“O le Maufetuuna’i Faalelagona e Fesoasoani ia i Tatou e Saunia ai mo Faalavelave Faafuasei,” Sauniuniga mo Faalavelave Faafuasei (2023)
O le Maufetuuna’i Faalelagona e Fesoasoani ia i Tatou e Saunia ai mo Faalavelave Faafuasei
O Le Faatomuaga
O le maufetuuna”i faalelagona atonu e le o le mea muamua lea e te mafaufau i ai pe a e mafaufau i sauniuniga mo faalavelave faafuasei. Sa faailoa mai e Peresitene Russell M. Nelson lenei popolega e uiga i sauniuniga faalelagona: “Ou te uunaia outou ina ia faia laasaga ina ia saunia faaletino. Ae ua sili atu ona ou popole i a outou sauniuniga faaleagaga ma faalelagona” (“Opogi le Lumanai ma le Faatuatua,” Liahona, Nov. 2020, 74). O le malosiaga faalelagona ma le maufetuuna’i o ni uiga taua ia e mafai ona faaleleia ai lou olaga i taimi sili ona lelei a o fesoasoani foi ia te oe e faatautaia faigata.
O ni nai mea nei e tatau ona e iloa e saunia ai faalelagona mo tulaga faigata e pei o se faalavelave faafuasei po o isi faalavelave.
O Le A Le Maufetuuna’i Faalelagona?
O le maufetuuna’i faalelagona (o nisi taimi e ta’ua o le malosi faalelagona po o le maufetuuna’i faalemafaufau) o le mafai lea ona onosaia, fetuunai, ma toe faaleleia mai le atuatuvale ma faigata.
E tusa ai ma le Matagaluega a le I.S. o le Soifua Maloloina ma le Auaunaga mo Tagata Soifua, o le maufetuuna’i faalelagona e aofia ai foi le tomai o se tasi e “faatumauina pe toe foi i se tulaga o le soifua manuia faalemafaufau e ala i le faaaogaina o auala lelei e taulimaina ai.” E tusa ai ma le American Psychological Association, o le maufetuunai faalelagona o le tomai lea e faaaoga ai fetuunaiga faalelagona e onosaia ai luitau o le olaga.
Faamanuiaga o le Maufetuuna’i Faalelagona
E tele tulaga e mafai ona mafua ai le atuatuvale faalelagona. Mo se tagata e faatapulaaina tomai o le maufetuunai, o lenei atuatuvale e mafai ona saofaga i atugaluga faaletino ma faalemafaufau. O i latou e sili atu le maufetuuna’i faalelagona o loo feagai pea ma tiga faalelagona, ae ua ia i latou le tomai e onosaia ai, fetuunai, ma toe tu i luga pe a uma ona afaina faalelagona.
O le fausiaina o le maufetuunai faalelagona a o lei oo i se faalavelave faafuasei e mafai ona fesoasoani e faaitiitia ai le faanoanoa faalemafaufau ma faalelagona mo se taimi umi. O le aoao e pulea o tatou lagona e mafai ai ona tatou lagonaina o tatou lagona, faaaoga lagona e pei o faamatalaga, ma filifili pe faapefea ona tatou tali atu.
Pe a tatou filifili pe faapefea ona tatou tali atu, nai lo le na ona tali atu, o le a sili atu ona tatou galulue i se auala e ogatusa ma le tagata tatou te mananao ia avea ai i tatou—ia sili atu ona ogatusa ma o tatou tulaga faatauaina (tagai i le 2 Nifae 2:26). O le malamalama, lagonaina, ma le puleaina o o tatou lava lagona e mafai ai ona tatou tausia isi. E mafai foi ona tatou mataalia atili a o tatou taumafai e saili punaoa e manaomia.
Uiga o le Maufetuuna’i Faalelagona
O i latou e i ai le maufetuuna’i faalelagona ua atiina ae ni tomai o fetuuna’iga faalelagona, faalemafaufau, ma amioga. Latou te fausia ma faatumauina sootaga saogalemu ma vavalalata. Atonu foi na latou atiina ae ni auala faapitoa e taulima ai e fesoasoani ai ia i latou e fetuunai i aafiaga faigata. Latou te faaaogaina mataupu faavae o le faamoemoe ma le faatuatua e fausia ai lo latou malosiaga faalelagona.
Faatasi ai ma nei tomai, o tagata maufetuunai e sili atu ona saunia e fetuunai i o latou tulaga i se auala e faaitiitia ai le faanoanoa faalelagona ma faalemafaufau.
Aisea e Taua ai le Maufetuuna’i Faalelagona i se Faalavelave Faafuasei?
Pe o se faalavelave faalenatura, maliu e lei faamoemoeina, po o le leai o se galuega, o faalavelave faafuasei e mafai ona avea ma mea matautia e tutupu. O tali masani i nei luitau e aofia ai le faateleina o tulaga o le atuatuvale ma le popole, tulaga faateleina o le fefe ma le leai o se faamoemoe, se lagona faaitiitia o le saogalemu, ma lagona o le ita. E toatele foi tagata e oo i auga faaletino o le mamafatu o le atuatuvale, e pei o le afu, faafaufau, ma le leai o se moe, faapea foi ma le vaivai o talitonuga i la latou tapuaiga po o le taua o le olaga.
O nei tali e mafai ona lofituina. O le tele o le atuatuvale e mafai ona taitai atu ai i le le lelei o le faiga o faaiuga, lea e faigata ai ona tali atu ma le talafeagai i le faalavelave faafuasei. O le lagonaina o le lofituina i lagona faigata e faigata atili ai ona tausia oe lava ma isi ma toe foi atu ai i faiga masani. Afai e tuua ae le togafitia, o lagona lofituina e mafai ona oo atu ai i se faaitiitia o le malosi, faaletonu o sootaga, ma luitau o le soifua maloloina faalemafaufau.
Fausiaina o le Maufetuuna’i Faalelagona a o le’i tupu se Faalavelave
O le fausiaina o le maufetuunai a o lei tupu se faalavelave o se auala lelei lea e saunia ai. O le maufetuunai o le mafaufau e le o se mea e faafuasei, e faapefea la ona e fausia se maufetuunai sili atu?
Mataupu Faavae o Aso Uma
Amata i luitau o loo e feagai ai i le taimi nei. E tusa lava pe e te le o feagai i le taimi nei ma se faalavelave faafuasei, atonu o loo e feagai ma se mea e mafua ai se tulaga o le atuatuvale po o le faavauvau faalemafaufau. O nei tulaga faigata e maua ai avanoa silisili e fausia ai lou maufetuunai faalelagona.
O le maufetuunai faalelagona e fesootai lelei lava i mataupu faavae e pei o le manatu mamafa ma le agaalofa mo le tagata lava ia ma isi. Mafaufau pe mafai faapefea ona faaleleia tulaga faigata i lou olaga pe afai e te faaaogaina atili le agaalofa. E mafai faapefea e le manatu mamafa atili ona fesoasoani? E masani lava, o le faaaogaina o nei mataupu faavae e le suia ai le tulaga, ae e suia ai le ala e te iloa ai ma tali atu ai faalelagona. O lenei mea e faaitiitia ai le atuatuvale ma fausia ai lou maufetuunai faalelagona.
Ae ia i ai ia te outou le onosai, ma talitalia ia puapuaga, faatasi ma le faamoemoe mausali o le a outou mapu mai i o outou puapuaga uma i se aso. (Alema 34:41)
Mauaina o le Malosi i le Alii: Kosi o le Maufetuuna’i Faalelagona
Ua ofoina mai e le Ekalesia se kosi o le ola tutoatasi i le maufetuuna’i faalelagona. I lenei kosi, e mafai ona e aoao atili ai e uiga i le soifua maloloina faalemafaufau, maufetuunai faalelagona, ma le auala e faaaoga ai mataupu faavae o le faamoemoe ma le faatuatua e onosaia atili ai tofotofoga o le olaga. E galulue tagata auai i vaega, lea e fesoasoani e tuuina atu le lagolago faaagafesootai ma le fesootaiga lea e manaomia e tagata e maufetuunai faalelagona ina ia manuia.
E Mafai Faapefea Ona Faateleina Lo’u Maufetuuna’i i se Faalavelave?
Afai o loo e aafia i le taimi nei i se faalavelave faafuasei ma lagona le lofituina i le popole ma le atuatuvale, e i ai mea e mafai ona e faia e faaleleia atili ai lou manuia faalelagona—e tusa lava pe itiiti sou aafiaga muamua i le fausiaina o tomai o le maufetuuna’i.
Faailoa atu ma Lagona Ou Faalogona
Muamua ma le sili ona taua, ia manatua o le i ai o le maufetuunai faalelagona e le faapea o le tapunia po o le le amanaiaina o ou lagona. O tali malolosi faalelagona e mafai ona avea o se vaega masani o se faalavelave. O tagata maufetuuna’i e maua ni tomai lelei o le taulimaina e fesoasoani ia i latou e alualu ai i luma mai o latou luitau. E faapefea la ona e faia lena mea i le lotolotoi o se faalavelave?
Tausi Lelei Lou Tino
I tulaga o faalavelave, e masani lava mo le tino e faaosofia lona tetee, solaaga, po o isi tali mo le puipuiga. Atonu o le a e aafia i le le manuia o le mafaufau, fefe, ita, po o le tapunia faalelagona. Atonu e te le lagonaina le fiaai ma atonu e faigata ona moe. O nei tali e mafai ona fesoasoani e puipuia ai oe i se faalavelave, ae afai e faaumiumi nei aafiaga, e mafai ona le lelei ia tali. O lea ia faamanatu ia te oe lava ina ia fai ni malologa. Fai le mea sili e te mafaia ia lava ai le moe. Ai, inu, ma faamalositino. Manatua e tausia lou tino ina ia mafai ona e faafouina faalemafaufau ma saunia e fesoasoani ia te oe lava ma isi.
Faamalosia Fesootaiga Faaletagata
E taua foi le manatua o le faataitaia o le maufetuunai faalelagona e le tupu i le tuuatoatasi na o oe. O tagata e maufetuuna’i e faalagolago i lagolago faaagafesootai ma faaleagaga. Ia fesootai pea ma le Atua ma i latou o siomiaina oe. Faamalosia lau upegafesootai lagolago, auauna atu i isi, ma uunaia le agaalofa ia te oe lava ma lou nuu. O le fesootai ma le Atua ma isi e fesoasoani e faaitiitia ai tulaga o lou atuatuvale, lea e faaitiitia ai aafiaga mo taimi uumi o se faalavelave faafuasei. Ma aua nei galo ona faafesootai atu ou manaoga. E le taumafai tagata e maufetuuna’i faalelagona e faia e i latou lava; latou te fesili mai mo se fesoasoani pe a manaomia.
Taulai i le Foiaina o Faafitauli
O tagata maufetuuna’i e galulue foi e faatumauina se manatu moni ma lelei. Afai o loo e i ai i le ogatotonu o se faalavelave, atonu e aoga le taulai atu i le foiaina o faafitauli. O le tausia o se vaaiga e faalagolago i sini e mafai ona fesoasoani i lou manuia faalelagona a o e aafia i ni lagona lelei mai le galue agai atu i se sini—e tusa lava pe itiiti lena sini e pei o le ala i luga, faia o se tatalo, ma saunia mo le aso. O le faaaogaina o lou aga malie e mafai foi ona fesoasoani.
O Le Maufetuuna’i Faalelagona o se Tomai Taua o le Sauniuniga
O tagata uma, e tusa lava po o a o latou tulaga, e oo i taimi o faigata. O le maufetuuna’i faalelagona o se tomai taua lea e mafai ona fesoasoani ia te oe e onosaia, fetuunai, ma toe faaleleia mai luitau o le olaga. Ma i tulaga o faigata ogaoga, o le maufetuuna’i faalelagona e mafai ona fesoasoani e faaitiitia ai le faanoanoa mo se taimi umi e mafua mai i le oti ma le faavauvau.
A o e saili ia sili atu ona saunia mo ituaiga uma o tulaga o faalavelave faafuasei, aua e te tuulafoaiina e fausia lou maufetuunai faalelagona. Saili le lagolago faaagafesootai mai au uo ma aiga. A o e faia lena mea, e mafai ona avea oe ma se faataitaiga o le maufetuunai faalelagona lea e musuia ai le fausiaina o tomai o le maufetuuna’i i lou aiga ma le nuu atoa.
Ia outou faamalolosi ma outou lototetele, aua tou te fefefe, aua foi nei matatau i o latou luma: aua o Ieova lou Atua, lua te o faatasi ma ia; na te le tuua na o oe, na te le lafoai ia te oe. (Teuteronome 31:6)