Fuafuaga mo Faalavelave

O Le Faatomuaga

O le mafaufau e uiga i mala faalenatura e mafai ona lagona ai le taufaafefe ma le lofituina. Ae ua folafola mai ia i tatou, “Afai ua outou saunia o le a outou lē matata’u lava” (Mataupu Faavae ma Feagaiga 38:30). O le saunia mo faalavelave faafuasei e mafai ona fesoasoani ia i tatou e lagona atili ai le saogalemu ma mafai ai ona fesoasoani ia i tatou ia tumau i le saogalemu i le mea e mafai ai pe a tulai mai se faalavelave po o se mea e le’i faamoemoeina.

E manaomia sauniuniga i le tele o eria, e aofia ai sauniuniga tautupe, teuina o meaai, malosi fetuunaifaalelagona, ma fuafuaga mo faalavelave faafuasei. Afai e i ai ni a tatou fuafuaga ua faatulaga, e mafai ona tatou saunia pe a tutupu ni faalavelave.

O Le A le Fuafuaga mo Faalavelave?

O fuafuaga mo faalavelave o ni fuafuaga mo le auala o le a e saunia ai ma mea o le a e faia i le tulaga o se faalavelave faalenatura. E aofia ai le teuina o meaai, sapalai o le suavai, ma le manuia faalelagona, ma oo atu ai i le fuafuaina mo le toe faatasia pe a mavae se faalavelave ma se fesootaiga ma tagata o le aiga. O fuafuaga aupito sili ona lelei e faigofie ma puupuu. I le avea ai o se aiga po o se tagata toatasi, e tatau ona outou toe iloiloina ma faafou e le aunoa ia lenei fuafuaga.

Na aoao mai Elder L. Tom Perry, “Amata nei loa ona fatu se fuafuaga pe afai e le o ia te oe se fuafuaga se tasi, pe faafou lau fuafuaga o i ai nei. … O le le mautu i le lalolagi i aso nei ua matua taua ai lo tatou gauai atu i fautuaga ma saunia ai mo le lumanai” (“Afai Ua Saunia Outou, o le a Outou Le Matata’u Ai Lava,” Ensign, Nov. 1995, 37).

Pe a atiina a’e lau fuafuaga mo faalavelave, mafaufau e faafesootai ma fuafuaga a uarota, siteki, ma nuu. Tagai i le Taiala mo Sauniuniga mo Faalavelave Faafuasei a le Siteki ma le Uarota mo nisi faamatalaga e uiga i fuafuaga o faalavelave i la outou eria.

O A Vaega Autu o se Fuafuaga mo Faalavelave?

Ua “uunai’a e le Au Peresitene Sili ia tagata o le Ekalesia i le lalolagi atoa ina ia saunia mo faigata o le olaga e ala i le i ai o se sapalai masani o meaai ma vai ma sina tupe e teuina” (All Is Safely Gathered In). Tatou te le iloa lava po o afea e oo mai ai se faalavelave faalenatura, faafitauli tau i le tamaoaiga, po o isi faalavelave faafuasei. E ala i le faia o se fuafuaga, e mafai ai ona tatou saunia ma mafai ona faateleina le avanoa e ola soifua maloloina ai, maua fesootaiga, ma le saogalemu pe a tulai mai ni faalavelave faalenatura.

Pe a fuafuaina mo faalavelave, e aoga le:

Mafaufau i faalavelave e ono i ai i la outou eria.
Fai se fuafuaga mo faalavelave e ono tutupu ia te oe.
Fai se fuafuaga o fesootaiga ma le toe faatasia.
Mafaufau i manaoga patino faaletino, faalelagona, faalemafaufau, faaleagafesootai, ma faaleagaga o lou aiga.
Faafou au fuafuaga i se tulaga faifai pea.

Tagai i le Taiala o Fuafuaga o Le Sauniuniga mo Faalavelave Faafuasei Faaletagata Lava Ia ma Faaleaiga e saili ai gaoioiga ma siata e fesoasoani ia te oe e faia ai ni fuafuaga.

Teuina o Sapalai mo Faalavelave Faafuasei

Su’e se nofoaga mo le teuina ma faigofie ona maua i ai pepa faamatalaga taua o le aiga, tupe faaleoleo, sapalai o mea mo le tausiga ma faalavelave faafuasei, ma taumafa e teuina.

Tapena se ato mo faalavelave faafuasei mo tagata taitoatasi o le aiga i mea e pei o: aitema masani mo le tumama, lavalava, o moli [light soure], meaai e lamulamu ai, gaoioiga, ma se aitema faamafanafana e fesoasoani ia lagona ai e tamaiti le saogalemu.

Fuafuaga mo le Sailia o le Tasi ma le Isi

Faatulaga se nofoaga saogalemu e faapotopoto i ai le aiga, e o faatasi ma fuafuaga mo le toe faapotopotoina a le uarota, siteki po o le alalafaga. Atofa se nofoaga saogalemu e mafai ai e oe ma lou aiga ona maua le tasi ma le isi pe a mavae se faalavelave faafuasei. O se manatu lelei le filifili ma se isi foi nofoaga. O nofoaga e faapotopoto ai e mafai ona suia e faalagolago lea i le faalavelave po o le mea e te i ai i le taimi e tupu ai le faalavelave.

O lou nofoaga e faapotopoto ai e tatau ona i ai i se mea e mafai e tamaiti ona maua ai se tagata matua faatuatuaina. Siaki e vaai pe o i ai se nofoaga e faapotopoto ai lau uarota po o le siteki mo le toe faatasia o aiga.

Fuafuaga mo Fesootaiga

Faavae ni auala e fesootai ai ma le tasi ma le isi e uiga i lou saogalemu ina ne’i e alu ese mai [ia i latou] i le taimi o le faalavelave. E lelei le i ai o se lisi o tagata o aiga, uo, tuaoi, taitai o le Ekalesia, ma punaoa a le nuu. Mafaufau e tauloto numera o telefoni ina ne’i le maua lau lisi o numera e faafesootai ai [tagata]. Fuafua nisi auala e faafesootai ai pe afai e le mafai ona e faia se telefoni.

A mavae se faalavelave, e ono faigata ona faia ni fesootaiga i totonu o le eria. E masani ona faigofie atu le faia o ni valaau mamao. Ia tofi se tagata o lou aiga i se isi nuu e fai ma tagata faafesootai i fafo atu. Fuafua mo tagata uma o le aiga e faafesootai lena tagata. E mafai ona latou faailoa atu lo latou tulaga ma le nofoaga i le tagata lena e i fafo atu, lea e mafai ona fesoasoani e faailoa atu i isi na faamatalaga.

Fai se Kata o Faamatalaga mo Faalavelave Faafuasei mo tamaiti taitoatasi ia i ai le faailoaga faigofie [o le igoa], faamatalaga mo fesootaiga ma faalefomai, ma faamatalaga o auala e fesootai ai pea i le taimi o se faalavelave. E mafai ona teuina lenei mea i se pusa mo faalavelave faafuasei po o se atofaafafa, pe e mafai e lau fanau ona aveina faatasi ma i latou. E mafai ona fesoasoani lenei mea i le tagata fesoasoani muamua e faafesootai ai lou aiga i le taimi o se faalavelave.

Fuafuaga mo le Aveeseina

Faailoa po o fea e agai i ai i le taimi e tatau ai ona o ese. Fai se faafanua o auala autu ma se isi auala agai i nei nofoaga. Fai se iloiloga o nei auala faatasi ma lou aiga.

Mafaufau e tapena se ato mo faalavelave faafuasei lea e faigofie ona ave faatasi ma oe i le fuafuaga o le malaga ese atu. O nisi o aitema i lau ato mo faalavelave faafuasei e mafai ona aofia ai:

Pusa o le fesoasoani muamua
Vailaau Faafomai
Vai
Moliuila
Ofu ma palanikeke faaopoopo
Aitema faamafanafana mo le tagata lava ia ma tamaiti

Fai se faataitaiga o le o ese atu ma lou aiga. Ia faaalu e oe ma lou aiga le 10 minute e aumai ai tou “ato e ave” ma agai loa i luga o le auala e o agai i le nofoaga ua fuafua e o i ai.

Pe a Mavae se Faalavelave

O le taimi lava e mae’a ai se faalavelave faafuasei:

Ia maua le tausiga faafomai mo i latou na manunu’a po o ē e i ai ni luitau o le soifua maloloina.
Ia mautinoa e mafai ona e maua se sapalai o mea autu e manaomia ma auaunaga—e pei o meaai, malutaga le tumau, mea mo le faleese, ma lavalava.
Fesoasoani e su’e ma toefaatasia tagata o aiga o e na vavaeeseina mai isi tagata uma o le aiga.
Iloilo ma lipoti atu i uso ma tuafafine o auaunaga po o isi taitai o le Ekalesia le tulaga o tagata taitoatasi o le aiga.

O le taimi lava e mae’a ai se faalavelave faafuasei:

Tuu atu le fesoasoani i tagata o le aiga o loo puapuagatia, ua faaleagaina fale po o meatotino, po o e ua oo i le le mautonu faalelagona po ua faaleagaina faato’aga ma lafumanu.
Siaki i se tagata tausi soifua o gasegase o le mafaufau mo i latou e lagonaina le lofituina po o le maualuga o le faanoanoa.