Japta 45

Jisas Kraes I Tijim Abaot Sakramen mo Prea

Jisas Kraes i sendem ol disaepol blong Hem blong oli karem sam bred mo waen. Hem i talem long Ol Man blong Nifae blong sidaon long graon.

3 Nifae 18:1–2

Mo taem we ol disaepol oli bin kambak, Sevya i brekem bred long ol smolsmol pis mo i blesem. Hem i givim sam long ol disaepol blong Hem, mo i talem long olgeta blong givim sam long ol pipol.

3 Nifae 18:3–4

Jisas i talem se olgeta we oli tekem sakramen oli stap promes blong oltaem tingbaot Hem mo sakrifaes blong Hem. Mo bae oli kasem Spirit blong Hem.

3 Nifae 18:7

Jisas Kraes i blesem waen mo givim sam long ol disaepol. Ol disaepol oli givim sam waen long ol pipol tu.

3 Nifae 18:8

Jisas i talem se olgeta we oli tekem sakramen oli promes blong stap obei long ol komanmen blong Hem.

3 Nifae 18:10

Jisas i talem bakegen long ol disaepol blong Hem se olgeta we oli tekem sakramen mo oltaem tingbaot Hem, bae oli gat Spirit blong Hem i stap wetem olgeta.

3 Nifae 18:11

Hem i talem long ol disaepol blong Hem se bae oli kasem blesing sapos oli stap obei long ol komanmen blong Hem.

3 Nifae 18:14

Hem i talem long olgeta blong prea oltaem mo blong prea olsem we oli luk Hem i stap prea.

3 Nifae 18:15–16

Sevya i talem long Ol Man blong Nifae blong prea i go long Papa long Heven long nem blong Hem. Hem i givim komanmen long olgeta blong prea wetem ol famli blong olgeta.

3 Nifae 18:19, 21

Hem i talem se ol pipol oli mas kam tugeta plante. Oli mas welkamem ol narafala pipol long ol miting blong olgeta, prea from olgeta, mo stap ol eksampol long olgeta.

3 Nifae 18:22–24

Sevya i givim paoa long ol disaepol blong Hem blong givim Tabu Spirit. Mo wan klaod i kavremap ol pipol blong mekem se ol disaepol nomo oli luk Jisas Kraes i go antap long heven.

3 Nifae 18:36–39