Apendiks A

Blong Ol Papa mo Mama—Stap Rere Ol Pikinini blong Yu blong Stap long Kavenan Rod blong God blong wan Laef Taem

From se Hem i lavem yu, i trastem yu, mo save wanem nao yu save mekem, Papa long Heven i givim yu janis ia blong helpem ol pikinini blong yu blong go insaed mo kam antap long kavenan rod blong Hem, rod ia we i go long laef ia we i no save finis (luk long Doktrin mo Kavenan 68:25–28). Hemia i tekem tu blong stap helpem olgeta blong oli rere blong mekem mo kipim ol tabu kavenan ia, olsem kavenan blong baptaes mo ol kavenan we oli mekem insaed long tempol. Tru long ol kavenan ia, ol pikinini blong yu bae oli fasem olgetawan long Sevya, Jisas Kraes.

I gat plante wei blong mekem rere ol pikinini blong yu blong folem rod ia blong kavenan, mo Papa long Heven bae i helpem yu blong faenemaot bes wei we i moa gud blong helpem olgeta. Taem yu stap lukaotem insperesen, putum long maen blong yu se blong yumi stap lan i no hapen nomo long taem we ol lesen bae i hapen. Be, ia we i mekem blong stap lan long hom i gat moa paoa hem i we blong gat janis ia blong lanem samting tru long eksampol mo tru long ol smol, simpol taem ia—ol kaen ia i hapen olsem nomo long evri dei laef. I olsem we yumi stap folem kavenan rod ia we i stap semmak, we i rod blong hem i long wan, i semmak taem yumi stap lan abaot kavenan rod ia. (Luk long “Hom mo Famli,” Tij Folem Wei blong Sevya [2022], 30–31.)

I gat plante wei blong mekem rere ol pikinini blong yu blong folem kavenan rod ia blong blong God.

Andanit ia i gat sam aedia we i save givim moa insperesen. Yu save faenem sam moa aedia blong stap tijim ol pikinini we oli yia blong Praemeri long “Apendiks B: Blong Ol Praemeri—tap Rere Ol Pikinini blong Yu blong Stap long Kavenan Rod blong God blong wan Laef Taem.”

Baptaes mo Konfemesen

Nifae i bin tijim se “get we [yufala] mas gotru long hem” kavenan rod ia “i fasin blong sakem sin mo baptaes long wota” (2 Nifae 31:17). Ol traehad blong yu blong helpem ol pikinini blong yu oli rere blong kasem baptaes mo konfemesen i save putum ol leg blong olgeta i stap strong long rod ia. Ol traehad ia oli stat wetem stap tij abaot fet long Jisas Kraes mo fasin blong sakem sin. Oli tekem tu, stap tij abaot olsem wanem yumi riniu ol kavenan blong yumi blong baptaes taem yumi tekem sakramen evri wik.

Hemia sam risos we i save helpem yu: 2 Nifae 31; spesel namba blong Fren magasin abaot fasin blong baptaes; Gospel Topics, “Baptism,” Gospel Laebri.

• Eni taem we yu gat wan eksperiens we i mekem fet blong yu i kam strong long Papa long Heven mo Jisas Kraes, serem wetem pikinini blong yu. Helpem hem blong hem i andastanem se fet i wan samting we i save gro moa strong mo moa strong truaot long laef. ?Wanem nao sam samting we pikinini blong yu i save mekem blong developem fet blong hem long Jisas Kraes i kam moa strong bifo hem i save kasem baptaes?

• Taem pikinini blong yu i jusum blong mekem rong, toktok gud long hem abaot presen blong fasin blong sakem sin. Mo taem yu jusum blong mekem rong joes, serem glad ia we yu kasem taem yu sakem sin. Testifae se from Jisas Kraes i safa mo ded from ol sin blong yumi, Hem i givim paoa long yumi blong jenis. Taem pikinini blong yu i askem fogivnes, givim long hem wetem wan gudfala hat mo glad.

• Talem long pikinini blong yu abaot taem we yu bin baptaes. Soem ol pikja mo serem ol memori. Tokbaot long hem olsem wanem yu bin filim, olsem wanem kavenan blong we yu mekem long baptaes blong yu i helpem yu kam blong save moa abaot Jisas Kraes, mo olsem wanem oli gohed blong blesem laef blong yu. Leftemap tingting blong pikinini blong yu blong askem ol kwestin.

• Taem i gat wan baptaes insaed long famli o long wod blong yufala, tekem pikinini blong yu i go luk. Toktok tugeta abaot wanem yu mo pikinini blong yu i bin luk mo filim. Sapos i nid, toktok long hem we i kasem baptaes mo askem ol kwestin olsem hemia: “?Olsem wanem nao yu mekem desisen ia? ?Olsem wanem nao yu mekem rere?”

• Long enitaem yu luk pikinini blong yu i mekem wan samting we hem i promes blong mekem, leftemap hem wetem ol gudfala toktok we i tru. Poenemaot se blong stap kipim ol komitmen i helpem yumi blong kipim ol kavenan we yumi mekem taem yumi baptaes. ?Wanem nao yumi promesem God taem yumi bin baptaes? ?Wanem nao Hem i promesem long yumi? (luk long Mosaea 18:8–10, 13).

• Taem yu mo pikinini blong yu i gat wan tabu eksperiens tugeta (olsem long jos, taem yufala i stap ridim ol skripja, o taem yufala i givim seves long wan nara man), talem long hem abaot ol gudfala filing long saed blong spirit o ol strong tingting we yufala i kasem. Invaetem pikinini blong yu blong serem wanem hem i filim. Talem long hem ol defren wei we Spirit i save toktok long ol man, olsem ol wei we Hem i toktok long yuwan. Helpem pikinini blong yu i luksave ol taem we hem i save eksperiensem wok blong Tabu Spirit long laef blong hem.

• Wajem tugeta sam long ol vidio long Gospel Laebri koleksen we taetol blong olgeta i “Hear Him!” Toktok tugeta abaot ol defren wei we ol wokman blong Lod oli harem voes blong Hem. Invaetem pikinini blong yu blong droem wan pikja o mekem wan vidio abaot olsem wanem hem i harem voes blong Sevya.

• Tokbaot olsem wanem blong stap kam wan memba blong Jos blong Jisas Kraes blong Ol Lata-dei Sent i bin blesem laef blong yu. ?Olsem wanem yu bin kam moa kolosap long Papa long Heven mo Jisas Kraes taem yu stap givim seves long ol narawan mo ol narawan oli givim seves long yu? Helpem pikinini blong yu blong tingting long ol wei blong givim seves mo mekem ol nara memba blong Jos oli kam moa strong.

• Mekem sakramen i kam wan taem we i tabu mo i givim glad long famli blong yu. Helpem pikinini blong yu i mekem plan long ol wei blong lukluk nomo long Jisas Kraes long taem blong sakramen. ?Olsem wanem nao bae yumi soem se sakramen i tabu long yumi?

• Plante long ol spesel namba long Fren magasin i gat insaed ol atikol, stori, mo aktiviti blong helpem ol pikinini oli rere blong kasem baptaes mo konfemesen. Letem pikinini blong i jusum sam blong ridim mo gat gud taem wetem yu. (Luk tu long koleksen “Preparing for Baptism” long seksen blong ol pikinini long Gospel Laebri.)

  

  Nifae i bin tijim se “get we [yumi] mas go tru long hem” i rod blong kavenan “hemia i fasin blong sakem sin mo baptaes long wota” (2 Nifae 31:17).

Prishud Paoa, Atoriti, mo Ol Ki

Prishud i atoriti mo paoa blong God we Hem i blesem ol pikinini blong Hem wetem. Prishud blong God i stap long wol tudei insaed long Jos Ia blong Jisas Kraes blong Ol Lata-dei Sent. Evri memba blong Jos we oli kipim ol kavenan blong olgeta oli kasem blesing ia blong gat paoa blong prishud blong God insaed long ol hom blong olgeta, blong mekem olgetawan mo ol famli blong olgeta i kam strong moa (luk long (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent long Jos Ia blong Jisas Kraes, 3.5, Gospel Laebri). Paoa ia bae i givim sapot long ol memba blong mekem wok blong God blong sevem man mo mekem man i kam olsem god long laef blong olgetawan mo ol famli blong olgeta (luk long Jeneral Hanbuk, 2.2).

Yumi kasem ol odinens tru long atoriti blong prishud. Taem man mo woman oli givim seves long ol koling blong Jos, oli mekem samting ia wetem atoriti blong prishud, anda long daereksen blong olgeta we oli holem ol prishud ki. Evri pikinini blong Papa long Heven—ol boe mo o gel blong Hem—bae oli kasem blesing taem bae oli kam blong andastanem gud moa abaot prishud.

Blong lanem moa abaot prishud, luk Russell M. Nelson, “Ol Rij Samting long Saed blong Spirit,” Liahona, Nov. 2019, 76–79; Russell M. Nelson, “Praes blong Prishud Paoa,” Liahona, May 2016, 66–69; “Ol Prinsipol blong Prishud,” japta 3 long Jeneral Hanbuk.

• Mekem ol odinens blong prishud oli kam pat blong famli laef blong yu oltaem. Eksampol, helpem pikinini blong yu i rere long saed blong spirit from sakramen evri wik. Leftemap tingting blong pikinini blong yu blong lukaotem ol blesing blong prishud taem hem i sik o i nidim kamfot o daereksen. Makem i kam wan samting we i stap oltaem blong yu save poenemaot se Lod i stap blesem famli blong yu tru long paoa blong prishud.

• Taem yufala i ridim skripja tugeta, luk long ol janis blong tokbaot olsem wanem God i blesem ol pipol tru long paoa blong Hem. Serem eksperiens blong yuwan blong taem, God i bin blesem yu tru long prishud blong Hem. Ol eksampol blong ol blesing we yumi kasem we i kam long God tru long prishud, luk long Jeneral Hanbuk, 3.2, 3.5.

• Lanem prishud laen blong atoriti blong wan insaed long famli blong yu. (Olgeta we oli holem Melkesedek Prishud oli save kasem wan kopi blong laen blong atoriti blong olgeta taem oli sendem wan imel i go long [e-mail]; luk tu long “Request a Priesthood Line of Authority” long Help Center long ChurchofJesusChrist.org.) Tokbaot from wanem hem i impoten blong save se prishud atoriti i kam stret long Jisas Kraes Hemwan. ?From wanem Hem i serem wetem yumi?

• Tijim pikinini blong yu se afta we hem i kasem baptaes, hem i save kasem paoa blong prishud taem hem i stap kipim kavenan blong baptaes blong hem. Luklukbak tugeta long mesej blong Presiden Russell M. Nelson “Ol Rij Samting long Saed blong Spirit” (Liahona, Nov. 2019, 76–79). Talem long pikinini blong yu olsem wanem ol odinens blong prishud oli karem paoa blong God i kam long laef blong yu. Blong gat wan lis blong sam long ol wei we yumi kasem blesing tru long paoa blong prishud, luk long Jeneral Hanbuk, 3.5.

• Tokbaot kwestin ia “?Wan wokman blong Lod i olsem wanem?” Rid tugeta long Doktrin mo Ol Kavenan 121:36–42, mo fanem ol ansa. Long enitaem taem yu luk pikinini blong yu (o wan narawan) i stap putum long praktis wan long ol prinsipol ia o ol fasin we oli tijim insaed long ol ves ia, poenemaot.

• Taem yu o pikinini blong yu i yusum ol ki blong openem wan doa o statem wan trak, tekem janis ia blong komperem ol ki ia long ol ki we ol prishud lida oli holem. (Blong kasem mining blong ol prishud ki, luk long Jeneral Hanbuk, 3.4.1). ?Wanem nao ol ki blong prishud i “openem” o “stat mekem” blong yumi? Luk tu long Gary E. Stevenson, “Wea Nao Ol Ki blong Prishud?,” Liahona, May 2016, 29–32; “Where Are the Keys?” (video), Gospel Laebri.

• Taem oli set apat long yu blong wan koling, invaetem pikinini blong yu blong stap, sapos hem i posibol. Letem pikinini blong yu i luk yu stap fulfilim koling blong yu. Maet yu lukaotem wan wei we i stret blong hem i save helpem yu. Eksplenem olsem wanem yu filim paoa blong Lod long koling blong yu.

Stap go long Tempol—Ol Baptaes mo Ol Konfemesen blong Olgeta We Oli Ded

Ol tempol oli pat blong plan blong Papa long Heven blong ol pikinini blong Hem. Insaed long ol tempol, yumi mekem ol tabu kavenan wetem Papa long Heven taem yumi tekem pat long ol tabu odinens, evri odinens ia oli poenem yumi i go long Jisas Kraes. Papa long Heven i givim wan wei blong evri pikinini blong Hem oli mekem ol kavenan mo tekempat long ol odinens, hemia i tekem tu olgeta we oli no kasem ol odinens ia long laef ia. Long stat blong yia we bae hem i kasem 12 yia blong hem ( gel o boe), pikinini blong yu i bigwan inaf blong kasem baptaes mo kasem konfemesen long bihaf blong ol olfala we oli ded finis insaed long tempol.

• Atendem tempol evri taem olsem we yu save mekem. Talem long pikinini blong yu se from wanem yu stap go long tempol mo olsem wanem tempol i helpem yu filim moa kolosap long Papa long Heven mo Jisas Kraes.

• Tugeta, luklukbak mo toktok raon long ol kwestin blong tempol rekomen . Tokbaot long pikinini blong yu abaot wanem i stap hapen long taem blong tempol rekomen intaviu. Serem from wanem blong gat wan tempol rekomen i impoten long yu.

• Rid tugeta long Malakae 4:6. Tokbaot olsem wanem hat blong yu i save tanem i go blong tingbaot ol bubu blong yu. Lanem moa abaot ol bubu blong yufala taem yufala i wok tugeta blong lukaotem olgeta insaed long famli histri long FamilySearch.org. Lukaotem ol bubu we oli nid blong kasem baptaes mo konfemesen. Wan wod tempol mo famli histri konsalten i save helpem yu.

• Tugeta yufala i lukluk bak long ol risos long koleksen blong “Tempol” long seksen blong ol pikinini long Gospel Laebri. (luk tu long “Preparing Your Child for Temple Baptisms and Confirmations” long ChurchofJesusChrist.org.)

Stap Kasem Wan Petriakel Blesing

Wan petriakel blesing i stap olsem wan ples we yumi save kasem daereksen, kamfot, mo insperesen. I holem ol toktok blong Papa long Heven we i blong yumiwan mo i helpem yumi blong andastanem huia yumi blong taem we i no save finis mo stamba tingting blong yumi. Helpem pikinini blong yu blong rere blong kasem wan petriakel blesing tru long tijing we bae i helpem hem blong andastanem from wanem ol petriakel blesing oli impoten mo oli tabu.

Blong lanem moa, luk long Gospel Topics, “Patriarchal Blessings,” Gospel Laebri.

• Serem wetem pikinini blong yu eksperiens blong yu blong kasem wan petriakel blesing. Yu save serem ol samting olsem, wanem yu bin mekem rere blong kasem, olsem wanem i stap helpem yu kam moa kolosap long God, mo olsem wanem yu yusum blesing ia long laef blong yu. Yu save invaetem pikinini blong yu blong toktok wetem ol nara memba blong famli we oli kasem ol petriakel blesing blong olgeta.

• Tekem taem blong lukluk bak tugeta sam long ol risos we i stap long Gospel Topics, “Patriarchal Blessings.” Blong lanem abaot proses blong kasem wan petriakel blesing, luk long Jeneral Hanbuk, 18.17.

• Sapos yu gat sam long ol bubu blong yu we oli kasem petriakel blesing, maet bae i save givim insperesen blong ridim sam long olgeta wetem pikinini blong yu. Blong rikwestem ol blesing blong ol bubu we oli ded finis, login long ChurchofJesusChrist.org, klik long aekon akaon antap long raet kona blong skrin, mo selektem “Patriarchal Blessing.”

• Afta we pikinini blong yu i kasem wan petriakel blesing, invaetem eni memba blong famli we oli stap long taem ia blong save rekodem daon ol filing blong olgeta mo serem ol filing ia wetem pikinini blong yu.

Stap Go long Tempol—Endaomen

God i wantem blong kavremap mo blesem, ol pikinini blong Hem wetem “paoa we i kam antap” (Doktrin mo Kavenan 95:8). Yumi go long tempol blong kasem endaomen blong yumi wan taem nomo, be ol kavenan we yumi mekem wetem God mo paoa long saed blong spirit we Hem i givim long yumi olsem pat blong endaomen i save blesem yumi evri dei long laef blong yumi.

• Putumaot wan pikja blong tempol long hom blong yu. Talem long pikinini blong yu abaot ol filing we yu eksperiensem insaed long tempol. Tokbaot plante lav blong yu we yu gat long Lod mo haos blong Hem mo ol kavenan we yu bin mekem insaed ia.

• Lukluk tugeta temples.ChurchofJesusChrist.org. Ridim tugeta ol atikol olsem “Kasem Endaomen we I Kam long Antap” mo “Mekem Rere blong Go Insaed long Tabu Tempol.” Letem pikinini blong yu i askem eni kwestin we hem i gat abaot tempol. Blong gaedem yu long wanem blong tokbaot, yu save tokbaot aotsaed long tempol, luk long mesej blong Elda David A. Bednar “Rere Finis blong Kasem Evri Samting we Mi Nidim” (Ensign o Liahona, Mei 2019, 101–4; luk speseli long seksen we taetol blong hem “Stap Lanem Gospel long Hom we i Senta, mo Jos i Sapotem mo Rere blong Go long Tempol”).

• Taem yu mo pikinini blong yu i tekem pat long o witnes long ol nara odinens (olsem sakramen o wan blesing blong hilim sik), tekem wan taem blong tokbaot simbol we i go wetem ol odinens ia. ?Wanem nao ol simbol ia i ripresentem? ?Olsem wanem nao ol simbol ia oli testifae abaot Jisas Kraes? Hemia i save helpem pikinini blong yu i rere blong tingting hevi long mining blong ol simbol blong odinens blong tempol, we i testifae tu long Jisas Kraes.

• Helpem pikinini blong yu i luk save olsem wanem hem i stap kipim kavenan we hem i mekem long baptaes we oli tokbaot long Mosaea 18:8–10, 13. Mo tu helpem pikinini blong yu i luksave olsem wanem Lod i stap blesem hem. Bildim strong tingting long pikinini blong yu blong hem i gat paoa blong save kipim ol kavenan.

• Oltaem mekem open toktok abaot olsem wanem ol tempol kavenan blong yu i lidim yu blong mekem ol joes mo i helpem yu gro moa kolosap long Jisas Kraes. Yu save yusum Jeneral Hanbuk, 27.2, blong lukluk bak long ol kavenan we yumi mekem insaed long tempol.

Go long wan Misin

Elda David A. Bednar i bin tijim: “Wan nambawan samting we yu save mekem blong mekem rere from wan wok blong givim seves i blong kam wan misinari blong longfala taem bifo yu save go long wan misin. … Poen hem i we i no blong go long wan misin; be, hem i blong kam wan misinari mo givim seves truaot ful laef blong yumi wetem ful hat blong yumi, ful paoa blong tingting, ful maen, mo ful paoa. … Yu stap mekem rere from misinari wok blong wan laef taem” (“Becoming a Missionary,” Liahona, Nov. 2005, 45–46). Ol eksperiens we i mekem pikinini blong yu i stap kam wan misinari bae i blesem hem blong wan taem we i no save finis, i no blong taem ia nomo we bae hem i givim seves olsem wan misinari.

Blong lanem moa, luk long Russell M. Nelson, “Stap Prijim Gospel blong Pis,” Liahona, May 2022, 6–7; M. Russell Ballard, “Misinari Seves i Blesem Laef blong Mi blong Oltaem,” Liahona, Mei 2022, 8–10; Missionary Preparation: Adjusting to Missionary Life, Gospel Laebri.

• Soem eksampol olsem wanem blong serem gospel long ol wei blong evri dei laef. Oltaem stap rere long ol janis blong serem wetem ol narawan ol filing blong yu abaot Papa long Heven mo Sevya mo ol blesing yu kasem olsem wan memba blong Jos blong Hem. Invaetem ol narawan blong joenem famli blong yu long Jos- mo long ol nara aktiviti blong famli.

• Lukaotem ol janis we famli blong yu i save gat taem wetem ol misinari. Invaetem olgeta blong tijim ol fren blong yu, o letem olgeta blong oli tijim ol pipol long long hom blong yu. Askem ol misinari abaot ol eksperiens we oli gat mo olsem wanem misinari seves i helpem olgeta i kam moa kolosap long Jisas Kraes. Mo tu askem olgeta wanem oli bin mekem (o tingting sapos oli bin mekem) blong stap rere blong kam ol misinari.

• Sapos yu bin givim seves long wan misin, yu talemaot stret mo plante taem serem ol eksperiens blong yu. O invaetem ol fren o ol memba blong famli we oli bin givim seves long misin blong tokbaot eksperiens blong olgeta. Yu save tokbaot ol wei yu bin gat blong serem gospel wetem ol narawan truaot laef blong yu. Helpem pikinini blong yu i tingting long ol wei we hem i save yusum blong serem gospel.

• Givim janis long pikinini blong yu blong tijim famli blong yu ol prinsipol blong gospel. Pikinini blong yu i save putum tu long praktis blong stap serem ol biliv blong hem wetem ol nara man. Eksampol, yu save toktok raon long ol kwestin olsem “?olsem wanem nao yumi save talem abaot Buk blong Momon long wan we i neva harem abaot buk ia?” o “?Olsem wanem nao yumi save talemaot nid blong gat wan Sevya long wan we i no wan Kristin Man?”

• Helpem pikinini blong yu blong no fraet mo sem blong toktok long ol pipol. ?Wanem sam gudfala wei blong statem wan storian? Leftemap tingting blong pikinini blong yu blong lanem olsem wanem blong lisin long wanem ol narawan oli talem, andastanem wanem i stap long hat blong olgeta, mo serem ol trutok blong gospel we i save blesem laef blong olgeta.

• Lukaotem ol janis blong pikinini blong yu i save lanem abaot ol nara kalja mo fet. Helpem hem blong i luksave mo respektem ol gud mo tru prinsipol long ol nara bilif.

Stap Go long Tempol—Siling

Insaed long tempol wan hasban mo waef i save mared blong taem we i no save finis. Hemia i tekem ples insaed long wan odinens we oli singaotem siling. Nomata se odinens ia i bin tekem ples plante yia i pas bifo yu gat boe o gel blong yu, smol, simpol, impoten samting we yufala i stap mekem tugeta truaot long ol yia, bae i save helpem hem i rere blong kasem gudfala blesing ia.

• Ridim tugeta “Famli: Wan Ofisol Toktok I Go long Wol” in Gospel Laebri. ?Wanem nao ofisol toktok ia i tij abaot hapines insaed long famli laef mo abaot mared we i gat sakses? Wetem pikinini blong yu jusum wan long ol prinsipol insaed long ofisol toktok ia blong stadi abaot. Yu save faenem ol skripja we oli go wetem ol prinsipol ia long Gaed long Ol Skripja. Yu save putum ol gol tu blong putum long praktis ol prinsipol ia insaed long famli blong yu. Taem yu wok long ol gol blong yu, toktok raon tugeta wanem nao prinsipol ia i mekem i defren insaed long laef blong famli.

• Ridim mesej blong Presiden Dieter F. Uchtdorf wetem pikinini blong yu “Blong Presem Olgeta we Oli Stap Protektem Man” (Ensign o Liahona, Mei 2016, 77–80). Taem yu kasem seksen ia we taetol blong hem i “Wan Sosaeti blong Sakem Samting,” maet yu wantem blong lukluk long ol samting insaed long hom blong yu we oli nid blong sakemaot mo olgeta we oli no nid blong sakemaot. Tokbaot olsem wanem yu tritim ol samting i defren taem yu wantem olgeta blong save stap blong wan longtaem. ?Wanem nao hemia i tijim abaot olsem wanem yumi mas tritim mared mo famli rilesensip blong yumi? ?Wanem moa yumi lanem long mesej blong Presiden Uchtdorf abaot olsem wanem Sevya i save helpem yumi bildim ol strong mared mo famli?

• Sapos yu yu mared finis, yu mas open wetem pikinini blong yu abaot ol samting we yu filim se, olsem wan kapol yutufala i mekem gud, ol samting we yutufala i stap lanem, mo ol wei we yutufala i stap traem blong kam gud moa long hem. Sapos yu mo waef o hasban blong yu i bin sil long tempol, soem long pikinini blong yu tru long eksampol olsem wanem yu stap traehad blong kipim ol kavenan blong yu wetem wanwan long yutufala mo wetem Lod. Talem long pikinini blong yu olsem wanem yu stap traehad blong mekem Papa long Heven mo Sevya i stap long medel blong rilesensip blong yutufala mo olsem wanem Tufala i stap helpem yu.

• Taem famli i nid blong mekem ol desisen, holem famli kansel mo toktok raon. Mekem sua se evri tingting blong ol memba blong famli oli harem mo respektem. Yusum ol toktok raon ia olsem wan janis blong lidim wan helti komunikesen mo kaen fasin insaed long famli rilesensip, nomata we evriwan oli no luk ol samting long semmak wei.

• Taem we i gat agens o faet long toktok insaed long famli, soemaot fasin blong save wet long taem mo fasin blong gat lav mo sore. Helpem pikinini blong yu i luk olsem wanem yu stretem fasin blong rao wetem toktok long wei blong Kraes we bae i save helpem hem i rere from wan hapi mared. Ridim tugeta Doktrin mo Ol Kavenan 121:41–42, mo tokbaot olsem wanem ol prinsipol insaed long ol ves ia i save aplae long mared.