“Ia Faatasi ma Faamalosi i Latou”

Saunia e Elder Jeffrey R. Holland

O Le Korama a Aposetolo e Toasefululua

O la matou tatalo i le asō ia tuua e alii ma tamaitai uma lenei konafesi aoao ua faalolotoina atili le tuuto atu i le tausiga faamaoni mo le tasi ma le isi.

Ina ia toe faaupu le saunoaga a Ralph Waldo Emerson, o taimi sili ona lemafaagaloina i le olaga o taimi ia tatou te lagona ai le faananati mai o faaaliga.¹ Peresitene Nelson, ou te le iloa pe fia ni “mea faananati” e mafai ona matou taulimaina i lenei faaiuga o le vaiaso. O nisi o i matou e vaivai fatu. Ae a ou manatu i ai, e mafai foi ona e taulimaina lena mea. E maeu lenei perofeta!

I le agaga o tautinoga ma molimau ofoofogia a Peresitene Nelson anapo ma lenei taeao, ou te tuu atu ai la’u lava ia molimau e faapea, o nei fetuunaiga o ni faataitaiga o faaaliga na taialaina ai lava lenei Ekalesia mai lava i lona amataga. O nisi ia o faamaoniga o loo faanatinatiina e le Alii Lana galuega i lona taimi.²

Mo i latou uma o loo naunau e aoao i auiliiliga o nei mataupu, faamolemole ia iloa o le taimi lava e maea ai lenei sauniga o le konafesi, o le a amatalia ai se faatulagaga e aofia ai, ae le faapea o le faasologa lenei, le auina atu o se tusi mai le Au Peresitene Sili i tagata uma o le Ekalesia o loo ia i matou a latou imeli. O se tusi e fitu itulau o fesili ma tali o le a faapipii atu mo taitai uma o le perisitua ma ausilali. Ma le mea mulimuli, o na anomea ua uma ona tuuina i luga o le ministering.LDS.org. “Ole atu, ona foaiina mai ai lea ia te outou; ia outou saili, ona outou maua ai lea.”³

Ia i le tofiga matagofie ua tuuina mai e Peresitene Russell M. Nelson ia te a’u ma Sister Bingham. Uso e ma tuafafine, a o matua ai faalefaalapotopotoga le galuega a korama ma ausilali, o lona uiga, e faapena foi ona tatau ia i tatou ona matutua faaletagata lava ia—ma taitoatasi ma aloese mai amioga masani faisoo e aunoa ma ni lagona po o le mafaufau i le avea ma soo faamaoni lea na faaali mai e le Faaola i le faaiuga o Lana galuega i le lalolagi. A o Ia sauni e tuua Lana vaega toalaiti o soo sa ta’umamaina pea ma fai si fenumiai, Na te lei lisiina i ai ni laasaga faalepulega se tele sa ao ona latou faia pe tuu i ai se tele o lipoti e faatumu ia ta’i tolu kopi. Leai, sa Ia aoteleina a latou galuega i le poloaiga autu e tasi: “Ia outou fealofani, pei ona ou alofa atu ia te outou. … O le mea lea e iloa ai e tagata uma lava o o’u soo outou, pe afai ua outou fealofani.”⁴

I se taumafaiga ina ia tatou faalatalata atili i lena mamanu o le talalelei, o lenei mataupu faaleauaunaga fou faatoa faasilasila atu a le au perisitua ma le Aualofa o le a aofia ai elemene nei, faatasi ma isi mea, o nisi o ia mea ua maea ona faatulaga e le Aualofa faatasi ma se tulaga faamanuiaina ofoofogia.⁵

O le a tatou le toe faaaogaina le gagana o faiaoga o aiga ma faiaoga asiasi. O se vaega o lena mea ona o le tele o a tatou taumafaiga faaleauaunaga o le a i ai i tulaga e ese mai le fale ma o se isi vaega ona o a tatou fesootaiga o le a le faauigaina i le aoao atu o se lesona na sauniaina, e ui e mautinoa lava e mafai ona faasoa atu se lesona pe afai o i ai se manaoga mo sea lesona. O le faamoemoega autu lava i lenei manatu faaleauaunaga o le, e pei ona faamatalaina ai tagata i aso o Alema, ia “leoleo i luga o lo latou nuu, ma … fafaga i latou i mea tau i le amiotonu.”⁶
O le a faaauau pea ona tatou asiasi atu i aiga pe a mafai ai, ae o tulaga faalelotoifale e pei o le toatele o le faitauaofai, mamao, saogalemu o le tagata, ma isi tulaga lu’itauina e mafai ona taofia ai i tatou mai le asiasi atu i aiga uma i masina uma. E pei ona fautua mai le Au Peresitene Sili i tausaga ua mavae, fai le mea sili e te mafaia.⁷ E faaopoopo atu i soo se faatulagaga ua outou faavaeina mo asiasiga moni, o lena kalena e mafai ona faaoaina i valaau i telefoni, o tusi tusitusia, tesi, imeli, talanoaga faavitio, talanoaga i sauniga Lotu, galuega faatino fai faatasi, gaoioiga faaagafesootai, ma le anoanoai o mea e mafai ona fai i le lalolagi ua faulai ai ala o faasalalauga faaagafesootai. Peitai, e tatau ona ou faamamafa atu e faapea o lenei vaaiga fou lautele e le aofia ai la le uiga maasiasi na ou vaai ai talu ai nei i se pepa faapipii i tua o se taavale. E faitauina, “A ou faaee atua le pu, ua uma foi la’u ia asiasiga faaleaiga ia te oe.” Faamolemole, faamolemole, uso e, (o le a le ta’usalaina lava tuafafine i lena mea—ou te talanoa atu i uso o le Ekalesia), faatasi ai ma nei fetuunaiga matou te mananao ai ia tele atu le tausiga ma popolega, ae le itiiti.
Faatasi ai ma lenei mataupu faaleauaunaga fou atu, ma sili ona faavae i le talalelei, ou te lagona ua amata ona outou popolevale po o a la mea e faitaulia i luga o lipoti. Ia, malolo lelei, ona e leai se lipoti—o le mea sili e le o le 31 o le masina e “faatoa vevesi ai lava e fai se asiasiga i le aso mulimuli” mo le lipoti. O i foi lea tatou te taumafai e faaleleia. E na o le pau le lipoti o le a faia o le aofai o faatalanoaga sa faia e taitai ma soa faaleauaunaga i le uarota i lena kuata. E faigofie tele e pei ona faalogo i ai, a’u uo, o na faatalanoaga e matuai taua tele. A aunoa ma lena faamatalaga o le a leai se auala e maua ai e le epikopo le faamatalaga na te manaomiaina e faatatau i tulaga faaleagaga ma faaletino o lona nuu. Manatua: o uso o auaunaga latou te fai ma sui o le au epikopo ma le au peresitene o le korama a toeaina; latou te le suitulaga ia i latou. O ki a se epikopo ma se peresitene o se korama e sili atu nai lo lenei manatu faaleauaunaga.
Ona o lenei lipoti e ese mai soo se lipoti na outou auina atua i le tuanai, se’i o’u faamamafa atua e faapea, o i matou i le laumua o le Ekalesia e le manaomia ona iloa pe faapefea po o fea ae po o anafea foi na e faia ai se fesootaiga ma ou tagata; e na o le pau le mea matou te manaomia ona iloa ma popole i ai ia outou faia ma ia outou faamanuia ai i latou i soo se auala tou te mafaia ai.

Uso e ma tuafafine, ua ia i tatou se avanoa mai le lagi o se Ekalesia atoa e faailoa ai le “amio atua e lelei ma faamaoni i luma o le Atua”⁸—”e tauave avega a le tasi ma le isi ina ia māmā” ma ia “faamafanafana ia i latou e manaomia ona faamafanafanaina,”⁹ ia auauna atu i fafine ua oti a latou tane, ma ē matuaoti, o e faaipoipo ma nofotoatasi, o e malolosi ma pagatia, o e mafatia ma soifua maloloina, o e fiafia ma e faanoanoa—i se faapuupuuga, o i tatou uma, tatou uma taitoatasi, ona tatou te manaomia uma le fia lagonaina o le aao mafanafana o le faauooga ma le fia faalogo atu i se tautinoga mausali o le faatuatua. Peitai, ou te lapatai atu ia te outou, o se igoa fou, fetuutuunaiga fou, ma ni nai lipoti o le a le faia ai lava sina aunese o le eseesega i la tatou auaunaga vagana ua tatou vaai i lenei mea o se valaaulia e tausi le tasi ma le isi i se auala lototoa fou ma paia atu, e pei ona faatoa saunoa mai ai Peresitene Nelson. Pe a tatou siitia atu o tatou mata faaleagaga e taulai atu ina ia ola atili i le tulafono o le alofa i se tulaga lautele, o le a tatou faamamaluina tupulaga o e na auauna atu i lena auala mo le tele o tausaga. Se’i o’u faamatala atua se faataitaiga talu ai nei o sea tuuto ma le faamoemoe o le a anoanoai tagata e malamalama i le poloaiga a le Alii “ia faatasi ma faamalosi”¹⁰ o tatou uso ma tuafafine.

I le aso 14 o Ianuari talu ai, o se Aso Sa, faatoa te’a laitiiti lava le 5 i le afiafi, sa talatalanoa ai a’u uo talavou o Brett ma Kristin Hamblin i lo la fale i Tempe, Arisona, i le mavae ai o se aso o auaunaga a Brett i le au epikopo ma le tausiga pisi a Kristin mo le la fanau e toalima.

O Kristin o sē na sao ma le manuia mai le kanesa o le susu i le tausaga na mavae atu, sa faafuasei lava ona matapogia. Sa valaau i le 911 ma o mai ai se vaega o faalavelavae faafuasei ma taumafai ai ma le faananau e toe faaola mai o ia. A o tatalo atu ma le faatauanau Brett, sa vave ona ia faia nisi valaau se lua i le telefoni: o le tasi i lona tina na talosagaina lana fesoasoani i le fanau, o le isi ia Edwin Potter, o lana faiaoga o aiga. O le talanoaga atoa mulimuli ane e faapenei:

I le matauina ai o le ID i le telefoni, sa fai mai ai Edwin, “Sole, Brett, o a mai?”

O le tali toetoe lava a faataio atu a Brett “Ua ou manaomiaina oe i i—i le taimi nei lava!”

I ni nai minute sa lei mafai e Brett ona faitauina, sa tu ai lana paaga faaleperisitua i ona autafa, sa fesoasoani i le fanau ma ave atu Uso Hamblin i le falemai i tua atu o le taavale a le falemai o loo avatu ai si ona toalua. O iina, i le itiiti ifo ma le 40 minute i le maea ai o lana moeiini muamua lava, sa faasilasila mai ai e le fomai ua maliu Kristin.

A o tagitu’i ai Brett, sa opo o ia e Edwin i ona lima ma fetagisi faatasi ma ia—mo se taimi umi lava. Ona tuua ai lea o Brett e faanoanoa faatasi ma isi tagata o le aiga na faatasi atu, ae alu atu Edwin i le maota o le epikopo e ta’u atu ia te ia le mea lea faatoa tupu. Sa faavave atu le epikopo ofoofogia i le falemai ae alu atu Edwin i le fale o le au Hamblin. O iina sa la i ai ma lona toalua o Charlotte, lea foi sa faataalise atu, sa taaalo ai ma le fanau toalima a le au Hamblin, e 12 e oo i le 3 tausaga le matutua, lea ua leai nei se tina. Sa fafaga i latou i se meaai o le afiafi, faia se faaaliga musika sa lei fuafuaina, ma fesoasoani e saunia i latou e momoe.

Sa fai mai Brett ia te a’u mulimuli ane, “O le vaega ofoofogia o lenei tala e le o le sau o Edwin ina ua ou valaau i ai. I se faalavelave faafuasei, e i ai lava tagata i taimi uma e loto e fesoasoani. Leai, o le vaega ofoofogia o lenei tala, o ia le tagata sa ou mafaufau i ai. Sa i ai foi isi tagata na i ai. Sa i ai se tuagane ma se uso o Kristin e itiiti ifo ma le tolu maila le mamao. E i ai se matou epikopo lelei tele, silisili le lelei. Ae o le mafutaga i le ma va ma Edwin o se mafutaga sa vave ona ou lagonaina e valaau ia te ia ina ua ou manaomiaina le fesoasoani. Ua saunia e le Ekalesia mo i tatou se auala faatulagaina e ola lelei atili ai i le poloaiga lona lua—ia alofa, auauna, ma atiae sootaga ma o tatou uso ma tuafafine e fesoasoani ai ia i tatou e faalatalata atili atu ai i le Atua.”¹¹

Sa saunoa Edwin e uiga i lea aafiaga, “Elder Holland, o le mea malie i lenei sootaga atoa sa umi atu o avea Brett ma o matou faiaoga o aiga nai lo le taimi na ou avea ai ma o latou faiaoga o aiga. I lena taimi, sa ia asia i matou e sili atu e pei o se uo nai lo se tofiga. Na avea o ia ma se faataitaiga sili, o se faataitaiga maoae e tatau ai ma sē umia le perisitua e toaga ma faaaofia o ia. O lo’u toalua, o ma atalii—matou te le vaai ia te ia o se tasi e noatia e aumai se savali ia i matou i le faaiuga o masina taitasi; matou te manatu ia te ia o se uo e nofo i lalo atu i le aualatele i le pi’oga, o le na te faia soo se mea i lenei lalolagi e faamanuia ai i matou. Ua ou fiafia lava na mafai ona ou toe totogi atu sina mea itiiti o le aitalafu o loo ou nofoaitalafu ai ia te ia.”¹²

Uso e ma tuafafine, ou te auai faatasi ma outou i le faamamaluina o faiaoga uma o le pitonuu ma faiaoga o le uarota ma faiaoga o aiga ma faiaoga asiasi o e na alolofa ma auauna atu i lenei auala i la tatou talafaasolopito atoa. O la matou tatalo i le asō ia tuua e alii ma tamaitai uma—ma o tatou alii ma tamaitai talavou matutua—lenei konafesi aoao ua faalolotoina atili le tuuto atu i le tausiga faamaoni mo le tasi ma le isi, ua na o le alofa le pona lava o Keriso o loo uunaia i latou e faia faapena. E ui i mea tatou te lagonaina uma o o tatou tapulaa ma ni le atoatoa—ma e tofu uma i tatou ma luitau—ae ui i lea, tau ina ia tatou galulue faatasi ma le Alii o le tovine,¹³ ma tuu atu i le Atua ma le Tama o i tatou uma se lima fesoasoani i Lana galuega taua o le taliina o tatalo, tuuina atu o le faamafanafanaga, soloia o loimata, ma le faamalosia o tulivae vaivai.¹⁴ Afai o le a tatou faia lena mea, o le a avea atili i tatou ma soo moni o Keriso e pei ona tatau ona avea ai i tatou. I lenei Aso Sa o le Eseta, tau ina ia tatou alolofa i le tasi ma le isi e pei ona Ia alofa mai ia i tatou,¹⁵ ou te tatalo ai i le suafa o Iesu Keriso, amene.