“Vakai ki he Langí,” Ki Hono Fakamālohia ʻo e Toʻu Tupú, ʻOkatopa 2022.
Vakai ki he Langí
Ko e vakai ki he ngaahi fetuʻu fuká mo e palanité ʻa e taha ʻo e ngaahi founga ʻoku vakai hake ai ʻa Laisa P. ʻo Palāsilá ki he langí.
Ngaahi tā fakatātā ʻa Peter Bollinger; ngaahi faitā ʻa Barbara Leite
ʻOku faʻa ofo e kakaí ʻi heʻenau sio fakamamaʻu ki he langí ʻi he poʻulí—ki he ngaahi fetuʻú kotoa mo hono lahí kotoa. Kuo vakai maʻu pē ʻa Laisa P., taʻu 18, ʻo Minasi Kelaisi, Palāsilá, ki he langí ʻi he kotoa ʻo ʻene moʻuí.
ʻI heʻene kei siʻí, naʻá ne pehē, “Naʻá ku fie ʻilo ki he ʻunivēsí mo e anga e ngāue ʻa e ngaahi meʻá.” Naʻá ne saiʻia ʻi he ako ki he vavaá, naʻá ne manako ke sio ʻi he ongo faiva Star Wars, mo e Star Trek. Naʻá ne vakai ki he Pupunga Fetuʻú (Cosmos) mo Kala Sākeni mo laukonga he ngaahi tohi ʻa Sitīveni Hōkingí.
Kuo tataki ia ʻe he fieʻilo ko iá ʻi ha fononga ako fakafiefia ki he ngaahi fetuʻú—neongo kuo teʻeki ai ke ne mavahe mei he ʻātakai ʻo e māmaní.
Ngaahi Poini ʻi he Vavaá
ʻOku kau ʻa Laisa ki ha kulupu ʻo e niʻihi ʻoku nau saiʻia ʻi he ako ki he vavaá ʻi Palāsila. ʻI ha ʻaho ʻe taha, naʻe vahevahe ai ʻe ha mēmipa ʻo e kulupú ha fehokotakiʻanga ki ha faingamālie ke ʻanalaiso ai e ngaahi ʻīmisi ʻo e meʻa-fakaʻata lahí ke kumi ʻaki e ngaahi fetuʻu fuka maʻá e NASA. Naʻe lesisita ki ai ʻa Laisa.
ʻOkú ne fakamatala ʻo pehē, “ʻOku nau ʻomi ha ngaahi ʻīmisi mei he meʻa-fakaʻata Pan-STARRS ʻi he ʻUnivēsiti ʻo Hauaiʻí. Naʻá ku fakaʻaongaʻi ʻa e polokalama ako ki he vavaá ke ʻanalaiso e ngaahi ʻīmisi ko ʻení, pea naʻá ku fekumi ki ha ngaahi meʻa naʻe feʻunuʻaki ʻi he tōʻonga ʻo ha fetuʻu fuka.”
Hili hono vakaiʻi e ngaahi ʻīmisí mo fakahū atu e ngaahi lipooti ki hono ʻanalaisó, naʻá ne maʻu ha tali ʻi ha ʻaho ʻe taha. Naʻá ne maʻu ha fetuʻu fuka. ʻOku fakahingoa he taimí ni ko e LPS0003. Ka ʻe faifai pē peá ne maʻu ha faingamālie ke fili ha hingoa tuʻumaʻu ki ai.
Naʻe hoko e meʻá ni ke toe lahi ange ai ʻene fie ʻilo ki aí. ʻOkú ne pehē, “ʻOku ou fie maʻu ke maʻu ha ngaahi palanite ki tuʻa (exoplanets). Ko e taha ia ʻo ʻeku ngaahi fakaʻamua lahi tahá.”
Kuó ne tanumaki foki ʻene holi ke hoko atu ʻene ako fakasaienisí. ʻOkú ne lolotonga ʻi ha ʻunivēsiti ʻa e puleʻangá ʻo ako ki ha fakaʻilonga B.A. ʻi he lēsoni fīsikí.
Ka ʻoku ʻikai ko e ako pē ki he faʻunga ʻo e vavaá ʻokú ne ʻai ʻa Laisa ke vakai ai ki he langí.
Feituʻu Mohu Founga
Lolotonga e laukau ʻaki ʻe Laisa hono tuʻunga ko e taha ʻilo lahi fakasaienisí, ʻokú ne pehē ko e foʻi lea ʻe taha ʻokú ne fakamatalaʻi lelei iá ko e mohu foungá.
ʻOkú ne pehē, “Ko e mūsiká ko ha konga lahi ia ʻo ʻeku moʻuí.” Naʻá ne tā meʻalea talu mei heʻene kei siʻí—ʻuluakí ko e pianó pea hoko atu ki he vaioliní, ʻa ia ʻokú ne tā he taimí ni ʻi ha ʻōkesitulā ʻa e siteití. Pea ʻokú ne saiʻia ʻi he ngāue ʻoku fakahoko ʻe he faihivá he māhina takitaha ke faʻu ha kiʻi hiva nounoú.
ʻOku toe fakaʻaiʻai foki ʻe he ngaahi tohí ʻene mohu foungá. ʻOkú ne pehē, “ʻOku ou saiʻia ke lau ha ngaahi tohi mālie mei he funga ʻo e māmaní. Pea ʻoku ou saiʻia ke faʻu ha ngaahi talanoa mo ha ngaahi maau. ʻOku ou faʻa tohi maʻu pē ha meʻa.”
Ko e feinga ko ʻeni ke faʻú ko ha konga ia ʻo ʻene vakai ki he moʻuí. ʻOkú ne pehē, “ʻOku ou tui moʻoni ki he mālohi ʻo e mohu foungá mo e fakakaukaú. ʻOku ou manako ke mohu founga ʻi he tapa kotoa pē ʻo ʻeku moʻuí, ʻo aʻu pē ki he fīsikí.”
Pea ʻoku tokoni ʻa e mohu foungá ni ke ne vakai ai ki he langí. “Ko e taimi ʻoku ou faʻu ai ha ngaahi meʻá, ʻoku ou ofi ange ai ki hoku Fakamoʻuí mo hoku Tupuʻangá. ʻOku ou manatuʻi ʻeku Tamai Hēvaní mo e ʻilo naʻá Ne foaki maí, ʻa e ngaahi faingamālie ko ʻeni ke u akó, pea ʻoku ou houngaʻia ʻaupito ai.”
Vakai ki he Langí ke Maʻu ha Tokoni mo ha Tataki
Kia Laisá, ko e founga mahuʻinga taha ʻokú ne vakai ai ki he langí ko e lotu mo e ako folofola maʻu peé.
Hangē ko ʻení, lolotonga ʻene teuteu ki he sivi hū ki he ʻunivēsití, ʻokú ne pehē, “ko e ʻuluaki meʻa pē naʻá ku faí ko e lotu mo lau e folofolá kimuʻa. Naʻe lava ke u mamata ki hono tokoniʻi au ʻe he ʻEikí ke u akó, ke u toe tokanga ange.”
ʻOku ueʻi fakalaumālie ia ʻe he sīpinga ʻa Nīfaí. ʻI he ʻikai lotu e ongo taʻokete ʻo Nīfaí koeʻuhí ko e ʻikai ke na tui te na maʻu ha talí, naʻá ne fakamanatu ange kiate kinaua e talaʻofa ʻa e ʻEikí: “Kapau ʻe ʻikai te mou fakafefeka homou lotó, pea mou kole kiate au ʻi he tui, ʻo ʻamanaki te mou maʻu, ʻi hoʻomou tauhi faivelenga ʻeku ngaahi fekaú, ko e moʻoni ʻe fakahā ʻa e ngaahi meʻá ni kiate kimoutolu” (1 Nīfai 15:11).
ʻOku pehē ʻe Laisa, “ʻI heʻeku lau ʻení, ʻoku ueʻi ai au ke u fehuʻi ki heʻeku Tamai Hēvaní ʻa e meʻa ʻoku ou fie ʻiló, ʻa e meʻa ʻoku fie maʻu ke u ʻilo ʻi heʻeku moʻuí pea ʻi he taimi ní.”
ʻOkú ne pehē ʻoku hanga ʻe he lotú mo e ako folofolá ʻo “tokoniʻi au ke u loto-toʻa mo fakatuʻamelie ki he kahaʻú.” ʻOkú ne ʻiloʻi ʻoku ʻi ai ʻa e ʻOtuá pea te Ne tataki mo tokoniʻi ia.
Ko Hono Tokoniʻi e Niʻihi Kehé ke Nau Vakai ki he Langí
Ko e lahi ange hono tāpuekina ia ʻi heʻene vakai ki he langí, ko e lahi ange ia e fie tokoni ʻa Laisa ki he niʻihi kehé ke nau fai e meʻa tatau—ʻo kamata pē mei hono ʻapí.
ʻOkú ne pehē, “ʻOku ou fie tokoni ki hoku fāmilí, tautautefito ki hoku kiʻi tuongaʻané, ke muimui ʻia Sīsū Kalaisi.” Ko Laisa pē, mo hono tuongaʻané, mo ʻenau kuifefiné kuo nau mālohi ʻi he Siasí. ʻOkú ne pehē, ko e tā sīpinga leleí mo hono tokoniʻi hono fāmilí “ko e taha ia ʻo ʻeku ngaahi taumuʻa maʻongoʻonga taha ʻi he kotoa ʻo ʻeku moʻuí.”
ʻOkú ne saiʻia foki ke vahevahe ʻa e ongoongoleleí mo hono kaungāmeʻá. Naʻe aʻu ʻo papitaiso ha taha ʻo hono ngaahi kaungāmeʻá hili hono fakaafeʻi ia ʻe Laisa ke akoʻi ʻe he ongo faifekaú. ʻOkú ne pehē, “ʻOku ou fie fai ʻeni ʻi he kotoa ʻo ʻeku moʻuí ke vahevahe ʻa e ueʻi fakalaumālie mo e ʻilo ʻoku tau maʻú mo e kakai kehé. ʻOku fie maʻu ke nau maʻu ʻa e fiefia, fakafiemālie mo e ngaahi tali ko ʻeni ʻoku tau maʻú.”
ʻOku ʻikai leva ha ofo ʻi heʻene palani ke ngāue fakafaifekau ʻi he hoko hono taʻu 19, ke ne lava ʻo vahevahe ʻa e ongoongolelei ʻo Sīsū Kalaisí mo ha kakai tokolahi ange.
Pea ʻokú ne fie ngāue ki hono hisitōlia fakafāmilí koeʻuhí ke ne lava foki ʻo tokoni ki hono tānaki ʻo ʻIsileli ʻi he tafaʻaki ʻe taha ʻo e veilí. Kuó ne ʻosi ʻalu ki he Temipale Campinas Brazil pea ʻokú ne vēkeveke ki he temipale kuo fanongonongo ʻo ofi ange ki hono ʻapí ʻi Pela Holisoniteí.
Calm and Stars [ʻAlomālie mo e Ngaahi Fetuʻú], tā fakatātā ʻa Yongsung Kim, Havenlight.com
Vakai Maʻu pē ki he Langí
Kapau ʻe lava ke vahevahe ʻe Laisa ha pōpoaki ʻe taha mo e tokotaha kotoa pē, ʻokú ne pehē ko ia ʻeni: “ʻOua naʻá ke foʻi.”
ʻOkú ne pehē, “ʻOua naʻá ke foʻi ʻi he ngaahi meʻa ʻokú ke ʻofa aí, ʻi he ngaahi meʻa māʻoniʻoni ʻokú ke fie maʻú. ʻI he hokohoko atu ʻetau feingá, ʻi he hokohoko atu ʻetau tui mo hokohoko atu e akó, ʻe lava ke tau falala ki he tokoni ʻa e ʻEikí.
Kuó ne mātā tonu ʻeni ʻi hono fāmilí. ʻI hono taʻu 10, naʻe kole ange ke ne fai ha fakamoʻoni ki he papitaisó ʻi he polokalama sākalamēniti ʻa e Palaimelí. Ko e meʻá pē, naʻe teʻeki ai ke ne papitaiso. Naʻe teʻeki ke fakangofua ia ʻe heʻene faʻeé. Ko ia naʻe ʻikai ke fakapapauʻi ʻe Laisa pe ko e hā te ne lea ʻaki ʻi heʻene fakamoʻoní, ka naʻá ne ʻalu pē. Pea naʻe hoko leva ha mana. ʻOku pehē ʻe Laisa, “Naʻe ʻi he lotú ʻeku fineʻeikí he ʻaho ko iá. Naʻe ʻikai ke u ʻamanaki ʻe ʻi ai. ʻI he ʻaho ko iá, naʻá ku maʻu ha ngofua ke papitaiso au.”
ʻOkú ne pehē, “Kuo mau fakahoko ha fakalakalaka lahi ʻi hoku fāmilí mo e ongoongoleleí.” Kuo ʻosi papitaiso hono tuongaʻané. Naʻá na lau fakataha foki e folofolá mo ʻena faʻeé, pea ʻokú ne haʻu ki he lotú ʻi he taimi ʻe niʻihi.
Koeʻuhí ko e ngaahi aʻusia pehení, ʻoku ʻiloʻi ai ʻe Laisa “ʻe lava ke fakahoko ʻe he ʻOtuá ha ngaahi mana ʻi heʻetau moʻuí.”
ʻOkú ne pehē, “ʻOku ou tui ʻoku faingofua pehē—ʻoua ʻe foʻi, pea falala ki he ʻEikí. Te Ne ʻave kitautolu ki ha feituʻu ʻoku ʻikai ke tau ʻamanaki ki ai.”