Japta 15
Alma I Tij mo I Mekem Baptaes
Alma i ronwe long ol wokman blong King Noa mo i haed blong plante dei. Taem we hem i stap raet hem i raetem daon wanem we Abinadae i bin tijim.
Alma i sakem ol sin blong hem mo i go long Ol Man blong Nifae long sikret, mo i tijim olgeta mesej blong Abinadae. Alma i talem long ol pipol blong gat fet long Jisas Kraes mo sakem sin.
Long dei ia Alma i haed long wan grup blong ol tri kolosap long wan pul blong wota we nem blong hem Wota blong Momon.
Olgeta we oli biliv oli go long Wota blong Momon mo oli kasem baptaes. Alma i baptaesem 204 pipol i kam insaed long Jos blong Kraes.
Alma i odenem ol pris blong tijim ol pipol. Hem i talem long ol pris blong tijim fasin blong sakem sin mo fet long Jisas Kraes. Hem i talem tu se bae oli no mas raorao be oli mas kam wan.
Ol pipol blong Alma oli lavem mo givim seves long wanwan long olgeta. Oli serem evri samting we oli gat mo oli glad se oli bin lanem abaot Jisas Kraes, Ridima blong olgeta.
Ol wokman blong King Noa oli luk Alma i stap tijim ol pipol. King i talem se Alma i stap tanem Ol Man blong Nifae agensem hem, i mekem se hem i sendem wan ami blong kilim olgeta.
God i givim woning long Alma se ol ami blong King Noa oli stap kam. Ol pipol oli karem tugeta ol samting blong olgeta mo ol famli blong olgeta, ol animol. Mo ol narafala samting mo oli ronwe i go long ples we i no gat man long hem.
God i givim paoa long ol pipol blong Alma blong mekem se oli save ronwe long ol ami blong King Noa. Ol ami ia oli lukaotem be oli no save faenem olgeta.
Afta we oli travel long ples we i no gat man long hem blong eit dei, ol pipol blong Alma oli kam long wan naesfala eria we i gat klin wota i stap ron long hem. Long ples ia oli planem ol kakae mo oli bildim ol bilding.
Ol pipol ia oli wantem Alma blong kam king blong olgeta, Alma i talem se God i no wantem blong oli gat wan king. God i wantem olgeta blong oli fri.