“Founga Fakaʻehiʻehi mei he Mamahi ʻE Ala Taʻofí,” Ki Hono Fakamālohia ʻo e Toʻu Tupú, ʻOkatopa 2022.
Haʻu, ʻo Muimui ʻIate Au
Selemaia; Ko e Tangilaulau ʻa Selemaiá
Founga Fakaʻehiʻehi mei he Mamahi ʻe Ala Taʻofí
ʻOku akoʻi kitautolu ʻe ha palōfita ʻo e kuonga muʻá mo onopōní ko e founga lelei tahá maʻu pē, ke tau tafoki ki he ʻOtuá.
Tā fakatātaaʻi ʻe Michael Mullan
“ʻOku hoko mai ʻa e fakaʻauhá!”
Ko ha pōpoaki faingataʻa moʻoni ia ke fai! Ka naʻe fie maʻu ke fai ia. Naʻe tafoki e kakai ʻo Selusalemá mei he ʻOtuá, fakafisingaʻi ʻEne kau palōfitá, pea nau moʻui faiangahala mo talangataʻa. Naʻe finangalo e ʻOtuá ke nau ʻiloʻi kuó Ne feinga ke tokoniʻi kinautolu, ka kuo hoko mai ʻeni ha ngaahi nunuʻa kovi.
Naʻe ui ʻe he ʻOtuá ʻa Selemaia ke fakatokanga ki he kakaí. Ko ha ngāue faingataʻa ʻeni he naʻe ʻikai fanongo ha taha. Ko hono fakaʻosí, naʻe iku e mafola ʻa e taʻe-māʻoniʻoní ki hono fakaʻauha ʻo Selusalemá pea ʻave pōpula ʻa e kakaí ki Papilone.
Ko e Mālohi ʻo e Ngaahi Filí
ʻOku hoko e mamahí ʻi he ngaahi taimi ʻe niʻihi mei ha ngaahi meʻa ʻoku ʻikai ke tau lava ʻo mapuleʻí pe mei he ngaahi fili ʻa e niʻihi kehé. Ka ʻe lava ke tau fakaʻehiʻehi mei he ngaahi fili ʻoku tau faí.
Naʻe fakatokanga ʻa Selemaia ki he kakaí ko ʻenau fili ko ia ke tafoki mei he ʻOtuá pea tukunoaʻi ʻEne ngaahi akonakí ʻe iku ia ki he mamahi. Meʻamālié, ʻoku tokoniʻi kitautolu ʻe he folofolá mo e ngaahi lea ʻa e kau palōfita ʻo onopōní ke tau ʻiloʻi ʻa e ngaahi fili ʻe fakaiku ki he fiefiá mo tokoniʻi kitautolu ke tau fakaʻehiʻehi mei he mamahi ʻe ala lava ʻo taʻofí. Ko ha ngaahi sīpinga ʻeni ʻe niʻihi:
Tokanga ki he Folofola ʻa e ʻOtuá
Naʻe fakafou ʻia Selemaia hono fakahā ʻe he ʻOtuá ki he kakai ʻo Selusalemá “kuo nau liʻaki au ko e matavai moʻuí” (Selemaia 2:13). ʻOku mahuʻinga e vaí ki heʻetau moʻui fakatuʻasinó. ʻI he folofolá, ko e vaí ko ha fakataipe ia ʻo Sīsū Kalaisi mo ʻEne ngaahi akonakí, ʻa ia ʻoku mahuʻinga ki he moʻui taʻengatá.
Naʻe akoʻi ʻe Palesiteni Lāsolo M. Nalesoni ko e taimi ʻoku tau tokanga ai ki he folofola ʻa e ʻOtuá, “ʻOku ʻomi ai ʻe he ʻOtuá kiate kitautolu ʻa e sīpinga ke lavameʻa, fiefia, mo nēkeneka ʻi he moʻui ko ʻení. …
… ʻOku ou palōmesi ʻe tāpuekina kimoutolu ʻaki ha mālohi lahi ange ke fepaki mo e ʻahiʻahí, faingataʻá, mo e vaivaí. ʻOku ou talaʻofa atu ha ngaahi mana ʻi hoʻomou … feohi fakafāmilí, mo e ngāue fakaʻahó. Pea ʻoku ou palōmesi ʻe tupulaki homou ivi ke ongoʻi e fiefiá neongo ʻo ka fakautuutu e palopalemá ʻi hoʻomou moʻuí.”1
Ko e Tāpuaki ʻo e Fakatomala Fakaʻahó
Ko ha palopalema lahi ki he kakai ʻi he kuonga ʻo Selemaiá he naʻa nau ngāue ʻo hangē naʻa nau līʻoa ki he ʻOtuá, ka naʻe ʻikai ke nau fakamātoato (vakai, Selemaia 3:10; 7:8–11). ʻOku tokanga ʻa e ʻOtuá ki he ngaahi holi ʻa hotau lotó. Te tau lava fēfē ʻo fakapapauʻi ʻoku tau fakamātoato ʻi he muimui kiate Iá?
Naʻe fakahā ʻe he ʻEikí kia Selemaia te tau lava ʻo “fakatonutonu [hotau] ʻulungāngá pea mo [ʻetau] ngaahi faiangá” (Selemaia 7:3). ʻI hono fakalea ʻe tahá, te tau lava ʻo fakatomala. Kuo poupouʻi kitautolu ʻe Palesiteni Nalesoni ke tau “tokanga fakaʻaho maʻu pē ki he fakatomalá.” Naʻá ne pehē: “Ko e fakatomalá ʻoku ʻikai ko ha meʻa pē ʻoku hoko; [ka] ko ha ngāue [ia]. … [Ko hono] [ngāueʻi ia] mo [hoko ʻo] toe kiʻi lelei ange ʻi he ʻaho takitahá. …
“Ko e taimi ʻoku tau fili ai ke fakatomalá, ʻoku tau fili ke liliu! ʻOku tau fakaʻatā ke liliu kitautolu ʻe he Fakamoʻuí ki hotau tuʻunga lelei tahá. ʻOku tau fili ke tupulaki fakalaumālie mo [maʻu ʻa e] … fiefia ʻo e huhuʻí ʻiate Ia. [ʻI he] taimi ʻoku tau fili ai ke fakatomalá, ʻoku tau fili ke tatau ange mo Sīsū Kalaisi!”2
Muimui ʻi he Palōfitá
Naʻe faʻa fakafisingaʻi e ngaahi akonaki ʻa Selemaiá. Kuo hoko ʻa e meʻa tatau ki he kau palōfitá ʻi he kuonga kotoa pē. ʻOku nau fakatokanga mai fekauʻaki mo e ngaahi fakatuʻutāmaki fakalaumālie ʻo hono fakasītuʻaʻi pe fakakeheʻi e ngaahi moʻoni ʻo e ongoongoleleí ke fakamānako pe tali lelei ange kinautolú.
Kuo pehē ʻe Palesiteni Nalesoni, “Ko e moʻoní ʻa e moʻoní. ʻOku fakatefito e moʻoní ʻi he ngaahi fono kuo fokotuʻu ʻe he ʻOtuá.” Naʻá ne toe pehē foki: “Ko hono moʻoní, ʻoku mau talaki ʻEne moʻoní koeʻuhí ʻoku mau tokanga moʻoni ki he fānau kotoa pē ʻa e ʻOtuá. Mahalo he ʻikai te mau fakahā maʻu pē ki he kakaí ʻa e meʻa ʻoku nau fie fanongo ki aí. ʻOku tātātaha ke manakoa ʻa e kau palōfitá. Ka te mau akoʻi maʻu pē ʻa e moʻoní!”3
Tokoni ʻi he Halá
Taimi ʻe niʻihi ʻe lava ke tau ongoʻi lōmekina ʻi he ngaahi meʻa ʻoku tau fehangahangai mo iá. Naʻe ongoʻi pehē moʻoni ʻa Selemaia. ʻI hono ui ʻo Selemaia ʻe he ʻOtuá ke hoko ko ha palōfitá, naʻe ʻikai ke ne fakapapauʻi ʻa e meʻa te ne malavá. Naʻe fakamatalaʻi ʻe he ʻOtuá naʻá Ne ʻiloʻi ʻa Selemaia kimuʻa pea toki fāʻeleʻí pea naʻá Ne tomuʻa fakanofo, pe fili, ia mo tokoni ke teuteuʻi ia ki heʻene ngāue fakafaifekaú (vakai, Selemaia 1:5).
ʻOku ʻafioʻi foki koe ʻe he ʻOtuá. ʻI hoʻo tafoki kiate Iá, te Ne tokoniʻi koe ke ke fakaʻehiʻehi mei he mamahi ʻoku tupu mei he angahalá mo e talangataʻá. Te Ne ʻoatu kiate koe ʻa e mālohi ke ikunaʻi ʻa e meʻa ʻokú Ne finangalo ke ke faí, ʻo tatau ai pē pe ko e hā ʻe hoko mai kiate koé.