Fanga Kiʻi Tokoni ki Hono Maʻu ha Mālohi Fakatāutahá mo Hono Tokoniʻi ʻo e Niʻihi Kehé

Talateu

ʻI he fehangahangai mo e ngaahi faingataʻá, ʻoku angamaheni ke ke aʻusia ha ngaahi ongo kehekehe, ʻo kau ai ʻa e loto-mafasiá, loto-hohaʻá, loto-taʻotaʻomiá mo e tuenoá. Ki ha niʻihi, ʻe nounou mo fakataimi pē ʻa e ngaahi ongo ko ʻení, ka ki ha niʻihi kehe, ʻe lava ke taimi lōloa mo tuʻuloa ʻa e ngaahi ongo ko ʻení. Kapau ʻokú ke fehangahangai maʻu pē mo e ngaahi faingataʻa ʻoku fakatupu lōmekina ki hoʻo tuʻunga moʻui lelei fakasōsialé pe fakaelotó, mahalo ʻe ala sai ke ke fakakaukau ke talanoa mo ha tokotaha palōfesinale. Tatau ai pē pe ko e hā hono tuʻo lahi hoʻo fehangahangai mo e ngaahi ʻahiʻahi faingataʻá, ʻoku ʻi ai ha fanga kiʻi founga faingofua ʻe lava ke tokoni ki he tokangaekina fakaelotó.

Te u Maʻu Fēfē ha Mālohi ʻi he Ngaahi Taimi Faingataʻá?

• Fetuʻutaki mo ha taha ʻokú ke falala ki ai.

• Fakafoʻou ho laumālié ʻi he lotu, fakalaulauloto, fakakaukau lelei mo e tokangaekina ʻi he manavaʻofa kiate kita mo e niʻihi kehé.

• Tokanga taha ki he ngaahi meʻa ʻi hoʻo moʻuí ʻoku lele leleí pea ʻokú ke lava ʻo mapuleʻí.

• Fakakaukauloto ki he meʻa ʻoku mahuʻinga kiate koé.

• Hokohoko atu hono fakaʻaongaʻi ʻo e ngaahi founga lelei ʻokú ke ʻilo ʻoku ʻaongá.

Ko e Hā Te u Lava ʻo Fai ke Fakasiʻisiʻi ʻa e Loto-mafasiá?

ʻI he taimi ʻokú ke aʻusia ai ʻa e ngaahi ongoʻi loto-mafasiá, ʻe lava ke tokoni ʻa e ngaahi ʻekitivitī hangē ko e fakamālohisinó, feohi fakasōsialé, maʻu ha mohe feʻungá, mo e kai ha meʻakai fakatupu moʻui leleí. Fakakaukau angé ki he ngaahi meʻa ko ʻení:

• Mānava mo faofao.

• Fai ha ʻekitivitī fakanonga, hangē ko e ʻioká (yoga) pe tai sií (tai chi).

• Tuku haʻo kiʻi taimi ke ke kiʻi mohe, mālōlō, pe fakaakeake.

• Lau pe fanongo ki he mītia ʻoku fakatupulakí.

• Inu ʻa e vaí ke lahi pea kai ʻa e ngaahi meʻakai ʻoku moʻui leleí.

• Fai ha ngaahi ʻekitivitī fakafiefia mo e niʻihi kehé.

• Fanongo, tā, pe hivaʻi ha ngaahi fasi ʻoku ueʻi fakalaumālié.

• Kiʻi mālōlō fakataimi mei he mītiá mo e ngaahi ongoongó.

• ʻAlu ʻo luelue pe fai ha faʻahinga fakamālohisino ʻe taha.

• Tohi ʻa e meʻa ʻokú ke houngaʻia aí.

• Kumi ha ngaahi founga ke ngāue mo tokoni ai ki he niʻihi kehé (vakai, JustServe.org).

• Kumi ha ngaahi fakakaukau mo ha ngaahi maʻuʻanga tokoni lahi ange ʻi he HowRightNow.org.

Te u Lava Fēfē ʻo Tokoni ki he Niʻihi Kehe ʻOku Nau Fehangahangai mo e Ngaahi Taimi Faingataʻá?

• Fakahaaʻi ʻa e manavaʻofá: Fakahaaʻi ʻokú ke tokanga. ʻE lava ke tokoni pē ʻa e ʻi ai tonú.

• Fakafanongo: Tuku ke fakahaaʻi ʻa e ngaahi fakakaukaú mo e ongó.

• Fakahaaʻi ʻa e manavaʻofá: Fakahaaʻi ʻokú ke feinga ke maʻu ha mahino, pea tokoniʻi kinautolu ke nau ongoʻi ʻoku sai pē kapau ʻoku ʻikai ke nau ongoʻi sai ʻi he taimí ni.

• Aleaʻi ha ngaahi founga ke matuʻuaki ʻaki: Talanoa fekauʻaki mo e ngaahi tōʻonga moʻui leleí, kau ai ʻa e meʻakai fakatupu moʻui leleí, maʻu ha vai feʻungá, haisiní, fakamālohisinó, mohé mo e ngaahi faitoʻo ʻoku ʻomi mei he toketaá.

• ʻOatu ha ʻamanaki lelei: Vahevahe ha fakalotolahi, poupou mo ha ngaahi maʻuʻanga tokoni.

Ko e Hā ha Meʻa Te U Lava ʻo Talaange ki ha Taha ʻOku Faingataʻaʻia Fakaeloto?

ʻOku manavasiʻi ha kakai ʻe niʻihi te nau lea ʻaki ʻa e meʻa hala ki ha taha ʻoku fehangahangai mo ha ngaahi faingataʻa. ʻE lava ke nau hohaʻa naʻa nau toe fakalahi atu ki he ngaahi fakakaukau ʻo e loto-mafasiá pe taonakitá. ʻOku mahuʻinga ke ke fakapapauʻi ʻoku ʻiloʻi ʻe he niʻihi fakafoʻituitui ʻoku faingataʻaʻiá ʻokú ke ʻi ai ke tokoniʻi kinautolu. Ko e fetuʻutaki ʻi he manavaʻofá ʻe lava ke iku ia ki ha ngaahi fetalanoaʻaki lelei mo ʻaonga.

Ko e ngaahi meʻa ʻeni ʻe niʻihi te ke lava ʻo lea ʻakí:

• ʻOku ou ʻofa mo tokanga atu kiate koe.

• ʻOku ʻikai mahino kakato kiate au, ka ʻoku ou tokanga atu.

• ʻOku ou ʻi hení ke tokoni atu, pea te u lava ʻo fanongo.

• Ko e hā hoʻo ngaahi founga ke matuʻuaki ʻakí?

• Ko e hā ha ngaahi hohaʻa ʻokú ke maʻu ʻi he taimí ni?

• Ko e hā ha meʻa kuó ne tokoniʻi koe ʻi he kuohilí?

• Ko e hā ha ngaahi meʻa ʻokú ke hohaʻa ki ai fekauʻaki mo e kahaʻú?

• ʻOku ou ʻi heni mo koe pea ke tokoni atu.

• ʻOku sai pē ke ke ongoʻi ʻa e meʻa ʻokú ke ongoʻí.

• ʻOku ou ʻilo ha kakai te nau lava ʻo tokoni.

Ngaahi Maʻuʻanga Tokoni Kehé

“Discussion Guide: How Can I Minister to Others During a Crisis? (Fakahinohino ki he Fealēleaʻakí: Te u Lava Fēfē ʻo Ngāue Fakaetauhi ki he Niʻihi Kehé Lolotonga ha Faingataʻa?)”

“Ngaahi Maʻuʻanga Tokoni Faifaleʻí,” ʻi he Ngaahi Maʻuʻanga Tokoni Faifaleʻí, Gospel Library