Ko Hono Tokoniʻi e Ngaahi Kulupú

Kamata ( miniti ʻe 10 pe siʻi ange)

Tokotaha Tokoní

Kamata e fakataha ako ʻa e tokotaha tokoní ʻo anga peheni:

1. Kamata ʻaki ha fua lotu (mo ha himi, ʻo kapau ʻe fie maʻu).

2. ʻE malava ke fakahoko ʻe ha mataotao ki he moʻui fakafalala pē kiate kitá pe ko ha mēmipa kehe pē ʻo e kōmiti moʻui fakafalala pē kiate kitá ha fakafeʻiloaki mo ha fakamoʻoni miniti ʻe tolu- ki he nima.

3. ʻOange ki he tokotaha kotoa pē ke ne fakafeʻiloaki nounou pē ia (ʻikai ke toe lahi hake ʻi he taki sekoni ʻe 30).

4. Fakaafeʻi kotoa e kulupú ke vakai ki heʻenau ngaahi tohi lēsoní pea muimui ki ai.

ʻOku Talitali Lelei Koe

Lau

Fakamālō atu ʻi hoʻo loto fiemālie ke ke hoko ko ha tokotaha tokoní. Te ke tokoni ke tataki ha fanga kiʻi kulupu ʻo ha niʻihi fakafoʻituituí ke nau malava ʻo moʻui fakafalala lahi ange pē kiate kinautolu ʻaki hono tokoniʻi kinautolu ke nau ako ha ngaahi pōtoʻi ngāue foʻou pea moʻui ʻaki e ngaahi tefitoʻi moʻoni ʻo e ongoongoleleí. Te ke hoko ko ha konga ‘o ha meʻa fakaofo. ‘E lava ʻe he ngaahi kulupu moʻui fakafalala pē kiate kitá ʻo liliu ha ngaahi moʻui. ʻOku ʻikai fie maʻu ia ke ke hoko ko ha mataotao. Muimui pē ʻi he ngaahi naunaú pea fakafalala ki ha ngaahi tākiekina mei he kulupú mo e Laumālié.

Koeʻuhí ʻoku kiʻi kehe ange ʻa e ngaahi kulupu moʻui fakafalala pē kiate kitá mei he ngaahi kulupu kuo tau ʻosi ʻi aí, ʻe tokoni e ako ko ení ke tau ako pea ʻilo fekauʻaki mo e ngaahi meʻa ʻoku makehe ai e ngaahi kulupú ni. Te mau tali he ʻahó ni ha ngaahi fehuʻi angamaheni ʻoku faʻa ʻomi ʻe he kau ngāue tokoní kimuʻa pea toki kamata ha kulupú:

• ʻOku ʻuhinga ki he hā ke moʻui fakafalala pē kiate kita?

• ʻOku ngāue fēfē ʻa e ngaahi kulupu moʻui fakafalala pē kiate kitá?

• Ko e hā te u lava ʻo fai ke u hoko ai ko ha tokotaha tokoni tuʻukimuʻa?

ʻIkai ngata he ako ko ʻení, fakapapauʻi ke ke lau ʻiate koe pē ʻa e Fakamatala Fakalahi pea vakaiʻi mo e ngaahi maʻuʻanga tokoni ‘i he srs.lds.org kimuʻa hoʻo ʻuluaki fakatahá.

Ko e ako ʻi he ʻaho ní ʻe tatau pea hangē pē ia ko e ngaahi fakatahaʻanga fakakulupu ʻa e moʻui fakafalala pē kiate kitá te tau tokoniʻí. Te tau muimui ʻi he ako ko ʻení pea ʻi heʻetau ngaahi kulupu moʻui fakafalala pē kiate kitá, ki he ngaahi nāunaú ʻo hangē ko ia kuo tohí. ʻOku haʻu fakataha pē ʻa e ngaahi tohi lēsoni moʻui fakafalala pē kiate kitá mo ha ngaahi fakamatala ke tokoni ke tau ʻiloʻi e ngaahi meʻa ke faí. ʻI he taimi ʻoku tau vakai ai ki he ngaahi fakamatala ko ʻení, te tau muimui leva ki he ngaahi fakahinohino ko ʻení:

Lau

ʻOku kau ʻi he ako ko ʻení pea mo e ngaahi tohi lēsoni te tau ngāue ʻaki ʻi heʻetau ngaahi kulupú, ha ngaahi fokotuʻu ki he ngaahi vahé, fealēleaʻakí, pea mo e ngaahi ʻekitivitií. ʻOku tokoni ʻeni ke tau levaʻi lelei ai e taimí pea fakahoko kotoa e lēsoní. Vaheʻi maʻu pē ha tokotaha tauhi taimi ki he fakataha fakakulupu kotoa pē ke fakapapauʻi ʻoku nofo e kulupú he taimi-tēpilé.

Tokotaha Tokoní

Kole ki ha taha pe ‘okú ne fie hoko ko ha tokotaha tauhi taimi ʻi he toenga ‘o e akó.

ʻOku ʻUhinga Ki He Hā ke Moʻui Fakafalala pē Kiate Kita?

Lau

“Ko e moʻui fakafalala pē kiate kitá ko e malava ia, mo e tukupā, pea mo e feinga ke tokonaki ʻa e ngaahi fie maʻu fakalaumālie mo fakatuʻasino ʻo e moʻuí maʻata pea mo e fāmilí” (Tohi Tuʻutuʻuni Fika 2 : Ko Hono Puleʻi ʻo e Siasí [2010], 6.1.1). ʻOku ʻikai ʻuhinga ʻa e moʻui fakafalala pē kiate kitá te tau lava ʻo fakahoko pe maʻu ha faʻahinga meʻa pē ʻoku tau fie maʻu. Kapau ʻoku tau moʻui fakafalala pē kiate kitautolu, ʻoku tau ʻiloʻi ʻoku fakafou ʻi he ʻaloʻofa mo e mālohi ʻo Sīsū Kalaisí, fakataha mo ʻetau tuí, ʻa ʻetau malava ʻo ngāue maʻá e ngaahi fie maʻu fakalaumālie mo angamaheni ʻo e moʻuí ʻoku tau fakaʻamua maʻatautolu mo hotau fāmilí. Kuo fokotuʻutuʻu foki e ngaahi kulupu moʻui fakafalala pē kiate kitá ke tokoniʻi kitautolu ke liliu ʻetau tōʻonga moʻuí, ngāue mo e ʻEikí ke lava ʻo moʻui fakafalala lahi ange pē kiate kita, fakatuʻasino mo fakalaumālie.

Te tau mamata ki ha vitiō ʻo ha kau mēmipa mo ha kau taki ʻo ha kulupu ʻoku nau talanoa fekauʻaki mo ʻenau ngaahi aʻusia ʻi he ngaahi kulupu moʻui fakafalala pē kiate kitá. ‘I hoʻo mamata ʻi he vitioó, fakafanongo ki he founga ne kaunga ai e ngaahi kulupu moʻui fakafalala pē kiate kitá ki he kakaí ʻi he fakatuʻasinó mo e fakalaumālié fakatouʻosi.

Mamataʻi

“Self-Reliance: Tools to Become Better,” maʻu ʻi he srs.lds.org/videos. (ʻIkai ha vitiō? Hoko atu hono laú.)

Alea’i (miniti ʻe 2)

Ko e hā ha ngaahi aʻusia kuó ke maʻu naʻe tokoni ke ke ‘ilo ʻoku felāveʻi ‘a e fakalaumālié mo e fakatu’asinó?

ʻOku Ngāue Fēfē ʻa e Ngaahi Kulupu Moʻui Fakafalala Pē Kiate Kitá?

Lau

Ko e ngaahi kulupu moʻui fakafalala pē kiate kitá ko ha fanga kiʻi fakataha alēlea iiki ʻoku nofotaha ki hono tokoniʻi e mēmipa takitaka ʻo e kulupú ke fakalakalaka. ʻOku ʻi ai ha ngaahi kulupu moʻui fakafalala pē kiate kita ʻe fā ke fili mei ai:

• Kumi ha Ngāue Lelei Ange

• Ko Hono Kamataʻi mo Fakatupulaki ʻEku Pisinisí

• Ngaahi Meʻa Fakapaʻanga Fakatāutahá

• Ako Koeʻuhí ko ha Ngāue Lelei Ange

ʻE malava pē ke ʻilo e kakaí fekauʻaki mo e ngaahi kulupú ʻiate kinautolu pē, mei ha fakataha lotu, pe ʻi ha fakaafe fakahangatonu. ʻOku fili pē ʻe he kakaí pe ko e fē kulupu ʻoku nau fie kau ki aí.

ʻOku faʻa tokosiʻi pē e ngaahi kulupú, meimei ʻi lalo pē ʻi he toko 12 . ʻOku fakataha maʻu pē e kulupú ʻi he uike hokohoko ʻe 12, pea ko e fakataha kotoa pē ʻoku meimei houa ʻe ua.

‘Oku tataki e kulupu moʻui fakafalala pē kiate kita ʻe ha tokotaha ngāue tokoni. ʻOku tokoniʻi e ngaahi kulupu moʻui fakafalala pē kiate kitá, kae ʻikai ke akoʻi ‘e ha faiako. ʻI heʻete hoko ko ia ko e tokotaha tokoní, ʻoku ʻikai ke fie maʻu ia ke tau hoko ko e kau mataotao ʻi he lēsoní. Ka, ‘oku tau tokoniʻi e kulupú ke nau muimui ki he ngaahi nāunaú ʻo hangē ko ia kuo tohí pea fakaafeʻi e mēmipa takitaha ʻo e kulupú ke nau kau ki ai.

ʻOku muimui e fakataha fakakulupu takitaha ki ha vahe ʻi he tohi lēsoní. ʻOku ʻi ai ha konga ʻe nima ʻo e vahe takitaha mo hono taimi pē kuo ʻosi fokotuʻu atu ke fai ai. Ko e ngaahi konga ʻe nima ko ʻení ko e ʻelito ia ʻo ha fakataha fakakulupu ʻo e moʻui fakafalala pē kiate kitá. Ke fakalele ha fakataha fakakulupu, muimuiʻi pē e ngaahi nāunaú mo e taimi kuo ʻosi fokotuʻu atú—ʻoua naʻa hiki fakalaka mei ha konga.

ʻEkitivitī (miniti ʻe 8)

Tau toʻo ha kiʻi taimi siʻi ke vakai ai ki ha tohi lēsoni moʻui fakafalala pē kiate kita. ʻE tokoni ʻeni ke tau vakai ko e fakalele ko ia ʻo ha fakataha fakakulupú, ʻoku tau muimui pē ki he ngaahi nāunaú. Te tau fakahoko fakakulupu e ʻekitivitī ko ʻení.

Sitepu 1: ‘E tufa ʻe he tokotaha tokoní ha ngaahi tatau ʻo e tohi lēsoni moʻui fakafalala pē kiate kitá. ʻE lava ke vahevahe e kakaí mo kinautolu ʻoku tangutu ofi ki aí.

Sitepu 2: ʻOku vakai kotoa ʻa e kulupú ki he vahe ua ʻo e tohi lēsoní. Te tau vakaiʻi fakataha kātoa e ngaahi vahé, pea kumi e konga ʻe nima ʻo ha fakataha fakakulupu moʻui fakafalala pē kiate kita. ʻI heʻetau maʻu kotoa e ngaahi konga takitaha ʻi he vahé, te tau taʻofi leva ai kae lau leʻolahi mai ʻe he tokotaha tokoní ʻa e fakamatala ki he kongá mei he tēpile ko ʻení.

Liliu e Kau Ngāue Tokoní

Lau

ʻI he fakaʻosinga ʻo e fakataha takitaha, te tau lava ʻo tokoniʻi e kau mēmipa ʻo ʻetau kulupú ke fili hanau hoa ngāue ke tokoni mo poupou ʻi he lolotonga ʻo e uiké. ʻE lava pē ke liliu e ngaahi hoa ngāué ʻi he uike takitaha. Meimei ko ha fefine mo e fefine pe tangata mo e tangata ka ‘oku ‘ikai ke na fāmili.

Ko e fakatahaʻi e ngaahi tefitoʻi moʻoni fakalaumālié, taukei fakangāué, mo e mālohi ʻo e kulupú, ʻoku fokotuʻu ai ha ʻātakai makehe ʻo e akó ʻa ia ʻoku tokoni ki he kakaí ke fakalakalaka ʻenau moʻuí. Hangē ko ia te ke mamata ki ai ʻi he vitiō ko ení, ʻoku tau ako ʻi heʻetau ngaahi kulupu moʻui fakafalala pē kiate kitá mei ha maʻuʻanga tokoni ʻe tolu: ngaahi nāunaú, tokotaha kotoa pē, pea mo e Laumālié.

Mamataʻi

“The Power of the Group,” maʻu atu ʻi he srs.lds.org/videos. (ʻIkai ha vitiō? Hoko atu hono laú.)

Aleaʻi (miniti ʻe 2)

‘Okú ke pehē ko e hā ha founga ʻe kehe ai hoʻo ngaahi kulupu moʻui fakafakalala pē kiate kitá mei he ngaahi kalasi pe fakataha ako kehe kuó ke ʻosi kau atu ki aí? Ko e hā nai ha founga te nau faitatau ai?

Liliu e Kau Ngāue Tokoní

Ko e Hā Teu Lava ‘o Fai Ke u Hoko ai Ko Ha Tokotaha Tokoni Tuʻukimuʻa?

Lau

ʻE malava pē ʻa e hoko ko ha tokotaha tokoní ke hoko ko ha aʻusia fakaʻofoʻofa. Naʻe fakahoko ʻe he kau tokoni lelei tahá ha ngaahi meʻa mātuʻaki mahuʻinga ʻe tolu:

• Tokoni, kae ʻikai akoʻi.

• Tokangaʻi mo ha ngaahi fatongia kehe ʻe niʻihi.

• Hoko ko ha tauhi-sipi ki he kulupú.

Tokoniʻi, kae ʻIkai Akoʻi

Lau

ʻOku fakataumuʻa hono fokotuʻu e ngaahi kulupu moʻui fakafalala pē kiate kitá ke tokoniʻi kae ʻikai ke akoʻi ʻe ha faiako. ʻOku ʻikai ke teuteu lēsoni e kau ngāue tokoní, akoʻi e kulupú, pe lea lahi ange ʻi ha mēmipa ʻo e kulupú. ʻOku nau muimui pē ʻi he nāunau ʻa e kalasí pea fakaafeʻi e mēmipa takitaha ʻo e kulupú ke nau kau mai. ʻOku tokoni ʻa e kau ngāue tokoní ki hono fokotuʻu ha ʻātakai ʻe lava ke akoʻi ai ʻe he Laumālié e kulupú.

Vakai ʻi he vitiō hono hokó, ki he ngaahi founga ne liliu ai e tokotaha tokoní mei he akoʻí ki he tokoniʻí, pea naʻe fēfē hono olá ʻi he kulupú.

Mamataʻi

“How to Facilitate a Group,” maʻu atu ʻi he srs.lds.org/videos. (ʻIkai ha vitiō? Hoko atu hono laú.)

Aleaʻi (miniti ʻe 2)

ʻOku kehekehe fēfē e tokoniʻí mei he akoʻí?

Liliu e Kau Ngāue Tokoní

Lau

ʻI heʻetau hoko ko ia ko ha tokotaha tokoní, ʻoku tau fatongia ʻaki hono fokotuʻu ha ʻātakai ʻoku lelei, fakaʻapaʻapa, pea fakafiefia ki he akó. ʻOku tau tokoni ki he kau mēmipa heʻetau kulupú ke nau fetokaʻiʻaki pea fakahaaʻi e ʻofá mo e tokoní.

ʻEkitivitī (miniti ʻe 5)

Ko e ngaahi lisi ʻeni ʻo e ngaahi meʻa ʻe malava ke tau fai ʻi heʻetau hoko ko e kau ngāue tokoní, ʻa ia ʻe lava ke tokoni pe uesia ai e ʻātakai ako ʻetau kulupú. ‘Ai ha taha ke ne lau leʻolahi ʻa e ngaahi lisí, pea talanoa ʻi he kulupú fekauʻaki mo e ʻuhinga ʻe malava ai ke tokoni pe uesia e ngaahi meʻá ni.

Liliu e Kau Ngāue Tokoní

Lau

ʻI heʻetau hoko ko e kau ngāue tokoní, ʻoku tau tā e sipingá. ʻE lava ke tau tokoniʻi e kau mēmipa ʻo ʻetau kulupú ke fokotuʻu ha ʻātakai lelei mo fetokaʻiʻaki ki he akó. He ʻikai haohaoa maʻu pē e meʻa kotoa, pea ʻe ala fie maʻu ʻi ha ngaahi taimi ke tau tokoniʻi e mēmipa ʻo e kulupú ke nau vakai ki he founga ʻoku uesia ai ʻe heʻenau tōʻongá ʻa e kulupú pea mo e founga ke liliu aí. Te tau talanoa lahi ange ki he meʻá ni ʻi heʻetau ʻekitivitī hokó.

ʻEkitivitī (miniti ʻe 10)

Sitepu 1 (miniti ʻe 5): Tauhoa mo e tokotaha hoko atu kia koé, fili ha taha ʻo e ngaahi tūkunga ko ʻení, pea aleaʻi e founga te ke fakaleleiʻi ʻakí.

Sitepu 2 (miniti ʻe 5): Fakataha fakakulupu mai pea fevahevaheʻaki e ngaahi meʻa ne mou talanoaʻí.

Ngaahi Tūkungá

• Ko e mēmipa pē ʻe taha pe ua ʻo e kulupú ʻoku lahi ange ʻena toutou leá ʻi he toenga ʻo e kulupú, pea ʻoku fakalongolongo pē e kau mēmipa kehe ʻo e kulupú ʻo ʻikai vahevahe ʻenau ngaahi fakakaukaú.

• ʻOku ʻi ai e tokotaha ʻi he kau mēmipa hoʻo kulupú ʻoku teʻeki ke kau mai ki he ngaahi fealēleaʻakí pe ngaahi ʻekitivitī fakakulupú.

• ʻOku ʻi ai e tokotaha ʻi he kau mēmipa hoʻo kulupú ʻoku faʻa lea maʻu pē kau ki ha ngaahi meʻa ʻoku ʻikai felāveʻi mo e tefitó. ʻOku hoko ʻene ngaahi fakamatalá ke faingataʻa ke nofo maʻu ʻi he lēsoní pea aleaʻi e ngaahi nāunaú ʻi he taimi ʻoku tuku maí.

• ʻOku ʻi ai ha mēmipa ʻo e kulupú ʻoku faingataʻa ʻaupito ke laukonga leʻolahi. ʻOkú ke fifili pe ʻoku faingataʻaʻia pe mahalo ʻoku mā pē ia.

• ʻOku kei kamata tōmui pē ʻa e kulupú koeʻuhí ko ha kau mēmipa tokosiʻi pē ʻi he kulupú ʻoku ʻikai ke nau maʻu mai e taimí pea ʻokú ke ongoʻi tautea ke kamata ʻoku teʻeki ke nau aʻu mai.

Tokotaha Tokoní

ʻE ala tokoni ʻi he fealēleaʻaki ko ʻeni fekauʻaki mo e fatongia ʻo e tokotaha tokoní, ke foki e tokoní ki he tokotaha tokoni ʻuluakí.

Tokangaʻi mo ha Ngaahi Fatongia Kehe ʻe Niʻihi

Lau

ʻI heʻetau hoko ko e kau ngāue tokoní, ʻoku ʻi ai foki mo haʻatau ngaahi fatongia kehe ʻe niʻihi mavahe mei heʻetau ngaahi fakataha fakakulupú. ʻE ʻomi ʻe he ʻekitivitī hokó ha faingamālie ke tau talanoa ai fekauʻaki mo e ngaahi fatongiá ni.

ʻEkitivitī (miniti ʻe 10)

‘E tataki kitautolu ʻe he ngaahi lisi fehuʻi ko ʻení ʻi ha fealēleaʻaki fekauʻaki mo e ngaahi fatongia kehe ʻe niʻihi ʻoku tau maʻu ko e kau ngāue tokoní. ʻE tokoniʻi ʻe he mataotao ʻo e moʻui fakafalala pē kiate kitá pe ko ha taki fakalotofonua ʻe taha e fealēleaʻakí ni mo ʻomai ha ngaahi fakahinohino pau ki he meʻa takitaha. Ongoʻi tauʻatāina pē ke fai ha ngaahi fehuʻi lolotonga ʻetau fealēleaʻakí.

Ko hai ʻoku mataotao ʻi he moʻui fakafalala pē kiate kitá, pea ko e hā ʻenau meʻa ʻoku faí?

• Fakamatala ki he fetuʻutakí:

Ko e fē taimi ʻoku fakahoko ai e fakataha lotú, pea ko e hā hoku fatongiá?

• Taimí:

• Feituʻú:

• Ko hoku fatongiá:

ʻOku anga fēfē hono faʻu e kulupu ʻoku ou tokoniʻí, pea ʻoku fēfē ʻeku fengāueʻaki mo kinautolú?

Ko e hā e founga mo e taimi ke u lēsisita ai ʻeku kulupú mo lipooti ʻenau fakalakalaká?

• Foungá:

• Taimí:

Ko e hā e founga ʻoku totonu ke u teuteu ai ki heʻeku ʻuluaki fakatahá?

• Taimi mo e feituʻu ʻe fakahoko aí:

• Founga te u lava ʻo hū ai ki he falé:

• Founga te u maʻu ai e ʻū tohi lēsoní:

• Founga te u fakaʻaongaʻi ai e ngaahi vitioó:

• Founga te u fokotuʻutuʻu ʻaki e lokí:

Ko e hā mo haʻatau toe ngaahi fehuʻi makehe?

Liliu e Kau Ngāue Tokoní

Hoko ko ha Tauhi-Sipi ki Hoʻo Kulupú

Lau

Kuo tau fakamatalaʻi kakato ʻeni e founga ke tokoní mo aleaʻi ha niʻihi ʻo hotau ngaahi fatongia kehé, kuo taimi leva ke tau talanoa kau ki he meʻa mahuʻinga ki he ngāue tokoni tuʻukimuʻá. ʻOku ʻofa mo tokanga e kau ngāue tokoni lelei tahá ʻi he kau mēmipa ʻo ʻenau kulupú. ʻOku nau tokangaʻi ʻenau kulupú ʻo hangē pē ko ha tokanga ʻa ha tauhisipi ki ha tākanga sipí. Naʻe fakaʻaongaʻi ʻe Kalaisi e fakatātā ʻo e kau tauhisipí koeʻuhí naʻe ʻiloʻi ʻe he kau tauhisipí ʻa e hingoa, ʻulungaanga, mo e fie maʻu takitaha ʻo ʻenau fanga sipí. ʻOku feinga e kau ngāue tokoni tuʻukimuʻá ke ʻiloʻi e kau mēmipa ʻenau kulupú, tokanga ki heʻenau lavameʻá, pea tokoni ke nau kau mai pea maʻu ha ola ʻoku leleí. Mahalo naʻa ʻosi ha ngaahi uike siʻi pea toki kakato mai hoʻo kulupú, ka ko e tokolahi taha e niʻihi ʻoku ʻosi mei he kulupu moʻui fakafalala pē kiate kitá, ʻoku nau talanoa fekauʻaki mo ʻenau vāofi mo ʻenau kulupú pea mo ʻenau fetokoniʻakí. ʻI heʻetau hoko ko e tokotaha tokoní, te tau lava ʻo tokoni ke fokotuʻu ha ʻātakai ʻokú ne poupouʻi ʻení.

Taufetongi ‘i hono lau e ngaahi fokotuʻu ko ʻeni ki he hoko ko ia ko ha tauhisipi ki hoʻo kulupú.

Ko e Hoko ko ha Tauhisipi ki Hoʻo Kulupú

• Tā telefoni pe ʻave ha pōpoaki telefoni ki he kau mēmipa ‘o e kulupú. ‘E lava ke ke vakaiʻi kinautolu pea fakamanatu ange e ‘aho, taimi, mo e feituʻu ʻo e fakatahá.

• ʻI he aʻu mai ʻa e kakaí, talitali fiefia kinautolu pea feinga ke ʻiloʻi kinautolu.

• Fakatokangaʻi pea fakahaaʻi e fiefia ʻi he fakalakalaka e kau mēmipa hoʻo kulupú.

• Fakamanatu ki he kau mēmipa ʻo e kulupú ke fakaʻapaʻapaʻi e ngaahi fakamatala ʻoku ʻikai fakahāhāholó.

• ʻI he vahaʻa ʻo e ngaahi fakatahá, fakalotolahiʻi e kau mēmipa ʻo e kulupú ʻoku fāifeingá. Tokoni ki honau ngaahi hoa ngāué ke fetuʻutaki pea poupouʻi foki kinautolu.

• Tokoni fakataha mo e niʻihi kehe ʻi he kulupú ki he kau mēmipa ʻo e kulupú ne ʻikai maʻu fakatahá.

• Lotua e kau mēmipa ‘o hoʻo kulupú ʻaki honau hingoá.

• Toe vakaiʻi ʻi he faʻa lotu ʻa e ngaahi nāunau ki homou fakataha fakakulupu hokó.

• Nofo ofi ki he Laumalié, pea ngāue ‘o fakatatau mo e ngaahi fakakaukau mo e ueʻi fakalaumālié.

Aleaʻi (miniti ʻe 2)

ʻE tokoni fēfē hono fai e ngaahi meʻá ni ke tau hoko ko ha tauhisipi ki heʻetau ngaahi kulupu moʻui fakafalala pē kiate kitá?

Liliu e Kau Ngāue Tokoní

ʻEkitivitī (miniti ʻe 10)

Sitepu 1 (miniti ʻe 5): Tauhoa mo e tokotaha hoko atu kia koé, fili ha taha ʻo e ngaahi tūkunga ko ʻení, pea aleaʻi e founga te ke fakaleleiʻi ʻakí.

Sitepu 2 (miniti ʻe 5): Fakataha fakakulupu mai pea fevahevaheʻaki e ngaahi meʻa ne mou talanoaʻí.

Ngaahi Tūkungá

• ʻI hoʻomou fakataha fakakulupu hono uá, te ke ongoʻi ai ʻoku kiʻi momou e kakaí ke lipooti naʻe ʻikai ke nau tauhi kotoa ʻenau ngaahi tukupaá. ʻE ʻi ai e niʻihi he ʻikai ke nau fie vahevahe kinautolu ʻi honau taimí.

• Lolotonga e fakataha hono faá, ‘okú ke fakatokangaʻi ʻoku ‘i ai e tokotaha ʻi he kau mēmipa hoʻo kulupú ʻoku ʻikai ke ʻi ai. ‘Oku pehē ʻe hono hoa ngāué naʻe fiu feinga ia ki ai ʻi he uiké kakato.

• Ko e toko ua ʻi he kau mēmipa hoʻo kulupú ʻokú na kau ki ha tui fakalotu kehe. ʻOku fie maʻu ke ke fakapapauʻi ʻoku talitali lelei pea ongoʻingofua ʻe hoʻo kulupú ʻena ngaahi fakakaukaú.

• ʻOku hoko ha kiʻi meʻa fakafāmili fakatuʻupakē ki ha tokotaha ʻi he kulupú pea ʻikai ai ke ne lava mai ki he fakataha ʻi he uike ní. ʻOkú ne fakakaukau ke mavahe mei he kulupú koeʻuhí naʻe ʻikai ke ne maʻu e foʻi kalasi ʻe taha.

• ‘Oku fāifeinga ha mēmipa ʻe taha ʻo e kulupú. ‘Oku hangē ʻokú ne lotofoʻi ko e teʻeki ke ne vakai ki ha lavameʻa tatau mo e kau mēmipa kehe ʻo e kulupú.

Liliu e Kau Ngāue Tokoní

Fakaʻosí

Lau

Fakatauange pē kuo tokoni e ako ko ʻení ke tau maʻu ha kiʻi mahino lahi ange fekauʻaki mo e moʻui fakafalala pē kiate kitá, founga ngāue ʻa e ngaahi kulupu moʻui fakafalala pē kiate kitá, mo e meʻa te tau lava ʻo fai ke hoko ai ko ha kau ngāue tokoni tuʻukimuʻá. Mahalo ʻe kiʻi kehe e hoko ko ha konga ʻo ha kulupu moʻui fakafalala pē kiate kitá pea ʻi ai ha aʻusia foʻou maʻatautolu mo e kau mēmipa ʻo ʻetau kulupú. Mahalo ʻe fie maʻu ha kiʻi taimi nounou ke tau ongoʻi fiemālie ai ki he founga fakahoko ʻo e ngāué pea mo e niʻihi kehé. Toutou vakai mai pē ki he tohi lēsoni ko ʻení, vakaiʻi e fakamatala makehe ʻi he Fakamatala Fakalahí—tautautefito ki he ngaahi siví—pea vakai ki he srs.lds.org ke maʻu ha fakamatala lahi ange mo ha ngaahi vitiō ke tokoni. Te tau maʻu ha aʻusia lelei ʻi he fakalau ʻa e taimí pea mo e falala ki he ʻEikí.

Mamataʻi

“Self-Reliance Facilitators: Bringing About Change,” maʻu atu ʻi he srs.lds.org/videos. (ʻIkai ha vitiō? Hoko atu hono laú.)

Aleaʻi (miniti ʻe 3)

Ko e hā e ngaahi meʻa mahuʻinga taha naʻa tau ako mei he ako ko ‘ení?

Fakalaulauloto (miniti ʻe 3)

Fakakaukau fakafoʻituitui angé ki he ngaahi meʻa kuó ke ako mei he akó ni, pea fakakaukau ki ha meʻa ʻe finangalo e ʻEikí ke ke fakahoko. Hiki hoʻo talí ʻi lalo.

Makatu’unga ʻi he meʻa ne u aʻusia ʻi he ʻaho ní, ‘oku ou fie:

Lotú

Fakaafeʻi ha taha ke ne fai e lotu tukú.