Japta 50

Ol Man blong Jared Oli Aot long Babel

Jared mo brata blong hem, tufala i ol stret mo gud man we tufala i stap long wan taon we nem blong hem Babel. Oli laef long ples ia plante handred yia i pas bifo olgeta Man blong Nifae.

Ita 1:33; Jenesis 11:9

Plante long ol pipol long Babel oli ol rabis man. Oli bildim wan taoa blong traem blong kasem heven. Lod i kros tumas long olgeta, nao Hem i jenisim lanwis blong olgeta.

Jenesis 11:4, 7

Jared i askem brata blong hem blong prea long Lod, mo askem long Lod blong no jenisim lanwis blong ol famli mo fren blong olgeta.

Ita 1:34

Brata blong Jared i prea, mo Lod i ansarem prea blong hem. Jared, brata blong hem, mo ol famli mo fren blong olgeta oli stil save andastanem wanwan long olgeta.

Ita 1:35–37

Lod i talem long brata blong Jared blong tekem tugeta, ol famli mo fren blong hem, mo lego graon ia. Oli tekem wetem olgeta ol animol mo ol sid.

Ita 1:41–42

Lod i talem se bae Hem i lidim Ol Man blong Jared oli go long wan promes graon.

Ita 1:42

Ol Man blong Jared oli bin kasem ol pijin mo fis mo oli tekem wetem olgeta.

Ita 2:2

Oli tekem plante sugabag.

Ita 2:3

Ol Man blong Jared oli travel long waelples. Lod i bin toktok long olgeta long wan klaod mo i talem long olgeta wanem rod blong folem.

Ita 2:5

Lod i talem se ol pipol we oli laef long promes graon bae oli mas wok blong God, o sapos no, bae Hem i prapa spolem gud olgeta.

Ita 2:7-8

Taem Ol Man blong Jared oli kasem so, oli stanemap ol tenet blong olgeta. Oli stap kolosap long solwota blong fo yia.

Ita 2:13