“Ko e Ngāue Fakaetauhi ʻaki e Tohi ʻa Molomoná,” Ki Hono Fakamālohia ʻo e Toʻu Tupú, ʻOkatopa 2022.
Ko e Kaveingá mo Au
Ko e Ngāue Fakaetauhiʻaki e Tohi ʻa Molomoná
“ʻOku ou feinga ke … ngāue fakaetauhi ki he niʻihi kehé ʻi Hono huafa māʻoniʻoní.”
ʻI heʻeku kei siʻí, naʻá ku kaungāmeʻa mo ha taha ne ʻikai Siasi. Naʻe fakaafeʻi ia mo hono fāmilí ki he lotú kimuʻa, ka naʻe ʻikai ke nau saiʻia ai. Naʻá ku lotua ia peá u ongoʻi ʻoku totonu ke u ʻalu ki honau ʻapí ʻo ʻoange kiate kinautolu ha tatau ʻo e Tohi ʻa Molomoná.
ʻI he ʻaho hono hokó ne u ʻoange ʻa e Tohi ʻa Molomoná ki hoku kaungāmeʻá mo hono fāmilí mo kole ange pe te nau loto-fiemālie ke lau ha vahe pē ʻe taha. Naʻá ku foki ki ʻapi ʻo talaange ki heʻeku faʻeé ʻoku ʻikai ke u fakapapauʻi pe te nau fai ia. Hili ha kiʻi taimi siʻi, naʻe ʻeke mai ʻe hoku kaungāmeʻá pe ʻoku ou fie mohe ʻi hono ʻapí he pō ko iá. Lolotonga ʻeku ʻi aí, naʻe pehē ʻe hono fāmilí te nau lau ha kiʻi konga siʻi mei he Tohi ʻa Molomoná ka naʻe ʻikai ke nau ongoʻi ko e taimi totonu ia ke ako lahi ange ai fekauʻaki mo e Siasí.
ʻI he maʻu meʻatokoni efiafí, naʻe ʻeke mai ʻe he tangataʻeiki ʻa hoku kaungāmeʻá pe ko e hā naʻe faʻa fai ʻe he kāingalotu ʻo e Siasí kimuʻa pea nau kaí. Naʻá ku fakamatalaʻi ange ʻoku mau tāpuakiʻi ʻa e meʻakaí. Naʻá ne ʻeke mai pe te u loto-fiemālie ke lotu. Naʻá ku ʻohovale! Ka naʻá ku fiefia foki ke vahevahe ʻa e meʻa naʻá ku tui ki aí. Naʻa nau fakamālō mai ʻi heʻeku lotú, pea naʻe talamai ʻe hoku kaungāmeʻá naʻá ne ongoʻi ha meʻa ʻi heʻeku lotú naʻá ne ongoʻi fiefia ai. Naʻa mau talanoa ʻi he toenga ʻo e maʻu meʻatokoni efiafí fekauʻaki mo e lotú pea mo e meʻa ʻoku ou tui ki aí.
ʻI he pongipongi hono hokó ʻi he maʻu meʻatokoni pongipongí, naʻe lotu e tangataʻeiki hoku kaungāmeʻá ke tāpuakiʻi ʻa e meʻakaí. Naʻá ne pehē naʻá ne lotu foki kimuʻa pea toki mohe he pō kimuʻá.
Neongo ʻoku teʻeki ai ke nau kau ki he Siasí, ka ʻoku ou kei fetuʻutaki pē mo kinautolu mo tali ʻenau ngaahi fehuʻi fekauʻaki mo e Siasí mo poupouʻi kinautolu ke nau lau ʻa e Tohi ʻa Molomoná.
ʻOku ou fiefia ʻi heʻeku hoko ko ha faifekaú mo tokoniʻi kinautolu ke nau ongoʻi ʻa e Laumālié. ʻOku ou ʻiloʻi ʻi heʻeku ngāue fakaetauhi kiate kinautolu mo tokoni ke nau ongoʻi ʻa e Laumālié, kuó u tokoniʻi kinautolu ke nau toe ofi ange kia Kalaisi.
ʻOku nofo ʻa e tokotaha naʻá ne faʻú ʻi ʻAitahō, USA.