“Aoao—Taimi Aofai: 85 Minute,” Faafoeina o Vaega mo le Ola-Tutoatasi (2016)
“Aoao—Taimi Aofai: 85 Minute,” Faafoeina o Vaega
Ata
aikona o le aoao
Aoao—Taimi Aofai: 85 Minute
O Le A le Vaega mo le Ola Tutoatasi? (10 minute)
Maimoa:“I Will Provide for My Saints,” e maua i le srs.lds.org/videos i lalo o le “Punaoa o Vitio” i le vaega “Faafoeina o Vaega” (Leai se vitio? Faaauau le faitau.)
Talanoa: E faapefea ona aafia lo’u ola tutoatasi i lo’u faatuatua ia Iesu Keriso?
Faitau:O le faamoemoega o vaega mo le ola tutoatasi o le, ia fesoasoani i tagata ia suia le ala o loo ola ai. Na aoao mai Elder M. Russell Ballard: “Ou te talitonu o aufono o le ala aupito sili lea ona aoga e maua ai taunuuga moni. Ma le isi, ou te iloa o aufono o le ala a le Alii ma sa Ia foafoaina mea uma i le atulaulau e ala i se aufono faalelagi, e pei ona ta’ua i tusitusiga paia” (“Aufono Faaleaiga,” Ensign po o le Liahona, Me 2016, 63).
O le galulue faatasi i se faatulagaga o se aufono, e maua ai e tagata o le vaega ia taleni, musumusuga, aafiaga, ma le malamalama sili atu nai lo mea na latou faia. O vaega o le ola tutoatasi:
E i ai ni tagata se toa 8–12 e galulue i se mea e mananao uma i ai, e pei o le puleaina o mea tautupe, sailia o se galuega lelei atu, faaleleia o a latou aoga, po o le amataina ma le faateleina o se pisinisi.
O se siosiomaga saogalemu lea e lagona uma ai e tagata le lagolelei e auai faatasi ai.
E fono tai vaiaso e oo atu i le 12 vaiaso, e atinae tomai ma aga masani fou.
E faaaoga ai se faataitaiga o se aufono ina ia mafai e ona tagata auai ona aoao mai ma faamalosiau e le tasi le isi.
Tautino e galue i vaiaso taitasi i mea ua aoaoina e ona sui auai.
Lipoti atu le alualu i luma ina ia mafai e ona sui auai ona tali atu taitoatasi i latou mo a latou tautinoga.
Talanoa: O le a le eseesega o vaega mo le ola tutoatasi mai aoaoga faamasani po o isi vaega na e auai?
O Lou Matafaioi o se Tagata e Faafoea (15 Minute)
Maimoa:“Auala e Faafoe ai se Vaega,” e maua i le srs.lds.org/videos i lalo o “Punaoa o Vitio” i le vaega “Faafoeina o Vaega” (Leai se vitio? Faaauau le faitau.)
Talanoa: O a mea na tatau ona sui e le tagata faafoe i le vitio mai le avea o se faiaoga i le avea o se tagata e faafoea? Na faapefea ona aafia ai le vaega?
Faitau:Na fetalai mai le Alii e uiga i aufono po o vaega i totonu o le Ekalesia, “Ia lē tuu atu i tagata uma e tāutala i le taimi e tasi; ae tuu atu i tagata e tautala taitoatasi mai ae tuu i isi tagata uma e faalogologo i ana upu, ina a uma ai ona tautala mai o tagata uma, o le a faapea ona mafai ona faagaeetia ai o tagata uma, ma ina ia mafai ona maua ai e tagata taitoatasi le avanoa tutusa” (MF&F 88:122; ua faaopoopo le faatusilima).
I vaega o le ola tutoatasi, e leai se tasi e valaauina e faiaoga! I le avea ai o se tagata faafoe, o lou tiute o le fesoasoani i tagata o le vaega e mulimuli i anomea, auai, ma valaaulia le Agaga i le talanoaga. Sa lei valaauina oe e avea ma tagata e iloa uma mea e uiga i le mataupu. Nai lo o lena, e tatau ona e auai o se tagata o le vaega, tausia tautinoga ma aoao faatasi. O le mulimuli i mataupu faavae o loo i lalo (ua faamatamata tetele) o le a fesoasoani i lau vaega ia maua se aafiaga faamanuiaina.
Fatu se siosiomaga saogalemu. O vaiaso taitasi o le a lipoti faamaoni atu ai e sui auai i le vaega a latou taumafaiga i le tausiga o tautinoga. O le a latou faia ni mea sese ma oo i le toilalo a o latou malaga agai atu i le faateleina o le ola tutoatasi. O le tulaga masani lava lenei ma e lelei. E taua ona lagona e sui auai o loo latou i ai i se siosiomaga saogalemu e taumafai ai, toilalo, ma iu ai ina faamanuiaina.
Talanoa: O a ni auala e mafai ai ona e fesoasoani i sui auai ia lagona le saogalemu, lagolelei, ma le taliaina i le vaega?
Faitau:Faamalosiauina o le auai. I le avea ai ma se tagata e faafoea, e le tatau ona umi ona e tautala i lo se isi lava tagata i le vaega. E tatau ona tou milo faatasi i totonu ma fesoasoani e tuu atu i tagata uma se avanoa e tautala ai.
Talanoa: E faapefea ona e taulimaina se tagata e faomalo i le talanoaga pe e le auai i le talanoaga?
Faitau:Amata ma faaiu i le taimi sao. E tatau i tagata o le vaega ona mafai ona talitonu o le a amata ma faaiu le vaega i le taimi sao. Ua tofu vaega ma gaoioiga ma taimi faatapulaa fautuaina. E mafai ona e tofia i vaiaso taitasi se tagata i le vaega e mataituina le taimi.
Talanoa: O a nisi mea e mafai ona e faia e fesoasoani ai i le vaega ia alu i le taimi sao?
Faitau:Tausisi i manatu faaalia aoga ma lelei. Aua nei faasoaina atu ni tala e faitio ai i isi, e tusa lava pe faatatau i se tasi e le silafia e tagata o le vaega.
Talanoa: E mafai faapefea ona e uunaia manatu faaalia o le vaega ia taulai atu [i le mataupu talanoaina] ma ia faaaloalo?
O le Fausaga o se Fonotaga a le Vaega mo le Ola Tutoatasi (40 minute)
Maimoa:“‘Go and Do’ Learning,” e maua i le srs.lds.org/videos i lalo o “Punaoa o Vitio” i le vaega “Faafoeina o Vaega” (Leai se vitio? Faaauau le faitau.)
Faitau:O fonotaga taitasi a vaega e tai lima vaega. E le tatau ona e faamisia se vaega.
Ata
aikona o le lipoti
Lipoti:I le vaega lenei, e iloilo ai e sui auai o le vaega a latou taumafaiga ma lipoti atu lo latou alualu i luma i le vaega. Latou te faasoa atu mea ua latou aoaoina mai le faataitaia o tomai ma aga masani fou. O le iloiloina o le alualu i luma e taua tele i le atinaeina o aga masani fou. (E alu ai le 20-30 minute.)
Talanoa: E faapefea ona fesoasoani ia i tatou le lipoti faamaoni atu o lo tatou alualu i luma i le vaega?
Ata
Aikona o Lo’u Faavae
O Lo’u Faavae:I le vaega lenei, e mafai ai e sui auai ona aoao ma faatino mataupu faavae o le faatuatua, aoga, galue malosi, ma le faalagolago i le Alii. O vaiaso taitasi e toe faamanatu ai e sui auai se mataupu faavae autu o le a fesoasoani ia i latou e faateleina ai le ola tutoatasi. (E alu ai le 20 minute.)
Talanoa: Aisea tatou te suesueina uma ai tomai faaleaoaoga faavae ma faaletino i totonu o o tatou vaega?
Ata
aikona o le aoao
Aoao:I le vaega lenei, e faitau, talanoa, ma faataitai ai e sui auai ni manatu ma ni tomai fou o le a fesoasoani ia i latou ia ola tutoatasi ai faaletino. (E alu ai le 40-50 minute.)
Ata
aikona o le mafaufau loloto
Mafaufau Loloto:I le vaega lenei, e mafaufau loloto ma tusitusi ai e sui auai o le vaega ia mea ua latou aoaoina i le taimi o le fonotaga a le vaega. Latou te sailia le taitaiga mai le Alii ma faailoa auala e faalelei atili ai. Faamolemole e aua le faamisia le vaega lenei. (E alu ai le 5-10 minute.)
Talanoa: E faapefea e le mafaufau loloto—le leoa ma e aunoa ma le talanoaina—ona faataga le Agaga Paia e aoao i tatou?
Ata
aikona o le tautino
Tautino:I le vaega lenei, e tautino ai sui auai e faataitai tomai ma aga masani fou ua latou aoaoina ma talanoaina i le fonotaga a le vaega. O le faia ma le tausia o tautinoga e taua i le faagasologa o le faavaeina o aga masani fou. Ina ia fesoasoani, o le a filifili e sui auai se isi tagata o le vaega e avea ma se soa galue. O soa galue e siaki e le tasi le isi i le aluga o le vaiaso e tuuina atu le faamalosiauga ma le lagolago. E tautino foi sui auai e aoao atu mea ua latou aoaoina i o latou aiga po o uo. (E alu ai le 5-10 minute.)
Talanoa: Aisea e taua ai le avea ma le i ai o se soa galue?
Ata
aikona o le galue
Galue:E tatau i sui auai ona galulue i a latou tautinoga i le aluga o le vaiaso ia sui le auala o loo latou ola ai! O le fai ma le aoaoina o isi i mea ua latou aoaoina e fesoasoani e atiae ai tomai ma aga masani o le ola tutoatasi. (E alu ai le 3-8 itula i le vaiaso.)
Talanoa: E mafai faapefea ona ou fesoasoani i tagata o le vaega ia galulue i le aluga o le vaiaso e atiae ni aga masani lelei?
Faitau:O lenei la ua e silafia le fausaga [o fonotaga], sei o tatou faataitaia faatasi la se vaega moi o se fonotaga.
Auala e Auai ai Tagata i Vaega (10 minute)
Maimoa:“Filifilia o se Vaega o le Ola Tutoatasi,” e maua i le srs.lds.org/videos i lalo o “Punaoa o Vitio” i le vaega “Faafoeaina o Vaega”. (Leai se vitio? Faaauau le faitau.)
Faitau:O le faagasologa ia auai ai i se vaega e aafia ai ni laasaga se tolu:
Muamua, e valaaulia e aufono a uarota le au paia e auai i se faigalotu o le ola tutoatasi.
Lona lua, o le au paia ua auai mai i le faigalotu o le a:
Aoao i aoaoga ma mataupu faavae autu o le ola tutoatasi.
Iloilo lo latou manaoga faaleagaga ma faaletino o loo i ai i le taimi nei.
Filifili se vaega o le a faaalualu ai i luma o latou tomai.
Filifili se aso, taimi, ma nofoaga mo fonotaga a vaega.
Lona tolu, ona amata auai atu lea o sui auai i le vaega na latou filifilia i le vaiaso e tasi pe a uma le faigalotu.
O Tiutetauave Faaletaitai o se Tagata Faafoe (10 minute)
Lesitalaga o le Vaega
Faitau:E taua le lesitala o le vaega ma faatumu mulimuli ane se lipoti i le faaiuga o le vaega. O lenei faiga e mafai ai ona e talosagaina tusi faamaonia mo tagata o le vaega, maua anomea faaopoopo mo aoaoga, ma fesoasoani i le Ekalesia e faaleleia atili le taulamua o le ola tutoatasi. Faamolemole toe faamanatu faatonuga o loo i lalo:
Ao lei faia le fonotaga muamua o le vaega, sii mai le Fomu o le Lesitalaga o le Vaega i le srs.lds.org/report. Faatumu le fomu i le taimi o le fonotaga muamua o le vaega. A uma ona faatumu le fomu, asiasi i le srs.lds.org/report e tuu ai i totonu faamatalaga.
Faafesootai i vaiaso taitasi le tagata faapitoa o le siteki mo le ola tutoatasi e faailoa atu i ai po o ai na auai i le fonotaga ma soo se tala o le faamanuiaina o tagata o le vaega.
Ao lei oo i le fonotaga mulimuli o le vaega, sii mai le Lipoti o Faaiuga o le Vaega ma le Fomu Talosagaina o Tusi Faamaonia i le srs.lds.org/report. Faatumu le fomu i le taimi o le fonotaga mulimuli o le vaega. A uma ona faatumu le fomu, asiasi i le srs.lds.org/report e tuu i totonu faamatalaga.
Tapenaina o le Potu ma Vitio i Vaiaso Taitasi
Faitau:E tatau i le tagata faapitoa o le siteki mo le ola tutoatasi ona taofi se potu i le falelotu o le Ekalesia mo oe. O vaiaso taitasi e tatau ona e vave sau ai i ni nai minute e faatulaga laulau ma nofoa. E tatau foi ona e faatulagaina masini otovitio ma faamaonia e ola ata vitio ma leo.
Faafoeina o Vaega “Saili se Galuega e Sili Atu”
Afai o loo e faafoeina se vaega, Saili se Galuega e Sili Atu, e lua ni mea e tatau ona e nofouta i ai.
Muamua, pe a faatulaga lau vaega i le faigalotu o le ola tutoatasi, ia valaaulia sui auai o le vaega e aumai se kopi o se lisi o galuega latou te fiafia i ai i fonotaga taitasi a le vaega.
Lona lua, o filifiliga o lau fonotaga e fetuutuunai. Faamolemole faitau itulau e 16-17 i le faaopoopoga. Ia faailoa atu filifiliga i le fonotaga ia i latou e filifilia lau vaega i le faigalotu o le ola tutoatasi.
Aotelega
Faitau:Ia tagai e le aunoa i le lisi lenei i le taimi o lau auaunaga o se tagata faafoe.
O Mea E te Faia ao lei oo i le Fonotaga o le Vaega
Valaau pe tesi i tagata o le vaega e faamanatu i ai le aso, taimi, ma le nofoaga.
Toe faamanatu anotusi e sauniuni ai e faafoe—ae aua le tapena e aoao atu e pei o se lesona.
Fai atu i le tagata faapitoa o le siteki mo le ola tutoatasi ia lava ni tusigaluega e tuu atu ia te oe mo tagata uma o e na saini aao ma ni kopi faaopoopo se lua.
Ia e vave taunuu e faatulaga lelei nofoa, laulau, ma vitio.
Ia i ai ni peni ma ni penitala mo tagata e galo ona aumai a latou lava peni ma penitala.
O Mea E te Faia i le Fonotaga o le Vaega
Faafeiloai fiafia i tagata o le vaega ma ia faamasani ia i latou.
Ia iloa ma patipatia mea latou te ausia ma le alualu i luma.
Tofi se tagata e mataituina le taimi e pulea taimi fautuaina.
Ia uunaia talanoaga a tagata o le vaega.
Ia faamamafa atu le galulue i tautinoga i le va o fonotaga.
Faamanatu i tagata o le vaega ia faaaloalo i faamatalaga e le faalauaiteleina.
O Mea E te Faia pe a uma le Fonotaga o le Vaega
Asiasi i le srs.lds.org/report pe a uma le fonotaga muamua ma le mulimuli a le vaega mo le lesitalaga, lipoti atu, ma tusi faamaonia.
Ia uunaia soa galue e faafesootai ma fesoasoani i le tasi ma le isi i le aluga o le vaiaso.
Faafesootai i vaiaso taitasi le tagata faapitoa o le siteki mo le ola tutoatasi e faailoa atu i ai lau auai ma pe na a mai le aluga o le fonotaga.
Ia toe faamanatu ma le agaga tatalo ia anomea mo le isi fonotaga e sosoo ai o le vaega.
Ia saunia faaleagaga ma ia galue i uunaiga e te maua.