“Sauniuniga mo Faalavelave Faafuasei ma Meafaigaluega e Tali Atu ai mo Taitai,” Sauniuniga mo Faalavelave Faafuasei (2023)

Sauniuniga mo Faalavelave Faafuasei ma Meafaigaluega e Tali Atu ai mo Taitai

Puleaina o Taumafaiga Volenitia

Pe a talosagaina e se siteki ua aafia ni volenitia mai isi siteki e fesoasoani i le faamamaaga i le mavae ai o se faalavelave, o talosaga e tatau ona mo se aofaiga faapitoa o volenitia e faia se galuega faatino faapitoa e mua’i faailoa atu, lea ua saunia mo i latou pe a latou taunuu.

E pei ona faatonuina ai e taitai o le Ekalesia i le lotoifale, o tofitofiga e mafai ona aofia ai:

Faatonu—e faia aoaoga faamasani ma volenitia, taitaia le galuega, faia faaiuga pe a manaomia, faamautinoa le saogalemu o volenitia, ma ia mautinoa ua faamaumauina ma lipoti atu itula.
Taitai Faamaopoopo Fesoasoani Muamua/Soifua Maloloina—e tuuina atu le fesoasoani muamua, meaai paleni, ma le vai i volenitia o e manaomiaina.
Taitai o Vaega—e taitai vaega e 2–20 tagata. O taitai o vaega e tatau ona saunia e iunite o loo tali atu. E faamautinoa e taitai o vaega taitasi ua lava mea e fai e tagata uma o le vaega, o loo i ai masini sa’o, ma o loo ola. A mae’a tofitofiga o galuega, e faatulaga e le taitai o le vaega ni tofitofiga fou. Na te filifili pe faapefea ona faaaoga lelei ia punaoa a le vaega. O taitai o vaega e nafa ma le lipotia o le tulaga o le faasologa o galuega taitasi, faamae’aina o Faamaumauga Galuega a le Aufaigaluega, talosagaina o nisi volenitia faaopoopo pe a manaomia, ma le fuafuaina o le saogalemu o fale taitasi a o le’i tuuina atu le auaunaga.
Supavaisa o Fanua—e o atu i pitonuu ua aafia, toe tuuina atu lipoti i le nofoaga autu e faagaoioia ai, tofi pe toe tofia ni volenitia, ma fesoasoani ia mautinoa ua tofu vaega uma ma ni tofiga ma ia faaauau pea le galuega.
Taitai Faamaopoopo o Sapalai—e faapotopoto ma pulea meafaigaluega ma sapalai, e aofia ai sapalai o fesoasoani muamua. (Tagai i “Typical Flood Damage Cleanup Items,” o loo i lalo.)
Tusitala/Tusitalafaasolopito—e pue ata o volenitia i tulaga uma ma i nofoaga uma. E masani lava e le galulue i latou ma se vaega e tasi ae faaaofia ai le eria atoa ua aafia.

Pe a taunuu atu i le nofoaga atofaina, e tatau ona i ai se faatonu po o se taitai volenitia e faamautinoa o loo lelei ona faia ni aoaoga faamasani a volenitia uma i a latou galuega, e aofia ai le faaaogaina o fomu o le Faavasegaga ma le Oka o Galuega, ma ia taulimaina soo se atugaluga o le saogalemu.

E masani ona taunuu mai volenitia i taimi eseese; o le mea lea, o aoaoga e manaomia ona faifai pea ma e tatau ona faatulaga ina ia le faatalitali ai volenitia mo aoaoga faamasani. O le tele o faiaoga e mafai ona faia aoaoga faamasani vave, i le taimi lava e tasi mo le toatele o volenitia.

O volenitia e tatau ona “siaki i totonu” ma “siaki i fafo” i le nofoaga o galuega faatino o auaunaga. O ’au faigaluega e tatau ona faatulagaina ma faamaumauina e uarota po o siteki.

Faamatalaga e tuuina atu i volenitia:

O se faamatalaga o le tulaga ma le galuega ina ia faataunuuina
Fautuaga o mea e aumai: masini, lavalava, sapalai faaletagata lava ia, meaai ma vai, ma isi mea faapena
Faamatalaga e uiga i fuafuaga mo le moe, mauaina o faletaele ma faleletaua, ma isi mea faapena
Kopi o le pepa o faamatalaga ua faaautuina “Taiala mo le Faamamaina [pe a uma se] Faalavelave—Volenitia a le Ekalesia”
Faamalamalamaga o volenitia o le Ekalesia e tatau ona fesoasoani i le faamamaina, ae le o le toefauina
Faamatalaga faafesootai mo le taitai faamaopoopo volenitia o le siteki e tali atu i faalavelave
O se faamanatu e le tatau i volenitia ona talai a o faatinoina le auaunaga

Faamatalaga e ao mai i le galuega faatino:

O le aofai o volenitia ma itula na auauna atu ai (ina ia faamaumauina ma lipotia mai laina o le perisitua)
Igoa ma le numera o telefoni a tagata taitoatasi o loo faamaopoopoina taumafaiga volenitia
Nofoaga o le galuega faatino
Umi o le galuega faatino

Isi Iloiloga:

Faatulagaga o mea e momoe ai.
Mauaina o fale taele ma faleleta’ua.
Femalagaaiga, meaai, masini vai, ma isi mea faapena.
O le autalavou (10-18 tausaga) e mafai ona auai i galuega faatino ma isi gaoioiga fesoasoani mo faalavelave, e aofia ai galuega faatino faamama, nofoaga autu mo foai, ma le aoina o meaai.
E tatau i taitai i le lotoifale ona faailoa atu ma le faaeteete le galuega ma tuuina atu le taitaiga i matua mo le faatagaina o le autalavou. O se iloiloga ma le faaeteete e tatau ona tuuina atu i le autalavou e galulue i galuega faatino faigata o le “faamama ese”.
E tele galuega e mafai e tagata e i ai manaoga faapitoa ona auai ma lagona le faamalieina i le auauna atu i isi (mo se faataitaiga, nofoaga autu mo valaau, nofoaga autu mo foai, sauniaina o meaai, ma le faagaoioiga o malutaga).

E Mafai Faapefea Ona Ou Fesoasoani i Isi Ina ia Saunia?

VOAD (e matele lava i le IS): O Faalapotopotoga Ofofua e Galulue i Faalavelave (VOAD) e faamaopoopoina taumafaiga laveai i le va o sui ofofua atu, vaega e mai i ekalesia, ma faalapotopotoga a le malo e aofia ai i le tali atu i faalavelave.

Taiala mo Sui o le Ekalesia i le VOAD

Aisea e auai ai le Ekalesia i le VOAD?

O Le Ekalesia a Iesu Keriso o le Au Paia o Aso e Gata Ai o ia o se sui o le faalapotopotoga a le National VOAD ma e lagolagoina le tulaga ma le misiona a le VOAD. E ala i le auai i le VOAD, ua avea ai le Ekalesia o se vaega aloaia o le nuu e tali atu i faalavelave faafuasei i le Iunaite Setete.

O faalapotopotoga e pei o le Koluse Mumu ma le Salvation Army o ni sui auai toaaga foi o le VOAD. O le tele o faalapotopotoga faalemalo, setete, ma le lotoifale e aofia ai le Homeland Security ma le FEMA e auai malosi foi i taumafaiga sauniuni ma faamaopoopoga. E taua le atiina a’e o sootaga galulue ma isi faalapotopotoga e tali atu ai a o le’i tulai mai se faalavelave faafuasei po o se faalavelave.

O le a le VOAD a le setete?

Ua vaevaeina le faalapotopotoga a le National VOAD i mataupu tau setete. O loo i ai se vaega VOAD o le setete i setete taitasi e 50. O nisi o setete toatele atu e sili atu ma le tasi le vaega. O le tele o vaega o le VOAD o le setete e potopoto i se tulaga faalemasina e talanoaina ai taumafaiga sauniuni ma le faamaopoopoga. Ua uunaia le tagata tomai faapitoa o le VOAD ua tofia e auai i fonotaga faalemasina a le VOAD. O faamatalaga i mataupu taitasi o le setete e mafai ona maua i luga o le uepisaite a le National VOAD.

O a matafaioi o se tagata tomai faapitoa o se VOAD?

O le tagata tomai faapitoa o le VOAD ua tofia e tatau ona avea ma se tagata toaga o le vaega VOAD a lona setete e ala i le faia o mea nei:

Auai i fonotaga faalemasina.
Totogi aitalafu pe a manaomia (faamolemole faafesootai le pule o le uelefea a le eria mo nisi faamatalaga).
Auai i konefesi faavitio a o le’i faia ma pe a mavae mala.
Ofo atu le fesoasoani a le Ekalesia pe a talafeagai ai.

O le a se mea e mafai ona tuuina mai e le Ekalesia?

I lalo o le taitaiga a le Fitugafulu Eria i le eria na aafia, e mafai e le pule o le uelefea a le eria ma le tagata tomai faapitoa o le VOAD ona talosagaina le fesoasoani lenei:

Galulue volenitia
Meaai ma vai
Palanikeke
Sapalai masani faafomai
Sapalai faamama
Sapalai mo le tumama
Fautuaga mo faalavelave ma le lagolago faalelagona mai Tautua mo Aiga
Malutaga le tumau

Tagai i le FEMA Emergency Management Institute mo punaoa ma aoaoga faaopoopo.