Ang Simbahan ni Jesukristo Gipahiuli

Ang Simbahan ni Jesukristo Gipahiuli!

Mga paghulagway pinaagi ni Apryl Stott

Sa wala pa kita moanhi sa yuta, nagpuyo kita uban sa atong Langitnong mga Ginikanan. Gihigugma kita Nila! Ang Langitnong Amahan adunay nindot nga plano alang kanato. Moanhi kita sa yuta aron makaangkon kita og lawas ug makat-on ug molambo. Dayon mobalik kita aron mopuyo sa atong langitnong panimalay. Apan dili nato kini mabuhat nga kita ra. Magkinahanglan kita og tabang.

Ang Langitnong Amahan mipili sa atong kinamagulangang igsoon, si Jesukristo, nga moanhi sa yuta aron sa pagtabang kanato. Si Jesus mipakita kanato unsaon sa paghigugma sa uban ug sa pagsunod sa mga sugo sa Langitnong Amahan. Mipili Siya og mga Apostoles aron mangulo sa Iyang Simbahan.

Dayon si Jesus nag-antus alang kanato didto sa Tanaman sa Getsemani. Gibati niya ang tanan natong mga kasakit ug kaguol. Namatay Siya alang kanato diha sa krus. Tungod niini, makadangup kita Kaniya kon kita nasakitan o magul-anon o nagkinahanglan og tabang. Makahinulsol kita kon makabuhat kita og sayop.

Sa ikatulong adlaw human namatay si Jesus, Siya nabanhaw. Si Jesus nabuhi pag-usab! Tungod niini, mabanhaw usab kita. Makahimo kita sa pagpuyo sa langit pag-usab human kita mamatay.

Human sa Iyang Pagkabanhaw, si Jesus mibisita sa Iyang mga disipulo sa Jerusalem ug sa Amerika. Mihangyo siya sa Iyang mga Apostoles nga mopadayon sa pagtudlo sa mga tawo mahitungod sa Iyang ebanghelyo. Daghang mga tawo nga nakadungog sa mga Apostoles nabunyagan ug mipasakop sa Simbahan.

Human mamatay ang mga Apostoles, ang mga tawo misugod sa pagkalimot sa pipila ka importante nga mga bahin sa ebanghelyo ni Jesus. Mihunong sila sa pagtuo nga ang Langitnong Amahan kanunay nga modasig sa Iyang mga anak dinhi sa yuta. Nakalimot sila nga ang tanan dinhi sa yuta makabaton og kahigayunan nga mabunyagan. Mihunong sila sa pagtuo nga ang mga propeta ug apostoles kanunayng mogiya sa Simbahan.

Milabay ang daghang katuigan. Sa katapusan, panahon na aron ibalik ang nangawala nga mga bahin sa ebanghelyo ni Jesus. Panahon na aron ipahiuli ang Iyang Simbahan! Ang Langitnong Amahan nagkinahanglan og tawo nga mahimong propeta ug motabang sa pagpabalik niini sa yuta. Mipili siya og usa ka batang lalaki nga ginganlan og Joseph Smith.

Usa ka adlaw, si Joseph nagbasa sa Biblia. Sa Santiago 1:5, giingon dinhi nga ang Langitnong Amahan motubag sa atong mga pangutana kon kita mangutana uban sa pagtuo. Si Joseph aduna gayuy pangutana! Nasayud siya nga adunay daghang simbahan nga nagtudlo mahitungod ni Jesus. Apan gusto niyang mahibaloan kon aduna bay usa nga sama sa Simbahan ni Jesus diha sa Bag-ong Tugon.

Usa ka matahum nga adlaw sa tingpamulak sa panahon sa Pasko sa Pagkabanhaw, si Joseph miadto sa kakahoyan duol sa iyang panimalay. Miluhod siya ug misugod sa pag-ampo. Dayon mibati si Joseph og dili maayong pagbati. Si Satanas misulay sa pagbalda kaniya. Apan si Joseph mipadayon sa pag-ampo sa tanan niyang kusog.

Dayon usa ka nindot nga kahayag ang mikunsad. Nakita ni Joseph ang Langitnong Amahan ug si Jesukristo. Gitawag kini nga Unang Panan-awon. Miingon Sila nga ang Simbahan ni Jesus wala dinhi sa yuta. Apan maanaa kini sa dili madugay. Ang Pagpahiuli nagsugod na!

Ang Langitnong Amahan mipadala og mga anghel aron mapahiuli ang importanting mga bahin sa ebanghelyo. Si Anghel Moroni mihatag ni Joseph sa bulawang mga palid aron makaangkon kita sa Basahon ni Mormon nga makatabang kanato nga makat-on mahitungod ni Jesukristo.

Si Juan Bautista midala og balik sa Aaronic nga Pagkapari aron kita mabunyagan. Si Pedro, Santiago, ug Juan midala sa Melchizedek nga Pagkapari aron makadawat kita sa Espiritu Santo ug makaangkon og mga panalangin kon kita masakit.

Si Elijah mianhi aron masilyo kita ngadto sa atong mga pamilya diha sa templo.

Ang Simbahan ni Jesukristo sa mga Santos sa Ulahing mga Adlaw giorganisar. Nagpasabut kana nga ang Simbahan ni Jesus nahibalik na sa yuta! Kining tanan nga mga butang kabahin sa Pagpahiuli.

Ang Pagpahiuli sa ebanghelyo nagpadayon gihapon karon. Ang mga propeta, apostoles, mga misyonaryo ug mga miyembro nagpaambit sa maayong balita ni Jesukristo sa tibuok kalibutan. Ang mga Templo gitukod sa daghang mga yuta aron ang mga tawo masilyo ngadto sa ilang mga pamilya sa kahangturan. Ug ang Simbahan nagtabang sa mga tawo sa mga dapit diin adunay kagutom o kalamidad.

Ang tanan adunay mabuhat sa pagtabang sa Pagpahiuli. Makatabang ka pinaagi sa pagkat-on mahitungod sa imong family history ug sa pagpahigayon og mga bunyag sa templo. Mahimo ka nga mohatag og ikapulo sa pagtukod og mga simbahan ug mga templo. Mahimo ka nga mohatag og mga halad sa puasa aron sa pagtabang sa mga tawo nga nanginahanglan. Makasulti ka sa mga tawo mahitungod ni Jesukristo.

Si Jesus mihatag kanato sa Iyang Simbahan aron sa pagtabang kanato nga makabalik sa atong langitnong panimalay. Makaambit kita sa sakramento ug kanunay nga mohinumdom sa unsay Iyang gibuhat alang kanato. Makapakita kita og gugma sa uban, sama sa Iyang gibuhat. Makatabang kita sa uban nga makat-on mahitungod sa Iyang ebanghelyo! ●