O Taiala mo le Teuina ma le Faamamaina o le Suavai mo Faalavelave Faafuasei

Ata

o le tamaitiiti o loo inuina le vai

O Le Faatomuaga

O le i ai o se vai saogalemu mo le faaaogaina vave o se tasi lea o auala sili ona taua e fesoasoani ai i lou aiga ia saunia mo se faalavelave faafuasei. E sili atu ona taua le suavai i le lagolagoina o le ola nai lo meaai, o lea la o se tasi lea o aitema muamua e tatau ona e aoina mai ma teuina. Mulimuli i taiala nei i le faia o se sapalai o vai mo faalavelave faafuasei ina ia mautinoa ai ua lava ma saogalemu lau sapalai e faaaoga.

O Le A Se Mea e Tatau Ona Ou Faaaogaina mo le Teuina o Vai?

O punavai sili ona taatele o vai e teuina o vai ua utu i fagu, vai paipa, ma le vai o loo teuina i se tanevai.

Fagu Vai: O le teuina o fagu vai faapisinisi i koneteina palasitika e faia i le polyethylene terephthalate (PETE po o le PET) o se faiga saogalemu ma faigofie. Aloese mai koneteina palasitika e le o ni palasitika o le PETE.
Vai paipa: O le tuufaguina ma le teuina o vai mai le paipa e manaomia ai le taimi ma le taumafaiga ae o se filifiliga lelei mo le tamaoaiga.
Tanevai: Afai e faatagaina e le paketi ma le avanoa, e mafai ona e mafaufau e teuina le vai i se tanevai. O nei tane tetele e masani ona teuina i lalo mo le faamoemoega o le pueina mai o vaitimu ae e mafai foi ona faatumulia i le vai mai isi punavai.

E Faapefea Ona Ou Saunia le Vai ina Ia Teuina?

Afai e te filifili e utuina le suavai mo le teuina mo faalavelave faafuasei e oe lava, mafaufau i taiala nei:

Filifiliga o se Koneteina

O koneteina e teu ai vai e tatau ona le sao iai le ea ma tetee atu i le faaleagaina. O faguinu palasitika e masani ona faaaoga. Aua nei faaaogaina ni koneteina sa faaaoga muamua e teu ai ni oloa e le o ni mea e ai, ma ’aua nei faaaogaina ni fagu palasitika susu ona e le lelei ona faamauina i latou ma e matele lava ina leaga i le aluga o taimi. Faatasi ai ma soo se koneteina e teu ai vai ua e fuafua e faaaoga, fufulu maeaea lelei ma faamama a o le’i faatumuina.

Faamamaina Muamua o le Vai

Faaaoga taiala nei e faamama ai le vai a o le’i utuina i totonu i se koneteina:

Faavailaau, manino: Afai na faamama le vai i le vailaau e se kamupani suavai, e le manaomia ona e faamamaina a o le’i teuina.
E le faavailaauina, manino: Afai e le o faavailaauina le vai ma o loo manino, faaopoopo i ai ni mataua se 8 o le vailaau ta lavalava (5 i le 9 pasene sodium hypochlorite) i le kalone e tasi. Faaaoga na o le vailaau ta lavalava e aunoa ma ni vailaau faamafiafia, vailaau faamanogi, po o vailaau e faaumi ai le aoga.
E le faavailaauina, puaoa: Afai e le o faavailaauina le vai ma e puaoa, faaopoopo i ai ni mataua se 16 o le vailaau ta lavalava i le kalone e tasi.

E Faapefea Ona Ou Teuina ma le Saogalemu le Vai?

A uma loa ona faamama le vai ma utu i koneteina, ia fai mea nei:

Faamau ia mau lelei ia koneteina.
Tusi ai le aso.
Teu i se nofoaga mālū ma pogisa.

Talu ai o le tele o koneteina e manino ma e mafai e le malamalama ona ulu atu iai, atonu e te manao e ufiufi pe teuina i latou i ni taga palasitika pogisa. O nisi o koneteina e ono manaomia ai foi le puipuiga mai le maluluina. Teu le vai i na o nofoaga e ono le faaleagaina ai lou fale po o le fale mautotogi pe a ono tulai mai ni liki. Afai e faaaoga le fagu vai na faatauina mai se faleoloa, faaaoga “aso sili ona lelei pe a faaaogaina” e fai ma taiala o le faataamiloga. A leai, sui le vai i le tai ono masina.

Ata

teineitiiti o loo inu mai se faguvai

O Le A le Tele o Le Vai e Tatau Ona Ou Teuina?

E ui e faigata ma e le tatau ona teuina ni vai i ni aofaiga tetele, ae fautuaina e tagata atamamai lou tausia o se sapalai o vai e lua vaiaso mo faalavelave faafuasei ona o faalavelave faalenatura e ono faaleagaina ai pe faalavelaveina ai sapalai o vai mo lena taimi umi. E manaomia e tagata matutua ona feinu ia le itiiti ifo ma le 2 kuata o le kalone vai i aso taitasi. O fanau, tina failelele, ma i latou o e mama’i pe o i ai ni tulaga faalesoifua maloloina e ono manaomia le tele o le vai. E manaomia se isi vai faaopoopo mo sauniuniga mo meaai ma le tumama mo se aofaiga o le 1 kalone mo le tagata matua i le aso. Mo se sapalai e lua vaiaso, teu ni kalone se 14 (53 lita) o vai mo le tagata matua e toatasi.

O A Ni Punavai Lelei mo le Vai i se Faalavelave Faafuasei?

Afai e uma lau vai na teuina pe leai foi se sapalai, o loo i ai isi punavai o vai e mafai ona e faaaogaina i se faalavelave faafuasei. O le a manaomia ona e faamamaina le vai mai nisi o nei punavai o vai ina ia mautinoa ai e saogalemu le faaaogaina. E tatau ona aloese mai le faaaogaina o le vai pe afai e togafitia i vailaau pe ua faaleagaina. O punavai o vai e ono aofia ai:

O totonu o le aiga

Faavevela vai
Vai o loo totoe i paipa
Fualaau aina ma fualaau fai sua tuuapa
Tane o faleletaua
Fasi aisa

Fafo atu o le Aiga

Vaitimu
Vai mai le vaieli
Vaipuna masani
Vaitaele ma vaitafe
Taufusi ma vaituloto

E faaopoopo atu i nei punavai, e mafai ona e faaaogaina le vai mai vai taele ma sipā mo le tumama ma le faamamaina—peitai, e le tatau ona inuina.

E Faapefea Ona Ou Iloa Pe O Saogalemu le Vai e Faaaoga?

Afai e palapala lau vai, e tatau ona e faamamaina a o le’i faaaogaina. Afai e te manatu atonu na faaleagaina lau vai, aua le faaaogaina. O vai inu ua faaleagaina i vailaau, suauu, vailaau oona, faleleta’ua, po o le lapisi e mafai ona taitai atu ai i se gasegase tuga. Peitai, o nisi taimi o le a i ai se tofo pefu o le vai pe a uma ona teuina. E le o le uiga o lena mea e faapea ua faaleagaina. O le tofo o le vai teuina e mafai ona faaleleia e ala i le sasaa mai lea koneteina i le isi koneteina a o le’i faaaogaina.

E Faapefea Ona Ou Faamamaina le Vai?

Afai e te le iloa pe ua saogalemu lau sapalai o le suavai pe ua faaleagaina, e tatau ona faamamaina a o le’i faaaogaina. O le faamamaina o le suavai e masani lava o se faagasologa e lua laasaga ma o le a saogalemu ai le suavai e faaaoga.

Laasaga 1: Faamaninoina o le Vai

O vai puaoa po o vai palapala e tatau ona faamanino muamua. E tatau ona pasi atu i pepa faamama, ie lelei, po o nisi faamama. E mafai foi ona e faato’aina le palapala, ona aveese lea ma le faaeteete le vai manino i le pito i luga O le vai ua faamamaina po ua kiliaina e tatau lava ona mama mai siama a o le’i faaaogaina.

Laasaga 2: Faamamaina mai Siama o le Vai

Metotia o le Faapunaina: O le faapunaina lelei o le vai mo le 3-5 minute o le a tapē ai le tele o siama ninii e ola i le vai. O le tele o le vai e manaomia ai le faapuna i se taimi umi atu. Peitai, o le faapuna faaumiumi o le aofaiga laitiiti e mafai ona faamamaina ai mea oona pe afai o iai.
Metotia o le vailaau ta lavalava: O le faaopoopoina o mataua e 8 o le vailaau ta lavalava (5 i le 9 pasene sodium hypochlorite) i lita uma e 4 (1 kalone) o le vai o le a tapē ai le tele o siama ninii. Faaaoga na o le vailaau ta lavalava e aunoa ma ni vailaau faamafiafia, vailaau faamanogi, po o vailaau e faaumi ai le aoga. O le faaaogaina o le vailaau ta lavalava e le faamamaina ai vai ua faaleagaina i vailaau oona.
O Vaimama mo vai: O nisi vaimama mo vai faapisinisi e mafai ona vaimama lelei ma faamamaina le suavai ua faaleagaina i siama ninii, vailaau oona, ma uamea mamafa. O lo latou aoga e faalagolago lea i le mamanu, tulaga, ma le faaaogaina sa’o.