Fakamatala Fakalahi ki he Tohí

Ngaahi Maʻuʻanga Tokoni ki he Uepisaiti ʻo e Moʻui Fakafalala pē Kiate Kitá

‘Alu ki he srs.lds.org ke maʻu ha fakamatala lahi ange mo ha ngaahi vitiō ʻaonga fekauʻaki mo hono tokoniʻi ha kulupu.

Meʻa Ke Ke Fai Kimuʻa ʻi ha Fakataha Fakakulupu

• ‘Alu ki he srs.lds.org ke hiki e ngaahi vitiō ki he tefitoʻi moʻoni ʻo e Ko hoku Fakavaʻé mo e lēsoní.

• ʻI hoʻo ʻuluaki fakatahá, kole ki he mataotao ʻo e moʻui fakafalala pē kiate kitá ke ʻoatu ha ʻū tohi lēsoni feʻunga maʻanautolu kotoa pē naʻe hiki honau hingoá ke kaú, pea tānaki atu mo ha tatau kehe ʻe ua.

• Toe vakaiʻi e naunaú ke ke teuteu ai ke tokoni, kae ʻoua naʻá ke teuteu ke akoʻi ia ʻo hangē ha lēsoní.

• Hili hoʻo ʻuluaki fakatahá, ngāue mo hoʻo kau mataotaó ke lēsisita hoʻo kulupú (vakai, srs.lds.org/report).

• Telefoni pe ʻave ha pōpoaki ki he kau mēmipa ʻo e kulupú ke fakamanatu ange kiate kinautolu ʻa e ʻahó, taimí, mo e feituʻu ʻe fakahoko ai e fakataha fakakulupú.

• Poupouʻi e ngaahi hoa ngāué ke nau fetuʻutaki mo fetokoniʻaki lolotonga e uiké.

• Mateuteu fakalaumālie pea fakahoko ʻa e ngaahi ueʻi fakalaumālie ʻokú ke maʻú.

• ʻAlu vave ke fokotuʻutuʻu fakalelei e ʻū seá, tēpilé mo e ngaahi vitioó. Fokotuʻutuʻu hoʻo ʻū tēpilé ‘o anga pehé ni (ʻoku fakahaaʻi atu ʻe he ngaahi foʻi fetuʻú ʻa e feituʻu ʻoku tangutu ai ʻa e tokotaha tokoní).

Ko e Meʻa Ke Ke Fai Lolotonga e Fakataha Fakakulupú

• Talitali e kau mēmipa ʻo e kulupú ʻi heʻenau aʻu maí, pea feinga ke ʻiloʻi kinautolu.

• Fakatokangaʻi pea fakahikihikiʻi ʻenau ngaahi lavameʻá mo e fakalakalaká.

• Vahe ha taha tauhi taimi ke ne puleʻi e taimi ʻoku fokotuʻu atú.

• Poupouʻi e fealeaʻaki ʻa e kau mēmipa ʻo e kulupú.

• Fakamamafaʻi hono ngāueʻi e ngaahi tukupaá ʻi he vahaʻataimi ʻo e ngaahi fakatahá.

• Fakamanatu ki he kau mēmipa ʻo e kulupú ke fakaʻapaʻapaʻi e ngaahi fakamatala ʻoku ʻikai fakahāhāholó.

Ko Ha Konga ʻo Hoʻo Fakataha Fakakulupu Fakaʻosí

• ‘Oku fakakakato ʻe he kau mēmipa ‘o e kulupú ha sivi fakafoʻituitui.

• Te ke tānaki ‘a e siví, fakakakato ‘a e lipooti fakaʻosinga ʻa e kulupú, pea kole ha ngaahi tohi fakamoʻoni (vakai, srs.lds.org/report).

• Fakafiefia fakataha!

Sivi Fakafoʻituitui ʻa e Tokotaha Tokoní

Toe fakamanatu ʻa e fakamatala ʻi laló, hili e fakataha fakakulupu kotoa pē. ʻOku fēfē hoʻo ngāué?

Sivi Fakakulupu

Mahalo ʻe lava ke tokoni atu e sivi fakafoʻituitui fakakulupu ko ʻení ke ke ngāue ʻaki ko ha konga ia e ngaahi fakataha ʻo hoʻo kulupu fakafalala pē kiate kitá ke vakaiʻi ʻaki hoʻo kulupú pea ʻilo ki heʻenau ngaahi aʻusia ʻi he kalasí. Te ke lava ‘o fakaafeʻi e mēmipa takitaha ʻo e kulupú ke fakakakato ‘a e fōmú pea toki talanoaʻi fakakulupu ia. Te ke lava ʻo fai ʻeni ‘i he kamataʻanga ʻo ha fakataha fakakulupu pe ʻi he fakaʻosinga ʻo e konga ki he “Akó”. ʻOku fakahoko e ʻekitivitī ko ʻení ʻi ha meimei miniti ʻe 10.

Ngaahi Fakataha Kehekehe Ke Fili Mei Ai ki he Kumi ha Ngāue Lelei Ange

Kapau te ke tokoni ki he kulupu, Kumi ha Ngāue Lelei Ange mahalo te ke maʻu ai ha kau mēmipa ʻo e kulupú ‘oku nau fiemaʻu ha ngāue ʻi he taimi pē ko iá pea ʻikai faʻa tatali ki ha uike ʻe 12 ke fakakakato kotoa ai e ngaahi kalasí. Kapau te ke vakai ki he ngaahi ʻuluaki peesi ʻo e tohi lēsoní, te ke maʻu ai e ngaahi fakataha kehekehe ke fili mei ai ʻa ia ʻe mei malava ke feau lelei ange ai e ngaahi fie maʻu e kau mēmipa ʻo e kulupú. Te ke lava foki ‘o talanoa mo hoʻo mataotao he moʻui fakafalala pē kiate kitá ke toe ʻilo lahi ange.

Kau Mēmipa ‘o e Kulupú mei he Ngaahi Tui Fakalotu Kehekehe

Ko e tokotaha kotoa pē, ʻoku talitali lelei ke kau mai ki he ngaahi kalasi moʻui fakafalala pē kiate kitá, tatau ai pē pe ko e hā e fungavaka ʻoku kau ki aí. Ko ha ngaahi fokotuʻu faingofua pē ʻeni ʻe malava ke tokoni ki hono faʻu ha aʻusia ʻoku lelei pea fakamāfana ki he mēmipa kotoa pē ʻo e kulupú.

• Ke faingofua pea loto fiemālie ki ha ngaahi fehuʻi.

• ‘E ala tokoni kapau ʻe fakamatalaʻi e ngaahi folofolá pe ngaahi kupuʻi lea ‘oku fakapatonu ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

• Mahalo naʻa fie maʻu ke fai ha liliu ki ha niʻihi ʻo e ngaahi tukupaá.

• ‘E lava ke tokoni hoʻo mataotao ki he moʻui fakafalala pē kiate kitá ʻi ha faʻahinga fehuʻi pē fekauʻaki mo e lēsisitá ke fakapapauʻi ʻoku maʻu ʻe he tokotaha kotoa pē ʻi he kulupú ha tohi fakamoʻoni ki he kalasí.

Tokoni Kehé

Ka ke ka aʻusia ha ngaahi palopalema pe hohaʻa pe fie maʻu ha tokoni ʻi hono fakafehokotaki e kau mēmipa ʻo e kulupú ki honau ngaahi uōtí pe ngaahi ʻiuniti fakakoló, ngāue mo hoʻo mataotaó ki ha fakahinohino mo e tokoni.