15:11

Leoleoina o Agaga

Saunia e Elder Gary E. Stevenson

O Le Korama a Aposetolo e Toasefululua

Tatou te aapa atu i le alofa i isi ona o le mea lena na poloaiina i tatou e lo tatou Faaola e fai.

I se talanoaga talu ai ma sa’u uo, na ia ta’u mai a o talavou o ia, faato’a papatisoina o se tagata o le Ekalesia, sa faafuasei ona ia lagonaina se mea e pei ua le toe talia ea o ia i lana uarota. Na siitia ese faifeautalai sa aoaoina o ia, ma sa ia lagona ai e pei ua leai se tasi e toe kea atu ia te ia. O le leai ai o ni uo i le uarota, sa ia toe maua ai ana uo tuai ma latou auai ai i ni gaoioiga sa aveesea ai o ia mai le auai ai i le lotu—sa faateteleina o lea na amata ai ona se ese mai le lafu. Ma loimata i ona fofoga, sa ia faamatala lona faafetai tele ina ua faaloaloa atu e se uso i le uarota se lima auauna ia te ia ma valaaulia o ia e toe foi mai i se auala mafanafana ma le faauo. I totonu o ni nai masina, sa toe i ai o ia i le saogalemu o le lafu, ma faamalosia isi faapea ai ma ia lava. Tatou te le faafetai ea mo le leoleo mamoe i Pasila sa saili atu i lenei alii talavou, o Elder Carlos A. Godoy, lea o loo nofo i o’u tua atu o se uso o le Au Peresitene o Fitugafulu?

Pe le ofoofogia ea le auala e mafai ai e ni nai taumafaiga laiti ona maua ai ni taunuuga e faavavau? O lenei upumoni o loo i ai i le fatu o taumafaiga o auaunaga a le Ekalesia. E mafai e le Tama Faalelagi ona ave a tatou taumafaiga laiti i aso taitasi ma liliu i se mea faavavega. Ua na o le ono masina talu ona faasilasila mai e Peresitene RusselL M. Nelson e faapea “ua faia e le Alii ni fetuunaiga taua i le auala tatou te tausia ai le tasi ma le isi,”¹ ma faamalamalama mai, “O le a tatou faatinoina i se auala fou atu, ma paia atu e tausi ma auauna atu ai i isi. O le a tatou faasino atu ma le faigofie i nei taumafaiga o ‘auaunaga.’”²

Sa faamalamalama mai e Peresitene Nelson: “O se faailoga o le Ekalesia moni ma le ola a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga. Ona o Lana Ekalesia lenei, o i tatou o Ana auauna o le a auauna atu i le tasi, e pei lava ona sa Ia faia. O le a tatou auauna atu i Lona suafa, i Lona mana ma le pule, ma i Lona agalelei alofa”³

Talu mai le faasilasilaga, ua maoae lo outou tali mai! Ua matou maua ni lipoti o le faamanuiaina tele o le faatinoina o nei suiga i le toetoe o siteki uma i le lalolagi e pei ona faatonuina ai e lo tatou perofeta soifua. Mo se faataitaiga, o uso ma tuafafine o auaunaga ua tofia i aiga, ma soa—e aofia ai alii talavou ma tamaitai talavou—ua faatulagaina, ma ua faia foi faatalanoaga o auaunaga.

Ou te manatu e le o se mea e tupu fua i le ono masina ao lumanai le faasilasilaga faafaaaliga o ananafi; “O se paleni fou i le va o aoaoga o le talalelei i totonu o le aiga ma totonu o le Ekalesia”⁴—lea na tuuina atu ai le faasilasilaga faafaaaliga i le auauna atu. E amata atu ia Ianuari, ao tatou faaaluina le itiiti mai ma le tasi le itula ia tatou tapuaiga faalelotu, o mea uma ua tatou aoaoina i le auauna atu o le a fesoasoani ia i tatou e toe faapaleniina lena avanoa i se aafiaga sili ona maualuga ma sili ona paia, o le aso sapati e faaogatotonu i le aiga faatasi ma aiga ma e pele.

Faatasi ai ma nei auivi faalefaalapotopotoga ua faatulagaina, tatou te ono fesili, “E faapefea ona tatou iloa o loo tatou auauna atu i le ala a le Alii? O tatou fesoasoani ea i le Leoleo Mamoe Lelei i le ala o loo Ia faamoemoeina?”

I se talanoaga talu ai nei ma Peresitene Henry B. Eyring, sa ia faamālō ai i le Au Paia i le fetuutuunai i nei suiga iloga ae na faailoa mai foi lona faamoemoe faamaoni ia iloa e tagata o le au paia o le auaunaga e sili atu nai lo le “tau na ona faaali atu o lou lelei.” E le o faapea atu la o le faaali atu o le lelei e lē taua, ae o i latou e malamalama i le agaga moni o le auaunaga e iloaina e matua sili atu nai lo le na o le faaali atu o le lelei. O le faia i le ala a le Alii, e mafai ai e le auaunaga ona maua se faatosinaga tumau mo le lelei lea e faaauau atu i le faavavau atoa, e pei ona i ai mo Elder Godoy.

“Sa faaali mai e le Faaola e ala i faataitaiga le uiga o le auauna atu a o Ia auauna atu ona o le alofa. … Sa Ia … aoao atu, tatalo mo [isi], faamafanafana atu, ma faamanuia i latou sa siomiaina o Ia, ma valaaulia tagata uma ia mulimuli ia te Ia. … Pe a auauna atu tagata o le Ekalesia [i se ala maualuga atu ma paia atu], latou te saili atu ma le agaga tatalo e auauna atu e pei ona Ia faia—e … ‘leoleo lea i luga o le ekalesia e lē aunoa, ma faatasi ma faamalosi i latou,’ e ‘asiasi atu i fale o tagata taitoatasi o le ekalesia,’ ma fesoasoani i tagata taitoatasi ia avea ma se soo moni o Iesu Keriso.”⁵

Tatou te malamalama o se leoleo mamoe moni e alofa i ana mamoe, silafia [mamoe] taitasi i o latou igoa, ma “i ai le fiafia ia” te i latou.⁶

Sa faaalu e se uo ua leva lona olaga o se leoleo manu, ma faia le galuega mamafa o le tausiga o se lafupovi ma mamoe i Atu Mauga Papa gaoā. Sa ia faasoa mai i se tasi taimi ia te a’u luitau ma lamatiaga e fesootai ma le tausiga o mamoe. Sa ia faamatala mai i le amataga o le tautotogo, pe a tele ina liusuavaia le kiona mai luga o tumutumu lautetele o atu mauga, na te tuu ai le lafu a le aiga pe tusa ma le 2,000 mamoe i atu mauga mo le taumafanafana. O iina, na te leoleo ai mamoe seia oo ina faai’ui’u le tautoulu, ma aveese atu ai manu mai le nofoaga taumafanafana i se nofoaga taumalulu i le toafa. Sa ia faamatalaina le faigata tele o le tausiga o se lafu mamoe telē, e manaomia ai le usu i le vaveao ma le foi mai ua po—alapo e le’i taitai oso le la ma le manava ua leva le po. Sa le mafai ona ia faia na o ia.

Sa fesoasoani isi e tausi le lafu, e aofia ai se suifefiloi o leoleo manu ua i ai le potomasani sa fesoasoani i ai ni lima talavou o ē na faamanuiaina mai le atamai o a latou soa. Sa ia faalagolago foi i ni solofanua matutua se lua, solofanua po’a laiti se lua, lua taifau leomanu matutua, ma tamai taifau leomanu e lua pe tolu. I le taimi o le taumafanafana, sa feagai ai la’u uo ma ana mamoe ma matagi ma timuga mamafa, ma’i, manu’aga, lāmala, faapea ai ma isi uma faigata e te mafaufauina. O nisi tausaga e tatau ona latou la’uina le vai i le taumafanafana atoa ina ia ola ai mamoe. Ona oo lea i tausaga uma i le faai’ui’uga o le tautoulu, pe a taufaamata’u mai le taumalulu ma aveese atu mamoe mai atumauga ma faitauina, e masani lava e silia ma le 200 mamoe na leiloloa.

O le lafu e 2,000 na tuu i atumauga i le amataga o le tautotogo sa faaitiitia ifo ma le 1,800. O le tele lava o mamoe leiloloa sa le’i leiloloa ona o le mama’i po o le mamate faanatura ae ona o manufeai e pei o liona o le mauga po o luko. O nei manufeai e masani lava ona latou maua tamai mamoe o se ese mai le saogalemu o le lafu, ua aveese i latou lava mai le puipuiga a o latou leoleo mamoe. E mafai ona outou mafaufau mo se taimi i le mea lea faato’a ou faamatala atua, i se aano faaleagaga? O ai le leoleo mamoe? O ai le lafu? O ai o loo fesoasoani i le leoleo mamoe?

Sa fetalai mai le Alii o Iesu Keriso lava Ia, “O a’u nei o le leoleo mamoe lelei, ua ou iloa a’u mamoe, … ou te tuuina atu foi lo’u ola e sui a’i mamoe.”⁷

Sa faapena foi ona aoao mai le perofeta o Nifae e faapea o Iesu “e fafaga i ana mamoe, ma o le a latou maua [le vaomu’a] ia te ia.”⁸ Ou te maua le filemu tumau i le iloaina “o le Alii o lo’u leoleo mamoe”⁹ ma ua Ia silafia i tatou taitoatasi ma i lalo o Lana tausiga. A tatou fetaiai ma matagi o le olaga, timuga mamafa, ma’i, manu’aga, ma lāmala, o le Alii—lo tatou Leoleo Mamoe—o le a auauna mai ia i tatou. O le a ia toefuataiina mai o tatou agaga.

I lea lava ala e tasi na tausia ai e la’u uo ana mamoe faatasi ma le fesoasoaniga a le aufaigaluega talavou ma matutua, o solofanua, ma taifau leomanu, ua manaomia ai foi e le Alii le fesoasoaniga i galuega faigata o le tausiga o mamoe i Lana lafu.

I le avea ai ma fanau a se Tama Faalelagi alofa ma ni mamoe i Lana lafu, ua tatou olioli ai i faamanuiaga o le tautuaina taitoatasi e Iesu Keriso. E faapena foi, ua ia i tatou se tiutetauave e tuu atu le fesoasoaniga faaleauaunaga i isi o siomiaina i tatou i le avea ai o i tatou lava ia ma ni leoleo mamoe. Ua tatou faalogo i le afioga a le Alii ia “auauna mai ia te a’u ma alu atu i lo’u igoa, ma faapotopoto faatasi mai a’u mamoe.”¹⁰

O ai se leoleo mamoe? O alii, tamaitai, ma tamaiti uma i totonu o le malo o le Atua o se leoleo mamoe. E le manaomia ai se valaauga. Mai le taimi na tatou tutu a’e ai mai le vai o le papatisoga, na faatagaina ai i tatou i lenei galuega. Tatou te aapa atu i le alofa i isi ona o le mea lena na poloaiina i tatou e lo tatou Faaola e fai. Sa faamamafa mai e Alema: “Ona o ai se leoleo mamoe … ua ia te ia ni mamoe e tele, ae ua ia lē leoleo i luga o i latou, ina ia lē ulu mai luko ma ai lana lafu? … Na te lē tuli ese ea o ia i fafo?”¹¹ Soo se taimi lava e oo ai o tatou tuaoi i ni mafatiaga faaletino pe faaleagaga, tatou te taufetuli atu e fesoasoani. Tatou te tauave avega a le tasi ma le isi ina ia māmā. Tatou te faanoanoa faatasi ma i latou o ē faanoanoa. Tatou te faamafanafana ia i latou e manaomia le faamafanafanaga.¹² Ua faamoemoeina ma le alofa e le Alii lenei mea mai ia i tatou. Ma o le a oo mai le aso o le a tatou tali atu ai ia te Ia mo le tausiga o loo tatou faia e auauna atu ai i Lana lafu.¹³

Sa faasoa mai e la’u uo leoleo mamoe se isi elemene taua tele i le leoleoina o mamoe i le mauga. Sa ia faamatalaina e faapea o mamoe leiloloa e patino lava le lamatiaina i le matautia o manufeai. O le mea moni, e oo atu i le 15 pasene o lona taimi ma le taimi o lana aufaigaluega e tuuto atu i le sailiga o mamoe leiloloa. Sa latou iloaina o le vave lava ona latou mauaina o mamoe leiloloa, ae le’i se ese mamao tele mamoe mai le lafu, o le itiiti foi lena o le ono lamatiaina o mamoe. O le toe maua mai o mamoe leiloloa e manaomia ai le tele o le onosai ma le amio pulea.

I nai tausaga ua mavae, sa ou maua ai se tusiga i se nusipepa i le lotoifale sa matua faagaeetiaina lea na ou sefeina ai. O le ulutala o le itulau pito i luma sa faitauina faapea, “O Le A Le Tuulafoaia e le Ta’ifau Naunau le Mamoe ua Se.”¹⁴ O lenei tusiga ua faamatalaina ai sina aofaiga laitiiti o mamoe na anaina e se lafumanu sa le’i mamao mai ma le fanua o la’u uo lea sa lafoaia i lo latou nofoaga taumafanafana. E lua pe tolu masina mulimuli ane, sa saisaitia ma mamao ese i latou i se atumauga. Ina ua tuulafoaiina mamoe, sa nofo ai le ta’ifau leomanu ma i latou, aua o lona tiute lea le vaavaaia ma le puipuia o mamoe. Sa le’i tāitāi masepu lana vaai. O iina sa nofo ai—faataamilomilo i mamoe ua se mo masina e tele i le tau malulu ma le kiona, ma auauna atu o se puipuiga mai luko, liona o le mauga, po o se isi lava manufeai e ono lamatia ai mamoe. Na ia nofo ai lava iina seia oo ina mafai ona ia toe taitai pe leoleoina mamoe e toe foi atu i le saogalemu o le leoleo mamoe ma le lafu. O le ata na faaali mai i le itulau i luma o lenei tusiga na mafai ai e se tasi ona iloa uiga i fofoga ma le amio o lenei taifau leomanu.

Uiga i fofoga ma le amio o lenei taifau leomanu

I le Feagaiga Fou, tatou te maua ai se faataoto ma faatonuga mai le Faaola lea e maua ai nisi malamalamaaga e faatatau i lo tatou tiutetauave o ni leoleo mamoe, o tuafafine ma uso o auaunaga, i mamoe ua leiloloa:

“O ai ea so outou e ana mamoe e selau, afai e le iloa le tasi, e le tuua e ia le ivagafulu ma le iva i le vao, a e alu ma saili i le ua le iloa, seia maua?

“A maua, ua faafuata ma le olioli.

“A oo atu foi i lona aiga, ua faapotopoto ai i ana uo ma e tuaoi ma ia, ua fai atu ia te i latou, Ia tatou olioli ia; aua ua ou maua la’u mamoe na leiloa.”¹⁵

A o tatou aoteleina le lesona o loo aoao mai i le faataoto, tatou te maua ai lenei fautuaga taua:

Muamua, e ao ona tatou faailoaina le mamoe ua leiloa.
Lua, tatou te saili ia i latou seia maua i latou.
A maua i latou, atonu tatou te ave i latou i o tatou tauau ma aumai i latou i le aiga.
Tatou te siomiaina i latou i uo i lo latou taunuu mai.

Uso e ma tuafafine, o o tatou luitau silisili ma a tatou taui silisili e mafai ona oo mai a o tatou auauna atu i le mamoe ua leiloa. O tagata o le Ekalesia i le Tusi a Mamona sa “leoleo i luga o lo latou nuu, ma fafaga i latou i mea tau i le amiotonu.”¹⁶ E mafai ona tatou mulimuli i le latou faataitaiga pe a tatou manatuaina o le auaunaga e ao ona “taitaia e le Agaga, … fetuutuunai, ma e fua i manaoga o tagata taitoatasi.” E taua tele foi lo tatou “saili atu e fesoasoani i tagata taitoatasi ma aiga e saunia mo o latou sauniga e sosoo ai, tausia [a latou] feagaiga … , ma ia ola tutoatasi.”¹⁷

E taua agaga uma i lo tatou Tama Faalelagi. O Lana valaaulia patino ia auauna atu, o le tau silisili ma le taua lea ia te Ia, aua o Lana galuega ma le mamalu lea. O le galuega moni lava lea o le faavavau. E i ai i Ana fanau taitasi se gafatia le mafaatauina i Lana silafaga. E alofa o Ia ia te oe i se alofa e le mafai ona e malamalama i ai. E pei o le ta’ifau leomanu faamaoni, o le a afio o Ia i luga o mauga e puipui oe i taimi o matagi, timuga mamafa, kiona, ma isi mea e tele.

Sa aoao mai Peresitene Russell M. Nelson i le konafesi talu ai: “O le tatou savali i le lalolagi [ma ou te fia faaopoopo atu, ‘i la tatou lafu o auaunaga’] e faigofie lava ma faamaoni: tatou te valaauliaina fanau uma a le Atua i itu uma e lua o le veli ia o mai i lo latou Faaola, maua faamanuiaga o le malumalu paia, maua le olioli tumau, ma agavaa mo le ola e faavavau.¹⁸

Tau ina ia tatou siitia la tatou vaai i lenei vaaiga mamao faaperofeta, ina ia mafai ona tatou leoleoina agaga e agai atu i le malumalu ma mulimuli ane i lo tatou Faaola, o Iesu Keriso. Na te le o faamoemoeina i tatou e faia ni vavega. E na o le pau le mea o loo Ia talosaga mai ai ia tatou aumai o tatou uso ma tuafafine ia te Ia, aua o loo ia te Ia le mana e togiola ai agaga. Pe a tatou faia lea mea, e mafai ma o le a tatou mauaina lenei folafolaga: “Pe a faaali mai le Leoleo mamoe silisili, e maua e outou le pale [o le mamalu] e le mamae lava.”¹⁹ Ou te molimau atu ai i nei mea—ma ia Iesu Keriso lo tatou Faaola ma le Togiola—i le suafa o Iesu Keriso, amene.