Lēsoni 211—Ngaahi Akonaki ʻa e Kau Taki ʻo e Siasí

“Ngaahi Fili ki he Taʻengatá”

Ko Hono Ako e Ngaahi Akonaki ʻa e Kau Taki ʻo e Siasí

ʻI he taʻú kakato, ʻe maʻu ʻe he kau akó ha ngaahi faingamālie lahi ʻi he seminelí ke ako mei he ngaahi akonaki ʻa e kau taki fakalaumālie ʻo e ngaahi ʻaho kimui ní ʻi he Siasi ʻo Sīsū Kalaisí. ʻOku ʻomi ʻe he lēsoni ko ʻení ha sīpinga ʻo e founga ʻe lava ke fakaʻaongaʻi ai ʻe he kau faiakó ʻa e tohi “Ngaahi Akonaki ʻa e Kau Taki ʻo e Siasí” ke tataki e kalasí ʻi heʻenau ako e ngaahi pōpoaki ko ʻení. Ko e sīpinga ʻoku fakaʻaongaʻi ʻi he lēsoni ko ʻení koe “Ngaahi Fili ki he Taʻengatá” naʻe fai ʻe Palesiteni Lāsolo M. Nalesoni ([fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org). ʻE lava ke fakaloloto ʻe he lēsoni ko ʻení ʻa e mahino ʻa e kau akó ki he ngaahi tefitoʻi moʻoní ke tokoniʻi kinautolu ke nau teuteu ki he moʻui taʻengatá.

Ngaahi ʻEkitivitī Ako ʻOku Ala Fakahokó

Fakatokangaʻi ange: ʻOku ʻomi ʻe he lēsoni ko ʻení ha sīpinga ʻo e founga ʻe lava ke fakaʻaongaʻi ai ʻe he kau faiakó ʻa e fakamatala “Sīpinga: Ngaahi Akonaki ʻa e Kau Taki ʻo e Siasí” ke tokoni ki hono ako ʻe he kau akó ʻa e ngaahi pōpoaki mei he kau taki ʻo e Siasí. Te ke lava ʻo liliu e ngaahi fakakaukau mei he lēsoni ko ʻení, fakaʻaongaʻi ha ngaahi fakakaukau kehe mei he sīpingá, pe fakaʻaongaʻi hoʻo ngaahi fakakaukau pē ʻaʻau te ne feau lelei ange e ngaahi fiemaʻu hoʻo kau akó.

Kamata ʻa e lēsoní

Kamata e lēsoní ʻi ha founga te ne fakatupu ha tokanga ʻi he kau akó pea tokoni ke teuteuʻi honau ʻatamaí mo e lotó ki he aʻusia fakaakó. Fakakaukau ke fakaʻaongaʻi ha fakamatala pe fakakaukau mei he lea ʻa Palesiteni Nalesoni ko e “Ngaahi Fili ki he Taʻengatá.” Ko ha sīpinga ʻeni ʻe taha ʻo e founga ke kamata ai ʻa e lēsoní.

Hiki ʻa e lea ko ʻení ʻi he palakipoé pea fakaafeʻi e kau akó ke fakakaukau ki honau kahaʻú ʻi he moʻuí ni pea ʻi he taʻengatá:

ʻI ha lea ʻa Palesiteni Lāsolo M. Nalesoni ki he kakai lalahi kei talavoú, naʻá ne pehē:

ʻOku ou fie talanoa [atu] fekauʻaki mo homou kahaʻú. (Russell M. Nelson, “Ngaahi Fili ki he Taʻengatá,” [fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)

Tali ʻa e ngaahi fehuʻi ko ʻení ʻi hoʻo tohinoa akó:

• Ko e hā hoʻo ngaahi fakakaukau mo e ongo ʻi hoʻo fakakaukau ki ho kahaʻú ʻi he moʻuí ni mo e taʻengatá?

• Kapau naʻá ke lava ʻo talanoa fekauʻaki mo ho kahaʻú mo e palōfita ʻa e ʻOtuá, ko e hā ha ngaahi fehuʻi te ke ʻeke ange kiate ia?

Fakakaukau ke fakaafeʻi ha kau ako tokosiʻi ke vahevahe ʻa e meʻa ne nau tohi ʻi heʻenau tohinoa akó. Te ke lava foki ʻo fakaafeʻi e kau akó ke hiki ʻi he palakipoé ha niʻihi ʻo ʻenau ngaahi fehuʻi fekauʻaki mo honau kahaʻú. ʻE ala tokoni ʻa e ngaahi fehuʻi ko ʻení ki he kau akó ke nau teuteu ke ako ʻa e pōpoakí.

Ako ʻa e pōpoakí

ʻI he ako ʻa e kau akó, poupouʻi kinautolu ke nau tokanga taha ki hono fakatupulaki ʻenau ʻiló mo fakamālohia ʻenau fakamoʻoni ki he Tamai Hēvaní mo Sīsū Kalaisí. Fakaafeʻi e kau akó ke lekooti e ngaahi fakakaukau mo e ngaahi ongo ʻe ala maʻu mei he Laumālie Māʻoniʻoní ʻi heʻenau akó.

ʻE fakaʻaongaʻi ʻe he konga ko ʻeni ʻo e lēsoní ʻa e “Kumi” ha fakakaukau mei he konga “Ako ʻa e Pōpoaki” ʻo e tohi “Sīpinga: Ngaahi Akonaki ʻa e Kau Taki ʻo e Siasí.” ʻOku fakataumuʻa ʻa e konga ko ʻení ke tokoniʻi e kau akó ke tukutaha ʻenau tokangá ʻi heʻenau ako e leá.

Kapau ʻoku ʻikai maʻu ʻe he kau akó ʻa e lea ʻa Palesiteni Nalesoni ko e “Ngaahi Fili ki he Taʻengatá,” te ke lava ʻo ʻoange ʻa e laʻipepa tufa ʻe tolú, ʻa ia ʻoku ʻi ai ha ngaahi konga ʻo ʻene leá. Te ke lava ʻo vahevahe hoʻo kalasí ki ha kulupu ʻe tolu pea tuku ki he kulupu takitaha ke nau ako ha laʻipepa tufa kehe. Pe ko hoʻo paaki ha tatau ʻo e leá kotoa, pea ʻe lava ke ako ʻe he kau akó ʻa e leá ʻi ha fanga kiʻi kulupu iiki. Fakaafeʻi e kau akó ke nau muimui ki he ngaahi fakahinohino ʻi laló ʻi heʻenau fakakakato ʻa e ʻekitivitií.

ʻI hoʻo ako e lea ʻa Palesiteni Nalesoni ko e “Ngaahi Fili ki he Taʻengatá,” kumi ha ngaahi moʻoni ʻe lava ʻo tokoni atu ke ke teuteu ki ho kahaʻú ʻi he māmaní mo e moʻui taʻengata mo e Tamai Hēvaní mo Sīsū Kalaisi. Te ke lava foki ʻo kumi ha ngaahi akonaki te ne lava ʻo tali hoʻo ngaahi fehuʻi fekauʻaki mo ho kahaʻú ʻa ia naʻá ke hiki ʻi hoʻo tohinoa akó pe ʻi he palakipoé.

Ngaahi Fili ki he Taʻengatá, Konga 1

Ko ʻeku taumuʻa he pō ní ke fakapapauʻi ʻoku mahino ki ho fakakaukaú ʻa e foʻi moʻoni ko e moʻuí ni ko e taimi moʻoni pē ia ke ke fili ai pe ko e faʻahinga moʻui fēfē ʻokú ke fiemaʻu ki he taʻengatá. Ko homou taimí ʻeni “ke teuteu ai ke feʻiloaki mo e ʻOtuá” [vakai, ʻAlamā 12:24; 34:32]. …

ʻE hanga ʻe he fili māʻoniʻoni kotoa pē ʻokú ke fai hení ʻo ʻoatu ha ngaahi lelei lahi ʻi he moʻuí ni. Ka ʻe hanga ʻe he ngaahi fili māʻoniʻoni ʻi he moʻui fakamatelié ʻo ʻoatu ha ngaahi lelei taʻemafakatataua ʻi he taʻengatá. Kapau te ke fili ke fai ha ngaahi fuakava mo e ʻOtuá pea tauhi faivelenga ki he ngaahi fuakava ko iá, ʻokú ke maʻu ai ʻa e talaʻofa ʻo e “tānaki atu ʻa e nāunau ki [ho] ʻulú ʻo taʻengata pea taʻengatá” [ʻĒpalahame 3:26]. …

Ko e moʻoni, ʻoku ʻikai loto ʻa e filí ke ke fakakaukau ki ʻapongipongi, pe ko e moʻui taʻengatá. Kae kātaki muʻa ʻoua naʻá ke nofo taʻeʻilo pe taʻetokanga ki he ngaahi faingamālie mo e ngaahi pole ʻo e moʻui fakamatelié. ʻI he laumālie ko iá, ʻoku fiemaʻu ke mahino kiate koe ha ngaahi moʻoni mahuʻinga ʻe tolu ʻe tokoni atu ke teuteuʻi ho hala ʻi he kahaʻú: …

ʻUluakí: ʻIloʻi ʻa e moʻoni fekauʻaki mo koé. ʻOku ou tui kapau naʻe folofola fakahangatonu atu e ʻEikí kiate koe he pooni, ko e ʻuluaki meʻa te Ne fakapapauʻi ʻoku mahino kiate koé ko ho tuʻunga totonú. Siʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá. Kuo mou hivaʻi e foʻi moʻoni ko ʻení talu mei hoʻomou ako e ngaahi lea ʻo e “Fānau Au ʻa e ʻOtuá” [Ngaahi Himí, fika 193]. Ka ʻoku tohitongi nai e moʻoni taʻengata ko iá ʻi homou lotó? Kuo fakahaofi nai koe ʻe he foʻi moʻoni ko ʻení ʻi hoʻo fehangahangai mo e ʻahiʻahí?

ʻOku ou manavasiʻi naʻa kuo mou fanongo ki he foʻi moʻoni ko ʻení ʻo tā tuʻo lahi pea hangē pē ia ha lea angamahení kae ʻikai ko ha foʻi moʻoni fakalangi. Ka ʻoku liliu ʻe he anga hoʻo fakakaukau ki hoʻo tuʻunga totonú, ʻa e meimei fili kotoa pē te ke fakahokó. …

…Ko hai koe?

ʻUluaki mo mahuʻinga tahá, ko ha fānau koe ʻa e ʻOtuá.

Uá, ʻi hoʻo hoko ko e mēmipa ʻo e Siasí, ko e fānau koe ʻo e fuakavá. Pea tolú, ko ha ākonga koe ʻo Sīsū Kalaisi.

ʻOku ou kole atu he poo ni kiate kimoutolu ke ʻoua naʻa mou fetongi e meʻa mahuʻinga mo taʻefeliliuaki ʻe tolu ko ʻení ʻaki ha toe meʻa kehe, koeʻuhí he ʻe hoko ʻa hoʻomou fai iá ke fakafeʻātungiaʻi ai hoʻomou fakalakalaká pe fokotuʻu taʻetotonu ai kimoutolu ʻi ha faʻahinga fakakalakalasi te ne taʻofi hoʻomou fakalakalaka taʻengatá. …

Ko e moʻoni ʻoku ʻi ai ha ngaahi hingoa kehekehe ʻoku matuʻaki mahuʻinga kiate koe. ʻOua muʻa naʻa mou maʻuhala ʻeku ʻuhingá. ʻOku ʻikai ko ʻeku ʻuhingá ʻoku ʻikai mahuʻinga e ngaahi tuʻunga mo e ngaahi meʻa kehe ʻoku ʻiloʻi ʻaki kimoutolú. Ko ʻeku ʻuhingá ʻoku ʻikai totonu ke hanga ʻe ha faʻahinga meʻa ʻoku ʻiloʻi ʻaki kimoutolu ʻo toʻo, fetongi, pe muʻomuʻa ia ʻi he tuʻunga tuʻuloa ʻe tolu ko ʻení: “fānau ʻa e ʻOtuá,” “fānau ʻo e fuakavá,” mo ha “ākonga ʻo Sīsū Kalaisi.”

Ka ʻi ai ha faʻahinga meʻa ʻoku ʻikai fenāpasi mo e ngaahi tefitoʻi meʻa ʻe tolu ko ʻení, ʻe iku siva ai ho ʻamanakí. ʻE iku pē ʻo fakamamahiʻi koe ʻe he ngaahi fakahingohingoa kehé koeʻuhí he ʻoku ʻikai ke nau maʻu e mālohi ke tataki koe ki he moʻui taʻengata ʻi he puleʻanga fakasilesitiale ʻo e ʻOtuá. …

ʻOua naʻá ke maʻuhala ai: ʻOku faka-ʻOtua ho ivi malavá. ʻI hoʻo fekumi faivelengá, ʻe fakahoʻata atu ʻe he ʻOtuá e tuʻunga te ke ala aʻusiá. (Russell M. Nelson, “Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)

Ngaahi Fili ki he Taʻengatá, Konga 2

Uá: ʻIloʻi ʻa e moʻoni fekauʻaki mo e meʻa kuo foaki atu ʻe he ʻOtua ko e Tamaí mo Hono ʻAlo ko Sīsū Kalaisí.

Ko hono fakanounoú, kuó Na foaki atu ʻa e meʻa kotoa pē!

ʻOku fakaʻatā kitautolu ʻe he palani ʻa e Tamai Hēvaní maʻa ʻEne fānaú ke tau nofo ʻi he feituʻu mo e founga ʻokú Ne moʻui aí pea iku ʻo hoko ʻo hangē ko Iá. ʻOku ʻomi ʻe [Heʻene] palaní ʻa e ngaahi tāpuaki maʻongoʻonga taha ʻo e taʻengatá kiate kitautolu, kau ai ʻa e malava ke tau hoko ko e “kaungā ʻea-hoko fakataha mo Kalaisí” [Loma 8:17].

ʻOku ʻafioʻi mo tokaimaʻananga ʻe he ʻOtuá ʻa e meʻa kotoa pē. ʻI he kotoa ʻo e taʻengatá, he ʻikai ha taha ʻe toe lahi ange ʻene ʻilo mo e tokanga kiate koé ʻiate Ia. He ʻikai ha taha ʻe toe ofi ange kiate koe ʻiate Ia. Te ke lava ʻo tekaki ho lotó kiate Ia mo falala kiate Ia ke Ne fekau mai ʻa e Laumālie Māʻoniʻoní mo e kau ʻāngeló ke tokangaʻi koe. Naʻá Ne fakahaaʻi ʻEne ʻofa taupotu tahá ʻi Heʻene fekauʻi mai Hono ʻAlo pē Taha naʻe Fakatupú ke pekia maʻau—ke hoko ko ho Fakamoʻui mo e Huhuʻí!

Naʻe ikunaʻi ʻe he ʻEiki ko Sīsū Kalaisí ʻa e māmaní ʻo fakafou ʻi Heʻene Fakaleleí [vakai, Sione 16:33; Tokāteline mo e Ngaahi Fuakava 50:41]. Ko ia ai, ʻokú Ne “māfimafi ke … fakamaʻa [koe] mei he taʻe-māʻoniʻoni kotoa pē” [ʻAlamā 7:14]. Te Ne fakahaofi koe mei ho ngaahi tūkunga fakamamahi tahá ʻi Heʻene founga mo e taimi pē ʻAʻana. ʻI hoʻo haʻu kiate Ia ʻi he tuí, te Ne tataki, tauhi, mo maluʻi koe. Te Ne fakamoʻui ho loto-mafesifesí mo fakafiemālieʻi koe ʻi hoʻo faingataʻaʻiá [vakai, Luke 4:18; ʻAlamā 7:10–12]. Te Ne ʻoatu ke ke maʻu Hono mālohí. Pea te Ne ʻai ke malava ʻa e meʻa ʻoku taʻemalava ʻi hoʻo moʻuí. …

ʻOku maʻu ʻe he ʻOtuá ha ʻofa makehe ki he tokotaha kotoa pē ʻokú ne fai ha fuakava mo Ia ʻi he vai ʻo e papitaisó. Pea ʻoku toe loloto ange ʻa e ʻofa fakalangi ko iá ʻi he taimi ʻoku fakahoko mo tauhi faivelenga ai ha ngaahi fuakava ʻoku lahi angé. Pea ʻi he fakaʻosinga ʻo e moʻui fakamatelié, ʻoku mahuʻinga ʻa hono toe fakatahaʻi ʻo e fānau fuakava kotoa pē mo ʻetau Tamai Hēvaní [vakai, Saame 116:15].

ʻOkú Ne mātuʻaki tokanga foki ke maʻu ʻe Heʻene fānaú kotoa pē ha faingamālie ke fanongo ki he ongoongo fakafiefia ʻo e ongoongolelei kuo fakafoki maí. Kuo ʻomi ʻe he Tamai Hēvaní ʻEne fānaú ki he māmaní ʻo laka hake ʻi ha milēniume ʻe ono. Ko e tokolahi taha ʻo e kakai ko ʻení kuo teʻeki ke nau maʻu e ngaahi ouau te ne fakafeʻungaʻi kinautolu ki he moʻui taʻengatá. Ko e ʻuhinga ia ʻoku fuʻu mahuʻinga ai e ngaahi temipalé. Ko hono ʻuhinga ia ʻoku hoko ai hono tānaki fakataha ʻo ʻIsileli ʻi he ongo tafaʻaki fakatouʻosi ʻo e veilí ko e ngāue maʻongoʻonga taha ʻi he māmaní he ʻaho ní. ʻE hoku kaungā-ngāue ʻi he ngāue māʻoniʻoní ni, ʻoku ʻi ai homou fatongia mahuʻinga ʻi he tānaki ko ʻení, pea ʻoku ou fakamālō atu ai. (Russell M. Nelson, “Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)

Ngaahi Fili ki he Taʻengatá, Konga 3

ʻIloʻi ʻa e moʻoni ʻoku fekauʻaki mo hoʻo uluí. Ko hono moʻoní kuo pau ke ke ului ʻiate koe pē. He ʻikai lava ke fakahoko ia ʻe ha taha kehe maʻau.

Sai, ʻe lava nai ke u fakaafeʻi kimoutolu ke mou fakakaukau ki ha ngaahi fehuʻi? ʻOku mou fie ongoʻi nonga nai fekauʻaki mo e ngaahi hohaʻa ʻokú ne lolotonga fakafeʻātungiaʻi kimoutolú? ʻOku mou fie ʻilo lahi ange nai kia Sīsū Kalaisi? ʻOku mou fie ako nai ki he founga ʻe lava ai ʻe Hono mālohi fakalangí ʻo fakamoʻui homou ngaahi kafó mo e vaivaí? ʻOku mou fie aʻusia nai ʻa e mālohi fakaʻofoʻofa mo pau ʻo e Fakalelei ʻa Sīsū Kalaisí ʻi hoʻomou moʻuí?

Ko e feinga ko ia ke tali e ngaahi fehuʻi ko ʻení, ʻe fie maʻu ki ai ha ngāue—ko ha ngāue lahi. ʻOku ou kōlenga atu ke mou fakatupulaki hoʻomou fakamoʻoní. Ngāueʻi ia. Maluʻi ia. Tokangaʻi ia. Tanumaki ia ke tupulaki. Fakatupulaki ia ʻaki e moʻoní. ʻOua naʻá ke ʻuliʻi ia ʻaki e ngaahi fakakaukau hala ʻa e tangata mo e fefine taʻetuí peá ke fifili leva pe ko e hā ʻoku hōloa ai hoʻo fakamoʻoní.

Fakahoko fakaʻaho hoʻo lotú ʻi he loto-fakamātoato mo e loto-fakatōkilalo. Fakaivia koe ʻaki e ngaahi lea ʻa e kau palōfita ʻo e kuonga muʻá mo onopōní. Kole ki he ʻEikí ke Ne akoʻi koe ʻi he founga ke fanongo lelei ange ai kiate Iá. Fakaʻaongaʻi ha taimi lahi ange ʻi he temipalé mo e ngāue hisitōlia fakafāmilí.

ʻI hoʻo fokotuʻu hoʻo fakamoʻoní ko e meʻa mahuʻinga taha kiate koé, fakatokangaʻi ha ngaahi mana ʻe hoko ʻi hoʻo moʻuí.

Kapau ʻoku ʻi ai haʻo ngaahi fehuʻi—pea ʻoku ou ʻamanaki pē ʻoku ʻi ai—fekumi ki he ngaahi talí ʻi he loto-holi fakamātoato ke tui. Ako ʻa e meʻa kotoa pē te ke lavá fekauʻaki mo e ongoongoleleí pea fakapapauʻi ke ke tafoki ki he ngaahi maʻuʻanga tokoni moʻoní ke maʻu mei ai ha fakahinohino. ʻOku tau moʻui ʻi he kuonga fakakosipeli he “ʻikai taʻofi ai ha meʻa” [Tokāteline mo e Ngaahi Fuakava 121:28]. Ko ia ai, ʻe tali ʻe he ʻEikí ʻetau ngaahi fehuʻí kotoa ʻi he taimi totonú.

Ka ʻi he taimi tatau, fakaʻutumauku ʻi he ngaahi fakahā te ke ala lava ke maʻú. ʻOku ou palōmesi atu ʻe fakamālohia hoʻo fakamoʻoní ʻi hoʻo fai iá, neongo kapau ʻoku teʻeki ke tali mai ha niʻihi ʻo hoʻo ngaahi fehuʻí. ʻE fakaiku maʻu pē hoʻo ngaahi fehuʻi fakamātoato, ʻoku fai ʻi he tuí, ki ha tui mo ha ʻilo lahi ange. …

ʻI hoʻo fakatupulekina hoʻo fakamoʻoní mo tanumaki ke tupulakí, te ke hoko ai ko ha meʻangāue mālohi ange ʻi he toʻukupu ʻo e ʻEikí. ʻE “ueʻi fakalaumālie koe ʻe ha ngāue lelei ange” [ʻAlamā 43:45]—ko e ngāue ʻa Sīsū Kalaisí!

ʻOku ʻikai ha meʻa ʻoku hoko ʻi he māmani ko ʻení ʻe toe mahuʻinga ange ka ko hono tānaki ʻo ʻIsileli Maʻaná. Tuku ke ʻiloʻi ʻe hoʻo Tamai Hēvaní ʻokú ke fie tokoni. Kole kiate Ia ke ke ngāue ʻi he ngāue nāunauʻiá ni. Peá ke tuʻu leva ʻo ofo ʻi he meʻa ʻoku hoko ʻi he taimi ʻokú ke tuku ai ke lāngilangiʻia e ʻOtuá ʻi hoʻo moʻuí.

Siʻoku ngaahi kaungāmeʻa kei talavou, ʻoku ou ʻofa atu. ʻOku ou fakamālō atu. ʻOku ou falala atu. ʻI heʻeku hoko ko e palōfita ʻa e ʻEikí, ʻoku ou tāpuakiʻi kimoutolu ke mou ʻiloʻi ʻa e moʻoni fekauʻaki mo kimoutolú pea mataʻikoloa ʻaki ʻa e moʻoni fekauʻaki mo e tuʻunga nāunauʻia te mou malava ke aʻusiá. ʻOku ou tāpuakiʻi kimoutolu ke fakatupulaki hoʻomou fakamoʻoní. Pea ʻoku ou tāpuakiʻi kimoutolu ke mou maʻu ʻa e holi mo e mālohi ke tauhi hoʻomou ngaahi fuakavá.

ʻI hoʻomou fai iá, ʻoku ou palōmesi atu te mou aʻusia ha tupulaki fakalaumālie, tauʻatāina mei he ilifiá, mo ha loto-falala ʻoku ʻikai ke mou faʻa mafakakaukaua he taimí ni. Te mou maʻu ʻa e mālohi ke maʻu ha ivi tākiekina lelei ʻoku mahulu atu ʻi homou tuʻunga malava fakanatulá. Pea ʻoku ou palōmesi atu ʻe fakafiefia ange homou kahaʻú ʻi ha toe meʻa te mou lava ʻo tui ki ai he taimí ni. (Russell M. Nelson, “Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], broadcasts.ChurchofJesusChrist.org)

Fakaafeʻi e kau akó ke fakalaulauloto ki he meʻa ne nau ako ʻe lava ʻo tokoni ke nau teuteu ki heʻenau moʻui he kahaʻú ʻi he māmaní mo e moʻui taʻengatá. Te nau lava foki ʻo fakakaukauloto pe ko e fē ʻi heʻenau ngaahi fehuʻi fekauʻaki mo e kahaʻú naʻe talí pea mo e foungá. Fakakaukau ke kole ki ha niʻihi ʻo e kau akó ke vahevahe ʻa e founga naʻe tali ai ʻenau ngaahi fehuʻí.

Fakaloloto ʻa e mahinó

ʻE fakaʻaongaʻi ʻe he konga ko ʻeni ʻo e lēsoní ʻa e fakakaukau ki he “Faʻu ha Meʻa” mei he konga “Fakaloloto Ange ʻa e Mahinó” ʻi he fakamatala ki he “Sīpingá: Ngaahi Akonaki ʻa e Kau Taki ʻo e Siasí.”

Ko e taumuʻa ʻo e konga ko ʻení ke tokoniʻi e kau akó ke nau fakakaukau mo aleaʻi e lea ʻa Palesiteni Nalesoni ko e “Ngaahi Fili ki he Taʻengatá.”

Fakalaulauloto ki ha ngaahi fakakaukau naʻá ke maʻu ʻi hoʻo ako e pōpoaki ʻa Palesiteni Nalesoní. Faʻu ha meʻa te ne lava ʻo tokoniʻi koe ke ke manatuʻi ʻa e meʻa naʻá ke akó pe te ne ueʻi fakalaumālie ʻa e niʻihi kehé ke teuteu ki ha kahaʻu ʻuhingamālie mo e moʻui taʻengatá. Ko ha ngaahi sīpinga ʻeni ʻe niʻihi ʻo e ngaahi meʻa te ke lava ʻo faʻú:

• Ko ha fakatātā

• Ko ha foʻi maau

• Ko ha meme

• Ko ha tohi ʻi he mītia fakasōsialé

  Kapau ʻe lava, mahalo te ke fie ʻoange ha pepa mo ha ngaahi naunau kehe ʻe fiemaʻu. ʻI he ʻosi e ngāue ʻa e kau akó, fakakaukau ke fakaafeʻi ha niʻihi tokosiʻi ʻo kinautolu ke nau vahevahe ʻa e meʻa naʻa nau faʻú. ʻI he vahevahe ʻa e kau akó, te ke lava ʻo ʻeke ha ngaahi fehuʻi muimuiʻi hangē ko ʻení:

• Ko e hā ha konga ʻo e pōpoaki ʻa Palesiteni Nalesoní naʻá ne ueʻi koe ke ke faʻu iá? Ko e hā naʻá ne ueʻi fakalaumālie ai koé?

• ʻE tokoni fēfē hono manatuʻi e pōpoaki ko iá ke tataki koe he taimí ni pea ʻi he kahaʻú?

• ʻE fakaʻaiʻai fēfē ʻe he meʻa naʻá ke faʻú ha taha ke sio ki he Tamai Hēvaní mo Sīsū Kalaisi?

Fakakaukau ke vahevahe hoʻo fakamoʻoni ki he ngaahi moʻoni naʻá ne ueʻi fakalaumālie koe mei he pōpoaki ʻa Palesiteni Nalesoní. Poupouʻi e kau akó ke ngāue ʻo fakatatau ki ha faʻahinga ueʻi pē ne nau ongoʻi.