O Punaoa o le Ekalesia
O Le Faatomuaga
E i ai taimi e oo mai ai tofotofoga ma faigata i o tatou olaga, ma e ui e mafai ona avea lenei mea o se taimi faigata, e taua le iloa e le o tuua na o oe. Na aoao mai Keriso “Ia outou o mai ia te a’u, o outou uma ua tigaina ma mafatia i avega” (Mataio 11:28–30). O loo i ai taitai ma punaoa i le lotoifale o loo avanoa mo oe i nei taimi faigata. E i ai a tatou punaoa e fesoasoani ai i tulaga eseese, e aofia ai le saunia mo ma le tali atu i tulaga o faalavelave faafuasei.
O A Meaai o Loo Maua i le Fale Teuoloa a Epikopo?
Ua i ai i le epikopo le tiutetauave e tausia ai e matitiva ma e le tagolima i totonu o tuaoi o lana uarota. O se tasi o punaoa o loo avanoa e faataunuu ai lenei galuega o le fale teuoloa a epikopo—o se nofoaga e mafai ona o i ai i latou e le tagolima e maua ai meaai ma isi sapalai i le fautuaina atu e lo latou epikopo.
O fale teuoloa e maua ai ituaiga o oloa lava e tasi o loo maua i soo se faleoloa, e aofia ai oloa tuuapa, mea faamanogi meaai, oloa e kukaina, fualaauaina taumafa mata ma fualaau faisua, susu, aano o manufasi, ma pasa. O loo maua foi oloa mo le tumama faaletagata lava ia ma sapalai o le faamamaina o le fale.
O Fea E Mafai Ona Ou Maua ai se Fale Teuoloa a Epikopo e latalata mai ia te A’u?
E taua le iloa o nei fale teuoloa o loo i ai i eria eseese i Amerika i Matu ma Saute. I fafo atu o le IS, o loo i ai foi nisi o faleoloa e i ai konekarate e faaaoga o ni fale teuoloa a le Epikopo. Faafesootai atu lou Epikopo po o le Peresitene o le paranesi e vaai po o a filifiliga o loo maua i la outou eria.
E Mafai Faapefea Ona Ou Maua le Fesoasoani mai O’u Taitai o le Lotoifale?
Afai o loo e tauivi ma se faalavelave faafuasei, e le tuua lava na o oe. Ua saunia taitai i le lotoifale e fesoasoani ia te oe. O le peresitene o le Aualofa po o le peresitene o le korama a toeaiina o taitai i le potopotoga ua aoaoina e fesoasoani i tagata taitoatasi i le uarota. E mafai ona latou fesoasoani e faatumu fomu mo ‘oka o meaai, galulue faatasi ma le epikopo e faatulaga se fesoasoani i le Tautua mo Aiga, ma tuuina atu le taitaiga i le auala e taulima ai tulaga patino.
“E Mafai Faapefea ona Ou Fesoasoani i Isi o se Taitai o le Lotoifale?”
I lalo o le taitaiga o ki talafeagai o le perisitua ma faatasi ai ma le taitaiga a aufono talafeagai, e mafai ai e fanau a le Atua ona maua faamanuiaga e ala i nei punaoa e ala i le aapa atu i o latou nuu ma auauna atu i le ala a le Alii. O nisi o na meafaigaluega ma punaoa e aofia ai vaega o le ola tutoatasi, vaega o le toe faaleleia o olaga mai le tagofia o mea ua fai ma vaisu, ma vaega o le maufetuunai faalelagona, faatasi ai ma le tele o isi mea. Afai e manao lau uarota po o le siteki e faaaoga nei meafaigaluega ma punaoa i lou nuu i le lotoifale, kiliki iinei e fesoasoani ia te oe e amata ai.
O Fea e Mafai ona Ou Maua ai Fautuaga mo se Faafitauli o le Soifua Maloloina Faalemafaufau?
E fesoasoani le Tautua mo Aiga i taitai o le Ekalesia e tausia tagata taitoatasi ma luitau faaleagafesootai ma faalelagona e ala i le tuuina atu o punaoa e ogatusa ma mataupu faavae o le talalelei.
E mafai e le Tautua mo Aiga ona tuuina atu le lagolago o le soifua maloloina faaleagafesootai, faalelagona, ma faalemafaufau pe a mavae se faalavelave po o se mala. Pe a oo i luitau ia e le mafai ona tatou puleaina, e tofu i tatou ma auala eseese e tali atu ai. O nisi taimi tatou te tauivi ai, ma e le afaina lena mea. I nisi taimi, atonu tatou te tali atu ma le malosi e ala i le faaaogaina o o tatou malosiaga ma punaoa. E le o se mea e le masani ai mo i tatou le tali atu ma se tuufaatasiga o tauiviga ma malosiaga.
O auaunaga tau fesootaiga mo le tali atu i faalavelave faafuasei e taulai atu i le faaalia o le agaalofa, faailoaina ma le faatulagaina o le tali atu, tuuina atu o auala masani e taulimaina ai, sailia o auala e lagolago ai isi (tamaiti, tagata matutua, auaunaga), ma le tuuina atu o le faamoemoe ma punaoa. O le tali i fesootaiga-lagolago mo faalavelave faafuasei e le manaomia ai ni pepa o galuega po o se totogi.
O isi auaunaga e aofia ai:
-
Auaunaga o Feutagaiga mo Taitai o le Ekalesia
-
Fesoasoaniga mo le KOVITI‑19
-
O Auaunaga Faafautuaga
-
O Vaega Lagolagosua
-
O Auaunaga Faalemafaufau ma Agafesootai o Le Tali Atu i Faalavelave Faafuasei
O Sapalai mo le Tali Atu i Faalavelave Faafuasei
O faalavelave faafuasei e masani ona aumaia ai luitau e le’i faamoemoeina, ae ua saunia taitai i le lotoifale e fesoasoani mo sapalai e manaomia i le taimi o nei tulaga. Afai o loo e i ai i se tulaga o faalavelave faafuasei, e mafai e le Ekalesia ona saunia ni pusa faamama ma isi sapalai e tali atu ai i faalavelave faafuasei. E mafai e taitai i le lotoifale ona fesoasoani e talosaga nei aitema e ala i lo latou galulue faatasi ma le sui o le uelefea ma le ola tutoatasi.