei moʻoni kinautolu. ʻOku fakaofo moʻoni e meʻa ʻoku mou ʻomi ki he ngāué ni! Lotua ke ke ʻiloʻi pe ʻoku finangalo e ʻEikí ke ke ngāue fakafaifekau, pea ʻe ʻoatu ʻe he Laumālie Māʻoniʻoní e talí ki ho lotó mo e ʻatamaí. (Russell M. Nelson, “Malangaʻi e Ongoongolelei ʻo e Melinó,” Liahona, Mē 2022, 6)

1. Lau ʻa e fakamatalá mo ho hoá.

2. Aleaʻi ʻa e meʻa ʻoku makehe kiate koe mei he fakamatalá.

3. Mateuteu ke vahevahe hoʻo ngaahi fakakaukaú mo e kalasí.

Fakaafeʻi ha ngaahi hoa ʻe niʻihi ke vahevahe ʻenau ngaahi fakakaukaú mo e kalasí. Kapau ʻoku ʻi ai ha ngaahi fehuʻi ʻa e kau akó fekauʻaki mo e fakamatalá, fakakaukau ke tokoniʻi kinautolu ke maʻu ha ngaahi tali pe fakahinohino kinautolu ke aleaʻi ʻenau ngaahi fehuʻí mo e ʻEikí, ʻenau mātuʻá, pe kau taki ʻo e Siasí. Fakapapauʻi ʻoku mahino ki he kau akó ʻa e ngaahi fiemaʻu ʻa e ʻEikí ki he kau talavoú mo e kau finemuí fekauʻaki mo e ngāue fakafaifekaú.

Fakakaukau fakatāutahá

Fakaʻaliʻali ʻa e fakamatala mo e ngaahi fehuʻi ko ʻení pea fakaafeʻi e kau akó ke fakakaukau ki heʻenau ngaahi ongo fakataautaha fekauʻaki mo e ngāue fakafaifekaú. ʻE lava ʻe hono ʻoange ha taimi ki he kau akó ke nau fakalaulauloto mo tali e ngaahi fehuʻí ʻo fakaafeʻi ʻa e Laumālie Māʻoniʻoní mo teuteuʻi honau ʻatamaí mo e lotó ke ueʻi fakalaumālie kinautolu ʻi heʻenau akó.

Naʻe akonaki ʻa Palesiteni Lāsolo M. Nalesoni ʻo pehē:

Siʻoku ngaahi kaungāmeʻa kei talavou, ʻoku mou mahuʻinga kotoa ki he ʻEikí. Naʻá Ne tuku fakatatali kimoutolu ki he taimí ni ke tokoni ki hono tānaki ʻo ʻIsilelí. Ko hoʻo fili ko ia ke ngāue fakafaifekaú, neongo pe ko ha ngāue fakafaifekau malanga pe faifekau tokoni, ʻe tāpuekina ai koe mo e niʻihi kehé. (Russell M. Nelson, “Malangaʻi e Ongoongolelei ʻo e Melinó,” Liahona, Mē 2022, 6–7)

Fakalaulauloto mo hiki hoʻo ngaahi tali ki he ngaahi fehuʻi ko ʻení ʻi hoʻo tohinoa akó:

• Ko e konga fē ʻo e fakamatala ko ʻení ʻoku mahuʻingamālie taha kiate koé? Ko e hā hono ʻuhingá?

• Ko e hā e meʻa naʻe akoʻi ʻe Palesiteni Nalesoni te ne lava ʻo tokoniʻi hoʻo holi ke ngāue fakafaifekaú?

Fakaafeʻi ha niʻihi ʻe loto-fiemālié ke vahevahe ʻenau ngaahi talí. ʻI he vahevahe ʻa e kau akó, ʻe lava ke fakahaaʻi ʻe ha niʻihi ʻa e moʻoni ko ʻení ʻi he lea pē ʻanautolu: ʻE tāpuakiʻi kitautolu ʻe he ʻEikí mo ha niʻihi tokolahi kehe ʻi heʻetau fili ke hoko ko ʻEne kau faifekaú. Fakakaukau ke hiki ʻa e moʻoni ko ení ʻi he palakipoé. Poupouʻi e kau akó ke fekumi ki ha tokoni mei he Laumālie Māʻoniʻoní ke nau ʻiloʻi e founga ʻoku finangalo ai e Tamai Hēvaní ke nau fakaʻaongaʻi e foʻi moʻoni ko ʻení ʻi heʻenau moʻuí.

Kapau ʻokú ke ongoʻi ʻe ʻaonga ki he kau akó haʻanau ako lahi ange fekauʻaki mo e ngāue fakafaifekau tokoní, fakakaukau ke fakaʻaongaʻi ʻa e naunau ʻoku maʻu ʻi he “Ngaahi ʻEkitivitī Fakalahi ki he Akó.”

Ngaahi tāpuaki ʻo e ngāue fakafaifekaú

ʻE lava ke tokoni ʻa e ʻekitivitī ko ʻení ke mahino lelei ange ki he kau akó ʻa e ngaahi tāpuaki ʻe lava ke foaki ange ʻe he ʻEikí kiate kinautolu mo e niʻihi kehé ʻi heʻenau fili ke ngāue fakafaifekaú.

Fekumi fakataha mo ho hoá ʻi he folofolá, ngaahi lea ʻo e konifelenisi lahí, ngaahi himí, pe Gospel Library, ʻo kumi ʻa e ngaahi meʻa ko ʻení:

1. Ngaahi tāpuaki ʻe lava ke foaki ʻe he ʻEikí ki he niʻihi kehé ʻo fakafou ʻi heʻetau ngāue fakafaifekaú.

2. Ngaahi tāpuaki ʻe lava ke foaki mai ʻe he ʻEikí maʻatautolu ʻi heʻetau ngāue fakafaifekaú.

Kapau ʻokú ke ongoʻi ʻe lava ke fakaʻaongaʻi ʻe he kau akó ha fakahinohino pau ange, fakakaukau ke ʻoange ki he hoa takitaha ʻa e laʻipepa tufa ʻoku ui ko e “Ngaahi Tāpuaki ʻo e Ngāue Fakafaifekaú.”

Ngaahi Tāpuaki ʻo e Ngāue Fakafaifekaú

Ako e ngaahi potufolofola mo e ngaahi fakamatala ko ʻení. ʻI hoʻo akó, kumi e ngaahi meʻa ko ʻení:

1. Ngaahi tāpuaki ʻe lava ke foaki ʻe he ʻEikí ki he niʻihi kehé ʻo fakafou ʻi heʻetau ngāue fakafaifekaú.

2. Ngaahi tāpuaki ʻe lava ke foaki mai ʻe he ʻEikí maʻatautolu ʻi heʻetau ngāue fakafaifekaú.

• Tokāteline mo e Ngaahi Fuakava 4:1–4

• Tokāteline mo e Ngaahi Fuakava 15:6

• Tokāteline mo e Ngaahi Fuakava 18:14–16

• Tokāteline mo e Ngaahi Fuakava 31:3–8

• Tokāteline mo e Ngaahi Fuakava 50:22

Naʻe akonaki ʻa Palesiteni Lāsolo M. Nalesoni ʻo pehē:

Kāinga, ʻoku fiemaʻu lahi ange e ongoongolelei ʻo Sīsū Kalaisí ʻi he ʻahó ni ʻi ha toe taimi kimuʻa. Kuo maumauʻi ʻe he fakakikihí e meʻa kotoa pē ne taukaveʻi mo akoʻi ʻe he Fakamoʻuí. ʻOku ou ʻofa he ʻEiki ko Sīsū Kalaisí mo fakamoʻoni ko ʻEne ongoongoleleí pē ʻa e solovaʻanga tuʻuloa ki he melinó. Ko ʻEne ongoongoleleí ko ha [ongoongolelei] ʻo e melino [vakai, Tokāteline mo e Ngaahi Fuakava 27:16]. …

ʻOku faiako mo fakamoʻoni e faifekau kotoa pē ki he Fakamoʻuí. ʻOku hanga ʻe he fakapoʻuli fakalaumālie ʻo e māmaní ʻo ʻai ke fiemaʻu lahi ange e maama ʻo Sīsū Kalaisí ʻi ha toe taimi. ʻE fiemaʻu ʻe he taha kotoa pē ha faingamālie ke ne ʻilo fekauʻaki mo e ongoongolelei ʻo Sīsū Kalaisi kuo fakafoki maí. ʻE fiemaʻu ʻe he taha kotoa pē ke ne ʻilo e feituʻu te nau lava ke maʻu ai e ʻamanaki leleí mo e melino ʻoku “[ope] atu ʻi he ʻilo kotoa pē” [Filipai 4:7]. (Russell M. Nelson, “Malangaʻi e Ongoongolelei ʻo e Melinó,” Liahona, Mē 2022, 6–7)

Naʻe akoʻi ʻe ʻEletā Mākou B. Nasi ʻo e Kau Fitungofulú ʻo pehē:

ʻOku hanga ʻe hono vahevahe ʻo e ongoongoleleí ʻo ʻomi ʻa e fiefia mo e ʻamanaki lelei ki he laumālie ʻo e tokotaha vahevahé mo e tokotaha ʻokú ne talí fakatouʻosi. Ko hono moʻoní, “hono ʻikai ke lahi pehē fau ʻa [hoʻo] fiefiá” [Tokāteline mo e Ngaahi Fuakava 18:15] ʻi hoʻo vahevahe ʻa e ongoongoleleí! Ko hono vahevahe ʻo e ongoongoleleí ko e fiefia ia hoko mo e fiefia, ʻamanaki lelei hoko mo e ʻamanaki lelei. …

ʻI he fili ko ia ke ʻoua ʻe hiki hake e maama ʻo e ongoongoleleí ʻoku tau ʻunu ai ki he fakapoʻulí, ʻa ia ʻoku tau tō ngofua ai ki he ʻahiʻahí. Ka ko e meʻa mahuʻingá, ʻoku moʻoni ʻa e fakamatala fehangahangaí: ʻi he fili ko ia ke hiki hake e maama ʻo e ongoongoleleí ʻoku tau ʻunu ofi ange ai ki he maama ko iá mo e maluʻi mei he ʻahiʻahí ʻokú ne ʻomí. He toki tāpuaki maʻongoʻonga moʻoni ia ʻi he māmani ʻo e ʻaho ní! (Marcus B. Nash, “Hiki Hake Hoʻomou Māmá,” Liahona, Nōvema 2021, 71–72)

ʻI he ʻosi e ako ʻa e kau akó, fakaafeʻi e hoa takitaha ke hiki takatakai ʻi he moʻoni ʻi he palakipoé ha tāpuaki ʻe taha pe lahi ange ʻo e ngāue fakafaifekaú. Hili hono hiki ha ngaahi tāpuaki lahi, fakakaukau ke fai ha ngaahi fehuʻi hangē ko ʻení ke ʻoange ki he kau akó ha faingamālie ke vahevahe pe fakamoʻoni ki he meʻa ne nau akó:

• Ko e ngaahi tāpuaki fē ʻi he palakipoé kuó ke maʻu pe ko ha niʻihi kehe ʻokú ke ʻilo ʻo fakafou ʻi he ngāue fakafaifekaú?

• Ko e hā ha potufolofola pe fakamatala ʻe taha naʻá ke lau kuo tokoni ke fakatupulaki hoʻo holi ke ngāue maʻá e ʻEikí ʻi hoʻo hoko ko ha faifekaú?

• ʻOkú ke pehē ʻe tākiekina fēfē ʻe he ngāue fakafaifekaú ho vā fetuʻutaki mo e ʻEikí? Ko e hā hono ʻuhingá?

Fakakaukau ke vahevahe ha ngaahi aʻusia kuó ke maʻu pe ko hoʻo fakamoʻoni ki he ngāue fakafaifekaú. Mahalo te ke fie huluʻi foki ʻa e foʻi vitiō “Value of a Full-Time Mission” (5:22), ʻoku maʻu ʻi he ChurchofJesusChrist.org, pea fakaafeʻi e kau akó ke kumi e ngaahi ʻuhinga ʻe fili ai ha taha ke ʻalu ʻo ngāue fakafaifekau.

Fakakaukau ke tataki fakafoki e kau akó ki he fakamatala ʻa Palesiteni Nalesoni mei he kamataʻanga ʻo e lēsoní. Fakaafeʻi e kau talavoú ke hokohoko atu ʻenau lotua ke fakatupulaki ʻe he ʻEikí ʻenau holi mo e malava ke ngāue fakafaifekau taimi kakató. Fakaafeʻi e kau finemuí ke nau lotu ke ʻiloʻi pe ʻoku finangalo e ʻEikí ke nau ngāue fakafaifekau taimi kakato.

Ngaahi Maʻuʻanga Tokoni Kehé

ʻE tāpuekina fēfē au ʻe he ʻOtuá ʻi heʻeku ngāue fakafaifekaú?

Naʻe vahevahe ‘e ‘Eletā Mākou A. ʻAitukaitisi ‘o e Kau Fitungofulύ:

ʻOku kau ʻi he ngaahi tāpuaki lahi kuó Ne foaki maʻaku koeʻuhí ko ʻeku ngāue fakafaifekau taimi kakato Maʻaná ʻa e tui lahi ange kia Sīsū Kalaisi mo ʻEne Fakaleleí mo ha ʻilo fakapapau mo e fakamoʻoni mālohi ange ki Heʻene ngaahi akonakí, koeʻuhí ke ʻoua naʻa ueʻingofua au ʻe he “matangi ʻo e akonaki kotoa pē” (ʻEfesō 4:14). Ne mole meiate au ʻa e manavahē ke faiakó. Ne fakatupulaki hoku ivi malava ke fehangahangai mo e ngaahi faingataʻá ʻaki e ʻamanaki leleí. ʻI heʻeku vakavakai ki he kakai mo e ngaahi fāmili ne u fetaulaki mo ia pe akoʻi ʻi heʻeku hoko ko ha faifekaú, ne u ako ai ʻoku moʻoni e ngaahi akonaki ʻa e ʻOtuá ʻi Heʻene folofola ʻoku ʻikai ʻomi ʻe he faiangahalá ʻa e fiefia moʻoní pea ʻoku tokoni ʻa e talangofua ki he ngaahi fekau ʻa e ʻOtuá ke tau tupulaki fakatuʻasino mo fakalaumālie fakatouʻosi ai (vakai, Mōsaia 2:41; ʻAlamā 41:10). Pea naʻá ku ako ko e ʻOtuá ko ha ʻOtua ʻo e ngaahi mana (vakai, Molomona 9).

Naʻe mahuʻinga e ngaahi meʻa kotoa ko ʻení ʻi heʻeku teuteu ki he moʻui matuʻotuʻá, ʻo kau ai ʻa e nofomalí mo e hoko ko ha mātuʻá, fua fatongia ʻi he Siasí mo e ngāue maʻuʻanga moʻuí mo e feohi ʻi he koló. …

Naʻe tākiekina moʻoni ʻe heʻeku ngāue fakafaifekaú ʻa ʻeku moʻuí. Naʻá ku ako ʻoku mahuʻinga ʻa e falala ki he ʻOtuá, ke falala ki Hono potó mo e ʻaloʻofá pea mo ʻEne ngaahi talaʻofá. He ko hono moʻoní, ko ʻetau Tamaí Ia, pea ʻoku ʻikai ha toe veiveiua ʻa ʻEne finangalo ke tau maʻu ʻa e lelei tahá. (Marcos A. Aidukaitis, “Hiki Hake Ho Lotó pea Fiefia,” Liahona, Mē 2022, 42–43)

Ko e hā e ʻuhinga ʻoku hoko ai ʻa e ngāue fakafaifekaú ko ha fatongia mahuʻingá?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻikai ko ha fatongia lakanga fakataulaʻeiki fakataimi pē hono malanga ʻaki ʻo e ongoongoleleí. ʻOku ʻikai ko ha ʻekitivitī pē ʻoku tau fakahoko fakataimi pē pe ko ha ngāue kuo pau ke tau fakahoko ʻi heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka ko e ngāue fakafaifekaú ko hono fakahaaʻi fakalaumālie ia pe ko hai kitautolu mo hotau tukufakaholó. Ne tomuʻa fakanofo kitautolu ʻi he maama fakalaumālié pea fāʻeleʻi ki he matelié ke fakahoko e fuakava mo e talaʻofa ne fai ʻe he ʻOtuá kia ʻĒpalahamé. ʻOku tau ʻi heni ʻi he māmaní ʻi he kuongá ni ke poupouʻi e lakanga fakataulaʻeikí pea malanga ʻaki e ongoongoleleí. Ko hotau tuʻungá ia pea ko e ‘uhinga ia ‘oku tau ‘i heni ai—ʻi he ‘ahó ni pea ‘i he taimi kotoa pē. (David A. Bednar, “Becoming a Missionary,” Liahona, Nov. 2005, 47)

Ngaahi ʻEkitivitī Fakalahi ki he Akó

Ko ha uiuiʻi ngāue fakafaifekau

Fakaafeʻi e kau akó ke vahevahe kapau kuo nau mamata ki hano fakaava ʻe ha taha ha uiuiʻi ngāue fakafaifekau.

• Naʻe fēfē ʻa e aʻusia ko iá?

• Ko e hā e meʻa ʻokú ke manatuʻi mei he tohi uiuiʻi ngāue fakafaifekaú makehe mei he feituʻu naʻe vahe ki ai ʻa e tokotahá pea mo e lea fakafonua te ne lea ʻakí?

Fakamahinoʻi ange ʻe lava ke taʻu taʻe fakatokangaʻi he taimi ʻe niʻihi e ngaahi tāpuaki ʻoku lisi mai ʻi ha uiuiʻi ngāue fakafaifekaú. ʻOange ki he kau akó ha tatau ʻo ha tohi uiuiʻi ngāue fakafaifekau kimuí ni mai. Fakaafeʻi kinautolu ke kumi e ngaahi tāpuaki ʻoku talaʻofa mai ʻe he ʻEikí ʻo fakafou mai ʻi Heʻene palōfitá kiate kinautolu ʻoku ui ke ngāué.

Ngāue fakafaifekau tokoní

Fakamatalaʻi ange ʻe lava ke uiuiʻi ʻa e kau talavou mo e kau finemui moʻui taau ʻoku ʻikai ke nau lava ʻo ngāue fakafaifekau malanga, koeʻuhí ko ha ngaahi ʻuhinga fakatuʻasino, fakaʻatamai, fakaeloto, pe ha toe ngaahi ʻuhinga kehe pē ke nau ngāue fakafaifekau tokoni. ‘E ngāue ʻa e kau faifekau ngāue tokoní ma‘á e ʻEikí ‘i ha ngaahi ngāue kehekehe, kau ai e ngaahi kautaha tokoni ʻofá, ʻo fakafou ʻi he ngaahi ngāue ʻa e Siasí, mo e ngaahi faingamālie kuo tuku mai ʻi he siteikí. Ke vakai ki ha sīpinga, fakakaukau ke mamata ʻi he “Service Missions: Elder Quadeʻs Story” (5:19), ʻoku maʻu ʻi he ChurchofJesusChrist.org.

Fakaafeʻi e kau akó ke lau ʻa e ngaahi meʻá ni mei he ngaahi fakahinohino ʻoku ʻoatu maʻá e kau faifekau tokoní, ʻo kumi ha ngaahi fakakaukau fekauʻaki mo e ngāue fakafaifekau tokoní:

Ne tuku mai ʻe he Kau Palesitenisī ʻUluakí ha taumuʻa ʻo e faifekau tokoní ke ne tataki kimoutolu ʻi homou uiuiʻi toputapu ke ngāué:

• “Ko ʻetau taumuʻá ke tokoniʻi ʻa e niʻihi kehé ke nau omi kia Kalaisi ʻaki hono tokoniʻi kinautolu hangē ko ia naʻe mei fai ʻe he Fakamoʻuí. ʻOku tau tokoni loto fiemālie ʻi ha ngaahi kautaha ʻofa, ngaahi me‘a faka-Siasi, pea ʻi loto ʻi he koló. Te tau ngāue fakaetauhi ʻi Hono huafá ki ha taha, ʻo hangē ko ia naʻá Ne faí, ʻo fakahaaʻi ʻEne angaʻofa ongongofuá.”

Manatu ko e founga hoʻo tokoni ki he Fakamoʻuí ʻoku mahuʻinga ange ia ʻi he feituʻu ʻokú ke ngāue aí pe meʻa ʻokú ke fakahokó. Naʻe fakahā ʻe Palesiteni Lāsolo M. Nalesoni: “Kuó u ako ʻi he taʻu lahi ʻeku faifatongia he Siasí ni, ʻoku ʻikai fuʻu mahuʻinga e feituʻu ia ʻoku ngāue ai ha taha. Ko e meʻa ʻoku tokanga ki ai ʻa e ʻEikí ko e founga ʻoku ngāue ai ha taha” (“Ko e Ngāue Fakaetauhi ʻi he Mālohi mo e Mafai ʻo e ʻOtuá,” Liahona, Mē 2018, 68). Ko hoʻo ngāué ki he ʻEikí, pea kuo fakaafeʻi koe ke ke ngāue tatau mo Ia! (Ngaahi Tuʻunga Moʻui Fakafaifekau maʻá e Kau Ākonga ʻa Sīsū Kalaisí—Ngāue Fakafaifekau Tokoní, 1.3)

• Ko e hā e meʻa naʻá ke saiʻia aí?

• Ko e hā ha ngaahi fakakaukau naʻá ke maʻu fekauʻaki mo hono fakafofongaʻi ʻo Sīsū Kalaisi ʻi hoʻo hoko ko ha faifekaú?

• ʻE fakalahi fēfē ʻe he fakamatala ko ʻení ʻetau vīsone ki he ngāue fakafaifekaú?

Ke maʻu ha fakamatala lahi ange, te ke lava ʻo fakaafeʻi e kau akó ke fekumi ki he ngaahi fakaikiiki ʻoku maʻu ʻi he ChurchofJesusChrist.org/service-missionary pe ʻi he Gospel Library app.