Introduction

Xtikib’ankil

Welcome to EnglishConnect!

Sahil k’ulunik choq’ aawe sa’ EnglishConnect!

EnglishConnect nak’anjelak reheb’ li neke’xsik’ xchaab’ilob’resinkil lix yu’ameb’ rik’in xtzolb’al li Ingles. Jalan jalanqo ut jalan jalanqeb’ li qatinob’aal. Jalan jalanq li qaseeb’al rik’in li Ingles, a’b’an sa’ komonil tooruuq chixtz’aqob’resinkileb’ ru li qameta.

Why Are You Learning English?

K’a’ut naq yookat chixtzolb’al li Ingles?

Wi wan aawajom, a’an naru nakatxtenq’a chixjayalinkil ut chixwaklesinkil aawib’. Qatz’ilaq rix k’a’ut naq yookat chixtzolb’al li Ingles. Ma nakawaj jun chik li trab’aaj li chaab’il wi’chik? Ma tento taatzol li Ingles re naq tatruuq chi xik sa’ junaq tzoleb’aal? K’e aahoonal re xtz’iib’ankil k’a’ut naq yookat chixtzolb’al li Ingles.

Nawaj xtzolb’al li Ingles xb’aan naq:

Xtzolb’al li Ingles naru nakatxtenq’a rik’in li tzolok, li trab’ajik, li tenq’ank, ut xtawb’aleb’ li amiiw. EnglishConnect naru nakatxtenq’a rik’ineb’ laa meta.

What Is EnglishConnect?

K’a’ru li EnglishConnect?

EnglishConnect a’an jun k’anjeleb’aal re xtzolb’al li Ingles li k’uub’anb’il xb’aan Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Xk’uub’aman EnglishConnect re aatenq’ankil chixnimob’resinkil laa seeb’al rik’in li Ingles rik’in paab’aal, wank sa’ komonil, ut k’iik. A’in naraj naxye naq moko aajunes ta tatwanq. Tattzoloq aawochb’eeneb’ chik li kristiaan ut teetenq’a eerib’ ut teewaklesi eech’ool cherib’il eerib’. Tatruuq ajwi’ chixnimob’resinkil laa paab’aal naq li Dios naru nakatxtenq’a chi tzolok.

Wankeb’ junjunq chi tasal sa’ EnglishConnect. EnglishConnect 1 ut 2 neke’xtenq’aheb’ laj tzolonel chixtawb’al xseeb’aleb’ rik’in li Ingles. EnglishConnect 3 naxkawresiheb’ laj tzolonel chi tzolok—tz’aqal wi’chik sa’ BYU–Pathway Worldwide. Naru nakataw xkomon chik li na’leb’ chirix BYU–Pathway sa’ byupathway.org. Tzol xkomon chik chirix EnglishConnect sa’ englishconnect.org.

What Makes EnglishConnect Unique?

Chan ru naq jalan EnglishConnect?

Sa’ EnglishConnect, naqanimob’resi li qaseeb’al chiroksinkil li Ingles sa’ jun na’ajej re paab’ank, k’ulub’ank, ut k’iik.

Faith

Li paab’aal

Sa’ EnglishConnect, naqataw qana’leb’ rik’in li tzolok jo’ ajwi’ li paab’aal. Sa’ xtiklajik li junjunq chi tzolok wan jun na’leb’ re tzolok. A’aneb’ a’in musiq’ejil na’leb’ li nokohe’xtenq’a chixkanab’ankil naq li Dios tixnimob’resi li qawankilal chi tzolok. Li nakapaab’ chirix laa wankilal chi tzolok jwal tixjal li taab’aanu ut li taatzol. Eb’ li na’leb’ re tzolok naru nakate’xtenq’a chixtawb’al ru laa tz’aqal wankilal ut lix seeb’al li Dios re aatenq’ankil. A’aneb’ a’in li na’leb’ li taatzol:

Laa’at jun ralal li Dios

“Laa’in jun ralal li Dios ut wan lin junelikil wankilal ut ajom.”

(chi’ilmanq Romanos 8:16–17; Li Junkab’al: Jun Jek’inb’il Aatin choq’ re li Ruchich’och’)

Xk’anjelankil li paabʼaal chirix li Jesukristo

“Li Jesukristo naru nikinixtenq’a chixb’aanunkil chixjunil naq nink’anjela lin paab’aal chirix a’an.”

(chi’ilmanq Filipenses 4:13; Eter 12:27; Moroni 7:33)

Xk’ulb’al li teneb’ank

“Wan xtaql inch’ool, ut teneb’anb’il sa’ inb’een laa’in li k’a’ru tintzol.”

(chi’ilmanq 2 Nefi 2:14, 16; Tzol’leb’ ut Sumwank 58:27–28)

Xraab’al ut xtzolb’al qib’ chiqib’il qib’

“Naru nintaw inna’leb’ rik’in li Musiq’ej naq ninrahok, nink’utuk, ut nintzolok wochb’eeneb’ li was wiitz’in.”

(chi’ilmanq Jwan 13:34–35; Jwan 14:26–27; Tzol’leb’ ut Sumwank 88:77, 88:122–123)

Xik chi uub’ej

“Chi tenq’anb’ilin xb’aan li Dios, naru ninxik chi uub’ej us ta wankeb’ li ch’a’ajkilal.”

(chi’ilmanq 2 Nefi 31:20; 2 Nefi 32:9; Tzol’leb’ ut Sumwank 50:41–42)

Aatinak rik’in li Qaawa’

“Ninchaab’ilob’resi lin tzolb’al naq nin’aatinak rik’in li Dios wulaj wulaj chirix li ninb’aanu.”

(chi’ilmanq Proverbios 3:5–6; Mateo 7:7–8; Alma 37:37)

Eb’ li na’leb’ re tzolok a’aneb’ xyehom li yaal. Naru nakayeheb’ a’in aawe naq nakawaj ru naq taawaklesiiq aach’ool. Naq nakawoksiheb’ li na’leb’ a’in, laa seeb’al chi tzolok taanimanq. Taanaw naq rik’in xtenq’ li Dios, naru nakatz’aqob’resi ruheb’ laa meta.

Fellowship

Wank sa’ komonil

Jun raqal re EnglishConnect li aajel ru, a’an li tzolok sa’ komonil. Eb’ li ch’uut re EnglishConnect neke’xra, neke’xtenq’a, ut neke’xwaklesi xch’ooleb’ chirib’ileb’ rib’. Sa’eb’ lix ch’utam laa ch’uut naru nakayal aatinak sa’ Ingles, ut us ta taawanq aamajelal, moko taaraqe’q ta aatin chawix. Li tz’aqonk sa’ jun ch’uut re EnglishConnect naru nakatxtenq’a chixyalb’al aaq’e ut chixtawb’aleb’ laa wamiiw.

Growth

Li k’iik

EnglishConnect maawa’ ka’ajwi’ jun k’anjeleb’aal re xtzolb’al li Ingles. Maak’a’ naxye b’ar yookat chixtikib’ankil, li k’a’ru taanumsi tatxtenq’a chi chaab’ilo’k jo’ aj tzolonel. Taawanq aahoonal re:

• Xyalb’al roksinkil li Ingles wulaj wulaj.

• Xk’eeb’al reetal laa k’iijik.

• Tzolok rik’ineb’ li kristiaan.

• Tijok chiru li Dios re naq tatxtenq’a chixtz’aqob’resinkileb’ ru laa meta.

What Will I Do in EnglishConnect?

K’a’ru tinb’aanu sa’ EnglishConnect?

Sa’ EnglishConnect, tattzoloq sa’ junesal, taayal aatinak sa’ ch’uut wulaj wulaj, ut taayal roksinkil li nakatzol wulaj wulaj. Li junjunq tzolok sa’ li hu re tzolok re EnglishConnect wan wiib’ xjachal—“Tzolok sa’ junesal” ut “Aatinak sa’ ch’uut.”

Personal Study

Tzolok sa’ junesal

Li raqal “Tzolok sa’ junesal” nakatxkawresi chi aatinak sa’ ch’uut. Sa’ “Tzolok sa’ junesal,” nakab’aanuheb’ li k’anjel a’in:

Study the Principle of Learning

Xtzolb’al li na’leb’ re tzolok

Sa’ li junjunq tzolok wan jun na’leb’ re tzolok. A’aneb’ a’in musiq’ejil na’leb’ li tate’xtenq’a chi k’anjelak aawochb’een li Dios sa’ xtzolb’al li Ingles. Naq maji’ wanqat sa’ laa ch’uut re aatinak, il li na’leb’ re tzolok, k’oxlaheb’ li patz’om, ut tz’iib’a li na’leb’ nakak’ul.

Memorize Vocabulary

Xtzolb’al sa’ aach’ool eb’ li aatin

Tzol li naraj naxye ut chan ru nayaab’asiman li junjunq chi aatin. Oksiheb’ li aatin re xyalb’al roksinkileb’ li eetalil. Naru ajwi’ nakasik’ xkomoneb’ chik li aatin li naru neke’oksiman sa’ li eetalil.

Practice the Patterns

Xyalb’al roksinkileb’ li eetalil

Sa’ xtiklajik, tzoleb’ sa’ aach’ool li reetalileb’ li ch’ol aatin. Chirix a’an, oksiheb’ li eetalil re xk’oxlankileb’ ak’il patz’om ut sumehom. Naru nakak’e jalaneb’ chik aatin re li tusleb’aal aatin sa’ xna’ajeb’ li aatin li wankeb’ xjuch’ chirub’eleb’. Yaab’asiheb’ k’iila sut toj reetal naq naru nakawoksiheb’ li eetalil chi us re patz’ok ut re sumenk.

Conversation Group

Aatinak sa’ ch’uut

Sa’ li raqal “Aatinak sa’ ch’uut” wankeb’ li kok’ k’anjel taawoksi re tzolok rik’ineb’ laa wech aj tzolonel. Sa’ li “Aatinak sa’ ch’uut,” nakab’aanuheb’ li kok’ k’anjel a’in:

Discuss the Principle of Learning (20–30 minutes)

Aatinak chirix li na’leb’ re tzolok (20–30 k’asal)

Sa’ laa ch’uut, ilomaq ut aatinanqex chirix li na’leb’ re tzolok. A’an a’in jun hoonal re wotzok ut tzolok rik’ineb’ laa was aawiitz’in.

Activities

Kok’ k’anjel

Sa’eb’ li kok’ k’anjel 1, 2, ut 3, oksiheb’ li aatin ut reetalileb’ li ch’ol aatin re aatinak. Eb’ li kok’ k’anjel a’in tate’xtenq’a re naq ink’a’ yal taaye li xatzol, tat-ok b’an chixyeeb’al xkomon chik li k’oxlanb’il tz’aqal aab’aan laa’at. Li junjunq chi k’anjel tatxkawresi choq’ re li k’anjel jun chik.

Activity 1: Practice the Patterns (10–15 minutes)

K’anjel 1: Xyalb’al roksinkileb’ li eetalil (10–15 k’asal)

Sa’ k’anjel 1, tz’ileb’ rix li aatin ut li eetalil li xatzol sa’ junesal. Laa meta, a’an roksinkileb’ li eetalil re xyeeb’aleb’ ut xtawb’aleb’ ru li kok’ patz’om ut sumehom.

Activity 2: Create Your Own Sentences (10–15 minutes)

K’anjel 2: Xk’oxlankileb’ aajunes ak’il ch’ol aatin (10–15 k’asal)

Sa’ li k’anjel 2, yal roksinkileb’ li eetalil re xk’oxlankileb’ aajunes ak’il ch’ol aatin. K’anjela laa seeb’al. Laa meta, a’an roksinkileb’ li eeetalil re xk’oxlankileb’ jo’ k’ihal li ak’il patz’om ut sumehom naru chawu.

Activity 3: Create Your Own Conversations (15–20 minutes)

K’anjel 3: Xk’oxlankileb’ aajunes li ak’il aatinak (15–20 k’asal)

Sa’ li k’anjel 3, yal aatinak jo’ taab’aanu raj rik’ineb’ li kristiaan wulaj wulaj. Laa meta, a’an aatinak chi chaab’il rik’in li Ingles ak xatzol.

Evaluate (5–10 minutes)

Tz’ilok-ix (5–10 k’asal)

Sa’ xraqik li ch’uut re aatinak, tz’il rix ma yookat chixtz’aqob’resinkil ru li rajom li raqal. Oksi li “Tusleb’aal re xtz’ilb’al rix laa tzolb’al” re xk’eeb’al reetal lix yalb’al aaq’e chi tzolok sa’ junesal, ut k’eheb’ laa meta re chaab’ilo’k. K’e aahoonal chi saho’k aach’ool chirix laa k’iijik ut lix yalb’al aaq’e.

Daily Practice

Xyalb’al roksinkil wulaj wulaj

Re xtzolb’al li Ingles, tento taak’e aach’ool chixyalb’al roksinkil wulaj wulaj. Rochb’een li hoonal re tzolok, taw chan ru taawoksi li Ingles sa’ li nakab’aanu wulaj wulaj. Qayehaq, naq yookat chirab’inkil li son, ab’i sa’ Ingles. Naq nakawil jun kaxmu, il sa’ Ingles malaj k’eheb’ li subtitulo sa’ Ingles. Naq yookat chi oyb’enink sa’ junaq na’ajej, yal roksinkil li Ingles sa’ laa k’a’uxl. Naq nakattijok, ye li jo’ k’ihal naru chawu sa’ Ingles. Re tat-ok chiroksinkil li Ingles wulaj wulaj, tento taawoksi sa’ li ak nakab’aanu wulaj wulaj.

Naru ajwi’ nakab’aanu li junjunq chi k’anjel ut tz’ilok-ix sa’ internet sa’ englishconnect.org/learner/resources ut sa’ li Hu re tzolok re EnglishConnect.

Wi yooqat chixb’aanunkileb’ li kok’ k’anjel re tzolok sa’ junesal ut yooqat chixyalb’al roksinkil li Ingles wulaj wulaj, chi jo’kan naq taatzoloq sa’ junpaat ut kawresinb’ilaqat wi’chik choq’ re laa ch’uut re aatinak. Oksi li “Tusleb’aal re xtz’ilb’al rix laa tzolb’al” li wan sa’ xraqik li xtikib’ankil a’in re xk’eeb’al reetal lix yalb’al aaq’e ut eb’ laa meta.

Remember This

Chijultiko’q aawe a’in

Wi yooqat chixb’aanunileb’ li kok’ k’anjel re tzolok sa’ junesal, ut yooqat chi tz’aqonk sa’ laa ch’uut re aatinak, chi jo’kan naq taanimob’resi laa seeb’al chi aatinak sa’ Ingles. Ut nim wi’chik chiru a’an, naq yooqat chiroksinkileb’ li na’leb’ re tzolok ut chi tijok re naq li Dios tatxtenq’a, a’an naru tatxtenq’a chixtz’aqob’resinkileb’ ru laa meta anajwan ut chalel.