Fakalahi ki he Tohí

Ngaahi ʻEkitivitī Fakamanatu ʻo e Fakataukei Fakatokāteliné

Ngaahi Fakakaukau ki hono Toe Vakaiʻi e Ngaahi Tefitoʻi Moʻoni ki hono Maʻu e ʻIlo Fakalaumālié

Lolotonga e lēsoni Akoako Fakataukei Fakatokāteline takitaha, ʻe ala tokoni ke ʻoange ki he kau akó ha faingamālie ke toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. ʻE tokoni ʻeni ke nau mateuteu lelei ange ai ke fakaʻaongaʻi e ngaahi tefitoʻi moʻoni ko ʻení ʻi he ngaahi tūkunga ʻi he kalasí mo e ngaahi tūkunga moʻoni ʻo e moʻuí.

Ko ha ngaahi sīpinga ʻeni ʻe niʻihi ʻo e ngaahi founga te ke lava ʻo tokoniʻi ai hoʻo kau akó ke nau toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié:

Lau maʻuloto ʻa e ngaahi tefitoʻi moʻoní. Kole ki he kau akó pe te nau lava ʻo toe lau maʻuloto e tefitoʻi moʻoni ʻe tolu ʻo hono maʻu e ʻilo fakalaumālié. ʻE lava ʻe he kau akó ʻo tohi fakataautaha e ngaahi tefitoʻi moʻoní ʻi heʻenau tohinoa akó, pe ʻe lava ʻe he kau mēmipa kehekehe ʻo e kalasí ʻo lau maʻuloto leʻolahi e ngaahi tefitoʻi moʻoní. Kapau ʻe fiemaʻu tokoni e kau akó, te nau lava ʻo vakai ki he palakalafi 4 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023). Te ke lava foki ʻo ʻoange ha fanga kiʻi tokoni, hangē ko ha ʻekitivitī ke fakafonu ʻa e konga ʻataá pe ʻoange e mataʻitohi ʻuluaki ʻo e foʻi lea takitaha ʻi he ngaahi tefitoʻi moʻoni kehekehé.

Fakatauhoa e ngaahi sētesí mo e tefitoʻi moʻoni totonú. Hiki e tefitoʻi moʻoni ʻe tolu ki hono maʻu ʻo e ʻilo fakalaumālié ʻi he palakipoé. Lau leva pe fakaʻaliʻali ha ngaahi sētesi pe kupuʻi lea kehekehe mei he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné. Fakaafeʻi e kau akó ke vahevahe pe ko e fē ʻi he ngaahi tefitoʻi moʻoni ki hono maʻu ʻo e ʻilo fakalaumālié ʻoku felāveʻi lelei taha ki ai e sētesí.

Fakamatalaʻi ʻa e ʻuhingá. Fakaafeʻi ha kau ako kehekehe ke nau fakamatalaʻi e ngaahi tefitoʻi moʻoni ʻo hono maʻu ʻo e ʻilo fakalaumālié ʻi heʻenau lea pē ʻanautolu. ʻE lava ke fakahoko ʻeni ʻaki hano ʻeke ki ha kau ako kehekehe fekauʻaki mo e ngaahi tefitoʻi moʻoni kehekehé, pe te ke lava ʻo vahe ʻa e kau akó ki ha ngaahi kulupu tautau toko tolu pea vahe ha taha ʻo e ngaahi tefitoʻi moʻoní ki he tokotaha ako takitaha. ʻO ka fiemaʻu, te nau lava ʻo toe vakaiʻi e ngaahi tefitoʻi moʻoni ko ʻení ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné kimuʻa pea kole ange ke nau fakamatalá.

Fakamatalaʻi fakanounou ʻi ha foʻi lea ʻe 10 pe siʻi ange. Fakaafeʻi e kau akó ke nau faʻu ha fakamatala fakanounou ki he ngaahi tefitoʻi moʻoni takitaha ʻo hono maʻu e ʻilo fakalaumālié ʻa ia ʻoku foʻi lea ʻe 10 pe siʻi angé. Fakaafeʻi ha kau ako kehekehe ke vahevahe ʻenau fakamatala fakanounoú pea fakamatalaʻi e ʻuhinga ne nau fili ai e ngaahi foʻi lea ne nau filí.

Faʻu ha ʻīmisi pe fakaʻilonga. Fakaafeʻi e kau akó ke nau faʻu ha fakataipe, fakatātā, pe fakaʻilonga ki he ngaahi tefitoʻi moʻoni takitaha ʻo hono maʻu ʻo e ʻilo fakalaumālié. ʻOku totonu ke fakafofongaʻi ʻe he meʻa ʻoku nau faʻú ʻa e meʻa ʻoku akoʻi ʻe he ngaahi tefitoʻi moʻoní. ʻI he ʻosi ʻa e kau akó, fakaafeʻi kinautolu ke fakaʻaliʻali e meʻa naʻa nau faʻú ki he niʻihi kehé pea fakamatalaʻi e ʻuhinga naʻa nau fakakau ai e meʻa naʻa nau fakakaú.

Toe vakaiʻi lolotonga hono aleaʻi e tūkungá. Hili hono vahevahe ha tūkunga moʻoni, fakaafeʻi e kau akó ke nau ako e palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné. ʻE lava e kau akó ʻo kumi pea vahevahe ha ngaahi akonaki mei he ngaahi palakalafi ko ʻení ʻe lava ʻo tokoni ki he tokotaha ʻi he tūkungá ke (1) ngāue ʻi he tuí, (2) sivisiviʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá, mo e (3) fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.

Vahevahe e ngaahi aʻusiá. ʻE lava ke kole ki he kau akó ke nau vahevahe ha ngaahi aʻusia kuo nau maʻu ʻi hono fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié. Te nau lava ʻo fakamatalaʻi e founga naʻe tokoni ai e ngaahi tefitoʻi moʻoni ko iá kiate kinautolu ʻi heʻenau ngaahi fehuʻí pe tūkungá pe ko e founga naʻa nau lava ai ʻo fakaʻaongaʻi e ngaahi tefitoʻi moʻoní ke tokoniʻi e niʻihi kehé.

Fili ha kupuʻi lea ʻe taha. Vahe ki he tokotaha ako takitaha ke nofotaha ʻi ha taha ʻo e ngaahi tefitoʻi moʻoni ʻo hono maʻu ʻo e ʻilo fakalaumālié. ʻOange ha taimi ke nau fili ai ha kupuʻi lea ʻe taha mei he palakalafi takitaha ʻi heʻenau konga ne vahe angé ʻa ia ʻoku nau ongoʻi ʻokú ne fakafofongaʻi lelei taha e meʻa ʻoku akoʻi ʻi he palakalafi ko iá. Fakaafeʻi leva e kau akó ke nau ʻunu takai holo ʻi he lokí ʻo kumi ha taha naʻe vahe ki ai e tefitoʻi moʻoni tatau pea fakafehoanaki e ngaahi kupuʻi lea naʻa nau filí. ʻE lava leva e kau akó ʻo kumi ha kau ako naʻe vahe ki ai e ongo tefitoʻi moʻoni ʻe tahá pea vahevahe e ngaahi kupuʻi lea naʻa nau filí.

Ngaahi Fakakaukau ki hono Fakamanatu e Ngaahi Potufolofola Fakataukei Fakatokāteliné

Tuku ha taimi ʻi he lolotonga e taʻú ke toutou fakamanatu e ngaahi potufolofola fakataukei fakatokāteline ʻoku ako ʻe he kau akó. ʻE lava ke tokoni ʻeni ke fakalahi e malava hoʻo kau akó ke manatuʻi e ngaahi fakamoʻoni folofolá mo e ngaahi kupuʻi lea folofola mahuʻingá. ʻE lava foki ia ʻo tokoni ke mahino lelei ange kiate kinautolu pea nau fakamatalaʻi mo fakaʻaongaʻi e tokāteline naʻe akoʻi ʻi he ngaahi potufolofola fakataukei fakatokāteliné. ʻE lava ke maʻu ha lisi ʻo e ngaahi potufolofola fakataukei fakatokāteliné mo e ngaahi kupuʻi lea folofola mahuʻingá ʻi he Fakamatala ki he ʻElito ʻo e Fakataukei Fakatokāteliné.

ʻOku ʻoatu ʻi lalo ha ngaahi ʻekitivitī ʻe lava ke fakaʻaongaʻi pe liliu ke tokoni ki hoʻo kau akó ke nau fakamanatu e ngaahi potufolofola fakataukei fakatokāteliné ʻi ha founga kehekehe.

Ako Ma‘uloto

ʻŪ kaati fakamanatú. Fakaafeʻi e kau akó ke faʻu ha ʻū kaati fakamanatu ʻo tohi e fakamoʻoni folofolá ʻi he tafaʻaki ʻe taha ʻo ha laʻipepa pea tohi e kupuʻi lea folofola mahuʻingá ʻi he tafaʻaki ʻe tahá. ʻE lava ʻa e kau akó ʻo faʻu ha ʻū kaati ki ha ngaahi potufolofola fakataukei fakatokāteline lahi ʻi ha laʻipepa pē ʻe taha pea kosi leva ʻa e ʻū kātí. Te nau lava leva ʻo ngāue ʻiate kinautolu pē pe mo ha hoa ke ako maʻuloto e ngaahi fakamoʻoni folofolá mo e ngaahi kupuʻi lea folofola mahuʻingá. ʻE lava ʻo fakahoko e ngaahi fakamanatu ko ʻení ʻo fakaʻaongaʻi e ʻū kaati fakamanatú ʻi ha ngaahi taimi lolotonga e taʻú.

app Fakataukei Fakatokāteliné. Fakaʻaongaʻi e ngaahi ʻekitivitī ako maʻuloto ʻi he app ki he Fakataukei Fakatokāteliné. Kapau ʻe lava, te ke lava ʻo fakafehokotaki ho meʻangāue toʻotoʻó ki ha projector pe ko ha tv ke fakaʻaliʻali ai e polokalamá ke lava e kau akó ʻo fakakakato e ngaahi ʻekitivitī ako maʻulotó fakataha mo e kalasí. Te ke lava foki ʻo fakaafeʻi e kau ako ʻoku ʻi ai ʻenau meʻangāue toʻotoʻó ke fakaʻaongaʻi e polokalamá ke fakahoko e ngaahi ʻekitivitī ako maʻulotó ʻi he kalasí pe ʻi ha taimi mavahe mei he kalasí.

Lau maʻuloto fakakalasí. Hili hoʻo lea ʻaki ha fakamoʻoni folofolá, ʻe lava e kalasí ʻo lau fakataha e kupuʻi lea folofola mahuʻingá. Te ke lava foki ʻo lau ha kupuʻi lea folofola mahuʻinga pea fakaafeʻi e kalasí ke nau lau fakataha ʻa e fakamoʻoni folofola ʻoku fekauʻaki mo iá.

ʻŪ fakatātā fekauʻakí. Kumi ha ngaahi fakatātā pe tā fakatātā ʻoku fekauʻaki mo e ngaahi akonaki ʻo e ngaahi potufolofola fakataukei fakatokāteliné. Fakaʻaliʻali ki he kau akó ʻa e ʻū fakatātā ko ʻení ʻi heʻenau ako maʻuloto e ngaahi fakamoʻoni folofolá mo e kupuʻi lea folofola mahuʻingá. ʻE lava foki ʻo fakaafeʻi e kau akó ke nau kumi pe tā haʻanau fakatātā pē ʻanautolu ʻoku tokoni ke nau maʻuloto e ngaahi potufolofolá. Kapau ʻoku tatau e ʻū fakatātā ʻoku fakaʻaongaʻi ʻe he kalasí fakakātoa ki hono maʻuloto e ngaahi potufolofolá, te ke lava ʻo puke hake ʻa e ʻū fakatātā ko iá ʻi ha ngaahi taimi lolotonga e ngaahi kalasi he kahaʻú ke sio pe ʻe kei lava pē ʻa e kau akó ʻo manatuʻi e ngaahi kupuʻi leá mo e fakamoʻoni folofolá.

Fokotuʻutuʻu. Fakaʻaliʻali e ngaahi lea ʻo e fakamoʻoni folofolá mo e kupuʻi lea folofola mahuʻingá ʻo ʻikai fakahokohoko totonu pea fakaafeʻi e kau akó ke nau fokotuʻutuʻu ia ki he hokohoko totonú.

Ngaahi ʻuluaki mataʻitohí. Fakaʻaliʻali pē mataʻitohi ʻuluaki ʻo e foʻi lea takitaha ki he fakamoʻoni folofolá mo e kupuʻi lea folofola mahuʻingá pea fakaafeʻi e kau akó ke nau feinga ke lau ke tonu ʻa e fakamoʻoni folofolá mo e kupuʻi lea mahuʻingá. Tamateʻi ha ʻū mataʻitohi lahi ange ʻi he fakaʻau ke lava e kau akó ʻo lau maʻuloto ʻa e fakamoʻoni folofolá mo e kupuʻi lea mahuʻingá.

Fakafonu ʻa e konga ʻataá. Fakaʻaliʻali e fakamoʻoni folofolá mo e kupuʻi lea folofola mahuʻingá ʻo toʻo ha ngaahi foʻi lea ʻe niʻihi. Fakaafeʻi e kau akó ke lau maʻuloto e fakamoʻoni folofolá mo e kupuʻi lea mahuʻingá pea fakafonu e ngaahi konga ʻataá. Tamateʻi ha ngaahi foʻi lea lahi ange ʻi he fakaʻau ke lava e kau akó ʻo lau maʻuloto ʻa e fakamoʻoni folofolá mo e kupuʻi lea mahuʻingá.

Fakatauhoa. Fakaʻaliʻali ha ngaahi fakamoʻoni folofola mo ha ngaahi kupuʻi lea folofola mahuʻinga ʻi ha kōlomu ʻe ua. Hiki ʻi he kōlomu ʻuluakí ʻa e ngaahi fakamoʻoni folofolá ʻo fakahokohoko totonu. Hiki ʻi he kōlomu hono uá ʻa e ngaahi kupuʻi lea folofola mahuʻingá ʻo ʻikai fakahokohoko totonu. Fakaafeʻi leva e kau akó ke nau fakatauhoa e ngaahi fakamoʻoni folofola tonú mo e ngaahi kupuʻi lea folofola mahuʻingá.

Mahino pea fakamatalaʻi

Ngaahi fakamoʻoni folofola fekauʻakí. Fakaafeʻi e kau akó ke kumi ha ngaahi fakamoʻoni folofola fekauʻaki ʻoku felāveʻi mo ha potufolofola fakataukei fakatokāteline. Te nau lava leva ʻo akoʻi ki heʻenau kaungāakó e meʻa naʻa nau akó, kau ai e founga ʻoku kaunga ai e ngaahi potufolofola naʻa nau akó ki he potufolofola fakataukei fakatokāteliné. Te ke lava ʻo fokotuʻu ange ʻoku maʻu ha niʻihi ʻo e ngaahi fakamoʻoni folofola fekauʻaki ʻoku nau maʻú mei he ngaahi potufolofola fakataukei fakatokāteline ʻi ha tohi folofola kehe.

Fakafehokotaki kia Sīsū Kalaisi. Vahe ki he kau akó ha potufolofola fakataukei fakatokāteline ke nau ako, pea kole ange ke nau fakakaukau ki ha ngaahi founga kehe ʻoku fakafehokotaki ai e potufolofola ko iá kia Sīsū Kalaisí. Te nau lava ʻo fakakaukau pea aleaʻi e meʻa ʻoku tokoni ʻenau potufolofola ne vahe angé ke mahino lelei ange kiate kinautolu ʻa Sīsū Kalaisi, ko ʻEne tokāteliné, pe ko e palani ʻo e fakamoʻuí. Te nau lava foki ʻo kumi ha ngaahi sīpinga ʻo e founga naʻe akonaki pe fakatātaaʻi ai ʻe he Fakamoʻuí e moʻoni naʻe maʻu ʻi he potufolofolá.

Ngaahi fakamatala faingofua. Fakaafeʻi e kau akó ke teuteu ke fakamatalaʻi e tokāteline naʻe akoʻi ʻi ha ngaahi potufolofola fakataukei fakatokāteline kehekehe ki ha taha ʻoku ʻikai maheni mo e ngaahi akonaki ko iá. Te nau lava ʻo fakakaukauloto ʻoku nau fakamatalaʻi e ngaahi akonaki ko ʻení ki ha kiʻi leka pe ki ha taha ʻoku ʻikai ko ha mēmipa ʻo e Siasí. Fakaafeʻi ke nau hiki ʻenau fakamatalá ʻi heʻenau tohinoa akó pea vahevahe leva ia mo ha kaungāako.

ʻOtu Lea ki he ʻOtu Lea. Fakaʻaliʻali ki he kau akó ha ngaahi sīpinga ʻo ha ngaahi peesi ʻe niʻihi ʻo e ʻOtu Lea ki he ʻOtu Leá mei he makasini Ki Hono Fakamālohia ʻo e Toʻu Tupú ʻa ia ʻoku ʻanalaiso ai ha ngaahi lea pe kupuʻi lea mahuʻinga mei he ʻū potufolofolá. Ko e sīpinga ʻe taha ʻo ha peesi pehē ko e “ʻOtu Lea ki he ʻOtu Lea: Ko ha Tangata Leʻo” (Ki Hono Fakamālohia ʻo e Toʻu Tupú, ʻOkatopa 2022, 32). Fakaafeʻi e kau akó ke faʻu haʻanau tatau ʻo ha peesi ʻOtu Lea ki he ʻOtu Lea. Kole ange ke nau fili ha ngaahi foʻi lea mahuʻinga mei ha potufolofola fakataukei fakatokāteline pea fakakau ha ngaahi potufolofola fekauʻaki, fakamatala mei he kau taki ʻo e Siasí, mo ha ngaahi fakaʻuhinga ʻoku tokoni ke fakaloloto e mahino ki he ngaahi foʻi lea mahuʻinga ko iá.

Fai ha ngaahi fehuʻi. Fakaafeʻi e kau akó ke fili ha potufolofola fakataukei fakatokāteline te nau loto ke maʻu ha mahino lelei ange ki ai. Fakaafeʻi ke nau lau e potufolofolá pea lisi ha fehuʻi ʻe ua pe tolu ʻoku nau maʻu fekauʻaki mo e potufolofola ko iá. ʻE lava ke fekauʻaki e ngaahi fehuʻi ko ʻení mo e ngaahi lea pe kupuʻi lea te nau loto ke mahino lelei angé pe ko e ʻuhinga ʻoku mahuʻinga ai ke mahino e potufolofolá. ʻI hono lisi pē ʻe he kau akó ʻenau ngaahi fehuʻí, fakaafeʻi ke nau fakaʻaongaʻi ha ngaahi maʻuʻanga tokoni hangē ko e app Gospel Library, Fakahinohino ki he Ngaahi Folofolá, pe ngaahi meʻangāue ako kehé ke kumi ha tali ki heʻenau ngaahi fehuʻí. Fakaafeʻi ʻa e kau akó ke vahevahe ʻa e meʻa naʻa nau akó.

Fakatātā tokoni. ʻE lava ke faʻu ʻe he kau akó ha fakatātā, fakatahatahaʻi ha ʻū tā, pe ko ha meʻa fakakata (meme), ʻaati ha fanga foʻi lea, pupunga lea, pe ko ha fakatātā tokoni ʻe taha ʻoku fakatātaaʻi ai e meʻa ʻoku akoʻi ʻi ha potufolofola fakataukei fakatokāteliné. ʻE lava leva ʻe he kau akó ʻo fakaʻaliʻali e meʻa naʻa nau faʻú ki he niʻihi kehé mo fakamatalaʻi e founga ʻoku felāveʻi ai mo e potufolofola fakataukei fakatokāteline naʻa nau nofotaha aí.

Fakaʻaongaʻí

Ngaahi Tūkungá. Vahevahe ha ngaahi tūkunga kehekehe ʻoku felāveʻi ki ha ngaahi tuʻunga, pole, pe ngaahi fehuʻi fakalaumālie ʻe ala maʻu ʻe he kau taʻu hongofulu tupú. Fakaafeʻi e kau akó ke vahevahe ha potufolofola fakataukei fakatokāteline ʻe taha pe lahi ange ʻoku nau ongoʻi ʻe lava ʻo fakaʻaongaʻi ki he tūkungá pea fakamatalaʻi e founga ʻoku nau pehē ʻe lava ke tokoni ai e ngaahi potufolofola ko ʻení.

Vahevahe e ngaahi aʻusiá. ʻE lava ke fili ʻe he kau akó ha potufolofola fakataukei fakatokāteline ʻe taha kuo nau toki fakaʻaongaʻi ʻi heʻenau moʻuí pe te nau loto ke fakaʻaongaʻi kakato ange ʻi heʻenau moʻuí. ʻE lava ke fakaafeʻi e kau akó ke vahevahe e founga kuo tokoniʻi ai kinautolu ʻe he ngaahi akonaki ko ʻení.

Ako e ngaahi potufolofolá ʻo fakakaukau ki he ngaahi tūkunga fakatāutahá. Fakaafeʻi e kau akó ke fakakaukau ki ha tūkunga, fehuʻi, pe fili ʻoku nau fehangahangai mo ia. Fakaafeʻi ke nau kumi e ngaahi potufolofola fakataukei fakatokāteline ʻe tokoni ʻi honau tūkungá pea ke vahevahe e meʻa ʻoku nau maʻu ʻe tokoní.

Tokoniʻi ha taha taʻu hongofulu tupu. Fakaafeʻi e kau akó ke nau tā ha fakatātā faingofua ʻo ha taha taʻu hongofulu tupu pea tohi hono hingoá, taʻú, mo e tūkunga fakafāmilí pea mo ha faʻahinga fehuʻi, palopalema, pe pole pē ʻokú ne lolotonga fepaki mo ia. ʻE lava leva e kau akó ʻo feinga ke ʻiloʻi e ngaahi potufolofola fakataukei fakatokāteline ʻoku nau ongoʻi ʻe tokoni ki he tokotaha ko ʻení. Te nau lava ʻo fakamatalaʻi e tokāteline ʻi heʻenau potufolofola ne filí pea fai ha ngaahi fokotuʻu ki ha ngaahi ngāue ʻe ala fakahoko ʻe he tokotaha ko ʻení.

Teuteu ha fakataha lotu pe lea. ʻOange ki he kau akó ha ngaahi faingamālie ke fakaʻaongaʻi ʻa e ngaahi potufolofola fakataukei fakatokāteliné ke teuteuʻi ha pōpoaki ki he fakataha lotú pe ko ha lea nounou. Mahalo te ke fakakaukau ke fakataimi-tēpileʻi ʻa e tokotaha ako takitaha ke vahevahe ʻenau pōpoaki ki he fakataha lotú pe leá ʻi he kamataʻanga ʻo e kalasí lolotonga e semesitaá. Tokoniʻi ke nau teuteu ke fakamatalaʻi fakanounou ʻa e puipuituʻá pea fakamatalaʻi ʻa e ngaahi moʻoni naʻe akoʻi ʻi he ngaahi potufolofolá. Fakaafeʻi e kau akó ke vahevahe ha ngaahi aʻusia mahuʻinga mo ha ngaahi sīpinga ʻo hono fakaʻaongaʻi e ngaahi moʻoni mei he ngaahi potufolofola ne nau filí pea fakamoʻoni ki he ngaahi moʻoni ʻoku akoʻi ʻi he ngaahi potufolofolá.