Ko ha Tangata Leʻo

Naʻe ako e palōfita ko ʻIsikelí fekauʻaki mo ha fatongia ʻe taha ʻo ha palōfita.

folofola ʻa e ʻEikí

ʻOku hoko mai e folofola ʻa e ʻEikí ki he kau palōfitá ʻi ha ngaahi founga kehekehe. Taimi ʻe niʻihi ʻoku folofola fakahangatonu mai ʻa e ʻEikí kiate kinautolu. Taimi ʻe niʻihi ʻokú Ne fekauʻi mai ha kau ʻāngelo ke nau fakahoko ʻEne folofolá. ʻOkú Ne faʻa folofola kiate kinautolu ʻi he kihiʻi leʻo siʻi ʻo e Laumālie Māʻoniʻoní.

tangata leʻo

ʻI he kuonga muʻá, naʻe tuʻu ha tangata leʻo ʻi ha funga ʻā pe ʻi ha taua ʻo vakai atu ki he ngaahi fakatuʻutāmaki mei he mamaʻó ʻe hoko mai, hangē ko e ngaahi filí ʻi heʻenau fononga ke ʻohofi ha koló. ʻE lava leva ke fakatokanga ʻa e tangata leʻó ki he kakaí koeʻuhí ke nau lava ʻo teuteu.

Naʻe fakahā ʻe he ʻEikí kia ʻIsikeli ʻoku hangē e palōfitá ha tangata leʻo ʻoku tuʻu ʻi ha tauá. Koeʻuhí ʻoku maʻu ʻe he kau palōfitá ha uiuiʻi māʻoniʻoni, ʻoku fakamavaheʻi kinautolu mei māmani pea mamata ki ha ngaahi meʻa mei ha tuʻunga fakalangi māʻolunga ange pe fakalangi ange. ʻOku nau fakatokanga ki he kakaí fekauʻaki mo e ngaahi fakatuʻutāmaki fakalaumālié.

fale ‘o ‘Isilelí

ʻI he taimi ʻoku talanoa ai e kau palōfita ʻo e ʻaho ní fekauʻaki mo e fale ʻo ʻIsilelí, ʻoku nau ʻuhinga ki he kakai ʻa e ʻEikí, ʻa ia kuo nau fai ha ngaahi fuakava mo Ia.

fakatokanga

ʻOku fakatokanga mai e kau palōfitá fekauʻaki mo e ngaahi fakatuʻutāmaki fakalaumālié koeʻuhí ke tau lava ʻo teuteu mo fakamālohia kitautolu ke fehangahangai mo kinautolu. ʻOku kole mai e kau palōfitá ke ʻoua naʻa tau faiangahala mo fakatokanga mai kiate kitautolu ʻa e meʻa ʻe hoko kapau te tau fai ia. ʻOku nau akoʻi mai e ngaahi moʻoni ʻa e ʻOtuá mo ʻEne ngaahi fekaú. Mahalo te nau talamai he taimi ʻe niʻihi ʻa e meʻa ʻe hoko ʻi he kahaʻú koeʻuhí ke tau lava ʻo ʻilo ʻa e meʻa ʻe hoko maí pea teuteu ki ai. (Vakai, Fakahinohino ki he Ngaahi Folofolá, “Palōfita,“ ChurchofJesusChrist.org/scriptures/gs.)