Japta 8
Taem blong Krosem Solwota
Lod i talem long Lihae blong karem famli blong hem i go insaed long sip we oli bin bildim. Oli mekem sip ia i fulap wetem ol frut, mit, mo hani mo ol sid blong planem long promes graon.
Ol strong win i blo, i pusum sip ia i go stret long promes graon.
Leman, Lemyul, mo sam long ol narafala man oli stat blong mekem ol fasin nogud. Taem Nifae i talem long olgeta blong stopem ol rabis fasin ia, oli kros mo oli fasem hem wetem ol rop.
From we oli mekem tumas rabis fasin, Liahona i stop blong wok. Oli no save wanem wei blong stiarem sip i go long hem. Wan weta we i nogud tumas i mekem sip ia i muv i gobak biaen blong tri dei.
Lihae i talem long Leman mo Lemyul blong karemaot rop long Nifae, be oli no wantem lisin. Lihae mo Saraea, tufala i harem nogud gogo i mekem se tufala i sik.
Waef blong Nifae mo ol pikinini oli krae mo talem long Leman mo Lemyul blong karemaot rop long Nifae, be tufala i no wantem.
Long nambafo dei, strong win ia i kam strong moa. Sip ia i stat blong draon.
Leman mo Lemyul, tufala i save se God ia i sendem bigfala win mo rabis weta. Tufala i fraet se bae oli draon.
Long en, Leman mo Lemyul, tufala i sakem sin mo tufala i karemaot rop long Nifae. I nomata se ol han mo leg blong hem i solap mo oli so tumas from mak blong ol rop ia, Nifae i no bin komplen.
Mo Nifae i pikimap Liahona, mo i bin wok bakegen. Nifae i prea mo win ia i bin stop. Solwota i stap kwaet.
Nifae i stiarem sip, mo i bin sel bakegen i go from promes graon.