Japta 40
Samuel we Hem i wan Man blong Leman i Talemaot Abaot Jisas
Ol Man blong Leman oli obei long ol komanmen blong God. Oli bin moa stret mo gud bitim Ol Man blong Nifae.
Samuel, wan profet blong ol Man blong Leman, i go long Sarahemla blong prij long ol nogud Man blong Nifae. Hem i talem long olgeta blong sakem sin.
Ol Man blong Nifae oli sakem Samuel aot long taon, mo hem i stat blong go bak long hom lan blong hem.
Be Lod i talem long Samuel blong gobak long Sarahemla mo talem long ol pipol wanem we Lod bae i putum long hat blong hem.
Ol Man blong Nifae oli no wantem letem Samuel i kam bak long taon, mekem se hem i klaem i go antap long top blong hae wol blong taon ia mo i stap prij long ples ia.
Hem i profesae se bae Ol Man blong Nifae oli ded evriwan long 400 yia taem bae oli laef nomo sapos ol pipol oli sakem sin mo gat fet long Jisas Kraes.
Samuel i talem long Ol Man blong Nifae se Jisas Kraes bae i bin long faef yia taem mo bae hem i sevem evriwan we i biliv long hem.
Samuel i talem long olgeta abaot ol saen blong taem we bae Jisas i bon. Wan niu sta bae i kamaot, mo naet ia bifo Jisas bae i bon bae i no tudak.
Mo Samuel i talem long olgeta abaot ded blong Jisas. Bae i gat tri dei we bae i tudak nomo—San, mun mo ol sta bae oli no saen.
Bae i gat tu tanda, laetning, mo graon i muvmuv. Ol maonten bae i brokbrok mo plante taon bae wan samting i spolem gud.
Samfala man blong Nifae oli biliv long Samuel mo oli sakem ol sin blong olgeta. Oli go blong faenem Nifae, wan long Ol Man blong Nifae we i stret mo gud blong i baptaesem olgeta.
Plante long ol narafala Man blong Nifae oli no biliv long Samuel. Oli sakem ston mo oli sutum hem wetem ol aro. Be Lod i protektem hem, i no gat wan ston o aro i kasem hem.
Taem ol pipol i luk se oli no save kasem hem, plante moa i biliv long hem mo oli go long Nifae blong oli kasem baptaes.
Nifae i tijim ol pipol abaot Jisas. Hem i wantem olgeta blong biliv long Jisas, sakem sin, mo kasem baptaes.
Plante long Ol Man blong Nifae, oli no bin biliv long Samuel. Oli traem blong holem hem.
Samuel i jam daon long wol ia mo i ron i go long kantri blong hem.
Samuel i stat blong tijim Ol Man blong Leman. Oli no bin harem hem bakegen long medel blong Ol Man blong Nifae.