“Tekinolosiá, Ko e Tānakí, mo Koe,” Ki Hono Fakamālohia ʻo e Toʻu Tupú, ʻOkatopa 2022.
Tokoniʻo e Moʻuí
Tekinolosiá, ko e Tānakí, mo Koe
ʻOkú ke kau ʻi he kongakau kei talavou ʻa e ʻEikí. Pea ʻe lava ke tokoni e tekinolosiá!
ʻOkú ke ʻiloʻi nai e taimi ʻokú ke maʻu ai ha meʻa ʻe ua ʻoku fakataumuʻa pē ke na ō fakataha, hangē ko e tuifio lelei ʻo e pinati patá mo e sokoletí, pe ko e chips mo e salsa? ʻOku ʻomi ʻe hono maʻu fakatahá ha fiefia!
Kuo fakaafeʻi kitautolu ʻe hotau palōfitá ke tānaki fakataha ʻa ʻIsileli, ke tau kau fakataha ʻi he “poletakikāfakafa tahá , ko e taumuʻa fungani tahá ia pea ko e ngāue maʻongoʻonga taha ia ʻi he māmaní.”1 ʻE fēfē nai hano fakatahaʻi e ngāue ki hono tānaki ʻo ʻIsilelí mo e tekinolosiá?
ʻI he taimi naʻe fakaafeʻi ai koe ʻe Palesiteni Lāsolo M. Nalesoni ke tokoni ki hono tānaki ʻo ʻIsilelí, naʻá ne fakahoko ha ngaahi fakaafe lahi. Tau vakai ki ha tefitoʻi moʻoni ʻe nima ʻo makatuʻunga ʻi he ngaahi fakaafe ko ʻení, mo fakakaukau ki he tekinolosiá.
Ngaahi tā fakatātā ʻa Jarom Vogel
1 Tuʻusi ke Fakahoko
Naʻe fuofua ui hotau palōfitá ke taʻofi ʻetau mītia fakasōsialé ʻi ha ʻaho ʻe fitu. Naʻá ku saiʻia hono fakahoko ʻení! Taimi ʻe niʻihi ʻoku fie maʻu ke tau ʻi ha tuʻunga lōngonoa ke tau fanongo moʻoni ki ai.
ʻI he taimi ʻoku ou kiʻi fakalongolongo aí, ʻoku lava ke u ongoʻi ʻa e nonga ʻo e Laumālie Māʻoniʻoní. Pea ʻoku faʻa haʻu ha ueʻi kau ki ha taha ʻoku finangalo e Tamai Hēvaní ke u tokoniʻi. Te ke lava ʻi hoʻo mavahe mei he mītia fakasōsialé ke fehokotaki mo e Laumālié ʻo maʻu ha ngaahi fakakaukau mo ha fakahinohino foʻou.
2 Feilaulauʻi ha Meʻa Siʻi ke Foaki ha Meʻa Lahi
Ko e fakaafe hono ua ʻa Palesiteni Nalesoní ke “ke feilaulauʻi fakauike ho taimi maʻá e ʻEikí,” ke “Siʻaki e meʻa ʻokú ke manako ke faí … pea fakaʻaongaʻi ʻa e taimi ko iá ke tokoni ki hono tānaki ʻo ʻIsilelí.”2
ʻI hoʻo fakakaukau ki he meʻa te ke ala tukuangé, fakakaukau foki ki ai ko ha foaki ki he ʻEikí mo ʻEne ngāué. Te ke lava nai ʻo tukuange hoʻo sio he vitiō tisikou fakamuimuitahá kae foaki e taimi ko iá mo e tekinolosiá ki he fakahokohoko fakamotuʻaleá, hisitōlia fakafāmilí, ako ʻo e ongoongoleleí, pe vahevahe e meʻa ʻokú ke akó mo e niʻihi kehé?
ʻOku ou palōmesi atu he ʻikai fakatataua e meʻa ʻokú ke fakakaukau ʻokú ke feilaulauʻí ki he ngaahi tāpuaki ʻokú ke maʻú.
3 Tuʻu Loto-toʻa
Ko e fakaafe hoko ʻa Palesiteni Nalesoní ke mou “sivisiviʻi hoʻomou moʻuí mo e ʻEikí”3 ke fakapapauʻi ʻoku mou ʻi he hala ʻo e fuakavá. ʻOku kau ʻi hono tānaki ʻo ʻIsilelí ʻa hono tānaki atu koe ke ke ofi ange ki he Fakamoʻuí!
ʻOku lahi ha lelei ʻi he ʻinitanetí. Ka ʻoku ʻikai ko ha fakapulipuli ʻa e lahi mo ha ngaahi meʻa fakatuʻutāmaki ʻi aí. ʻOku ʻuhinga ʻa e tuʻu loto-toʻá ki he tokanga maʻu pē. ʻI hoʻo fakafanongo ki he ngaahi ueʻi ʻa e Laumālie Māʻoniʻoní, te ke ʻiloʻi ai ha meʻa taʻe taau, fakasiʻia, pe fakamole taimi. Kole ki he Tamai Hēvaní ke fakalahi hoʻo ʻiló pea ʻoatu ha mālohi ke ke tafoki pe tamateʻi ia.
4 Vakai Hake pea Tokoni
Ne fakaafeʻi leva kitautolu ʻe hotau palōfitá ke “lotu fakaʻaho ke maʻu ʻe he fānau kotoa ʻa e ʻOtuá e ngaahi tāpuaki ʻo e ongoongolelei ʻo Sīsū Kalaisí.”4 ʻIo, naʻá ne fehuʻi atu koeʻuhí he ko e konga koe ʻo e ngāue maʻongoʻongá ni, pea ʻoku tokoni hoʻo ngaahi lotú.
Sio ki ʻolunga mei hoʻo telefoní peá ke sio ki he niʻihi ʻoku mou feohí. Vakai hake ki he langí ke fekumi ki ha fakahinohino ki he founga te ke lava ai ʻo tokoní. Peá ke tokoni leva—ʻo tatau ai pē pe ko e vitiō, pōpoaki telefoni, tohi ʻi he mītia fakasōsialé, telefoni, pe fetalanoaʻaki—pea ngāueʻi hoʻo ngaahi lotú mo e ngaahi ueʻi ʻa e ʻEikí.
5 Hoko ko ha Maama
Fakaʻosí, naʻe fakaafeʻi kitautolu ʻe Palesiteni Nalesoni ke tau “makehe. ʻAi ke ke kehe. Hoko ko ha maama.”5 Pea ʻoku kau ai hoʻo fakaʻaongaʻi e tekinolosiá! Manatuʻi, ko ha fānau koe ʻo ha ongomātuʻa fakalangi, ʻoku ʻi ai ho natula fakalangi mo e ikuʻanga taʻengata. Tuku ke ulo atu hoʻo māmá ʻi he feituʻu mo e tūkunga kotoa pē.
Naʻe fakaʻosi ʻe Palesiteni Nalesoni ʻene fakaafé ʻaki ha fakamanatu “ʻokú ke kau ʻi he lelei taha kuo tuku mai ʻe he ʻEikí ki he māmaní. ʻE malava ke ke toe poto ange mo fakapotopoto ange mo lahi ange ho ivi tākiekina he māmaní ʻi ha toe toʻu tangata ange kimuʻa!”6
ʻI hoʻo fakaʻaongaʻi e tekinolosiá ki he leleí, te ke hoko ai ko ha konga mahuʻinga ʻo e kongakau ʻa e ʻEikí ʻi hoʻo feinga ke tānaki ʻa ʻIsilelí. ʻOku fie maʻu ʻe he māmaní hoʻomou leleí pea mo e maama ʻa e ʻEikí! He toki meʻa mālohi moʻoni ia!