“Lēsoni 208—Ko e Teuteu ki he Konifelenisi Lahí: Ko e Fanongo ki he Ngaahi Folofola ʻa e Fakamoʻuí ʻo fakafou ʻi he Konifelenisi Lahí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Ko e Teuteu ki he Konifelenisi Lahí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 208: Ngaahi Akonaki ʻa e Kau Taki ʻo e Siasí
Ko e Teuteu ki he Konifelenisi Lahí
Ko e Fanongo ki he Ngaahi Folofola ʻa e Fakamoʻuí ʻo fakafou ʻi he Konifelenisi Lahí
ʻOku hanga ʻe heʻetau teuteu mo kau atu ki he konifelenisi lahí ʻo ʻai ke tau lava ʻo maʻu ha fakahā fakataautaha. Ko e ngaahi pōpoaki tataki fakalaumālie mo e fakahinohino ʻoku ʻomi ʻi he konifelenisi lahí, ʻoku ʻomi ia mei he ʻEikí ʻo fakafou mai ʻi Heʻene kau taki kuo filí. ʻE lava ke tokoni ʻa e lēsoni ko ʻení ki he kau akó ke nau teuteu ke fanongo ki he ngaahi pōpoaki fakataautaha mei he Fakamoʻuí ʻi he konifelenisi lahí.
Ngaahi ʻEkitivitī Ako ʻOku Ala Fakahokó
Ko e teuteu ki he ngaahi meʻa ʻe hokó
Fakaafeʻi ʻa e kau akó ke fakakaukau ki he ngaahi meʻa ʻoku nau fiefia ke kau ki aí, hangē ko ha ʻaho mālōlō makehe, vaʻinga sipoti, mālōlō ʻeveʻeva, pe ko ha toe meʻa kehe pē. Kole ange ke nau vahevahe ʻa e founga kuo nau kau pe mateuteu ai ke kau ʻi he ngaahi meʻa ko ʻení. Aleaʻi ʻa e founga ʻoku tokoniʻi ai kitautolu ʻe heʻetau teuteu ki he ngaahi meʻá ke tau maʻu ai ha aʻusia mahuʻingamālie ange lolotonga ʻa e polokalamá. Hili hono aleaʻí, fakakaukau ke fakaʻaliʻali ha fakatātā ʻo ha fāmili ʻoku mamata ʻi he konifelenisi lahí.
-
Ko e hā ʻokú ke fai pe ko ho fāmilí ke teuteu mo kau atu ki he konifelenisi lahí?
Ko e taumuʻa ʻo e konifelenisi lahí
ʻI Fēpueli ʻo e 1831, naʻe foaki ʻe he ʻEikí ha fakahā kia Siosefa Sāmita pea mo Sitenei Likitoni ʻo fakahinohinoʻi kinaua ke na tānaki fakataha ʻa e kaumātuʻá ki ha konifelenisi, ʻa ia naʻe fakahoko ʻi Sune ʻo e taʻu ko iá.
Lau ʻa e Tokāteline mo e Ngaahi Fuakava 44:2 ʻo kumi ʻa e meʻa naʻe talaʻofa ʻe he ʻEikí ke fai ʻi he konifelenisi ko ʻení.
-
ʻE tokoni fēfē nai ʻa e talaʻofa ʻa e ʻEikí ʻi he veesi ko ʻení ke mahino kiate koe ʻa e ʻuhinga ʻoku tau fakahoko ai ʻa e konifelenisi lahí?
Lau ʻa e lea ko ʻeni meia Palesiteni Lāsolo M. Nalesoní, ʻo kumi ʻa e taumuʻa ʻo e konifelenisi lahí.
Ko e taumuʻa ʻo e konifelenisí ni mo e konifelenisi lahi kotoa pē, ke tokoniʻi kitautolu ke tau fanongo kiate Ia. (Russell M. Nelson, “Pōpoaki Kamatá,” Liahona, Mē 2020, 7)
ʻE lava ke hiki pe fakafehokotaki ʻe he kau akó ʻa e lea ʻa Palesiteni Nalesoní ʻi heʻenau folofolá ʻo ofi ki he Tokāteline mo e Ngaahi Fuakava 44:2.
Fakamamafaʻi ange ʻa e foʻi moʻoni ko ia ko e taumuʻa ʻo e konifelenisi lahí ke tokoniʻi kitautolu ke tau fanongo kia Sīsū Kalaisi.
-
Ko e hā ʻoku mahuʻinga ai ke ʻiloʻi ʻa e meʻa ʻe folofola atu ʻaki ʻe Sīsū Kalaisi kiate koé?
-
Ko e hā ha ngaahi founga te ke lava ai ʻo fanongo ki he Fakamoʻuí ʻi he konifelenisi lahí?
Ke tokoni ki he kau akó ke fakakaukau ki heʻenau teuteu ki he konifelenisi lahí, fakakaukau ke fakaʻaliʻali ʻa e ngaahi fehuʻi vakaiʻi fakaekita ko ʻení ʻi he palakipoé. ʻE lava ke fakalaulauloto ʻa e kau akó ki he ngaahi fehuʻí pea hiki ʻenau ngaahi talí ʻi ha tohinoa ako.
-
ʻOku lelei fēfē nai hoʻo teuteu ke fanongo ki he folofola atu ʻa e Fakamoʻuí kiate koe ʻo fakafou ʻi he ngaahi pōpoaki ʻo e konifelenisi lahí?
-
Ko e hā ʻokú ke fiemaʻu pe ʻamanaki ke maʻu mei he konifelenisi lahí?
Ko e Teuteu ki he konifelenisi lahí
Ko e taumuʻa ʻo e laʻipepa tufá ke tokoni ke ʻiloʻi ʻe he kau akó ha ngaahi founga kehekehe te nau lava ai ʻo teuteu ki he konifelenisi lahí. ʻE lava ke ngāue ʻa e kau akó ʻi ha fanga kiʻi kulupu iiki, mo hanau hoa, pe ʻiate kinautolu pē.
Ko e Teuteu ki he Konifelenisi Lahí
ʻI he taimi naʻe ʻaʻahi ai ʻa Sīsū Kalaisi ki he kau Nīfaí, naʻá Ne fakaafeʻi kinautolu ke teuteu honau ʻatamaí ke fanongo mo mahino kiate kinautolu ʻEne pōpoakí (vakai, 3 Nīfai 17:3). Fakakaukauloto pe naʻe mei fēfē nai hoʻo aʻusia ʻi he konifelenisi lahí kapau naʻá ke fai ʻa e meʻa tatau.
-
Ako ʻa e ngaahi maʻuʻanga tokoni ko ʻení, ʻo kumi ha ngaahi founga te ke lava ai ʻo teuteuʻi koe ke maʻu ʻa e ngaahi pōpoaki ʻa e ʻEikí ʻi he konifelenisi lahí. Mahalo te ke fie fakaʻilongaʻi ʻa e ngaahi foʻi lea ʻoku ʻuhingamālié mo e ngaahi kupuʻi lea ʻoku makehe kiate koé.
Mōsaia 2:9; Tokāteline mo e Ngaahi Fuakava 88:63
Naʻe akonaki ʻa Palesiteni Lāsolo M. Nalesoni ʻo pehē:
ʻE hokohoko atu hoʻomou fanongo ki he moʻoní ʻi he ʻahó ni mo ʻapongipongi mei he tuʻunga malangá ni. Kātaki ʻo hiki ha fanga kiʻi fakamatala ʻo e ngaahi fakakaukau ʻokú ne tohoakiʻi hoʻo tokangá mo e ngaahi meʻa ʻe haʻu ki ho ʻatamaí pea nofo maʻu ʻi ho lotó. Kole ʻi he faʻa lotu ki he ʻEikí ke Ne fakapapauʻi mai ʻoku moʻoni ʻa e meʻa kuó ke fanongo ki aí. (Russell M. Nelson, “Ko e hā e Meʻa ʻOku Moʻoní?,” Liahona, Nōvema 2022, 30)
Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:
ʻOku ou ʻiloʻi ʻa e kau tamaioʻeiki ʻa e ʻOtuá ʻe lea atu ʻi he konifelenisí ni. ʻOku uiuiʻi ʻe he ʻOtuá ke nau ʻoatu ʻa e ngaahi pōpoakí ki Heʻene fānaú. Kuo folofola ʻa e ʻEikí ʻo fekauʻaki mo kinautolu: “ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia, pea ʻoku ʻikai te u tuli tonuhia; pea neongo ʻe mole atu ʻa e ngaahi langí mo e māmaní, ka ʻe ʻikai mole atu ʻa ʻeku leá, ka ʻe fakamoʻoniʻi hono kotoa, neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” [Tokāteline mo e Ngaahi Fuakava 1:38].
ʻOku fakahā hoʻo falala kiate Iá ʻi hoʻo fakafanongo mo e loto-ʻuhingamālie ke ako pea fakatomala, pea ʻalu ʻo fai ha meʻa pē te Ne kole atu. Ka ʻokú ke falala ki he ʻOtuá ke fakafanongo ki Heʻene pōpoakí ʻi he malanga, hiva, mo e lotu kotoa ʻi he konifelenisí ni, te ke maʻu ia. Pea ka ke toki ʻalu ʻo fai Hono finangaló, ʻe tupulaki ho mālohi ke falala kiate Iá, pea ʻe hokosia ʻa e taimí te ke fonu ʻi he fakafetaʻi ʻi hoʻo ʻilo kuó Ne falala kiate koé. (Henry B. Eyring, “Falala ki he ʻOtuá, Pea ʻAlu Leva ʻo Fakahoko,” Liahona, Nōvema 2010, 73)
Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:
ʻI hoʻo teuteu ki he konifelenisi lahí, ʻoku ou fakaafeʻi koe ke ke fakalaulauloto ki he ngaahi fehuʻi ʻokú ke fiemaʻu ke tali atú. Hangē ko ʻení, mahalo te ke fakaʻamu ke tataki mo fakahinohinoʻi koe ʻe he ʻEikí ʻo fekauʻaki mo e ngaahi faingataʻa ʻokú ke fehangahangai mo iá.
ʻE maʻu fakahangatonu ʻa e ngaahi tali ki haʻo ngaahi lotu pau mei ha lea pe mei ha kupuʻi lea pau. Taimi ʻe niʻihi ʻe maʻu ʻa e talí ʻi ha foʻi lea, kupuʻi lea, pe foʻi hiva ʻoku hangehangē ka ʻikai ke nau fekauʻakí. ʻE hanga ʻe ha loto ʻoku fonu ʻi he fakafetaʻi ʻi he ngaahi tāpuaki ʻo e moʻuí mo ha holi fakamātoato ke fanongo pea muimui ʻi he ngaahi faleʻí, ʻo teuteuʻi ha founga ke maʻu ai ha fakahā fakataautaha. (Dieter F. Uchtdorf, “Konifelenisi Lahí—ʻOku ʻIkai Ko Ha Tāpuaki Angamaheni Pē,” Liahona, Sepitema 2011, 4)
-
Mei he meʻa naʻá ke akó, hiki ha lisi ʻo e ngaahi founga te ke lava ai ʻo teuteu ke fanongo ki he leʻo ʻo e ʻEikí ʻi he konifelenisi lahí.
-
Hiki ha ngaahi founga kehe te ke lava ai ʻo teuteu ke fanongo ki he leʻo ʻo e ʻEikí ʻi he konifelenisi lahí.
Ko ʻeku teuteu ki he konifelenisi lahí
ʻE lava ke tokoni ʻa e ngaahi fehuʻi ko ʻení ki he kau akó ke fakaʻaongaʻi ʻa e faleʻi mei he lea ʻa ʻEletā ʻUkitofa ʻi he laʻipepa tufá. ʻE lava ke tali ʻe he kau akó ʻa e ngaahi fehuʻí ʻi heʻenau tohinoa akó pe ʻi ha kiʻi laʻipepa pe kiʻi kaati te nau lava ʻo ʻalu mo ia ki ʻapi ko ha fakamanatu.
-
Ko e hā ha ngaahi fehuʻi ‘oku ou maʻu? Ko e hā ha tataki pe fakahinohino ʻoku ou fiemaʻu ki he ngaahi faingataʻa ʻoku ou fehangahangai mo iá?
-
Ko e hā ha meʻa pau te u fai ke teuteu ke fanongo ki he fakahinohino ʻa e ʻEikí kiate au ʻi he konifelenisi lahí? (Fili ha founga ʻe taha pe ua naʻá ke lisi ʻi hoʻo laʻipepa tufá.)
Tokoni ke lipooti ʻe he kau akó ʻenau aʻusia ʻi he konifelenisi lahí
Hili ʻa e konifelenisi lahí, fakakaukau ke kole ki he kau akó ke vahevahe ʻa e founga naʻe liliu ai ʻenau aʻusiá ʻi heʻenau teuteu ki he konifelenisi lahí. Mahalo ʻe ʻi ai ha kau ako ʻe niʻihi naʻe ʻikai ke nau kau ʻi he konifelenisí. Te ke lava ʻo ʻoange ha taimi ki he kau ako ko ʻení ke nau toe vakaiʻi ʻa e ngaahi fakamatala fakanounou ʻo e ngaahi leá.
-
Ko e hā naʻá ke fai ke ke teuteu aí? Ko e hā ha ngaahi founga naʻe tokoni ai ʻení?
-
Naʻe tokoni fēfē nai hoʻo teuteú ke ke fanongo ki he leʻo ʻo e Fakamoʻuí mo maʻu ha fakahinohino meiate Ia?
ʻE lava foki ke vahevahe ʻe he kau akó ʻenau ngaahi ongo pe fakamoʻoni fekauʻaki mo e meʻa naʻa nau ongoʻi pe fanongo ki ai lolotonga ʻa e konifelenisi lahí.