Apendiks B

Apendiks B: Blong Ol Praemeri—Stap Mekem Rere Ol Pikinini from wan Laeftaem Rod blong Kavenan wetem God

Long ol manis we oli gat faef Sandei, ol tija blong Praemeri oli save jusum blong putum wan o moa long ol aktiviti ia blong stap lanem samting, blong i tekem ples blong Kam Folem Mi aotlaen blong namba faef Sandei wetem wan o moa long ol aktiviti ia blong stap lanem samting

Olgeta Prinsipol mo Odinens blong Gospel blong Jisas Kraes

Ol doktrin blong Kraes oli tijim yumi olsem wanem blong gobak long God.

Taem Jisas Kraes i bin kamaot long ol pipol long Ol Amerika, Hem i bin tijim olgeta long doktrin blong Hem. Hem i talem se yumi save go insaed long kingdom blong God sapos yumi gat fet, sakem sin, kasem baptaes, kasem Tabu Spirit mo stanap strong kasem en (luk long 3 Nifae 11:31–40; Doktrin mo Ol Kavenan 20:29). Ol aktiviti andanit ia oli save helpem yu blong tijim ol pikinini se ol prinsipol mo ol odinens ia bae oli helpem yumi blong kam moa kolosap long Sevya, truaot long laef blong yumi.

Blong lanem moa abaot doktrin blong Kraes, luk long 2 Nifae 31.

Samfala Aktiviti we Yu Save Mekem

• Givim long ol pikinini ol pikja we i ripresentem, fet long Jisas Kraes, fasin blong sakem sin, baptaes mo konfemesen (luk long Gospel Art Book, nos. 1, 111, 103, mo 105). Ridim o talem tugeta baehat namba fo toktok blong bilif abaot fet mo askem long olgeta blong leftemap ol pikja blong olgeta taem we oli ridim prinsipol o odinens ia. Helpem ol pikinini blong andastanem olsem wanem wanwan long ol prinsipol mo ol odinens ia oli save helpem yumi blong kam moa olsem Papa long Heven mo Jisas Kraes.

• ?Long wanem wei nao yu save helpem ol pikinini blong andastanem se fet, fasin blong sakem sin, baptaes mo konfemesen, oli no ol wan taem samting we i stap hapen be, i givim paoa long laef blong yumi blong gro long saed blong spirit? Eksampol. Yu save soem wan pikja blong wan sid mo wan bigfala tri (o droem ol samting ia long bod). Helpem olgeta blong tingting long ol samting we oli save helpem sid blong gro i kam wan bigfala tri, olsem wota, graon mo laet blong san. Helpem olgeta blong luksave se hemia i olsem ol samting we yumi mekem blong gro moa kolosap long God truaot long laef blong yumi—bildimap fet blong yumi long Jisas Kraes, sakem sin evri dei, laef folem ol kavenan we yumi mekem taem yumi baptaes mo stap lisin long Tabu Spirit.

• Serem wetem ol pikinini stori abaot ol faea kraka we i stap long mesej blong Elda Dale G. Renlund “How Can Repenting Help Me Feel Happy?” (Fren, Dec. 2017, 12–13, or Liahona, Dec. 2017, 70–71; luk tu long vidio ia “Repentance: A Joyful Choice” [Gospel Library]).

  Long ol defdefren poen blong stori, askem ol pikinini blong tingbaot wanem nao Elda Renlund i bin filim long tetaem ia. ?From wanem nao yumi filim glad taem yumi sakem sin? Serem wetem ol pikinini glad mo lav ia we yu bin filim taem yu bin askem Papa long Heven blong fogivim yu.

Baptaes

Jisas Kraes i putum wan eksampol blong mi taem Hem i bin kasem baptaes.

Nomata se Jisas i nogat sin, Hem i bin kasem baptaes blong putum wan stret eksampol long saed blong fasin blong stap obei long Papa long Heven (luk long 2 Nifae 31:6–10).

Blong lanem moa abaot baptaes, luk long Doktrin mo Kavenan 20:37; Gospel Topics, “Baptism,” Gospel Library.

Samfala Aktiviti we Yu Save Mekem

• Soem wan pikja blong Sevya we i baptaes mo wan pikja blong wan narafala man we i baptaes (o luk long Gospel Art Buk, namba 35 o long namba 103 o namba 104). Askem ol pikinini blong serem wanem i semmak long tufala pikja ia. Tugeta, ridim Matiu 3:13–17o “Japta 10: Jisas I Bin Baptaesinsaed long Ol Niu Testeman Stori, 26–29, o wajem vidio we i go wetem long ChurchofJesusChrist.org

  Letem ol pikinini blong poenem ol samting insaed long ol pikja taem oli stap ridim insaed long stori o vidio. Talem long ol pikinini abaot lav we yu gat long Sevya mo filing blong hat blong yu blong wantem folem Hem.

• Lisin long o singsing long wan singsing abaot baptaes, olsem “When Jesus Christ Was Baptized” (Children’s Songbook, 102). ?Wanem nao yumi lanem abaot baptaes long singsing ia? Ridim 2 Nifae 31:9–10, mo invaetem ol pikinini blong lisin long, from wanem Jisas Kraes i bin kasem baptaes. Invaetem olgeta blong dro wan pikja blong olgetawan long dei we oli baptaes.

Mi save jusum blong mekem wan kavenan wetem God mo kasem baptaes.

Fasin blong stap rere from taem blong baptaes i moa bitim blong stap rere from wan samting we bae i hapen. I minim blong stap rere blong mekem wan kavenan afta blong kipim kavenan ia blong wan laeftaem. Tingting hevi long ol wei we yu save helpem ol pikinini andastanem kavenan we bae oli mekem wetem Papa long Heven taem bae oli kasem baptaes, we i gat tu, ol promes we Hem bae i mekem long olgeta mo ol promes we bae oli mekem wetem Hem.

Samfala Aktiviti we Yu Save Mekem

• Eksplenem se wan kavenan i wan promes bitwin wan man o woman mo Papa long Heven. Taem yumi traehad blong kipim ol promes blong yumi long God, God i promes blong stap blesem yumi. Raetem long bod Ol Promes blong Mi long God mo Ol Promes blong God long Mi. Tugeta, ridim Mosaea 18:10, 13 mo Doktrin mo Ol Kavenan 20:37, mo helpem ol pikinini blong mekem lis blong ol promes we oli faenem we bae oli go stret anda long ol topik ia (luk tu long Dallin H. Oaks, “Baptaes Kavenan blong Yu,” Fren, Febwari 2021, 2–3). Serem ol wei we Papa long Heven i bin blesem yu taem yu traehad blong kipim kavenan blong baptaes blong yu.

• Soem pikja blong ol samting we Jisas Kraes i bin mekem taem Hem i stap long wol ia (sam eksampol, luk long Gospel Art Book, nos. 33–49). Askem ol pikinini blong tokbaot wanem we Jisas i stap mekem long wanwan pikja. Ridim Mosaea 18:8–10, 13, mo invaetem ol pikinini blong lisin long ol samting we oli promes blong mekem taem oli kasem baptaes (luk tu long “Baptaes Kavenan,” FrenFebwari 2019, 7; LiahonaFebwari 2019, F3). ?Long wanem wei nao ol promes ia bae oli gat paoa long ol evri dei aksen blong yumi? Invaetem ol pikinini blong dro wan pikja blong olgetawan we oli stap helpem wan narafala man olsem we Jisas bae i mekem. O yu save mekem wan nem tag we i simpol blong ol pikinini oli putum we i gat nem blong Sevya long hem.

  

  Taem yumi kasem baptaes, yumi mekem ol promes long God mo Hem i mekem ol promes long yumi.

Konfemesen

Taem mi bin kasem konfemesen, mi kam wan memba blong Jos Ia blong Jisas Kraes blong Ol Lata-dei Sent.

Blong kam wan memba blong Jos Ia blong Jisas Kraes blong Ol Lata-dei Sent, i karem plante blesing, we i tekem tu i kam ol janis blong ol pikinini blong stap aktiv blong tekempat long wok blong God.

Blong lanem moa abaot konfemesen mo presen ia we i Tabu Spirit, luk long Gary E. Stevenson, “How Does the Holy Ghost Help You?,” LiahonaMei 2017, 117–20; Gospel Topics, “Holy Ghosttopics.ChurchofJesusChrist.org

Samfala Aktiviti we Yu Save Mekem

• Invaetem wan we i jes kasem baptaes mo konfemesen blong kam long klas mo serem filing blong hem abaot konfemesen blong hem. ?I minim wanem long man o woman ia blong kam olsem wan memba blong Jos Ia blong Jisas Kraes blong Ol Lata-dei Sent? Helpem ol pikinini blong tingting long ol wei we oli kipim ol kavenan blong baptaes blong olgeta olsem ol memba blong Jos (olsem blong givim seves long ol narafala man, stap invaetem ol narafala man blong lanem moa abaot Jisas, stap talem ol prea long taem blong ol miting, mo i gohed). Serem olsem wanem nao taem yu yu stap mekem ol samting ia i bin helpem yu blong filim glad ia olsem blong stap wan memba blong Jos blong Kraes.

• Soem wan pikja blong ol pipol long wota blong Momon (luk long Gospel Art Buk, namba 76), mo askem ol pikinini blong tokbaot wanem we oli luk long pikja ia. Talem stori blong Alma mo ol pipol blong hem we o oli bin kasem baptaes long ples ia (luk long Mosaea 18:1–17; “Japta 15: Alma Teaches and Baptizes; “ Ol Stori blong Buk blong Momon, 43–44, o vidio we i go wetem long ChurchofJesusChrist.org

  Luklukbak long Mosaea 18:8–9 mo askem ol pikinini blong mekem ol aksen blong helpem olgeta blong tingbaot ol samting we ol pipol ia oli wantem blong mekem olsem ol memba blong Jos Ia blong Kraes. Serem wan eksperiens long taem we yu bin witnesem ol memba blong Jos we oli stap givim seves long ol wei ia.

Taem mi kasem konfemesen, mi kasem presen ia we i Tabu Spirit.

Taem yumi bin kasem baptaes mo konfemesen, Papa long Heven i promesem yumi “se oltaem, oli gat Spirit blong hem i stap wetem olgeta. [yumi]” (Doktrin mo Ol Kavenan 20:77). Nambawan presen ia we i kam long God oli singaotem presen ia we i Tabu Spirit.

Samfala Aktiviti we Yu Save Mekem

• Ridim Doktrin mo Ol Kavenan 33:15, mo askem ol pikinini blong lisin long spesel presen ia we Papa long Heven i stap givim long yumi taem yumi kasem baptaes mo konfemesen. Blong helpem olgeta lanem moa abaot olsem wanem presen we i Tabu Spirit bae i helpem olgeta, tugeta, luklukbak long Jon 14:26; Galesia 5:22–23; 2 Nifae 32:5; 3 Nifae 27:20. Yu save lukluk tu long toktok ia “The Holy Ghost Is …” (Friend, June 2019, 24–25; Liahona, June 2019, F12–F13).

• Bifo klas i stat, askem wan papa mo mama blong wan o moa pikinini blong serem olsem wanem oli bin kasem ol blesing tru long presen ia we i Tabu Spirit. ?Long wanem wei nao Hem i helpem olgeta? ?Long wanem wei nao oli harem voes blong Hem?

• Tugeta, singsing wan singsing abaot Tabu Spirit, olsem “The Holy Ghost” (Children’s Songbook,,105). Helpem ol pikinini blong andastanem wanem nao singsing ia i stap tijim yumi abaot olsem wanem Tabu Spirit i save helpem yumi.

Tabu Spirit i save toktok long mi long plante wei.

Ol pikinini we oli save harem save voes blong Spirit bae oli rere blong kasem revelesen blong olgetawan blong lidim olgeta truaot long laef blong olgeta. Tijim olgeta se i gat plante wei we Tabu Spirit i save toktok long yumi.

Samfala Aktiviti we Yu Save Mekem

• Helpem ol pikinini blong tingting long ol defren wei we yumi save toktok long wan fren we i stap longwe, olsem blong stap raetem wan leta, sendem wan imel o stap toktok long hem long fon. Tijim olgeta se Papa long Heven i save toktok long yumi tru long Tabu Spirit. Yusum mesej blong Presiden Dallin H. Oaks “How Does Heavenly Father Speak to Us?”blong helpem ol pikinini blong andastanem ol defdefren wei we Tabu Spirit i save toktok long maen mo hat blong yumi (Friend, Mar. 2020, 2–3; Liahona, Mar. 2020, F2–F3).

• Serem wan eksperiens blong taem we tabu Spirit i bin toktok wetem yu, tru long ol tingting long maen blong yu o tru long wan filing insaed long hat blong yu (luk long Doktrin mo Ol Kavenan 6:22–23; 8:2–3; luk tu long Henry B. Eyring, “Open Your Heart to the Holy Ghost,” Friend, Aug. 2019, 2–3; Liahona, Aug. 2019, F2–F3). Testifae long ol pikinini se Tabu Spirit i save helpem olgeta long ol semmak wei.

• Helpem ol pikinini blong tingting long ol taem we oli bin filim Spirit—eksampol, taem oli stap singsing long wan singsing abaot Sevya o taem we oli stap mekem wan samting wetem kaen fasin long ol narafala man. Helpem olgeta blong luksave ol filing long saed blong spirit we Tabu Spirit i stap soem. ?From wanem yu ting se Tabu Spirit i stap givim ol filing ia long yumi? Helpem ol pikinini blong tingting long ol samting we yumi nid blong mekem blong harem Tabu Spirit i toktok long yumi. Tokbaot wanem nao yu bin mekem blong harem Spirit klia moa.

Sakramen

Taem mi tekem sakramen, mi tingbaot sakrifaes blong Sevya mo mekem i kam niu ol kavenan blong mi.

Sevya i givim sakramen long yumi blong helpem yumi tingbaot sakrifaes blong Hem from yumi mo mekem i kam niu bakegen ol kavenan blong yumi. From odinens ia blong evri wik, bae yumi save gohed blong stap glad long ol blesing blong baptaes truaot long laef blong yumi.

Blong lanem moa, luk long Matiu 26:26–30; 3 Nifae 18:1–12; Doktrin mo Ol Kavenan 20:77, 79.

Samfala Aktiviti we Yu Save Mekem

• Invaetem ol pikinini blong kalarem “Jesus Introduced the Sacrament to the Nifaetes” insaed long Scripture Stories Coloring Book: Book of Mormon (2019), 26. Askem olgeta blong poen insaed long pikja ia wanem nao ol pipol ia oli stap tingting long hem. Ridim long ol pikinini samfala pat blong 3 Nifae 18:1–12 o “Japta 45: Jisas Kraes I Tijim Abaot Sakramen mo Prea,” Ol Stori long Buk blong Momon, 126–27, o wajem vidio we i go wetem long ChurchofJesusChrist.org. ?Wanem nao yumi save mekem blong tingbaot Jisas Kraes long taem blong Sakramen?

• Askem ol pikinini blong oli talem wanem samfala samting we oltaem oli mas tingbaot blong mekem , olsem blong fasem ol sus blong olgeta o stap wasem han blong olgeta bifo oli kakae. ?From wanem hem i impoten blong tingbaot olgeta samting ia? Ridim wetem ol pikinini Moronae 4:3 mo askem olgeta blong lisin long wanem yumi promesem blong oltaem tingbaot taem yumi tekem sakramen. ?From wanem hem i impoten blong tingbaot Jisas Kraes? Helpem ol pikinini blong andastanem wanem nao bred mo wota blong sakramen i helpem yumi blong tingbaot wanem we Jisas i bin mekem from yumi (luk long Moronae 4:3; 5:2).

• Raetem antap long bod “Mi promes blong …” Ridim ol sakramen prea long ol pikinini (luk long Doktrin mo Ol Kavenan 20:77, 79). Taem oli harem wan promes we yumi mekem long God, stop smoltaem mo helpem olgeta blong komplitim sentens ia long bod wetem promes ia we oli harem. Helpem olgeta blong andastanem se taem yumi tekem sakramen, yumi stap mekem ol semmak promes we yumi bin mekem taem yumi baptaes.

• ?Wanem nao i minim blong tekem long yumiwan nem blong Jisas Kraes? Blong helpem ol pikinini ansarem kwestin ia, serem wan eksampol blong wan samting we yumi putum ol nem blong yumi long hem. ?From wanem nao yumi putum nem blong yumi long ol samting ia? ?From wanem nao Jisas Kraes i wantem blong putum nem blong Hem long yumi? Tingting blong serem wanem we Presiden Russell M. Nelson i bin eksplenem se: “Blong tekem nem blong Sevya long yumi, i minim blong talemaot mo witnesem long ol narawan—tru ol aksen mo toktok blong yumi—se Jisas, Hem i Kraes” (“Stret Nem blong Jos,” Liahona, Novemba 2018, 88).

Prishud Paoa, Atoriti, mo Ol Ki

God i stap blesem ol pikinini blong Hem tru paoa blong prishud.

Evriwan long ol pikinini blong God—woman mo man, yangfala mo olfala—oli kasem paoa blong God taem oli kipim ol kavenan we oli bin mekem wetem Hem. Yumi mekem ol kavenan ia taem yumi kasem ol odinens blong prishud olsem baptaes (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 3.5, Gospel Library). Blong lanem moa luk long Russell M. Nelson, “Ol Rij Samting long Saed blong Spirit,” Liahona, Novemba 2019, 76–79; “Ol Prinsipol blong Prishud,” Japta 3 long Jeneral Hanbuk.

Samfala Aktiviti we Yu Save Mekem

• Helpem ol pikinini blong luksave ol blesing we oli kasem tru long prishud. Blong givim sam aedia long olgeta, yu save soem vidio ia long “Blessings of the Priesthood” (Gospel Library).

• Tingting blong raetem lis blong ol blesing ia long bod. ?From wanem nao ol blesing ia oli impoten tumas long yumi? Testifae se ol blesing ia oli kam long yumi tru long Jisas Kraes mo paoa blong prishud blong Hem.

• Raetem ol topik ia long bod: Paoa blong God’ mo paoa blong God’ mo atoriti we oli bin givim long ol man long wol ia.. Askem ol pikinini blong putum ol pikja andanit long fas topik we i helpem yumi blong andastanem olsem wanem God i bin yusum paoa blong Hem blong blesem yumi, olsem taem we Hem i krietem wol, stap lidim mo daerektem yumi stap soem long yumi se Hem i lavem mo save yumi, mo stap harem mo ansarem ol prea blong yumi (luk long Gospel Art Book, nos. 3, 68, 90, 111). Askem olgeta blong putum ol pikja andanit long seken topik we i helpem yumi blong andastanem olsem wanem ol man we oli klin inaf long wol ia oli yusum paoa mo atoriti blong God blong blesem yumi, olsem blong blesem olgeta we oli sik, stap baptaesem, givim konfemesen, blesem mo pasem sakramen mo stap silim ol famli (luk long Gospel Art Book, nos. 46, 104, 105, 107, 120). Serem from wanem yu glad long prishud mo ol blesing we i givim long yu.

• Wan long ol mein wei blong kasem ol blesing blong paoa blong God long laef blong yumi i tru long ol odinens blong prishud (luk long Doktrin mo Ol Kavenan 84:20). Blong helpem ol pikinini blong lanem ol trutok ia, raetemdaon lis blong ol skripja ia long bod: 3 Nifae 11:21–26, 33 (baptaes); Moronae 2 (konfemesen); Moronae 4–5 (sakramen). Wanwan long ol pikinini oli save jusum wan long ol sentens ia mo poenemaot odinens we oli tokbaot long skripja ia. Askem ol pikinini blong serem olsem wanem nao oli bin kasem blesing blong olgetawan taem we oli bin kasem ol odinens blong prishud.

• Helpem ol pikinini blong andastanem se bae oli kasem paoa we i kam long God taem we oli kasem baptaes mo kipim ol baptaes kavenan we oli bin mekem. Askem ol pikinini olsem wanem paoa ia i save helpem olgeta.

Wok blong God oli daerektem tru long ol ki blong prishud mo mekem i hapen tru long atoriti blong prishud.

Ol man we oli klin inaf oli save odenem olgeta i kam long wan ofis blong prishud. Blong ademap, taem oli setem apat wan man long wan koling o asaenem hem blong help long wok blong God, hem i save eksasaesem prishud atoriti we oli asaenem long hem. Ol man ia nomo we oli gat ol prishud ki, olsem stek presiden, bisop, mo ol kworom presiden, oli save yusum evri atoriti blong prishud insaed long Jos. Ol ki blong prishud oli atoriti ia blong talem olsem wanem blong yusum prishud blong stap mekem wok blong Lod.

Samfala Aktiviti we Yu Save Mekem

• Ridim wetem ol pikinini Mak 3:14–15, mo soem wan pikja blong wanem oli tokbaot long ples ia (olsem Gospel Art Buk, namba 38). Askem ol pikinini sapos oli bin luk wan man we oli odenem hem i go long wan ofis blong prishud o we oli setem apat hem long wan koling (o talem long olgeta abaot ol eksperiens we yu bin gat). ?Long wanem wei nao hemia i semmak long wanem we Sevya i bin mekem wetem ol Aposol blong Hem? Helpem ol pikinini blong raetemdaon lis blong ol prishud ofis o ol koling long bod we oli save givim long ol memba blong Jos, olsem wan tija o lida insaed long wan oganaesesen. Narasaed long wanwan ofis o koling, yu save raetemdaon wanem we wan we i stap long ofis o koling ia i gat atoriti blong mekem. Talem long ol pikinini olsem wanem nao taem we oli setem apat yu tru long wan we i gat prishud ki i save helpem yu blong givim seves.

• Invaetem ol pikinini blong tingting long wan samting i nidim ki, olsem wan trak o wan doa. ?Wanem nao bae i hapen sapos yu no gat ki? Tugeta, ridim Doktrin mo Ol Kavenan 65:2, mo serem testemoni long saed blong from wanem hem i impoten blong gat ol ki blong prishud long wol ia. Yu save wajem tu vidio ia blong “Where Are the Keys?” (Gospel Library) mo lukaotem wanem we Elda Stevenson i tijim abaot ol prishud ki.

• Askem wan long wod we i gat ol ki blong kam long klas mo serem wetem ol pikinini wanem i stap minim blong holem ol ki blong prishud. Askem hem blong tokbaot ol responsabiliti blong hem. ?Wanem pat blong wok blong Lod nao we hem i lidim? ?Long wanem wei nao Sevya i stap helpem hem?

Tempol mo Plan Ia blong Hapines.

Tempol hem i haos blong Lod.

Ol tempol oli bin pat blong plan we Papa long Heven i gat long ol pikinini blong Hem. Insaed long ol tempol yumi mekem ol tabu kavenan wetem Hem, kasem endaomen tru long paoa blong prishud, kasem revelesen, mekem ol odinens blong ol bubu blong yumi blong bifo we oli bin ded mo sil wetem ol famli blong yumi blong taem we i no save finis. Evri samting ia oli posibol tru long atonmen mo sakrifaes blong Jisas Kraes.

?Long wanem wei nao yu save helpem ol pikinini we yu tijim blong luksave se haos blong Lod i tabu mo rere long olgetawan blong tekempat long ol odinens insaed long tempol? Tingting blong luklukbak long ol risos ia: Doktrin mo Ol Kavenan 97:15–17; Russell M. Nelson, “Las Toktok,” Liahona, Novemba 2019, 120–22; “From Wanem Ol Lata-dei Sent Oli Bildimap Ol Tempol,” temples.ChurchofJesusChrist.org.

Ol tempol oli bin pat blong plan we Papa long Heven i gat long ol pikinini blong Hem.

Samfala Aktiviti we Yu Save Mekem

• Soem wan o moa pikja blong ol tempol. Askem ol pikinini se wanem nao i mekem se tempol i wan spesel ples. Poenemaot se long wanwan tempol oli raetem toktok ia: “I Tabu, I blong Lod: Haos blong Lod.” Askem ol pikinini wanem tingting blong olgeta long toktok “I Tabu, I blong Lod” i stap minim. ?From wanem nao oli singaotem tempol se haos blong Lod? ?Wanem nao hemia i tijim yumi abaot tempol? Sapos eniwan long ol pikinini we i bin go long tempol, olgeta tu oli save serem filing blong olgeta long wanem we oli bin filim taem oli stap long ples ia. Sapos yu bin go finis long tempol, serem olsem wanem yu bin filim se Lod i bin stap long ples ia, mo tokbaot from wanem tempol i wan tabu ples long yu.

• Tugeta, ridim Doktrin mo Ol Kavenan 97:15–17. Askem ol pikinini blong lukaotem wanem nao Lod i wantem long olgeta we oli kam insaed long tabu haos blong Hem. ?From wanem yumi nid blong stap klin inaf blong go insaed long haos blong Hem? Olsem pat blong storian ia, tokbaot ol tempol rekomen long ol pikinini, mo tu, talem long olgeta olsem wanem blong kasem wan. Yu save invaetem wan memba blong bisoprik blong serem wetem olgeta wanem i wan tempol rekomen intaviu mo ol kwestin we bae oli askem.

Insaed long tempol, yumi mekem ol kavenan wetem God.

Presiden Russell M. Nelson i bin tijim, “Jisas Kraes i stap invaetem yumi blong tekem rod ia blong kavenan i gobak hom long Papa mo Mama blong yumi long Heven mo stap wetem olgeta we yumi lavem olgeta.” (“Kam Folem Mi,” Liahona, Mei 2019, 91). Helpem ol pikinini andastanem se rod blong kavenan i tekem tu, baptaes, konfemesen, mo endaomen mo siling long tempol.

Samfala Aktiviti we Yu Save Mekem

• Askem ol pikinini blong helpem yu blong luklukbak long kavenan we yumi mekem wetem God taem we yumi bin baptaes, mo se yumi mekem i kam niu bakegen taem yumi tekem sakramen (luk long Mosaea 18:10; Doktrin mo Ol Kavenan 20:77, 79). Soem wan pikja blong wan tempol mo eksplenem se Papa long Heven i gat moa blesing we Hem i wantem blong givim long yumi insaed long tempol.

• Dro wan get we i stap go long wan rod. Askem ol pikinini from wanem oli ting se bae i help bigwan blong gat wan rod blong wokbaot long hem. Tugeta, ridim 2 Nifae 31:17–20, long ples ia Nifae i komperem kavenan blong baptaes olsem wan get mo invaetem yumi blong gohed long rod ia afta long baptaes. I gat moa long ol kavenan blong mekem afta long baptaes, we tekem tu, ol kavenan we oli mekem insaed long tempol. Eksplenem se Presiden Nelson i singaot rod ia “rod blong kavenan.”

Insaed long tempol yumi save kasem baptaes mo konfemesen blong ol bubu blong bifo we oli bin ded.

Gospel blong Jisas Kraes i mekem i posibol blong evri pikinini blong God oli save gobak mo laef wetem Hem, nomata sapos oli bin ded mo oli no save gospel. Insaed long tempol, yumi save kasem baptaes mo konfemesen olsem ol memba blong Jos ia blong Jisas Kraes long bihaf blong olgeta.

Samfala Aktiviti we Yu Save Mekem

• Tokbaot wan taem we wan i bin mekem wan samting blong yu we yu yuwan yu no save mekem. Invaetem ol pikinini blong serem ol eksperiens we i semmak olsem. Eksplenem se taem yumi go long tempol, yumi save kasem ol tabu odinens olsem blong mekem baptaes blong olgeta we oli bin ded. ?Long wanem wei nao yumi save stap olsem Jisas taem yumi stap mekem wok blong ol dedman? ?Wanem nao hem i bin mekem blong yumi we yumiwan, yumi no save mekem?

• Invaetem wan o moa yut we oli bin baptaes blong ol bubu blong olgeta blong bifo mo serem eksperiens blong olgeta. Askem olgeta wanem nao oli filim insaed long tempol. Leftemap tingting blong olgeta blong serem wanem oli bin filim taem oli stap mekem wok ia blong ol bubu blong olgeta blong bifo.

• Dro wan tri long bod mo droem tu ol rus mo ol branj. Askem ol pikinini blong tingting long wanem wei nao wan famli i olsem wan tri. Raetem long ol rus toktok ia Ol Bubu blong Bifo, raetem long ol branj toktok ia Ol Laen, mo long stamba blong tri raetem toktok ia Yu. Tugeta, ridim sentens ia long Doktrin mo Ol Kavenan 128:18: “From we yumi, sapos i no gat olgeta [ol bubu blong yumi blong bifo], yumi no save kam stret gud evriwan; mo semmak, olgeta, sapos i no gat yumi, oli no save kam stret gud evriwan.” Askem ol kwestin olsem olgeta ia: “?From wanem yumi nidim ol bubu blong yumi blong bifo? ?From wanem ol bubu blong yumi blong bifo oli nidim yumi? Long wanem wei nao ol papa mo mama, ol bubuman mo woman, mo ol bubu blong yumi blong bifo oli bin helpem yumi?” Invaetem ol pikinini blong lukaotem wan sentens we i tokbaot olsem wanem yumi save helpem ol bubu blong yumi blong bifo long Doktrin mo Ol Kavenan 128:18 long ful seksen ia.

• Tingting blong wok wetem papa mo mama blong wanwan pikinini blong faenem wan nem blong wan bubu blong bifo, blong pikinini i save tekem i go long tempol (luk long FamilySearch.org).